Mansiansian Akaparaan!

“Mansiansian akaparaan, lapud diad oras ya agyo isisipen nayarin say Anak na too so onsabi.’’​—LUCAS 12:40.

1. Anto so imbaga nen Kristo nipaakar ed pankaukolan na pansiansian manbantay?

PINASESEG nen Jesu-Kristo iray patumbok to a manbantay. Alimbawa, kuanto: “Sikayo, sirin, so manbantay; imbagak lan akauna ed sikayo so amin a bengatla. . . . Tan insan nanengneng da so Anak na toon onsasabi ed lurem a tekep na baleg a pakayari tan gloria. . . . Nipaakar ed satan ya agew odino oras anggapo so mikabat, nisay saray angheles ed tawen nisay Anak, noagta say Ama. Mansiansia kayon manimano, mansiansian aliing, ta agyo kabat no kapigan so aturon panaon. Singa sakey a toon manbiahe ed arawi a tinaynanan to so abung to tan inter to so pakauley ed saray ariripen to, diad balang sakey ed kimey to, tan binilin to so bantay-pinto a mansiansian manbantay. Kanian sirin mansiansian manbantay, ta agyo kabat no kapigan so isabi na katawan na abung, no kasin diad ngarem odino diad pegley-labi odino diad pankukaok odino diad masaksakbay ed kabuasan; ta pian sano sikato so onsabin bigla, agto kayo naromogan a nanaugip. Ingen no anto so ibagak ed sikayo ibagak ed amin, Mansiansian manbantay.’’​—Marcos 13:23-37.

2. Akin a say modelon pikakasi so manutukoy ed inkamabantay, balet panoy impamakapuy na saray iglesia na Kakristianoan diad pantalaran ed Panarian?

² Saray akaunan artikulo so angiter na daakan ya ebidensya a manlapud neutral a sengegan a saray iglesia na Kakristianoan so ‘agnansiansian nanbantay.’ Unong ed The Catholic Encyclopedia, pinakapuy da so panagtalaran ed Panarian diad pangibabagan “say panarian na Dios et kabaliksan to . . . so panuley na Dios ed kapusoan tayo,’’ a ditan et inekal ton amin so kabaliksan na modelon pikakasi, odino Pikakasi na Katawan. Ingen inkuan na The Encyclopædia Britannica: “Saray kerekerew ed pikakasi na Katawan so mangipapasen ed magonigon a tuloy a sirkumstansya a say ngaran na Dios tan linawa to so napauges, a say Panarian to so agni sinmabi.’’ On, say modelon pikakasi so mangipapasen ed inkamabantay. Espesipiko, diad antoran bengatla so pansiansiaan na saray Kristiano a manbantay?

“Manbantay’’​—Ed Anto?

3. Akin ya agnapukayan na saray Kristiano so panaon?

³ Say maapit a panangusisa ed saray propesiya na Biblia nipaakar ed “Unor Iran Bengatla’’ so mangiparungtal ed saray dugarugan bengatla a “pansiansiaan [na saray Kristiano] a manbantay.’’ Ununa, agda nepeg ya ibalang so kablian na panaon ta sinalita nen Jesu-Kristo so sakey ya “aturon panaon’’ a kabat lambengat nen Ama to. (Marcos 13:32, 33) Niarum, imbaga nen Jesus ed saray babangatan to a say Jerusalem so “igatin-gatin na saray nasyones, ya anggad nasumpal so aturon panaon na nasyones [Gentiles].’’ (Lucas 21:24) Mapatnag, inter nen Jesus ed saray patumbok to iyan impormasyon ta pian tulongan toran makapangibiig ed panaon na anggaan, ta sikato so sakey a kabiangan na ebat ed tepet: “Managbangat, kapigan so peteg a kagawa na sarayan bengatla, tan anto so tanda sano sarayan bengatla so niganan nagawa?”​—Lucas 21:7.

4. Nipaakar ed anton “tanda’’ so pansiansiaan na saray Kristiano a bantayan?

⁴ Niarum ed panimano ra ed elemento na panaon, saray Kristiano so manbantay ed kinerew a “tanda,’’ ya abitla met ed Mateo 24:3 tan Marcos 13:4. Sayan nanduruman-nengneng a tanda​—sasakupen toray sankamundoan a bakal, eraeras, yegyegyeg, salot tan kapasegsegang na saray tuan Kristiano​—so misiglaot ed kasumpalan na saray propesiya na panaon diad pangibiig ed “kapolian’’ ya “agla napaso’’ ya anggad amin na sarayan bengatlan niganan peteg a nagawa ed panaon na anggaan.​—Lucas 21:10-12, 32.

5. Panon so kiwawala nen Kristo ed saray tuan patumbok to ed amin na saray siglo, balet kasin saya labat so labay ton ibaga sanen inter to so tanda na “kiwawala’’ to?

⁵ Antoran importantin nagawa a misiglaotan ed “konklusyon na sistema na bengabengatla” so ipaknol na sayan tanda? Si Jesus so tinepetan na saray babangatan to: “Anto so tanda na kiwawala [Griego, pa·rou·siʹa]?’’ (Mateo 24:3) Anto so kabaliksan na “kiwawala’’ nen Kristo? Mas nen say espiritual a kiwawala to ed saray tuan patumbok to sanen sikaray nandaragup odino angisumpal ed kimey da a manggawa na babangatan. Saray patumbok to so tulongan to ya anggad amin na saray siglos. (Mateo 18:20; 28:18-20) Anggan saray teologo na Kakristianoan so mangako a say salitan “kiwawala’’ so walaan na nikaduman kabaliksan. Inkuan na The New International Dictionary of New Testament Theology: “Say ideya na parousia natan so nagmaliw a nibedber ed paniilalo na iglesia ed ipatnag nen Kristo ed anggaan na panaon.’’ Manlapud sakey a sampot ya anggad sananey, say Kristianon Griegon Kasulatan so mamibilin ed saray Kristianon manbilay a manalagar ed kiwawala nen Kristo.​—Mateo 24:3, 27, 37, 39; Santiago 5:7, 8; 2 Pedro 3:3, 4; 1 Juan 2:28; Apocalipsis 1:7; 22:7.

6. (a) Anto so kabaliksan na kiwawala nen Kristo ed sayan marelmeng a sistema na bengabengatla? (b) Panon so pangapekta na kiwawala nen Kristo ed saratan ya alanaan a Kristiano ya inatey a matoor tan saraman so siansia nin mabilay ed dalin?

⁶ Say kiwawala nen Kristo so mankabaliksan na mas nen “say konklusyon na sistema na bengabengatla.’’ (Mateo 24:3; Marcos 13:4) Kabaliksan to a say peles a marelmeng a sistema na bengabengatla so linmoob la ed “panaon na anggaan,’’ odino “kaunoran iran agew.’’ (Daniel 12:4, 9; 2 Timoteo 3:1-5) Kabaliksan to a si Kristo et inawat to ed Ama to so ganggan a pangagamil ed pananguley na Panarian ed dalin ‘diad utel na saray kakabusol to.’ (Salmos 110:2; 2:6-9; Apocalipsis 11:15-18) Sakbay ya ukomen to so mundo ed inkalapagan, dalawen nen Jesus so dili ton kongregasyon tan paolien toray alanaan a Kristiano ya inatey a matoor. (1 Corinto 15:21, 23; 1 Tesalonica 2:19; 3:13; 4:13-17; 2 Tesalonica 2:1) Saramay alanaan a Kristiano a siansia nin mabilay ed dalin tan matoor ya onkikiwas bilang aripen nen Kristo diad pansiasiansia ran aliing ed espiritual tan mangipaparungo na espiritual a “tagano ed manepeg a panaon’’ so turoen nen Kristo a “mangasikaso ed amin a kayarian to,’’ odino intereses na Panarian ed dalin. (Mateo 24:45-47; Lucas 12:42-44) Sayan “matoor tan makabat ya aripen’’ so nepeg a mibiang tan mangasikaso ed sankamundoan a kimey na panagpulong ed “sayan maong a balita na Panarian,’’ tan ‘insan onsabi so anggaan.’​—Mateo 24:14.

7. Anggan diad kaleganan na kiwawala nen Kristo, nipaakar ed anto nin arum a tanda so pansiansiaan a bantayan na saray Kristiano, tan akin a sikara so mantultuloy a mangipikasi ed “isabi’’ na Panarian na Dios?

⁷ Saray tuan Kristiano so “mansiansian manbantay’’ ed amin na sarayan bengatlan mamaneknek a sikara so manbibilay ed panaon na kiwawala nen Kristo tan “ed konklusyon na sistema na bengabengatla.’’ Ingen anggan diad kaleganan na “panaon na anggaan,’’ sikara so mansiansian manbantay ed “tanda na Anak na too,’’ say “isasabi” to a mangidapo na panangukom a sumpad marelmeng a sistema na bengabengatla nen Satanas. (Mateo 24:30, 44; Marcos 13:26, 35; Lucas 12:40; 21:27; 2 Tesalonica 1:7-10) Sirin, anggaman sikato so ‘presente’ tan say Panarian to so niletneg la, namparan sikato tan say Panarian to so siansia nin “onsabi’’ tan “mekmeken tan panganggaen to’’ so nasyones tan panpanarian na mundo nen Satanas. (Daniel 2:44) Saya so mangisalaysay no akin, kayari na impangiter to’d saray elemento na “tanda’’ na kiwawala to, inyarum nen Jesus: “Sano sarayan bengatla so nanenengneng yon nagagawa, amta yo a say Panarian na Dios so asingger la.’’ (Lucas 21:31) On, anggan diad kaleganan na kiwawala nen Kristo, siansian ipikasi na saray Kristiano so isabi na Panarian na Dios, tan siansian nakaukolan da so “mansiansian manimano’’ tan “mansiansian aliing’’ ed aturon panaon na “anggaan’’ tan say “kililiktar’’ da.​—Marcos 13:7, 29, 32-37; Lucas 21:9, 28.

Siopa So Apaneknekan a ‘Manbabantay’?

8. Ibinsabinsa iray bengatlan nepeg a pansiansiaan a pambantayan na saray Kristiano.

⁸ Anengneng tayo a saray Kristiano so manbibilay a mantalaran ed anggaan na “aturon panaon na nasyones.’’ Sikara so manbantay ed ‘tanda na kiwawala nen Kristo tan ed konklusyon na sistema na bengabengatla.’ Sikara so mantalaran ed kapaoli na saray alanaan a Kristiano ya inatey a matoor tan malinew a nabidbir a kaiba na “matoor tan makabat ya aripen’’ a klase ya aturon mangasikaso ed mangaraldalin ya intereses na Panarian nen Kristo. Diad kaunoran, sayan “aripen’’ so mantultuloy a mangitarya na espiritual a tagano, legan ya ipapangulo to so panangipulong ed “sayan maong a balita na Panarian . . . ed amin a panaayaman a dalin’’ sakbay “na anggaan.’’ “Say tanda na Anak na too’’ so ompatnag diad “isabi’’ to a maneral ed marelmeng a sistema na bengabengatla nen Satanas.

9. Siopa so apaneknekan a manbabantay ed anggaan na “aturon panaon na nasyones,’’ tan panon so impanulong na Zion’s Watch Tower ed saray Kristiano a mansiansian alisto ed espiritual?

⁹ Siopa so apaneknekan a “manbabantay’’ ed amin na sarayan bengatla? Nen 1876, si Charles T. Russell na Pittsburgh, Pennsylvania, so atentibon manbabantay ed anggaan na “aturon panaon na saray nasyones,’’ odino “panaon na Gentiles.’’ (King James Version) Diad saman a taon impalapag to so sakey ya artikulon apauloan na “Gentile Times: When Do They End?’’ Ditan imbaga to a “say pitoran panaon so mangangga ed A.D. 1914.’’ Manlapud 1880 a manpatuloy, saman a parehon impormasyon so nipalapag ed saray egpang na Zion’s Watch Tower. Say Marso 1880 a paway so angikuan: “ ‘Say Panaon na Gentiles’ so ninmatnat ed 1914, tan say mangatatawen a Panarian so agsigpot a manuley ya anggad satan.’’ Tua, saray estudyante na Biblia ya angisulat ed saraman ya artikulo so, ed saman a panaon, agnanggayaga ed dugan Biblical tan maawaran a pakatalos ed no anto so peteg a kabaliksan na anggaan na saraman ya “aturon panaon na nasyones,’’ a singa pakatalos tayo natan ed sarayan bengabengatla.a Balet say importantin punto et say sikara so “nambantay’’ tan atulongan a mamasiansia ed saray kapara ran Kristiano ya aliing ed espiritual.

10. Panon so inkapalinew na peteg a kabaliksan na “kiwawala’’ nen Kristo?

¹⁰ Saman a parehon grupo na saray estudyante na Biblia a kaiba nen Charles Russell tan say magasin a Zion’s Watch Tower so anulong met ed saray masimoon a Kristianon mantalos a say “kiwawala’’ nen Kristo so nepeg a natalosan ya agnanengneng, tan sikato so ag-ompawil ed dalin a manuley bilang silalaman ya ari. Nantultuloy ya intawag da so imano ed saray “sankaabungan’’ na Katawan diad saray nagawgawa ed mundo a misiglaotan ed “tanda’’ na kiwawala nen Kristo tan “say panaon na anggaan.’’

11. (a) Anto so agnagnap ya atalosan ed saman a panaon no nipaakar ed mangaraldalin iran panarian tan no nipaakar ed “kaala’’ na saray alanaan a Kristiano? (b) Anton magmaong a pakatalos so walad sikatayo natan ed Daniel 2:44 tan 1 Tesalonica 4:15-17?

¹¹ Inako, inisip a say inkiletneg na Panarian ed katawenan so mankabaliksan na tampol a kaderal na mangaraldalin iran panarian tan saray Kristiano so “naala’’ a mikasakey ed saray inatey lan alanaan a Kristianon napaoli ed panaon na kiwawala nen Kristo. (2 Tesalonica 2:1) Balet siopa so makatetel diad agda sigpot a pakatalos ed saman a panaon a say baleg a panagtipon a kimey so nakaukolan a nagawa ed baetan na gapowan tan say anggaan na kasumpalan na Daniel 2:44, odino say “kaala’’ ya abitla ed 1 Tesalonica 4:15-17 so manutukoy ed tampolan a kapaoli na alanaan ya ompatey kayari inggapo na ununan kioli?​—1 Corinto 15:36, 42-44; Roma 6:3.

12. (a) Anto so ilaloan nen Kristo a naromog a gagawaen na matoor ya “aripen’’ to sano sikato so onsabi a mangusisa ed sankaabungan to, tan siopa so aromog ton manggagawa na ontan? (b) Anto so intultuloy a gagawaen na matoor ya “aripen’’ a klase nanlapulad saman?

¹² Sarayan bengatla so natalosan tayo natan, salamat ed ondadaak a liwawan nisindag ed Salita na Dios diad panamegley na “matoor tan makabat ya aripen’’ a klase. (Uliran 4:18) Nipaakar ed satan ya “aripen,’’ inkuan nen Jesus: “Siopa a peteg so matoor tan makabat ya aripen a tinuro na katawan to a mangasikaso ed sankaabungan to, ya iter to’d sikara so tagano ed manepeg a panaon? Maliket itan ya aripen no sikato so nasabian na katawan to a manggagawa na ontan. Tua kuan ko’d sikayo, sikato so turoen To a mangasikaso ed amin a kayarian to.’’ (Mateo 24:45-47) Nen say nitronon Katawan a Jesus so angusisa ed sankaabungan to nen 1919, aromog to so grupo na saray Kristiano a nikasakey ed magasin a Watchtower a sitotoor a manbabanikel a “mansiasiansian manbabantay’’ diad tulong na espiritual a “tagano ed manepeg a panaon.’’ Anggad sayan mismon agew, satan ya “aripen’’ a klase so sitotoor a nantultuloy a mangitatarya na espiritual a tagano pian say “sankaabungan’’ na Katawan tan saray kakaiba ra so natulongan a “mansiansian manimano, mansiansian aliing.’’​—Marcos 13:33.

Inkaalisto odino Inkangiras?

13. Antoran tepet so nepeg ya itepet na saramay mamabalaw ed saray Tasi nen Jehova ed inkasikaran dili?

¹³ Mainomay ed saray niletneg ya iglesia na Kakristianoan tan arum a totoo so pamalaw ed saray Tasi nen Jehova lapud saray palapagan da, no maminsan, so angibagan saray ontan a bengatla so nayarin nagawa ed ontan iran petsa. Balet agta say ontan a kiwas so mitukoyan ed bilin nen Jesus a “mansiansian manbantay’’? (Marcos 13:37) Diad biek a dapag, kasin saray iglesia na Kakristianoan so angipaseseg ed Kristianon inkamabantay diad pangibabangat a say Panarian et “say panuuley na Dios ed kapusoan tayo’’? Agta sikara, imbes, so angipaseseg ed espiritual ya inkangiras diad pangipapasen ed panagtalaran na “anggaan’’ a sikato so “andi-kabaliksan’’ odino “andi-kanan mito’’? Kasin saray apostatan mangibabaga a “saray kaunoran ya agew’’ so ginmapo ed Pentecostes tan sakupen to so interon Kristianon panaon ya angiyalibansa ed Kristianon inkaliing? Agta sikara, imbes, so angisagyat na espiritual ya inkaugip?

14. Antoran ehemplo na matoor ya ariripen nen Jehova ed apalabas a subran maseseg a makanengneng ed kasumpalan na saray gagala na Dios?

¹⁴ Tua, arum iran tatalaranan a pinmatnag a sinuportaan na kronolohya na Biblia so agsinmabi ed inilaloan a panaon. Ingen agta mas lalon lablabayen so pakagawa na bengatla ran lingo lapud subran inkamaseseg ed pakanengneng a saray gagala na Dios so nasumpal nen say naugip ed espiritual diad kasumpalan na propesiya na Biblia? Agta si Moises so akapanggawa na 40-taon a lingon impangalkula diad panalin onkiwas a makauna diad pangekal ed irap na Israel? (Genesis 15:13; Gawa 7:6, 17, 23, 25, 30, 34) Agta saray apostoles nen Kristo so subran maseseg a makanengneng ed kiletneg na Panarian, ya agla salitaen so sigpot a lingon-impakatalos da ed no anto a peteg so Panarian? (Gawa 1:6; ipareng so Lucas 19:11; 24:21.) Agta saray alanaan a Kristiano ed Tesalonica so agmakaano a makanengneng “ed kiwawala na Katawan a Jesu-Kristo’’ tan “say agew nen Jehova’’?​—2 Tesalonica 2:1, 2.

15. Antoran ehemplo so mangipanengneng ya aliwan agmakasulatan so pangusar ed kronolohya diad panalin pandetermina ed no kapigan so kasumpal na saray gagala na Dios, tan anto so kelyaw na dakel iran matoor ya ariripen nen Jehova, ed apalabas tan diad kaplesan?

¹⁵ Anggapo so manunan agmakasulatan diad pangusar na kronolohya ed saray sagpot a mangamta “ed aturon panaon’’ diad kasumpalan na saray gagala na Dios. (Habacuc 2:3) Kinalkulo nen Daniel no kapigan so panampot na pankibalatar na Jerusalem. (Daniel 9:1, 2) Saray inmunan-siglon matoor a Judion nakdaan so nantalaran ed isabi na Mesias lapud kinalkulo ra so anggaan na sakey a panaon, a nibase ed propesiya. (Daniel 9:25; Lucas 3:15) Diad unor a koma-19 siglos tan asasakbay a koma-20 siglo saray Kristiano so akayarin nambilay diad impantalaran ed uley na Panarian na Dios sakbay a tuloy na 1914 lapud kinalkulo ra no kapigan so pangangga na “aturon panaon na nasyones.’’ (Lucas 21:24; Daniel 4:16, 17) Sirin, natalosan no akin a saray sagpot diad impangusar ed arum iran Biblical a pamatnagan ed panaon diad panasalin pananap no kapigan so peteg a pakasumpal na saray abayag ya inalagar ya ilalo. Saray matoor ya ariripen nen Jehova ed inmunan panaon so angibelyaw: “Panon kabayag, O Jehova?’’​—Isaias 6:11; Salmos 74:10; 94:3.

Akin a “Mansiansian Akaparaan’’

16. (a) Kasin natalosan so Marcos 13:32 a mankabaliksan ya agtayo nepeg so mangipanengneng na interes ed no kapigan so isabi na anggaan? (b) Anton “tanda’’ so mapatnag, balet anton arum a “tanda’’ so aalagden tayo?

¹⁶ Lapud malinlinew ya imbaga nen Jesus ya anggapo so toon makapikabat ed “satan ya agew’’ odino “say oras’’ sano gangganen na Ama so Anak to ya ‘onsabi’ a sumpad marelmeng a sistema na bengabengatla nen Satanas, nayarin itepet na arum: ‘Akin ya ontan lan inkamaganat so pambilay diad pantalaran ed satan ya anggaan?’ Maganat lapud mipadparan kabaliksan, inyarum nen Jesus: “Mansiansian manimano, mansiansian aliing . . . mansiansian manbantay.’’ (Marcos 13:32-35) Say “tanda“ na parousia nen Jesus so mapatnag la nanlapulad 1914. Aalagden tayo natan so “tanda na Anak na too,’’ sano sikato so ‘onsabi’ a bilang Manamatey nen Jehova.

17, 18. (a) Akin a ginanggan nen Jesus iray inmunan-siglon Kristiano ya ontaynan ed Jerusalem bektaman a nanengneng da so tanda na onsasabin kadederal to? (b) Akin a mapeligro so pangibaliwala ed inkamaganat na panaon tayo?

¹⁷ Sanen saray inmunan-siglon Kristiano ed Judea so inikdan nen Jesus na sakey a tandan ditan et nakabatan da so isabi na panaon na itaynan da ed Jerusalem, impurek to so pankaukolan na ikiwas a tamtampol. (Lucas 21:20-23) Akin ya ontan lan inkamaganat, lapud ngalngalin apat taon lay linmabas nanlapud impatnag na tanda nen 66 K.P. tan say aktual a kaderal na Jerusalem nen 70 K.P.? Lapud kabat nen Jesus a no sikara so nanabala, ya ipaleen da ni so ibatik da tan diad kaunoran et sikara so naabotan na saray armada na Roma.

¹⁸ Mipadpara natan, peligron tuloy ed saray Kristiano so pangibaliwa ed kaganatan na panaon tayo tan iyugali ra so “inkatayatay’’ ya awawey a mangipatnag na panduaruwa ed inkaasingger na anggaan.

19. Anton pasakbay so inter nen Pedro tan si Jesus?

¹⁹ Say parousia, odino kiwawala, nen Kristo so mankukurang la natan ed 70 taon, tan say “isasabi’’ na “agew nen Jehova’’ a sumpad mundo nen Satanas so maples a manasingger. Imbaga nen apostol Pedro a sayan agew “so onsabin singa matakew,’’ tan inyarum to a nepeg tayo so ‘manalagar tan pansiansiaen a maapit ed kanonotan so kiwawala na agew nen Jehova.’ (2 Pedro 3:10-12) Sikatayo met so pinasakbayan nen Jesus: “Imanoen yo so inkasikayo a saray kapusoan yo so agbalot komon nabelatan ed alabas a panangan tan alabas a panag-inum tan kapagaan ed bilay, tan tamtampol satan ya agew so biglan onsabi ed sikayon singa sakey a patit. . . Mansiansian aliing.’’​—Lucas 21:34-36.

20. Diad anto so nepeg tayon pisalsalamatan, tan panon a say manepeg a Kristianon panagtalaran so manalimbeng ed sikatayo?

²⁰ Agaylan maliket tan misalsalamat iray Tasi nen Jehova a sikara so impansiansian niliing ed espiritual na matoor tan lawas manbabantay ya “aripen’’ a klase! Say manepeg a Kristianon pantalaran so manalimbeng ed sikatayo legan na sarayan maatap a “kaunoran ya agew’’ tan dagdagen da itayon mibiang a maseseg ed panangipulong ed “sayan maong a balita na Panarian.’’ Diad satan tutulongan tayoray arum a mansiansian manbantay tan makaloob ed balon sistema na bengabengatla a ditan so “panayaman na inkatunong.’’​—2 Timoteo 3:1-5; Mateo 24:14; 2 Pedro 3:13.

[Paimano ed Leksab]

Kasin Nanonotan Yo?

◻ Akin ya agnepeg ya ibaliwala na saray Kristiano so panaon diad kronolohya na Biblia?

◻ Anton nikaduman kabaliksan so lalanoren na salitan “kiwawala’’?

◻ Akin a siansia nin matukoy so pangipikasi ed isabi na Panarian na Dios?

◻ Panon so pangebat yo ed saraman so mamabalaw ed saray Tasi nen Jehova ed pamaakaran na kronolohya?

◻ Akin a maatap so pangibaliwala ed inkamaganat na panaon tayo?

[Kahon ed pahina 14]

Bengabengatlan Pansiansiaan a Pambantayan na Kristiano

Say anggaan na “aturon panaon na nasyones.’’​—Lucas 21:24.

“Say tanda’’ na kiwawala nen Kristo “tan ed konklusyon na sistema na bengabengatla.’’​—Mateo 24:3-25:46.

Say malinew a pakabidbiran ed “matoor tan makabat ya aripen’’ a klase.​—Mateo 24:45-47.

Say “tanda na Anak na too,’’ sano sikato so ‘onsabi’ a mangidapo ed saray panangukom nen Jehova.​—Mateo 24:30.

[Litrato ed pahina 13]

Si C. T. Russell tan saray kakaiba to so nansiansian nanbantay