Anto so Agawa ed Kristianon Inkamabantay?
“NO anto so ibagak ed sikayo ibagak ed amin, Manbantay.’’ Saraman a salita nen Jesu-Kristo so onaaniweng ed kalayagan na saray masimoon a Kristianos diad inlabas na saray siglos. Balet kaunongan karakel a membro na saray Iglesian Romano Katoliko, Bandad Bukig ya Ortudoks odino manunan Protestante ran Iglesia so siansian walaan na satan a mabiskeg a pasakbay ya onaaniweng ed saray kalayagan da?—Marcos 13:37, King James Version.
Akin a saray Kristianos so mansiansian manbantay? Imbaga nen Jesus: “Mansiansian manbantay, ta agyo kabat no kapigan so isabi na Katawan na abung, . . . ta pian sano sikato so onsabin bigla, agto kayo naromog a nanaugip.’’ (Marcos 13:35, 36) Kanian saray babangatan nen Jesus so mansiansian manbantay ed isabi na Katawan da, salanti, isabi nen Kristo.
Anto so gagala na isabi nen Jesus? Say bilin to ed inkamabantay so niiter a kabiangan na ebat to ed sayan diretsan tepet na saray babangatan to ed sikato: “Anto so tanda na kiwawalam tan say konklusyon na sistema na bengabengatla [“anggaan na mundo na mundo,’’KJ]?’’ (Mateo 24:3) Unong ed miulibay ya awaran, kayari impangiter to ed nanduruman nengneng a tanda, inkuan nen Kristo: “Insan nanengneng da so Anak na too ya onsasabi ed lurem a tekep na pakayari tan baleg a gloria. Balet no sarayan bengatlan so onggapo lan nagawa, alagey kayon maptek tan itangwa yoray kauloan yo lapud say kililiktar yo so manasingger la. . . . Sano sarayan bengatla so nanenengneng yo lan nagagawa, amta yo a say panarian na Dios so asingger la.’’—Lucas 21:27-31.
Maabig Iran Rason ed Inkamabantay
Sirin, inikdan nen Jesu-Kristo iray babangatan to na maabig a rason diad pantultuloy ya aliing ed espiritual a bantayan da so kasumpalan na “tanda.’’Kabaliksan na saya a say Katawan da so agnanengneng a ‘presente,’ ta anggapo so tanda a nakaukolan no say kiwawala to so diad laman, nanengneng. Balet say espiritual a kiwawala to so mankabaliksan met a sayan marelmeng a “mundo,” odino “sistema na bengabengatla,’’ so linmoob la ed “konklusyon,’’ odino panaon na anggaan. Tan para ed saray Kristianos, kabaliksan to a say ‘kililiktar [da] so manasingger la.’ On, kabaliksan to a “say panarian na Dios so asingger la.’’
Agta saya so mismon kabaliksan na ilalo na Kristiano? Agta say mismon bengatla so akapangibangatan ed amin na saray Kristianos ya ipikasi, salanti: “Ama min wala ka ed tawen, komon ta mansiansian masanto so ngaran mo, onsabi so panarian mo, nagawa komon so linawam, ed dalin a singa ed tawen”? (Mateo 6:9, 10, The Jerusalem Bible) Pian magmaliw a lohikal, agta saray Katoliko a manguulit-ulit ed Paternoster da odino saray membro na arum ya iglesia a mangibagan say pikakasi na Katawan so manbantay a makanengneng ed kasumpalan na saray pikakasi ra? Odino kasi ta saray bangabangat na iglesia ra so angupot la ed kaslakan a kabaliksan na satan a pikakasi, ta pian samsamet la so natitilak ed sikara a bantayan?
No Akin a Dakel So Agla Manbabantay
Saray Kristianos so manbantay ed tanda na kiwawala nen Kristo (Griego, pa·rou·siʹa, nipatalos ya “isasabi” ed dakel iran bersyon na Biblia). Akin? Lapud kabaliksan na saya a say Panarian na Dios, say dilin kililiktar da tan say anggaan “na mundo,” odino peles a marelmeng a “sistema na bengabengatla,” so asingger la. Saray nanduruman iglesia na Kakristianoan so anulong komon ed saray membro a mansiansian aliing ed espiritual ta pian sikara komon so agnaromog a nanaugip sano onsabi so Katawan. Kasin sinumpal na saray iglesias so kimey da ed sayan pamaakaran?
Inkuan na sakey a reperensyan gawa na eskolar: “Legan a linmabas so panaon ya anggapo so nagawan parousia so amaarawin lalo ed arapen no nipaakar ed kipapasen na iglesia, tan diad kaunoran et interamente lan nataynanan bilang sakey ya artikulo na pananisia.”—The New International Dictionary of New Testament Theology.
Saya, diad tua, so agawa la. Kinaindanan na saray iglesia na Kakristianoan so Kristianon inkamabantay ya imbilin nen Jesus ed saray babangatan to ya agdan balot paulianan. Sikara la so aliwan sililiing ed kiwawala nen Kristo tan isasabi na Panarian na Dios. Imbaliwala da la so panaalagar ed “konklusyon na sistema na bengabengatla,” odino “say anggaan na mundo.”
Say sakey-tomon encyclopedia a QUID 1984 a Pranses so mangiter na abanten uker na relihyoson pananisia nipaakar ed anggaan na mundo. Diad leksab na “Characteristics of the Catholic Religion,” ibabaga to: “Say Iglesia so ompatnag ed kaplesan a manguuker ed anggaan na mundo a bilang say indibidual a subok ya arapen na balang too sano sikato so ompatey.” Pinaawang to so problema, imbaga na The New Encyclopædia Britannica: “Say lalon niletneg iran Kristianon iglesia so angipuera ed eskatologo [say bangat ed “Kaunoran Iran Bengatla”] a singa andi-kabaliksan odino andi-kanan mito.”
Sirin, anto so makasurprisa ingen agnapaliisan ya ebat ed tepet ya “Anto so agawa ed Kristianon inkamabantay?” Sikato so pinatey na “lalon niletneg iran Kristianon iglesia,” salanti, say Romano Katoliko, Bandad Bukig ya Ortudoks tan manunan Protestante ran iglesia. Anggaman ontan, say onggendan iran artikulo so mangipanengneng a saray tuan ariripen na Dios so naynay a nambilay diad panaalagar ed kiwawala nen Kristo, tan natan et wala so totoon amaneknek na Kristianon inkamabantay da diad inlabas na saray taon tan nalmoan da so makapakelaw ya ilalon nayarian nakayarian yo. Ipangasin ituloy a basaen, tan insan kerewen so sakey a Tasi nen Jehova ya ontulong ed sikayon “mansiansian manbantay“ diad kasumpalan na satan ya ilalo ed Biblia.