No Akin a Saray Tasi nen Jehova so Mansiasiansian Akabantay

“Mansiansia kayon akabantay . . . ta ag yo amta no anto’n agew so isabi na Katawan yo.”​—MATEO 24:42, NW.

1. Siopa so kiyaplikaan na simbawan “mansiansia kayon akabantay”?

DIAD kada aripen na Dios​—ugaw man odino maedad la, balanglan balo nin dedikado odino abayag la ed serbisyo—​onaplika so simbawa na Biblia: “Mansiansia kayon akabantay”! (Mateo 24:42, NW) Akin ya importanti iya?

2, 3. (a) Anton tanda so malinew a deniskribe nen Jesus, tan anto so impanengneng na say kasumpalan na propesiya? (b) Antoran sirkumstansya ya atukoy ed Mateo 24:42 so manusuri ed inkapeteg na pananisia tayo, tan panon?

² Diad pansamposampot na ministeryo to ed dalin, impasakbay nen Jesus so tanda na agnanengneng a kiwawala to diad pakayari na Panarian. (Mateo, Kapitulo 24 tan 25) Malinew a deniskribe to itan a panaon na maarin kiwawala to​—tan saray ebenton kasumpalan na propesiya so mangipapanengneng a sikato so nitrono bilang Ari ed katawenan nen 1914. Sikato met so anaglawi na sakey a nagawan pansuri ed inkapuro na pananisia tayo. Saya so mitukoyan ed panaon sano sikato so onkiwas bilang Manangidapo a maneral ed kaplesan a marelmeng a sistema legan na baleg a kairapan ya inkuan nen Jesus: “Balet satan ya agew tan oras angapo’y mikabat, angan saray angeles ed tawen, angan say Anak, noag say Ama lambengat.” Satan so walad kanonotan to no akin ya imbaga ton: “Mansiansia kayon akabantay sirin, ta ag yo amta no anto’n agew so isabi na Katawan yo.”​—Mateo 24:36, 42, NW.

³ Lapud agtayo amta so agew tan oras sano onggapo so baleg a kairapan, kaukolan a no sikatayo so mangibabaga a Kristiano tayo, sikatayo so manbilay bilang tuan Kristiano ed amin ya agew. Kasin say paraan na panguusar mo na bilay mo so mamawala na panangabobon na Katawan sano onsabi so baleg a kairapan? Odino no onsabin ununa so ipapatey, sika ta so nanonotan to a bilang sakey a matoor a nanlingkor ed si Jehova anggad sampot na kaplesan a bilay mo?​—Mateo 24:13; Apocalipsis 2:10.

Saray Akaunan Babangatan so Nambanikel a Magmaliw ya Akabantay

4. Anto so naaralan tayo manlapud alimbawa na inkamabantay nen Jesus diad espiritual a paraan?

⁴ Si Jesu-Kristo a mismo so angipanengeng na sankaabigan ya alimbawa na espiritual ya inkamabantay. Sikato so mabetbet a nampikasi tan sisimoon ed Ama to. (Lucas 6:12; 22:42-44) Sanen nipaarap ed saray subok, sikato so nanmatalek a tuloy ed panangiwanwan a karga na Kasulatan. (Mateo 4:3-10; 26:52-54) Agto inabuloyan so inkasikato a naabala ed kimey ya impabtang ed sikato nen Jehova. (Lucas 4:40-44; Juan 6:15) Kasin saraman so moriaen da so inkasikara bilang patumbok nen Jesus so nepeg met a magmaliw ya akabantay a singa sikato?

5. (a) Akin a saray apostol nen Jesus so walaan na problema ed panamasiansia na inkasimbang ed espiritual? (b) Anton tulong so inter nen Jesus ed saray apostol to kayari na inkioli to?

⁵ No maminsan, anggan saray apostol nen Jesus so nanduaruwa. Bilang nansumpalan na alabas ya inkasagyat tan lingo iran ideya, sikara so nipaarap ed inkasaew. (Lucas 19:11; Gawa 1:6) Sakbay dan naaralan so sigpot ya isaral ed si Jehova, saray biglaan a subok so nanwetwet ed sikara. Kanian, sanen si Jesus so inerel, saray apostol to so binmatik. Diad saginonor na saman a labi, si Pedro, lapud takot, so aminpigan angiburi ni ingen a kabat to si Kristo. Agni tinmanek ed kapusoan na saray apostol so simbawa nen Jesus: “Manpuyat tan manpikasi.” (Mateo 26:41, 55, 56, 69-75) Kayari na inkioli to inusar nen Jesus so Kasulatan pian pabiskegen so pananisia ra. (Lucas 24:44-48) Tan sanen pinmatnag ya ompan gawaen na pigara ya onsaginonor so ministeryon impabtang ed sikara, pinabiskeg nen Jesus so motibasyon da a mangiyapasakey na imano ra ed lalon importantin kimey.​—Juan 21:15-17.

6. Sumpa ed antoran duaran patit so impasakbay lan inmuna nen Jesus ed saray babangatan to?

⁶ Asasakbay ni, pinasakbayan la nen Jesus iray babangatan to a sikaray kaukolan ya agkabiangan na mundo. (Juan 15:19) Sinimbawa to met ira ya agpakatawan ed balang sinansakey noagta manlingkor a mankakasakey bilang sanaagi. (Mateo 20:25-27; 23:8-12) Kasin tinumbok da so simbawa to? Kasin inyuna ra so kimey ya initer ed sikara?

7, 8. (a) Panon a say rekord a ginawa na inmunan-siglon Kristianos so mangipanengneng ya impapuso ra so pasakbay nen Jesus? (b) Akin a say mantultuloy ya espiritual ya inkamabantay so importanti?

⁷ Legan a mabilay niray apostol, sinalimbengan da so kongregasyon. Paneknekan na awaran a saray akaunan Kristiano so ag-akibabali ed mapulitika iran pakurang na Romanon Imperyo tan anggapo ed sikara so nitandoron kleron klase. Diad biek a dapag, sikaray maseet a manangiyabawag na Panarian na Dios. Diad anggaan na inmunan siglo, sikaray akapantasi ed interon Romanon Imperyo, diad impanggawa na saray babangatan ed Asya, Europa, tan Amianen ya Aprika.​—Colosas 1:23.

⁸ Anggaman ontan, saraman ya agawaan ed panagpulong so agmankabaliksan ya agda la kaukolan so pansiansian akabantay ed espiritual. Say nipasakbay ya isasabi nen Jesus so mabayag ni. Tan legan a say kongregasyon so onloloob ed komaduan siglo K.P., linmesa iray situasyon ya anigensigen ed espiritualidad na saray Kristiano. Panon ya ontan?

Saramay Tinmunda ed Pagmaliw ya Akabantay

9, 10. (a) Kayari na impatey na saray apostol, antoran agawgawa so angipanengneng a dakel a mankuan a Kristiano so agnansiansian akabantay? (b) Antoran kasulatan a nisita ed sayan parapo so nayarin akatulong ed mankuan iran Kristiano a mansiansian mabiskeg ed espiritual?

⁹ Arum ya apibilang ed kongregasyon so ginmapon mangibalikas na saray sisiaen da unong ed saray termino na Griegon pilosopya, ta pian say ipupulong da et magmaliw a lalon makapaayat ed totoo na mundo. Kalkalna, saray paganon doktrina, a singa say Trinidad tan say sipor ya ag-ipapatey na kamarerwa, so nagmaliw a kabiangan na amantsaan a pormay Inkakristiano. Saya so angitonton ed panangipulisay ed ilalo ed milenyo. Akin? Saramay angadapta na sisiaen ed ag-ipapatey na kamarerwa so nankuan a saray bendisyon ed uley nen Kristo so nadampot ya amin diad pasen na saray espiritu na sakey a kamarerwa a makaliktar a mabilay ed laman na too. Kanian para’d sikara agla kaukolan so pagmaliw a mabantay ed kiwawala nen Kristo ed pakayari na Panarian.​—Ipareng so Galacia 5:7-9; Colosas 2:8; 1 Tesalonica 5:21.

¹⁰ Sayan situasyon so nidanet diad arum niran agawgawa. Ginapoan na arum a mankuan a Kristianon manangasikaso ya usaren iray kongregasyon da bilang paraan pian napabantog da so inkasikaran dili. Sisisilib dan impasen iray opinyon tan bangat da a kasimbangan na Kasulatan odino mas atagtagey ni ingen nen saraya. Sanen niwala so pankanawnawa, sayan apostatan iglesia so nampausar pian niyalibansa so intereses na mapulitikan estado.​—Gawa 20:30; 2 Pedro 2:1, 3.

Saray Resulta na Apadaak ya Inkamabantay

11, 12. Akin a say Repormasyon na Protestanti so ag-ananda ed ipawil na tuan panagdayew?

¹¹ Kayari na nilasus taon iran panag-abuso na Iglesia Romano Katolika, nansalita so arum a Repormista nen koma-16 siglo. Balet saya so ag-ananda ed ipapawil na tuan panagdayew. Akin ya andi?

¹² Anggaman nanduruman Protestantin grupo so inmekal manlapud pakayari na Roma, awit-awit da iray dakel a manunan bangat tan agagamil na apostasya​—say ideya na klero-lego, ontan met ed pananisia ed Trinidad, say ag-ipapatey na kamarerwa, tan say andi-anggaan a panirap kayari ipapatey. Tan, singa say Iglesia Romano Katolika, sikaray nantultuloy a kabiangan na say mundo, maapit a misisiglaotan ed saray mapulitikan elemento. Kanian impulisay da so antokaman ya ilalo ed isasabi na Kristo bilang Ari.

13. (a) Anto so mangipapanengneng ya arum a lalaki et talagan papablien da so Salita na Dios? (b) Legan na koma-19 a siglo, anton ebento so nagkalautlan naikdan na interes na pigaran mankuan iran Kristiano? Akin ya asagmak na dakel so inkadismaya?

¹³ Ingen, impasakbay nen Jesus a kayari ipatey na apostoles to, saray tuan mananawir na Panarian (ya inyaliling to ed saray trigo) so mantultuloy ya ombulaslas a kaiba iray alig-alig iran Kristiano (odino zisañas) anggad panaon na panagani. (Mateo 13:29, 30) Agtayo nagawaan natan ya ilista tekep na inkamaseguro so amin a minoria na Katawan a trigo. Balet makatantanda a legan na koma-14, koma-15, tan koma-16 iran siglo, walaray totoon angiyan na dilin bilay tan kawayangan da ed kapeligroan pian nipatalos so Biblia ed lenguahe na karaklan a too. Aglambengat inawat na arum so Biblia bilang Salita na Dios noagta impulisay da ni ingen so Trinidad bilang agmakasulatan. Impulisay na arum so sisiaen ya ag-ipapatey na kamarerwa tan panirap ed impiernon-apuy bilang sigpot ya agmitunosan ed Salita na Dios. Ontan met, legan na koma-19 a siglo, bilang resulta na apadaak a panagaral ed Biblia, saray grupo ed Estados Unidos, Alemanya, Britanya, tan Rusya so ginmapon angibalikas na kumbiksion a say panaon na ipawil nen Kristo so asingger la. Balet maslak ed saray iilaloan da so amaarap ed inkasaew. Akin? Diad baleg a kabiangan, saman so lapud masyado so impanmatalek da ed totoo tan aliwan tanto ed Kasulatan.

No Panon ya Apaneknekan a Saraya so Mabantay

14. Deskribien so paraan na panagaral na Biblian ginawa nen C. T. Russell tan saray kaiba to.

¹⁴ Insan, nen 1870, si Charles Taze Russell tan pigara ed kalimog to so amorma na sakey a grupo na panagaral na Biblia ed Allegheny, Pennsylvania. Aliwan sikara so inmunan akatebek ed dakel a katuaan na Biblia a sinayakup da, balet sano manaaral ira, niyugali ra a maalwar a surien so amin a kasulatan nipaakar ed sakey a nipaarap a tepet.a Say gagala da et, aliwan say pananap na prueba iran teksto para’d sakey a sakbay-tinibukel ya ideya, noagta pian naseguro a sikaray manibukel na saray konklusyon a mitunosan ed amin ya imbaga na Biblia nipaakar ed satan a pamaakaran.

15. (a) Anto so amoria na arum nilikud ed si Brother Russell? (b) Anto so mananda a saray Estudyante na Biblia so duma manlapud saraya?

¹⁵ Amoria na arum ya akadkauna ed sikara a si Kristo so ompawil ya agnanengneng bilang sakey ya espiritu. Anengneng na arum a say gagala na ipawil nen Kristo et aliwan say pamool ed dalin tan deralen so amin ya atooan a bilay, noagta, imbes et bendisyonan so amin a pamilya ed dalin. Wala nira ingen so pigara ya akamoria a say taon 1914 so mananda ed anggaan na saray Panaon na Hentil. Balet para’d saray Estudyante na Biblian mililimog ed si Brother Russell, saraya so nagkalalo nen saray punto lambengat pian diskusyonen na teologo. Iletneg da so bilay da ed liber na sarayan katuaan tan inikdan daraya na internasyonal a panangipalapag ed agnaparaan ya eskala ed saman a panaon.

16. Diad taon 1914, akin ya insulat nen Brother Russell: “Wala tayo ed taon na panagsubok”?

¹⁶ Siansia, kaukolan da so mansiansian akabantay. Akin? Bilang alimbawa, anggaman kabat da a say 1914 so tinandaan na propesiya ed Biblia, agda naseseguro no anto so nagawa ed satan a taon. Saya so angipresenta ed sikara na sakey a subok. Diad The Watch Tower na Nobyembre 1, 1914, insulat nen Brother Russell: “Tandaan tayo a wala tayo ed panaon na panagsubok. . . . No wala so antokaman a rason a mangitonton ed sakey ya onekal ed Katawan tan say Katuaan To tan ontundan mansakripisyo nisesengeg ed Gagala na Katawan, no ontan aliwa lambengat a panangaro ed Dios a walad puso so mamakiwas ed sakey pian magmaliw ya interesado ed Katawan, noagta wala ni; angangko say ilalo a say panaon et antiktikey la; say panangitalaga to et diad limitado lambengat a panaon.”

17. Panon a si A. H. Macmillan, tan saray arum ni a singa sikato so amasiansia ed espiritual ya inkasimbang da?

¹⁷ Tinaynan na arum so serbisyo ed si Jehova nen saman. Balet si A. H. Macmillan so andi. Pigaran taon ed saginonor, prangka ton binidbir: “No maminsan saray iilaloan tayo ed sakey a partikular a petsa so alablabas nen say ipapaseguro na Kasulatan.” Anto so akatulong ed sikato pian napansiansia to so espiritual ya inkasimbang? Amoria to, unong ed inkuanto, a “sano saraman ya iilaloan so ag-asumpal, satan so agmanguman ed saray gagala na Dios.” Inyarum to ni: “Naaralan ko a kaukolan tayon aksobien iray lingo tayo tan mantultuloy ya anapen so Salita na Dios para’d nagkalalon kaliwawaan.”b Sipapaabeba, saraman ya akaunan Estudyante na Biblia so angiyabuloy ed Salita na Dios a mangipetek ed panmoria ra.​—2 Timoteo 3:16, 17.

18. Panon a say Kristianon inkamabantay so mansumpal ed progresibo iran gungguna diad pamaakaran na pagmaliw ya agkabiangan na mundo?

¹⁸ Legan na tinmumbok iran taon, say pankaukolan dan pansiansian akabantay so agkinmesay. Siempre, kabat da, a saray Kristiano so kaukolan ya agkabiangan na mundo. (Juan 17:14; Santiago 4:4) Mitunosan ed satan, ag-ira akibabali ed Kakristianoan diad impangindorso ed Liga na Nasyones bilang mapulitikan balikas na Panarian na Dios. Balet aliwan anggad 1939 ya atalosan da so isyu nipaakar ed Kristianon neutralidad.​—Nengnengen so The Watchtower, Nobyembre 1, 1939.

19. Antoran gungguna ed panangasikaso na kongregasyon so nansumpalan lapud impansiansia na organisasyon a manbantay?

¹⁹ Anggad kapigan et andian ira na kleron klase, anggaman pigaran niboton mamatatken et liknaen dan say pambangat ed kongregasyon so mogmon iilaloan ed sikara. Anggaman ontan, tekep na pampilalek a tuloy a mikompormi ed Kasulatan, nirepaso na organisasyon so betang na saray mamatatken unong ed liwawa na Kasulatan, ya inulit-ulit a ginawa itan diad panamegley na saray egpang na The Watchtower. Agawa iray organisasyonal a pananguman a mitunosan ed nipanengneng na Kasulatan.

20-22. Panon a say interamentin organisasyon so progresibon niparaan a manumpal ed nipasakbay a kimey na sankagloboan a panangiyabawag na Panarian?

²⁰ Say interon organisasyon so manggagawa na sankapelesan a panagparaan pian sigpot a nasumpal so kimey ya indatak na Salita na Dios ed agew tayo. (Isaias 61:1, 2) Diad anton kalaknab a say maong a balita so niyaabawag ed agew tayo? Inkuan nen Jesus: “Say evangelio so kaokolan ya nipulong ya unona ed saray amin a naciones.” (Marcos 13:10) Manlapud punto-de-bista na too, satan a kimey so mabetbet a singa imposibli.

²¹ Ingen, tekep na talek ed Kristo bilang Ulo na kongregasyon, say matoor tan makabat a klase so ontutundas. (Mateo 24:45) Sitotoor tan mapekder dan inyarap ed totoo nen Jehova so nepeg a gawaen a kimey. Manlapud 1919 a manpatuloy, nagkalalon panangidanet so nipaarap ed lawak a ministeryo. Para’d dakel, aliwan mainomay so iyakar ed kabkaabungan tan mitongtong ed saray sankaili. (Gawa 20:20) Balet diad panamegley na saray aaralen ya artikulo a singa say “Blessed Are the Fearless” (nen 1919) tan “Be of Good Courage” (nen 1921) so tinmulong ed arum pian makagapo ed kimey, tekep na panagmatalek ed si Jehova.

²² Say kerew, nen 1922, ya “iyabawag, iyabawag, iyabawag, so Ari tan say panarian to” so angitarok na nakakaukolan a sagyat pian sayan kimey so nawalaan na makanepegan ya inkabantog. Manlapud 1927 a manpatuloy, saray mamatatken ya ag-angawat ed Makasulatan a responsabilidad so inekal. Ngalngalin diad saman met lanlamang a panaon, saray managbaroy a manangilaman na Sosyedad, saray pilgrim, so apabtangan a magmaliw a regional service director, a mangiiter na personal ya instruksion ed saray manangipalapag ed lawak a serbisyo. Aliwan amin so makapanpayunir, balet diad saray sampot-simba dakel so mangitatalaga na intero iran agew ed serbisyo, ya onggapon masakbay, ya ontundan magano pian manmerienda, tan kayari et manpatuloy ed serbisyo ya anggad isirunget. Saraman so makabaliksan a panaon na teokratikon iyaaligwas, tan nagugunggunaan tayon tuloy diad panrepaso ed paraan na pangitotonton nen Jehova ed totoo to. Sikatoy mantutultuloy a manggagawa ed satan. Tekep na bendisyon to, say kimey na panangipulong na maong a balita na niletneg a Panarian so nitarok ed matalonan kasumpalan to.

Kasin Sika so Mansiasiansian Manbabantay?

23. No nipaakar ed Kristianon aro tan inkabiig manlapud mundo, panon tayo bilang indibidual a nidemostra a sikatayo so mansiasiansian akabantay?

²³ Onkikiwas ed panangidirehi nen Jehova, say organisasyon to so manaalerto ed sikatayo nipaakar ed saray agamil tan awawey a mangipabidbir ed sikatayo bilang kabiangan na mundo, sirin walad kapeligroan ya onlabas a kaiba to. (1 Juan 2:17) Diad biek a dapag, balang sakey ed sikatayo so kaukolan a magmaliw a mabantay diad ikiwas ed panangidirehi nen Jehova. Si Jehova so mangiiter met ed sikatayo na instruksion nipaakar ed panagbilay tan pankimey a nankakasakey. Say organisasyon to so ontutulong ed sikatayon ombulaslas ed apresasyon no anton talaga so kabaliksan na Kristianon aro. (1 Pedro 4:7, 8) Say pansiasiansia tayon akabantay so mankakaukolan a sisisimoon tayon panbanikelan ya iyaplika iyan simbawa, anggaman ed saray kakapuyan na too.

24, 25. Diad antoran importantin pamaakaran a nepeg tayon mansiansian akabantay, tekep na anton ilalo?

²⁴ Naulit-ulit, a sikatayo so papanonotan na matoor tan makabat ya aripen: “Manmatale’ ka ed Jehova ed simoon a pusom, tan agka onsaral ed tapew na dili a pakatalos mo.” (Uliran 3:5) “Mikasi kayo ya andi tonda.” (1 Tesalonica 5:17) Sikatayo so nasisimbawa ya aralen ya ibase iray desisyon tayo ed Salita na Dios, a gawaen iyan salita a magmaliw a ‘silewan ed sali tayo tan liwawa ya onkana ed basbas tayo.’ (Salmo 119:105) Tekep na aro, sikatayo so napapaseseg a pansiansiaen a manuna ed bilay tayo so panangipulong na maong a balita na Panarian na Dios, say kimey ya impasakbay nen Jesus para’d agew tayo.​—Mateo 24:14.

²⁵ On, say matoor tan makabat ya aripen so maseguron akabantay. Balang sinansakey et kaukolan tayo met so mansiansian akabantay. Bilang resulta ed panggawa na ontan, komon ta sikatayo so naromog a kaiba na saramay akatalindeg a naabobonan ed arap na Anak na too sano sikato so onsabin mangidapo na panangukom.​—Mateo 24:30; Lucas 21:34-36.

[Saray paimano ed leksab]

Panrepaso

◻ Unong a nipanengneng ed Mateo 24:42, akin a kaukolan tayon mansiansian akabantay?

◻ Panon ya impanengneng nen Jesus tan saray inmunan-siglon patumbok a sikaray nansiansian akabantay?

◻ Nanlapulad 1870, antoran iyaaligwas so niwala lapud nansiansian akabantay iray ariripen nen Jehova?

◻ Anto so mamaneknek a sikatayo bilang indibidual so mansiasiansian manbabantay?

[Saray litrato ed pahina 23]

Nansiansian okupado si Jesus ed kimey ya impabtang na Ama to. Sikato met so masimoon a nampikasi

[Litrato ed pahina 24]

Si Charles Taze Russell ed saginonor iran taon to

[Litrato ed pahina 25]

Masulok a 4,700,000 a manangiyabawag na Panarian so aktibo ed amin a dalin