No Akin ya Ag-itayo Mantila

BILBILANG ta imbaga na sakey ya ugaw a bii ed nanay to: “On, onsempet ak a tampol kayari na klase.” Balet ta agni sinmempet tan nanggalaw ni kaiba toray kaaro to insan to ibaga ed nanay to: “Agak ni pinasempet nen madam ko kayari klase mi.” Duga kasi so pangibagay ontan?—

Odino bilbilang ta imbaga na ugaw a laki ed tatay to: “Andi pa, agko sinipa so bola ed abung.” Balet panon to no talagan ginawa to? Makapuy kasi so pangibagan agto ginawa?—

Impanengneng ed sikatayo na Sankamaongan a Managbangat so dugan gawaen. Inkuan to: ‘Say salita yon On et kabaliksan toy On, tan say Andi, et Andi; ta say antokaman ni et nanlapud mauges.’ (Mateo 5:37, NW) Antoy labay ya ibaga nen Jesus ed satan?— Say labay ton ibaga et nepeg tayon tooren so ibaga tayo.

Walay istorya ed Biblia a mangipapanengneng no panon kaimportante so pangibagay katuaan. Satan so nipaakar ed duaran too ya ibabaga ran babangatan ira nen Jesus. Nengnengen ta no antoy agawa.

Kulang nin duay bulan kayari impatey nen Jesus, dakel a totoo so nanlalapud arawin pasen pian onla ed Jerusalem parad importantin piesta na saray Judio a tinawag a Pentecostes. Marakdakep so impanpaliwawa nen apostol Pedro ya imbaga to ed totoo so nipaakar ed si Jesus, a pinaoli nen Jehova. Saya so pilpilimeron impakaaral na dakel ed saraman so linma ed Jerusalem nipaakar ed si Jesus. Tan labay da ni makaaral na dakel. Kanian, antoy gawaen da ey?

Agni’ra inmalis. Balet agni abayag et arum ed sikara so naupotan la na kuarta, tan kaukolan da so tulong ta pian walay nisaliw day naakan da. Labay na saray babangatan ed Jerusalem a tulongan iray bisita. Kanian, dakel ed sikara so angilako na saray kayarian da tan inawit day kuarta ed saray apostol nen Jesus. Insan imbunog na saray apostol so kuarta ed saray mankaukolan.

Si Ananias tan say asawa to, si Safira, a membro na Kristianon kongregasyon ed Jerusalem, so angilako na dalin da. Anggapoy angibaga ed sikaran ilako da itan. Sikaran mismoy nandesisyon ed satan. Balet say ginawa ra et aliwan lapud inaro daray balon babangatan nen Jesus. Diad tua, labay nen Ananias tan Safira ya isipen na totoo a mao-maong ira. Kanian imbaga dan iter day amin a kuarta pian ontulong ed arum. Diad tua et daiset labat so inter da balet imbaga ran inter dan amin. Antoy nikuan mo ed satan ey?—

Antam, akinengnengan si Ananias ed saray apostol. Inter toy kuarta ed sikara. Siempre, amta na Dios ya agto inter ya amin. Kanian impaamta na Dios ed si apostol Pedro a mantitila si Ananias.

Insan inkuan nen Pedro: ‘Ananias, akin ya inabuloyan moy Satanas a gawaen mo iya? Say dalin et gawam. Agmo kaukolan ya ilako itan. Tan anggan sano alakom lay dalin, sikay akauley no antoy gawaen mo ed kuarta. Balet akin a mankuankuanan kan inter moy amin a kuarta anta daiset labat so inter mo? Lapud saya et mantitila ka, aliwan dia ed sikami labat, noagta ed Dios.’

Aliwan ludlurey itan a bengatla. Nantila si Ananias! Agto ginawa so imbaga ton gawaen to. Nankuankuanan labat a gawaen to itan. Ibabaga na Biblia ed sikatayo no antoy tinmumbok ya agawa. Inkuan to: ‘Diad impakarengel ed saray salita nen Pedro, atumba tan inatey si Ananias.’ Pinatey na Dios si Ananias! Kayari na saman, say bangkay to so imponpon ed paway.

Kalabas na ngalngali taloy oras, sinmabi si Safira. Agto amta so agawa ed asawa to. Kanian tinepetan nen Pedro: ‘Kasin inlako yon dua so dalin ed presyo ya inter yo ed sikami?’

Inmebat si Safira: ‘On, inlako mi so dalin ed ontan a presyo.’ Balet ta nantila! Insinop day arum a kuarta parad inkasikara manlapud nanlakoan day dalin. Kanian pinatey met na Dios si Safira.​—Gawa 5:1-11.

Antoy naaralan ta manlapud agawa ed si Ananias tan Safira?— Naaralan ta’n aglabay na Dios iray matila. Naynay a labay ton ibaga tayoy tua. Balet dakel a totoo so mangibabagan aliwan makapuy so mantila. Duga iraman a totoo kasi?— Kasin antam a say sengegan na amin a sakit, ot-ot, tan ipapatey ed dalin et lapud impantila?—

Nonoten, say Diablo so nantila ed sankaunaan a bii, si Eva. Imbaga to ed si Eva a sikatoy ag-ompatey no sumlangen toy Dios tan mangan ed bunga ya imbaga na Dios ya agto kanen. Anisia si Eva ed Diablo tan angan na bunga. Asagyat to met si Adan a mangan. Kanian nankasalanan ira, tan amin ya iyanak da so makasalanan. Tan lapud sikaray makasalanan, amin ya ananak nen Adan so manirap tan ompatey. Panoy inggapo na amin a kairapan?— Ginmapo itan ed impantila.

Kanian imbaga nen Jesus a say Diablo so ‘matila tan ama na tila’! Sikatoy pilpilimeron nantila. No mantila so sakey, aaligen to so inmunan ginawa na Diablo. Nepeg tayon nonoten iya no natutukso itayon mantila.​—Juan 8:44.

Kapigan mo nalikna a natukso kan mantila?— Agta sano akagawa ka na makapuy?— Nayarin walay aderal mo, anggaman agmo ginagala. No natepetan ka, kasin ibagam a say agim so akaderal ed satan? Odino mankuankuanan kan agmo amta no akin ya aderal itan?—

Panon to no kaukolan mo a gawaen so asainmin mo, balet ta agmo ginawan amin itan? Kasin ibagam a ginawam lan amin itan, anggano andi ni?— Nepeg tayon nonoten si Ananias tan Safira. Agda imbagan amin so tua. Tan impanengneng na Dios no panon kauges itan diad impamatey to ed sikara.

Kanian antokaman so gawaen tayo, lalon makapuy so pansumpalan no itila tayo itan, tan ompan agtayo ni ingen ibagan amin so tua. Inkuan na Biblia: ‘Salitaen yo so katuaan.’ Inkuan to met: “Agkayo mantitilaan.” Naynay a sasalitaen nen Jehova so katuaan, tan iilaloan ton ontan met so gawaen tayo.​—Efeso 4:25; Colosas 3:9.