Pampandong​—Kapigan tan Akin?

Base ed Biblia, kapigan tan akin a nepeg a manpandong so sakey a Kristianon bii? Imanoen tayo so insulat nen apostol Pablo nipaakar ed saya. Ontulong iya pian makapanggawa tayo na duga iran desisyon a mamagalang ed Dios. Diad 1 Corinto 11:3-16, insulat nen Pablo so duaran punto a nepeg ya ikonsidera: (1) no kapigan manpandong so sakey a bii, tan (2) say rason no akin ya gawaen to itan.

No kapigan. Duaran situasyon so binitla nen Pablo: panagpikasi tan panagpropesiya. (Bersikulo 4, 5) Siempre, amta tayon say panagpikasi et pitotongtong ed si Jehova. No nipaakar ed panagpropesiya, say tutukoyen na saya diad panaon tayo et say panagbangat base ed Biblia ya gagawaen na sakey a Kristianon ministro. Balet, say labay kasin ibaga nen Pablo et lanang ya manpandong iray bibii kada no manpikasi ira odino sano ibabangat day katuaan ya walad Biblia? Andi. Wala labat iray situasyon ya kaukolan day manpandong.

Insulat nen Pablo no kapigan nepeg ya manpandong so sakey a sister diad pamilya tan diad kongregasyon. Inkuan to: “Say ulo na bii et say laki; . . . balang bii a manpipikasi odino manpropropesiya ya ag-akapandong et mamapabanday ed ulo to.” (Bersikulo 3, 5) Diad pamilya, say asawan laki so tinuro nen Jehova ya ulo na asawan bii. Kanian no gawaen na asawan bii iray responsabilidad ya inter nen Jehova ed asawan laki, nepeg ton ipanengneng ya bibidbiren to nin siansia so autoridad na asawa to. Ta no agto bidbiren, napabanday toy asawa to. Alimbawa, no say asawan bii et mangiyaaral na Biblia ya presente so asawa to, nepeg ya manpandong pian nipanengneng to ya bibidbiren toy autoridad na asawa to. Ontan so gawaen na asawan bii anggano agbautismado so asawa to, ta say asawan laki so ulo na pamilya.a No say asawan bii et manpikasi odino manbangat ya presente so menor-de-edad ya anak ton laki a bautismado la, sikatoy manpandong met, aliwan lapud say anak so ulo na pamilya, noagta pian ipanengneng so respeto ed sikato bilang bautismadon laki a membro na Kristianon kongregasyon.

Kumusta balet diad kongregasyon? Oniay inkuan nen Pablo: “No walay siopaman a labay toy misuppiatan pian paboran so sananey a kustombre, amta tayo ya anggapo lay arum a kustombre tayo, anggan saray kongregasyon na Dios.” (Bersikulo 16) Diad Kristianon kongregasyon, say inkaulo et niiter ed saray bautismadon lalaki. (1 Timoteo 2:11-14; Hebreo 13:17) Saray lalaki labat so tuturoen ya elder odino ministeryal a lingkor tan sikara so inikdan na Dios na responsabilidad ya mangasikaso ed kongregasyon. (Gawa 20:28) Balet no maminsan, wala ray situasyon ya kaukolan a gawaen na Kristianon bii so kimey ya gagawaen na saray kualipikadon bautismadon brother. Alimbawa, ompan sikatoy mangikondukta na pantitipon parad lawak na kimeyan ta anggapoy presente ya kualipikadon bautismadon brother. Odino ompan sikatoy mangiyaral na Biblia ya walay kaiban bautismadon brother.b Diad sayan duaran alimbawa, nepeg ya manpandong so sister pian nipanengneng to ya bibidbiren ton say gagawaen to et kimey ya iiter ed saray bautismadon brother.

Anggaman ontan, dakel so kabiangan na panagdayew tayo ya agkaukolan a manpandong so sakey a sister. Alimbawa, agto la kaukolan so manpandong no sikatoy mankokomento diad saray aral, no manpupulong ed kaabungan kaiba so asawa to odino arum nin bautismadon laki, odino no mangiyaaral na Biblia o mangidadaulo na pikakasi ed saray agbautismadon anak to ya aliwan presente so asawa to. Siempre, wala ni ray arum a tepet nipaakar ed saya, tan no agsegurado so sakey ya sister, sarag toy man-research.c No siansia nin agsegurado tan no say ididikta na konsiensia to et sikatoy manpandong, anggapoy uges to no gawaen to itan a singa nanengneng ed litrato diad sayan pahina.

Say rason. Diad bersikulo 10, walay duaran rason no akin a nepeg a manpandong so Kristianon bii: “Say bii et nepeg a nawalaan na tanda na autoridad diad ulo to, lapud saray anghel.” Unona, imanoen pa iramay salitan “tanda na autoridad.” Say pampandong et paraan pian nipanengneng na sakey a sister ya bibidbiren to so autoridad ya inter nen Jehova ed saray bautismadon lalaki ed kongregasyon. Kanian no gawaen to itan, ipapanengneng to met so panangaro tan katooran to ed si Jehova. Say komaduan rason et walad saramay salitan “lapud saray anghel.” Antoy epekto ed saray anghel no nanenengneng da so sakey a sister ya uunoren to iyan uksoyan?

Makakaliket iray anghel no nanenengneng dan say autoridad nen Jehova et bibidbiren na interon organisasyon to, diad tawen man odino diad dalin. Makakaaral met ira ed alimbawa na agperpekton totoo ya manpapasakop ed autoridad na Dios. Anggan sikara et kaukolan met a magmaliw a mapasakop ed saray uksoyan nen Jehova. Diad tua, dakel ya anghel nensaman so nanrebelde ed Dios. (Judas 6) Natan, naoobserbaan na saray anghel iray situasyon ya say sakey a Kristianon bii et mabulbulos a manpapasakop ed autoridad na brother anggano mas dakel so eksperiensya to, mas dakel so amta to, tan mas matalino. Wala ray situasyon ya say sister et sakey ya alanaan tan magmaliw a tomatawir a kaiba nen Kristo. Onsabi panaon ya say magmaliw a posisyon na sayan bii et mas atagey ni nen saray anghel tan manuley a kaiba nen Kristo diad tawen. Agaylan abig itan ya alimbawa ya naoobserbaan natan na saray anghel! Talagan baleg a pribilehyo na saray matoor tan mapasakop ya bibii ya ipanengneng ed minilyon ya anghel so maong ya alimbawa na inkamapaabeba tan katutulok!