Tepet

◼ Diad pangiyaral na Biblia diad puerta, kaukolan ni kasin manpandong so biin manangipalapag no walay kaiba ton lakin manangipalapag?

Sano say biin manangipalapag et mangikondukta na regular ya panangiyaral na Biblia tan walay kaiba ton lakin manangipalapag, kaukolan ya manpandong. (1 Cor. 11:3-10) Oniay nabasa ed pahina 27 na Hulyo 15, 2002 ya isyu na The Watchtower: “Sayan panagbangat et niyeskedyul la tan samay mangikokondukta so mismon mangidadaulo. Say ontan iran situasyon et kabiangan na panagbangat a kimey na kongregasyon. Kanian no say mangikondukta et bautismadon Tasi ya bii tan walay kaiba ton bautismadon Tasi ya laki, nepeg labat ya manpandong imay sister.” Onaplika iya balanglan say panangiyaral et diad abung, diad puerta labat, odino diad arum nin lugar.

Balet no agmet ni niletneg so regular ya panangiyaral diad puerta, agkaukolan a manpandong so sister anggano walay kaiba ton lakin manangipalapag, anggan say gagala na pan-RV da et pian idemostra so panangiyaral na Biblia o pantongtongan so sakey ed saray publikasyon ya uusaren tayod panangiyaral. Mabetbet ya agtampol niletneg so regular ya panangiyaral diad puerta tan kaukolan so maminpigan ipawil, kanian nepeg ya ikonsidera na saray manangipalapag so kipapasen tan tebeken dan maong no kapigan so nepeg lan pampandong.