Mangikondukta na Progresibo Iran Panangiyaral na Biblia Diad Puerta tan Panamegley na Telepono
1. Antoy gagala tayo ed pangikokondukta na saray panangiyaral na Biblia?
1 Agaylan makapaliket so pakapangigapo na panangiyaral na Biblia! Balet, say pananap ed sakey ya interesado ed panagaral na Biblia et gapoan labat. Say gagala na panagaral et pian tulongan so too a magmaliw a peteg a babangatan nen Kristo. (Mat. 28:19, 20) Antoy ontulong ed sikatayon nadampot itan a kalat?
2. Anto so panangiyaral na Biblia diad puerta tan panamegley na telepono, tan akin ya epektibo iratan?
2 Okupado Iran Totoo: Saray totoo natan so ompapalalon okupado. Diad arum iran pasen, nayarin diad primero et pigpigaran totoo so mabulos a mangigana na sakey oras ed panagaral na Biblia. Pian natulongan iratan, napapaseseg itayon mangigapo tan mangikondukta na saray panangiyaral na Biblia diad puerta odino panamegley na telepono. Diad primero, sarayan panangiyaral so nayarin antikey labat tan nayarin mangilanor ed pangonsidera ed pigara labat lan teksto na Biblia ya usaren so sakey odino duaran parapo ed publikasyon, a singa say libron Ibabangat na Biblia. Agaylan nakomendaan a dakel a manangipalapag so mangikokondukta la natan na saray panangiyaral diad puerta odino panamegley na telepono!
3. Akin a nepeg a panggunaetan tayon parukeyen so panaon ya uusaren tayo ed panagaral diad puerta?
3 Balet, kasin kontento itayo lan angga itayo labat ed puerta sano mangikondukta na panangiyaral? Andi. Anggaman makabat ya ag-itayo manbayag sano primeron nigapo so panangiyaral, oniay inkomento na Agosto 1990 a Ministeryo Tayo ed Panarian, pahina 8: “Diad bektan say panagaral so niletneg tan abayuboan so interes na unabung, sakey ya andukdukey a peryodo na panaon so nayarin usaren ed panagaral.” Importante iya. Pian iyilustra: Say naerasan ya ugaw so nayarin diad primero et pakanen na sandaraiset anggad ompawil lay ganas to, balet agtayo nailaloan a napapawil ton tampol so sankaabigan lan biskeg to tan ombaleg a normal no ontan labat kadaiset so ipakan ed sikato diad andukey a panaon. Mipadpara, nakaukolan na sakey ya iyaaralan na Biblia so mas pormal tan regular a panagaral pian onaligwas a magmaliw a matatken a lingkor na Dios.—Heb. 5:13, 14.
4. Antoray gunggona ed pangikondukta na panagaral na Biblia ed loob na abung?
4 Panangiyaral na Biblia Diad Loob na Abung: Mas maabig so mangikondukta na panagaral ed pribadon lugar—diad abung odino diad arum nin matukoy a pasen. Saya so manggawan mas mainomay so pakaaral tan ontulong ed iyaaralan a natalosan so Salita na Dios. (Mat. 13:23) Mas nainomayan met so managbangat ya iyadapta so aaralen a materyal ed saray pankaukolan na iyaaralan. Sakey ni, say andukdukey a panagaral so mangiyabuloy ed aragdalem tan makapabiskeg na pananisian panangonsidera ed Salita na Dios.—Roma 10:17.
5. Panon tayon niyalis dia ed loob na abung so panagaral ed puerta?
5 Panon yon niyalis dia ed loob na abung so panagaral ed puerta? Kayari na pigaran antikey iran panagaral, akin ta no iyopresi so andukdukey tan espisipikon kabayag na panagaral? Odino nayarin usaren yo so aliwan direktan metodo diad pangitepet ed too, “Wala tay panaon mo natan pian malaem ta’n nasingbat so aaralen?” odino “Panon karukey so sarag mon igana natan pian pantongtongan iyan tema?” No aliwan matalona iray sagpot yo, nepeg yon itultuloy so antikey iran panagaral diad puerta. Diad matukoy a pankanawnawa, sali yo lamet itan a pagmaliwen a panangiyaral na Biblia diad loob na abung.
6. Antoy nepeg a gagala tayo diad panggawa ed ministeryo tayo, tan panon a saray suhestion ed sayan artikulo so ontulong ed sikatayon nadampot itan a gagala?
6 Legan tayon itutultuloy ya aanapen iray makanepegan, agtayo lilingwanan so kalat tayo ed pangigagapo tan pangikokondukta na saray panangiyaral na Biblia. Say kalat tayo et say panulong ed saray matuan-impanpuso a magmaliw a dedikado tan bautismado iran lingkor nen Jehova. Komon ta bendisyonan to iray sagpot tayo legan tayon gagawaen so ministeryo tayo tekep na sayan gagala.—2 Tim. 4:5.