Sekreton Labalabay Tayon Naamtaan

Wala lay angibagad sika na sekreto?—a Diad Biblia et walay sekreton tatawagen ya “sagradon sekreto.” Sagrado ta nanlapud Dios. Tan sekreto ta ag-amta na totoo. Anggan saray anghel et labay da met ya naamtaan. Labay mon naamtaan no anto iyan sekreto?—

Diad gapo, ginawa na Dios so inmunan laki tan bii. Say ngaran da et Adan tan Eva. Impan-ayam ira na Dios ed balibalin hardin na Eden. No inunor labat komon nen Adan tan Eva so Dios, paraiso komon so interon dalin natan a singa samay hardin. Tan tuloytuloy iran nambilay ed Paraiso. Pero natandaan mo ni no antoy ginawa nen Adan tan Eva?—

Agda inunor so Dios kanian anggapoy paraiso natan. Balet imbaga na Dios ya parakepen toy interon dalin tan anggapo lay ompatey, tan magmaliw lan maliket so amin. Panon ton gawaen itan? Abayag ya ag-amta na totoo so ebat. Sekreto ni kasi.

Nen linmad dalin si Jesus, impaamta to iyan sekreto ed saray totoo. Imbaga ton nipaakar iyad Panarian na Dios. Imbaga to met ed sikara ya ipikasi dan onsabi iyan Panarian pian magmaliw ya paraiso so dalin.

Maliket kan akaamta ed sayan sekreto?— Tandaan mo ya saray maunor labat ed si Jehova so manayam ed Paraiso. Nabasad Biblia iray istorya na lalaki tan bibii ya maunor ed si Jehova. Labay mon naamtaay istorya da?— Kabaten tay arum ed sikara tan amtaen ta no panon tayo ran naalig.