Anto so Unong ed Ganggan Legan na Sabaton?

Diad sakey nin Sabaton, linmay Jesus ed sinagoga, nayarin diad Galilea. Diman et anengneng toy lakin kinmebet so kawanan a lima to. (Lucas 6:6) Babantayan a maong na saray eskriba tan Fariseo si Jesus. Akin? Naamtaay tuan gagala da nen nantepet ira: “Kasin unong ed ganggan so mamaabig legan na Sabaton?”​—Mateo 12:10.

Parad saray Judion lider na relihyon, say pantambal legan na Sabaton et unong ed ganggan no talagan delikado la. Singa bilang, diad Sabaton et aliwan unong ed ganggan so pangipawil o panbenda ed ayesyes a pukel, ta aliwa met nin delikado. Malinew ya agkukuestionen na saray eskriba tan Fariseo si Jesus lapud iyaansakit day paniirap na pobrin laki. Noagta manaanap iray nausar dan pangondena ed si Jesus.

Balet, amta nen Jesus so pikewet a panagkatunongan da. Atebek to ya tinawir day alablabas, aliwan makasulatan ya panmoria no anto ray sebel ya gawaen diad Sabaton. (Exodo 20:8-10) Asali to lay ontan ya lingon panagkritiko ed saray maabig ya gagawaen to. Natan et imparaan nen Jesus so dramatikon komprontasyon diad impangibaga tod lakin kinmebet so lima to: “Alagey ka tan gala diad pegley.”​—Marcos 3:3.

Nilingaw nen Jesus iray eskriba tan Fariseo, tan inkuan to: “No walay karnero yon naplag ed abot legan na Sabaton, siopad sikayo so agmangala tan agmangagwat ed satan?” (Mateo 12:11) Irerepresenta na karnero so puonan ya kuarta, kanian seguradon agda paulyanan ed bobon ya anggad onsublay ya agew; nayarin ompatey tan nalugi ra. Niarum ni, oniay ibabaga na Kasulatan: “Say matunong et aasikasoen to ray ayayep to.”​—Proverbio 12:10.

Pian nidanet so piparaan na satan, intuloy nen Jesus: “Agta mas mabli ni so too nen say karnero? Kanian say panggawa na maabig diad Sabaton et unong ed ganggan.” (Mateo 12:12) Malinew sirin ya agsinumlang nen Jesus so Sabaton nen pinaabig to may laki. Ag-akontra na saray lider na relihyon so lohikal, maabagey ya katunongan to. Ag-ira akasel.

Lapud adismaya tan maermen ed lingon kanonotan da, ninmengneng si Jesus ed kaliberliber. Insan inkuan tod laki: “Iyunat moy limam.” (Mateo 12:13) Nen inyunat na laki so kinmebet ya lima to, inmabig. Manliket a maong, balet antoy epekto na satan ed saramay mamapatit ed si Jesus?

Imbes ya manliket ira ta inmabig so lima na samay laki, pinmaway iray Fariseo tan nankokomplot iran tampol “kaiba iray kapartido na Herodes, pian pantongtongan day pamatey ed [si Jesus].” (Marcos 3:6) Mapatnag ya kaibad sayan politikal a partido iray membro na relihyoson grupo a tatawagey Saduceo. Diad tua, mankokontraan iray Saduceo tan Fariseo, balet natan et nankasakey ira pian pateyey Jesus.