Manbabangat Legan ya Paonlad Jerusalem

Diad pigaran bulan et akapokus ed Galilea so kimey nen Jesus, tan mas dakel so dinmengel ditan nen say diad Judea. Niarum ni, nen sikatoy walad Jerusalem tan pinaabig toy sakey a laki legay Sabaton, “sikatoy labay a pateyen na saray Judio.”​—Juan 5:18; 7:1.

Natan et 32 C.E. la tan asingger lay Piesta na Saray Tabernakulo (odino, Alolong). Sayan piesta et pitoran agew ya seselebraan tan tumbokan na sagradon pantitipon diad komawalon agew. Say piesta et pakatandaan na panampot na panagdalus tan panaon na panliliket tan pisasalamat.

Saray agagid ina nen Jesus a si Santiago, Simon, Jose, tan Judas et inkuan dad sikato: “Taynan ka la dia tan la kad Judea.” Say Jerusalem so sentro na panagdayewan na interon bansa. Legan na taloran tinaon a piesta, matoo ed syudad. Oniay inkatunongan na saray agagi nen Jesus: “Anggapoy toon iyamot toy antokaman a gagawaen to no labay ton sikatoy nakabkabat na totoo. No gagawaen mo irayan bengatla, ipanengneng moy inkasika ed mundo.”​—Juan 7:3, 4.

Diad tua, sarayan apatiran agagi to et “agmanisia” a sikato so Mesias. Balet, labay dan nanengneng na saray totoo ed piesta ya sikatoy manggawa na saray milagro. Lapud amta nen Jesus ya delikado iman, inkuan to: “Anggapoy rason na mundo pian busolen to kayo, balet bubusolen to ak, lapud tatasian ko a mauges iray kimey na mundo. La kayo ed piesta. Balet agak ni onla ed sayan piesta, ta agni asabi so panaon ko.”​—Juan 7:5-8.

Pigaran agew kayarin sinmian iray agagi nen Jesus ed grupo na saray manbiabiahe, masekreto met ya sinmian si Jesus tan saray disipulo to tan ag-ira naimano na totoo. Dinmalan irad mas asingger ya rota ed Samaria, imbes ya diad dadalanen na karaklan ya asingger ed Ilog Jordan. Kaukolan nen Jesus tan saray disipulo to so manpundo ed Samaria, kanian angibaki na saray mensahero ya mangiprepara. Diad sakey a lugar et ag-ira inabrasa o pinarawes na totoo lapud paonlay Jesus ed Jerusalem parad piesta na saray Judio. Mansyodot si Santiago tan Juan, tan intepet da: “Katawan, labay mon papelagen mid sikara so apoy manlapud tawen pian naupot ira?” (Lucas 9:54) Binano ira nen Jesus ed satan ya imbaga da, tan intuloy day nambiahe.

Nen wala rad dalan, oniay imbaga na sakey ya eskriba ed si Jesus: “Managbangat, ontumbok ak ed sika anggan iner so laen mo.” Inmebat si Jesus: “Saray kuyangen et walay panaayaman da, tan saray manok et walay ubong da, balet say Anak na too et anggapoy anggan napangidanganan toy ulo to.” (Mateo 8:19, 20) Labay ton ipaamta ed eskriba ya wala ray naeksperiensya ton kairapan no magmaliw ya patumbok nen Jesus. Tan mapatnag ya aglabay na eskriba so ontan a bilay. Kanian nayarin tepetan tayoy sarili tayo, ‘Kasin mabulos ak ya ontumbok ed si Jesus?’

Oniay imbaga nen Jesus ed sananey a laki: “Magmaliw kan patumbok ko.” Inmebat may laki: “Katawan, abuloyan mo ak nin onlan mangiponpon ed amak.” Lapud amta nen Jesus so kipapasen na laki, inkuan to: “Paulyan mo ray inatey a mangiponpon ed saray inatey da, balet la ka tan iyabawag mo so Panarian na Dios ed amin a pasen.” (Lucas 9:59, 60) Mapatnag ya agni inatey so ama na laki. Ta no onman, agla komon onlad man pian mitongtong ed si Jesus. Sikatoy agni akaparaan ya iyunad bilay to so Panarian na Dios.

Nen paepas la rad dalan ya paonlad Jerusalem, oniay imbaga na sananey nin laki ed si Jesus: “Ontumbok ak ed sika, Katawan, balet abuloyan mo ak nin manpatanir ed sankaabungan ko.” Inmebat si Jesus: “Say toon ombemben ed lukoy tan lingawen to iray walad beneg et agmakanepegan ed Panarian na Dios.”​—Lucas 9:61, 62.

Saramay malabay a magmaliw ya tuan disipulo nen Jesus et nepeg dan ipokus so mata ra ed kimey na Panarian. No lingaw-lingaw so manbabaka, agto napetek so babakaen to. No ikbanan toy lukoy tan lingawen to ray walad beneg, agnasumpal so babakaen to. Ontan met, siopaman ya onlingaw ed sayan daan a sistema na mundo et natumba ed dalan ya paonlad andi-anggaan a bilay.