TEPET 7
Antoy Gawaen Ko no Walay Manpilit ed Siak ya Mi-sex?
ANTOY GAWAEN MO?
Imadyin mo yan eksena: Duay bulan ni labat ya saninaro si Heather tan Mike, balet singa kabkabat da lan maong so sakey tan sakey. Lanang iran manti-text, pigay oras iran mantotongtong ed cellphone, tan nahulaan da lay ibaga na balang sakey! Balet natan, aliwan satan labat so labay ya gawaen nen Mike.
Diad linmabas ya duay bulan, anggad holding hands tan maganon kiss labat ira. Anggad man labat so labay nen Heather. Pero antakot met ya ompan i-break nen Mike no agto pagbigyan. Si Mike labat so mangipapalikna ed sikato ya special tan maganggana. ‘Sakey ni,’ so kuan nen Heather ed sarili to, ‘inar-aro mi sakey tan sakey . . . ‘
No wala ka lad edad ya miinaroan tan sika so walad situasyon nen Heather, antoy gawaen mo?
ISIP MO NI!
Say sex et regalo na Dios ya para labat ed saray sanasawa. No mi-sex ka ya agkayo kasal, agmo aapresyaen itan ya regalo. Singa gagawaen mon punas so balibalin kawes ya inregalo ed sika
No kontraen moy law of gravity, naaksidente ka. Ontan met, aliway pansumpalan mo no agmo unoren so ganggan na Dios ed moral, a singa say: “Paliisan yoy seksual ya imoralidad.”—1 Tesalonica 4:3.
Antoy resulta no agmo unoren itan ya ganggan? Ibabaga na Biblia: “Samay manggagawa na seksual ya imoralidad et mankakasalanan ed dilin laman to.” (1 Corinto 6:18) Akin ya duga itan?
Imbaga na saray researcher ya karaklan ed saray kabataan ya aki-sex ya agkasal et oniay naeeksperiensya ra.
NAKOKONSIENSIA RA. Pagbabawian lanlamang na saray kabataan ya aki-sex ya agkasal so ginawa ra.
ANGGAPO LAY TIWALA DA. Kayari dan mi-sex, isipen da, ‘Siopa ni kasi aki-sex ed sikato?’
NADISMAYA RA. Diad tua, labay na saray bibii ya walay manprotekta ed sikara, aliwan mansamantala ed inkabii da. Tan parad saray lalaki, agda la type so biin easy-to-get.
Tandaan mo sirin: No mi-sex ka anta agkayo kasal, iyaabebam so dignidad mo tan ipapakerew mo labat so bengatlan mabmabli. (Roma 1:24) Agmo ipapakerew so laman mo!
Ipanengneng mon desidido kan ‘ompaliis ed seksual ya imoralidad.’ (1 Tesalonica 4:3) No onsabi panaon ya wala lay asawam, sarag mo lay mi-sex. Tan seguradon na-enjoy mo itan, agka aburido, anggapoy pagbabawian mo, tan agka natatakot, aliwan singa saramay misi-sex ya agkasal.—Proverbio 7:22, 23; 1 Corinto 7:3.
ANTOY NIBAGAM?
No talagan inaro ka na boyfriend o girlfriend mo, kasin pansamantalaan to ka tan sakitan toy liknaan mo?
No walan talagay malasakit tod sika, kasin tuksoen to ka ya ag-unoren so ganggan na Dios?—Hebreo 13:4.