Tinalo nen Gideon Iray Midianita

Diad inlabas na panaon, tinaynan lamet na saray Israelita si Jehova tan nandayew ira ed saray dios ya aliwan tua. Pitoy taon ya tatakewen na saray Midianita iray ayep na saray Israelita tan dederalen da ray tanem da. Inmamot iray Israelita diad saray kuweba tan kapalandeyan pian natakasan da ray Midianita. Akikasi irad si Jehova ya iligtas to ra. Kanian angibaki si Jehova na anghel ya onlad mabiskeg a laki ya say ngaran to et Gideon. Imbaga na anghel ed si Gideon: ‘Pinili ka nen Jehova ya magmaliw ya sundalo.’ Tinepet nen Gideon: ‘Panon kon niligtas so Israel? Anggapoy nagawaan ko.’

Labay ya seguroen nen Gideon ya sikato so pinili nen Jehova. Kanian angiyan na bagoy karnero diad dalin tan imbaga tod si Jehova: ‘No diad kabuasan et say bagoy karnero labat so nabasa na linaew balet ta amaga so dalin, naamtaan ko ya siak so labay mon mangiligtas ed Israel.’ Kaimbuasan to, ambasabasa may bagoy karnero tan amaga so dalin! Balet impikasi lamet nen Gideon ya diad onsublay ya kabuasan et say bagoy karnero labat so amaga balet ambasa so dalin. Nen ontan so agawa, anisia lay Gideon ya sikato so pinili nen Jehova. Tinipon to ray sundalo to pian milaban ed saray Midianita.

Imbaga nen Jehova ed si Gideon: ‘Panaloen ta kayo ran Israelita. Balet lapud dakdakel so sundalom, ompan isipen yo ya analo kayo ta dakdakel kayo. Ibagam ed saramay sundalon natatakot ya onsempet la ra.’ Kanian 22,000 ya sundalo so sinmempet tan 10,000 labat so tinmilak. Imbaga nen Jehova: ‘Dakdakel nin siansia so sundalom. Itagar mo rad ilog, tan ibagam ya oninum iray danum. Nengneng mo no siopa iramay legan ya oniinum et akabantay nin siansia no walay kalaban, tan sikara labat so ikeram.’ Saray sundalo ya alerto legan ya oniinum et 300 labat. Imbaga nen Jehova ya anggano datdaiset ira, natalo day 135,000 ya sundalon Midianita.

Diad saman ya labi, imbaga nen Jehova ed si Gideon: ‘Natan ki la onlusob ed saray Midianita!’ Inikdan nen Gideon iray sundalo to na saklor ya trumpeta tan angkakabaleg a buyog ya wala ray karga ton panagsilew. Imbaga tod sikara: ‘Nengneng yo ak, tan alig yoy gawaen ko.’ Pinaknol nen Gideon so trumpeta to, binetag toy buyog to, impayapay toy panagsilew to, tan inyeyag to: ‘Say espada nen Jehova tan nen Gideon!’ Ontan met so ginawa na 300 ya sundalo to. Ataktakot iray Midianita kanian batik ira tan agda amtay arapen da. Lapud agulo ra, sikara lan mismo so nampapateyan. Tinulongan lamet nen Jehova iray Israelita ya taloen iray kalaban da.