Si Gideon tan Saray 300 ya Sundalo To

NENGNENG mo no antoy nagagawa. Sundalo iraya na Israel. Akatalimukor iran oniinum. Si Ukom Gideon iyay lakin akaalagey ed abay da. Babantayan to so panag-inum da.

Nengneng mon maong so nanduruman posisyon na panag-inum da. Saray arum et insubsob day lupa ra ed danum. Balet sayay sakey et angalaos na danum ed lima to pian nanengneng to no antoy nagagawa ed kaliberliber. Importante iya lapud imbaga nen Jehova ed si Gideon ya pilien to labat iramay lalakin akabantay legan ya oniinum. Saray ag-apili et pasempeten la. Nengnengen tayo no akin.

Napepeligro lamet iray Israelita ta agda inunor si Jehova. Tataloen ira na saray taga-Midian tan papairapen da ra. Kanian, kinmerew iray tulong ed si Jehova, tan sikaray dinengel to.

Imbaga nen Jehova ed si Gideon ya mangala na saray sundalo, kanian sikatoy nantipon na 32,000 ya lalakin milaban. Balet 135,000 ya sundalo so kalaban na Israel. Pero imbaga nin siansia nen Jehova ed si Gideon: ‘Masyadon dakel iray totoom.’ Akin kasi?

Ta no manalo so Israel, ompan isipen dan analo ira lapud sarili dan biskeg. Tan nonoten dan agda la kaukolay tulong nen Jehova. Kanian imbaga nen Jehova ed si Gideon: ‘Ibagam ed amin ya natatakot ya onsempet la ra.’ Nen ginawa iya nen Gideon, 22,000 ya sundalo so sinmesempet. Say atilak labat et 10,000.

Balet inkuan nen Jehova: ‘Siansia nin dakdakel iray sundalom.’ Kanian imbaga tod Gideon ya painumen to ray sundalo tod kawalaay danum tan pasempeten ya amin iramay inminum ya insubsob day lupa ra. Impormisa nen Jehova: ‘Panaloen ta ka tan saray 300 ya sundalom ya akabantay legan iran oniinum.’

Asabi lay pilaban da. Inapag nen Gideon ed taloran grupo so 300 ya sundalo to. Initdan to ray sansakey ya trumpeta, tan buyog a kinargaay silew. Nen manpegley-labi la, pinaliberan day kampo na kalaban. Insan bansag dan pinaknol so trumpeta tan binetag da ray buyog da, tan inyeyag da: ‘Say espada nen Jehova tan nen Gideon!’ Abapbalikwat tan ataktakot iray kalaban. Kibatiktik iran amin, tan analo iray Israelita.