Say Templo Parad si Jehova

Nen si Solomon lay ari na Israel, tinepetan nen Jehova: ‘Antoy labay mon iter kod sika?’ Imbaga nen Solomon: ‘Ugaw ak ni, kanian daiset ni amtak. Komon ikdan mo ak na karunongan pian amtak no panon kon asikasoen so totoom.’ Imbaga nen Jehova: ‘Lapud say kinerew mo et karunongan, gawaen ta kan sankarunongan ya too ed interon mundo. Gawaen ta ka met ya mayamyaman. Tan no unoren mo ak, ikdan ta kay andukey a bilay.’

Ginapoan nen Solomon ya ipaalagey so templo. Inusar to ray maong ya klase na balitok, pilak, kiew, tan bato. Libolibon marundunong ya lalaki tan bibii so nankimey pian nipaalagey so templo. Kayari pitoy taon, asumpal so templo tan nayari lan idedika ed si Jehova. Diad altar et wala ray bagat ya inyapay da. Tinmalimukor si Solomon ed arap na altar tan nampikasi: ‘O Jehova, amtak ya kulang ni kabaleg tan kabalibali na sayan templo parad sika, balet awat mo komon so panagdayew mi tan dengel mo ray pikakasi mi.’ Aliketan kasi si Jehova ed templo tan ed pikakasi nen Solomon? Kayari nen Solomon ya nampikasi, tampol ya walay linmeksab ya apoy manlapud tawen tan apoolan iray bagat ya walad altar. Labay ton ibaga, aliketan si Jehova ed templo! Nen anengneng itan na saray Israelita, malikeliket ira.

Lapud karunongan nen Arin Solomon, sikatoy akabkabat ed interon Israel tan anggan diad ararawin lugar. Oonla ed si Solomon iray totoo pian manpatulong ed saray problema da. Pati say reyna na Sheba et linma pian suboken to no kasin naebatan nen Solomon iray mairap ya tepet. Nen naebatan iratan nen Solomon, imbaga na reyna: ‘Dati et agak manisia ed ibabaga na totoo tungkol ed sika, balet natan et anengneng ko ya mas marunong ka manaya nen say imbaga da. Benendisyonan ka nen Jehova a Dios mo.’ Diad saman et mainawa so bilay ed bansan Israel, tan malikeliket iray totoo. Balet asingger lan manguman so bilay da.