Say Sulat ed Padir

Sinmabi panaon, si Belsazar la so ari na Babilonia. Sakey ya labi, inimbitaan to ed engranden panangan so sanlibon sankaimportantian ya totoo ed interon Babilonia. Ingganggan to ray managserbi ya ipaway da ray balitok ya kopa ya inala nen Nabucodonosor ed templo nen Jehova. Inusar iratan nen Belsazar tan saray bisita to ya pan-inuman na alak, tan indayew da ray dios da. Insan bigla ya walay anengneng dan lima ya angisulat diad padir na saray salitan agnatalosan.

Ataktakot si Belsazar. Impatawag to ray magician to tan im-promise tod sikara: ‘No siopay makaamta ed labay ya ibaga na sarayan salita, gawaen ko ya komatlon sankatageyan ya manuley ed Babilonia.’ Sinali dan talosan iray akasulat, balet anggapod sikara so makaamta no antoy labay ya ibaga na saratan. Kanian linmoob so reyna tan imbaga to: ‘Walay laki ya say ngaran to et Daniel. Nensaman et sikato so ontutulong ed si Nabucodonosor no wala ray agto natalosan. Sarag nen Daniel ya ipaamta ed sika so labay ya ibaga na sarayan salita.’

Impatawag nen Belsazar si Daniel. Imbaga na ari ed sikato: ‘No nabasam tan nipaliwawam irayan salita, ikdan ta kay balitok ya kuwintas tan gawaen ta kan komatlon sankatageyan ya manuley ed Babilonia.’ Imbaga nen Daniel: ‘Agmo ak la iikdan na regalo, balet ibagak ed sika so labay ya ibaga na sarayan salita. Antam ya malastog si amam ya Nabucodonosor, kanian inyabeba nen Jehova. Antam met so amin ya agawad sikato, balet siansia nin agmo nirespeto si Jehova, ta nan-inuman moy alak iray balitok ya kopa ya nanlapud templo To. Kanian insulat na Dios irayan salita: MENE, MENE, TEKEL, tan PARSIN. Say labay ton ibaga iratan et sakopen na saray Medo tan Persiano so Babilonia, tan naekal ka lan ari.’

Singa anggapoy makasakop ed Babilonia, ta sayan syudad et protektado na makapal iran padir tan apaliberan na aralem ya ilog. Balet diad saman ya labi, linmusob iray Medo tan Persiano. Nanggaway paraan si Ciro ya ari na Persia pian onatapew so ilog. Kanian akadalan ditan iray sundalo to tan akasabi rad puerta na syudad. Asabian da ya akalukas iray puerta! Linmoob iray sundalo, sinakop day syudad, tan pinatey da so ari. Insan si Ciro la so nagmaliw ya ari na Babilonia.

Kalabas na sakey taon, imbaga nen Ciro: ‘Ingganggan ak nen Jehova ya ipaalagey lamet so templo to ed Jerusalem. Nayarin onla diman so anggan siopa ed sikayo ran totoo to ya labay toy ontulong.’ Kanian agawa imay im-promise nen Jehova. Kayari na 70 ya taon manlapu nen aderal so Jerusalem, dakdakel ya Judio so pinmawil ed Jerusalem. Impawil met nen Ciro iray balitok tan pilak ya kopa tan arum nin kagawaan ya inala nen Nabucodonosor diad templo nen Jehova. Tinulongan nen Jehova iray totoo to panamegley nen Ciro, awa?