Dakel so Nagmaliw ya Kristiano ed Nanduruman Bansa

Inunor na saray apostol so ganggan nen Jesus ya ipulong so maong a balita diad interon dalin. Nen 47 C.E., saray agagi ed Antioquia et imbaki day Pablo tan Bernabe ya manpulong ed nanduruman lugar. Makulikuli ran dua ya nampulong ed saray lugar ed Asia Minor, singa diad Derbe, Listra, tan Iconio.

Pinulongan nen Pablo tan Bernabe so amin ya klase na totoo, mayaman man o mairap, ugaw man o matatken. Dakel so anisia ed katuaan tungkol ed Kristo. Nen pinulongan nen Pablo tan Bernabe so gobernador na Ciprus ya si Sergio Paulo, walay magician ya kinmontra ed sikara. Imbaga nen Pablo ed samay magician: “Dusaen ka nen Jehova.” Biglan abulag so magician. Nen anengneng itan nen Gobernador Paulo, nagmaliw ya mananisia.

Nampulong si Pablo tan Bernabe ed anggan iner, diad saray kaabungan, tindaan, karsada, tan diad saray sinagoga. Walay pinaabig dan lupoy ya laki diad Listra. Nen anengneng na totoo iyan milagro, inisip da ya dios si Pablo tan Bernabe kanian labay da ran dayewen. Balet binano ira nen Pablo tan Bernabe, ya kuan da: ‘Say Dios labat so dapat yon dayewen! Totoo kami labat.’ Insan wala ray sinmabin Judio tan sinugsogan da ray totoo ya busolen si Pablo. Tinupak na totoo si Pablo, inggayugoy dad paway na syudad, tan intilak da diman ta inisip dan inatey la. Balet mabilay si Pablo! Sikatoy tinulongan ya tampol na saray agagi tan inawit da lamet ed syudad. Insan la pinmawil si Pablo ed Antioquia.

Nen 49 C.E., nambiahe la lamet si Pablo pian manpulong ed nanduruman lugar. Binisita to lamet iray agagi ed Asia Minor, insan to intuloy ya impulong so maong a balita ed mas ararawin lugar, anggad Europe. Linmad Atenas, Efeso, Filipos, Tesalonica, tan arum ni ran lugar. Kaiba nen Pablo ya nambiahe si Silas, Lucas, tan say kabataan ya say ngaran to et Timoteo. Nantutulongan ira pian makabuo ra na saray kongregasyon tan pinabiskeg da ray agagi. Nanayam ed Corinto si Pablo ya sakey tan kapalduan taon pian pabiskegen iray agagi diman. Sikatoy nampulong, nambangat, tan sinulatan to ray dakel ya kongregasyon. Nantrabaho met bilang managgawa na tolda. Kalabas na panaon, pinmawil lamet si Pablo ed Antioquia.

Insan nen 52 C.E., nambiahe lamet si Pablo pian manpulong. Komatlo la yan impanbiahe to. Inggapo to ed Asia Minor, ya akasabi anggad Filipos tan amaarap ed Corinto. Insan pigay taon ya nanayam si Pablo diad Efeso. Sikatoy nambangat, nampaabig na saray walay sakit, tan tinulongan to so kongregasyon ditan. Inagew-agew met ya nampaliwawa diad sakey ya auditoryum na eskuelaan. Dakdakel so dinmengel tan inuman day kabibilay da. Kayari nen Pablo ya impulong so maong a balita diad dakel ya bansa, sikatoy linmad Jerusalem.