Pakanengneng ed “Tanda” a Tekep na Pakatalos
“Legan a sikato so manyudyurong ed Palandeg Olivo, saray babangatan to so inmasingger ed sikato a maamot, a kuan da: ‘Ibagam ed sikami, Kapigan so kagawa na sarayan bengatla, tan anto so tanda na kiwawalam tan ed konklusyon na sistema na bengabengatla.?’”—MATEO 24:3.
1. Akin a say manangebbiew-mundon nagagawa nanlapulad 1914 so aliwan nibanbana, tan anto so intepet na saray babangatan nen Jesus ed sikato?
SARAY manangebbiew-na-mundon nagagawa nanlapulad Guerra Mundial I nen 1914-18 so aliwan nibanbana. Sikara so impasakbay nen Jesu-Kristo ed apalabas lan labinsiam siglos. Imbaga to’d saray 12 babangatan to so nipaakar ed dakel iran makapakelaw a bengatlan onsabi, tan nisesengeg ed satan et sikato so tinepetan da: “Ibagam ed sikami, Kapigan so kagawa na sarayan bengatla, tan anto so tanda na kiwawalam tan ed konklusyon na sistema na bengabengatla?”—Mateo 24:3.
2. Akin a kinaliktan na saray apostoles ya amtaen so mas nen say nagawa sakbay na kaderal na Jerusalem nen 70 K.P.?
2 Kaliktan ya amtaen na saraman ya apostoles so mas lalo nen say nagagawa ed baetan na saman a panaon tan say kaderal na Jerusalem. Si Jesus so agpinmawil ed balanglan nanengneng odino agnanengneng ed saman a makadesyang ya inkagawa. Nisay say sistema na bengabengatlan linmesa a nanlapulad samay Delap so anampot diad inkaderal na Jerusalem nen 70 K.P. Diad katuaan to, “say tanda” na [agnanengneng a] kiwawala [nen Jesus] tan ed konklusyon na sistema na bengabengatla” so nigeter ya ompatnag mabayag ni kayari na mangaraldalin ya impanbilay na saray apostoles to.
3. (a) Antoy mangipanengneng a “sayan maong a balita na panarian” so ag-impulong na saray relihyon na Kakristianoan kaleganan na kayari-apostolikon apostasya? (b) Kasin onsaew so Panarian na Dios no onsaew so Nasyones Unidas?
3 Diad panamegley na saray mapropetikon parabolo nipaakar ed Panarian na Dios, imbaga nen Jesus ed saray apostoles to so nipaakar ed relihyoson iyaalsa a nagawa ed kayari na ipawil to ed tawen tan say ipatey da. Kaleganan na amin na satan a panaon na apostasya, kasin wala so sankamundoan a panangipulong ed “sayan maong a balita na panarian?” (Mateo 24:14) Peteg ya aliwan diad panamegley na saray relihyon na Kakristianoan, unong ta diad samay Disyembre 1918 et intandoro na Konsilyo Pederal na saray Iglesia nen Kristo ed America so niproponi ed saman a Liga na Nasyones a bilang “say mapulitikan balikas na Panarian na Dios ed dalin.” Anggaman ed saman a relihyoson impangindorso, say Liga so sinmaew diad interak na Guerra Mundial II nen 1939. Balet diad saman ya insaew, kasin say tuan Panarian na Dios so sinmaew? Andi! Nisay sikato so onsaew sano say sandi na Liga, say Nasyones Unidas, so onsaew la ed magano. Noag ingen satan a Panarian na Dios so maneral ed Nasyones Unidas, anggaman panon karakel na mangatatawen ya angheles so nayarin nakaukolan a manggawa ed saya!
4. Akin a say kimey na panangipulong ed Panarian so kabiangan na “tanda”?
4 Amin na saray akaunan salaysay so ontulong a mamatarem na pakatalos ed sayan importantin katuaan: Sikato so ebat ed kerew na sakey a “tanda” ya imbaga nen Jesus ed saray patumbok to: “Sayan maong a balita na panarian so nipulong ed amin ya atooan a dalin ya onkanan pantasi ed amin a nasyones; tan insan onsabi so anggaan.” (Mateo 24:14) Tandaan na saya a say ontan a sankadalinan a panangipulong ed Panarian so kabiangan na atugyop a “tanda” a mananda “ed konklusyon na sistema na bengabengatla.” Sikato met so nanengneng ya ebidensya ed agnanengneng a “kiwawala” nen Jesu-Kristo. Say paraan ya angidasigan nen Jesus ed panggegendanan na saray nagawgawa sakbay na propesiya to nipaakar ed kimey na panangipulong ed Panarian so makatantanda. Diad kabiangan inkuanto:
5. Anto so arum ed saray nengneng na “tanda” a sinalambit nen Jesus sakbay na impangipasakbay to ed sankamundoan a panangipulong ed Panarian?
5 “Makadngel kayo na saray bakal tan balbalita ed bakal; nengnengen yo a sikayo so agnatalagnaw. Ta sarayan bengatla so nepeg a nagawa, ingen aliwa nin sikato so anggaan. Ta ontalindeg so nasyon a sumpad nasyon tan panarian a sumpad panarian, tan walaray kakisiran na tagano tan yegyegyeg ed nanduruman pasen. . . . Tan lapud idaak na kaugsan say aro na babaleg a bilang so ombetel. Ingen say mansungdo ya anggad kasampotan et sikato so nilaban.”—Mateo 24:6-13.
6. Akin a saray nengneng na “tanda” so aliwan basta katuloyan lambengat na akauna ran padron na bengatla?
6 Tua, wala laray bakal, kakisiran na tagano, yegyegyeg, tan salsalot diad inlabas na saray siglos na Komon a Panaon tayo ya anggad 1914. (Lucas 21:11) Anggaman kuan, anggapo so nikumpara ed saman so agawa nanlapulad impangangga na Panaon Gentil ed saman a makatantandan taon. Say internasyonal a gutgutan a biglan angewgew ed samay tiagew na 1914 so binmalbaleg diad impibiang na militar ya akibabalian ed kaunoran na 28 nasyones. Dingan na saman a gewgew na too et sinmabi so yegyegyeg. Walaray kakisiran na tagano odino eras, tan diad unor a taon na saman a guerra mundial et sinmabi so singa-matakew a salot a tinawag na trankaso Espanyol ya anigway ed bilay na masulok a 20,000,000 a totoo. Amin na saya so aliwa lambengat a katuloyan na akauna lan nagagawa a padron na saray bengabengatla. Sikato so gapowan na panggegendanan na saray nagawgawa a manibukel na “tanda” a sayan sistema na bengabengatla so wala la ed nipasakbay a “panaon na anggaan” to. (Daniel 12:4) Say unor a libro na Biblia—say Apocalipsis, odino Puyan—so mangipaseguro ed saya.
7. Akin a say libro na Apocalipsis so nikurit, tan anto so ituro na dakel iran bengatlan wadtan a “niparungtal . . . ed saray tanda”?
7 Si apostol Juan, ya angawat na Puyan, so niganggan a mangisulat ed satan diad nikabkabiig a gagala. Anton gagala? Saya: “Pian ipanengneng to ed saray ariripen [na Dios] iray bengatlan magano lan nagawa.” Tan diad sampot na Puyan et imbaga nen Katawan a Jesu-Kristo: “On; siak so onsabi a magano.” Diad saman et inmebat si Juan: “Amen! Gala, Katawan a Jesus.” Sirin dakel a bengatlan “nipresenta . . . ed tanda” so, diad kipatnag da ed awaran, so mananda a sikatayo la so manbibilay “ed panaon na anggaan” na sayan sistema na bengabengatla. (Apocalipsis 1:1; 22:20) On, sikara so makatulong ed sikatayo diad pakanengneng ed atugyop a “tanda” a tekep na pakatalos.
8. Siopa so akakabayo ed “amputin kabayo,” tan kapigan so impangiter na Dios na pakauley ed sikaton onla a sumpad saray kakabusol to?
8 Diad Apocalipsis kapitulo 6 et nabasa so salaysay ed samay atawag na impankabayo “na apatiran managkabayo ed Apocalipsis.” Say pinmatnag ya inmuna et say managkabayo ed “sakey ya amputin kabayo,” say niglorian Jesu-Kristo, a linman mibakal a sumpad saray kakabusol to. Saya et sikato so inutorisaan na Dios a manggawa diad panampot na Panaon Gentil, sano saray kakabusol nen Jesus ed tawen tan dalin so sinmuko komon ed uley to.—Salmo 2:1-12.
9. Anto so inretrato na akakabayo ed (a) say “ambalangan-kolor” a kabayo? (b) say “andeket a kabayo”? (c) say “mapusisaw a kabayo”?
9 Say managkabayo ed “ambalangan-kolor” a komaduan kabayo so angiretrato ed internasyonal a bakal, lapud niiter ed sikato so armas na militar, “sakey a baleg a kampilan.” Diad komatlon akakabayo, “sakey a kabayon andeket,” so sakey a managkabayon mangireretrato ed kakisiran na tagano. Panon so pikabat tayo ed saya? Lapud sankaawit to so sankaparis a simbangan a panisimbangan to ed saray manunan suplay na tagano diad mablin presyo. Say komapat a managkabayo, diad maletletey-itsuran “mapusisaw a kabayo,” so angiretrato ed salot, ta ibabaga na salaysay: “Say sakey ya akakabayo so walaan na ngaran a Patey. Tan say Hades [say lubok] so maap-apit a manumtumbok ed sikato.” Tua, sayan komapat a managkabayo, so naikdan na pakauley a “mamatey ed andukey a kampilan” na bakal “tan ed kakisiran na tagano . . . tan diad maatap iran ayep na dalin.” Makatantanda, anggaman kuan, sikato met so naikdan na pakauley a mamiktima na iyakar ed lubok (Hades) diad panamegley na “makapatey a bakbak.”—Apocalipsis 6:1-8.
10. Anto so nagawa kayari kilukas na komalima tan komanem a tatak, tan anto so awaten na saray manaayam ed dalin?
10 Kayari na impakanengneng nen apostol Juan ed saraman a pasingawey a mananda “ed konklusyon na sistema na bengabengatla,” anengneng to so inkilukas na mapropetikon komalima tan komanem a tatak na lukot. Diad saman a punto, et anengneng to so sakey a pasingawey na makapakebbiew a desyang, ya onggapo ed “baleg a yegyeg.” Diad kaunoran, saray manaayam ed dalin so naobligan mangawat: “Say baleg ya agew na sanok da [nen Jehovan Dios tan si Jesu-Kristo] so onsabi.” Say pankapot na satan a simbolikon agew na sanok na Dios so mananda a say anggaan so sinmabin siansia ed saray mananuporta ed sayan mundo.—Apocalipsis 6:9-17.
Panagtipon ed Saraman So Naabobonan ed Kilalaban
11. Anton ilustrasyon so inusar nen Jesus a mangipanengneng ed inkaseguro na impasakbay to nipaakar ed kiwawala to tan “say konklusyon na sistema na bengabengatla”?
11 Diad impangiter ed “tanda” na “kiwawala [to] tan ed konklusyon na sistema na bengabengatla,” inkuan nen Jesus: “Natan naaralan yo ed kiew a higos so sakey ya alimbawa ed sayan punto: Sano saray malangwer a sanga to so onmutmut tan mamawala na bulong, kabat yo a say tiagew so asingger la. Ontan yo met, sano nanengneng yo so amin na sarayan bengatla, amta yo a sikato so asingger la ed saray puerta. Tua kuan ko ed sikayo a sayan kapolian so agla napaso ya anggad amin na sarayan bengatla so nagawa. Say tawen tan dalin so napaso, balet saray salitak so agbalot napaso.”—Mateo 24:32-35.
12, 13. (a) Anto so ag-ituro na sankanasyonan ya inkadesyang na Judio nen 70 K.P.? (b) Ed anto so mapropetikon itipo na saman a desyang? (c) Sirin, anto so intuloy nen Jesus ya impropesiya nipaakar ed isasabi to?
12 Sanen dineral na saray Romano so Jerusalem tan say templo to nen 70 K.P. a singa impasakbay nen Jesus, sayan makapakebbiew a kairapan a dinmapo ed saray Judios so agmananda a sikato la so sinmabi ed komaduan danay tan say agnanengneng a kiwawala to so ginmapo la. (Mateo 24:15-21) Lapud uusaren na Biblia so kadaanan a Jerusalem a bilang sakey a tipo, saman a makapakebbiew a desyang nen 70 K.P. so peteg a sakey a mapropetikon tipo. Inretrato to ed melag a kasumpalan so nagawa ed sankamundoan a kalaknab diad kayari panampot na Panaon Gentil nen 1914 tan sirin kayari na peteg ya inggapo nen Jesu-Kristo ed agnanengneng a kiwawala to. Sikato no akin ya imbaga met nen Jesus:
13 “Tampol kayari na kairapan ed saraman ya agew et say banwa so ombilunget, tan say bulan so agmangiter na liwawa to, tan saray bibitewen so napelag a manlapud tawen, tan saray pakayari na katawenan so natenyeg. Tan insan say Anak na too so ompatnag ed tawen, tan insan amin a tribu na dalin so mandugal diad pantagleey, tan nanengneng da so Anak na too ya onsasabi ed lurem na tawen a tekep na pakayari tan baleg a gloria. Tan ibaki toray angheles to a tekep na baleg a tanol na trumpeta, tan tiponen toray pinili to a manlapud apatiran dagem, manlapud sakey a sampot na katawenan ya anggad sananey a sampot.”—Mateo 24:29-31.
14. Anton sipanan tan bagat so atukoy ed Salmo 50:5?
14 Say nipasakbay a panipon ed saray “pinili” kaleganan na konklusyon na sistema na bengabengatla so kasumpalan na ganggan na Dios: “Tiponen yo ed siak iray matoor ko, saraman so akigawaan na sipanan ed siak diad bagat.” (Salmo 50:5) Lapud satan so tinawag nen Jehova na “sipanan ko,” agnayarin say dedikasyon a gawaen na sakey ed Dios diad pagmaliw a sakey a Kristiano tan sikato la so makapipaknaan diad pangibagat to ed inkasikato. Andi, sayan agawan sipanan ed baetan nen Jehova tan saray “matoor” et say insipan na Dios a “balon sipanan” ed abung na espiritual ya Israel. Say bagat a niletnegan na satan a balon sipanan et say dondon bagat na “Anak na too,” si Jesu-Kristo.—Jeremias 31:31-34; Mateo 24:30.
15. Sioparay “matoor,” tan sikara natan so manserbi a singa anto ed mundo?
15 Saray “matoor” a niloob ed balon sipanan so tinugyop na espiritual ya Israelitas. (Lucas 22:19, 20) Intawag na Dios so kagawa na katipon ta pian nausisa to raman so atipon, ya abobonan to so matoor tan ipulisay to raman so agmanbilay a tukoy ed saman so pangibabaga ran wala ra ed sipanan to, say balon sipanan. (Salmo 50:16) Nanlapulad Guerra Mundial I, say ebidensya et say Kakristianoan, a mangibabagan wala ed balon sipanan, so ag-apaneknekan a makapaliket ed si Jehovan Dios. Diad pirmin pidumaan et ontalindeg so melag a nakdaan na tuan dedikado, bautismadon babangatan na Manamegley na balon sipanan, si Jesu-Kristo. Pinaneknekan dan sikara so espiritual ya Israelitas. Sarayan matoor a patumbok na balon sipanan et saray “pinili” a tinipon na Anak na too ed inkasikato diad panamegley na saray angheles to. Sinumpal da so obligasyon na balon sipanan, say “sipanan ko,” a singa impanawag na Dios. Lapud kimey da diad panuporta ed Panarian na Dios ed panamegley nen Jesu-Kristo, so nagmaliw a ‘tanda’ ed interon mundo.—Isaias 8:18; Hebreos 2:13, 14.
16. (a) Kapigan so inkagawa na espiritual ya inkaliing na nakdaan na “matoor”? (b) Diad parabolo na samploran mamarikit, siopa so Nobyo tan siopa so manibukel na simbolikon nobya?
16 Para ed satan a nakdaan na “matoor,” nepeg a wala so espiritual a kaliing kaleganan na masasakbay a kabiangan na “konklusyon na sistema na bengabengatla.” Saya so manunan kabiangan na “tanda” ya impasakbay nen Jesus ed baleg a propesiya. Para ed nakdaan, say panaon na satan a kaliing so sakey a baleg a gayaga, gayagan singa saraman so limaran maalwar, odino makabat, a mamarikit ya aliing ed kelyaw diad pegley-labi: “Nia la so nobyo! Onla kayon mangabet ed sikato.” (Mateo 25:1-6) Saman a makapaliket ya inkaliing so agawa ed samay primabera na 1919, sanen say alanaan a nakdaan so ginmapon manpaabig a manlapud saray epekto na sankamundoan ya inkapasegsegang tan gulo ya asagmak da kaleganan na samay ambilunget a panaon na Guerra Mundial I. Say Nobyo ed parabolo na samploran mamarikit, siempre, et si Jesu-Kristo, tan say simbolikon nobya to et say matoor a kongregasyon ton 144,000 a membro a sikara so mikasakey ed sikato diad mangatatawen a Panarian. (Apocalipsis 14:1-4) Impanengneng na kronolohya na Biblia tan saray modernon salaysay a say Nobyon Ari so sinmabi ed espiritual a templo ed samay primabera na 1918. Insan inggapo ton paolien a manlapud patey iray matoor a membro na espiritual a nobya tan inkasakey tora ed inkasikato diad mangatatawen a Panarian. A singa balikas na nakdaan na nobya, ya inretrato na makabat iran mamarikit, ibabaga na Apocalipsis 19:7: “Manliket itayo tan manggayaga itayon tuloy, tan iter tayo ed sikato so gloria, lapud say bansal na Kordero so sinmabi la tan say asawa to so akaparaan la.”
17. (a) Akin a say ‘makabat a marikit’ a klase so manliket? (b) Saray makabat a mamarikit so angitarok na anto, tan sirin makapanggawa na anto?
17 On, say panaon na espiritual ya inkaliing na klasin ‘makabat a marikit’ tan diad impakatalos da ed kabaliksan na “tanda” a ginmapon pinatmag nen 1914 so okasyon ed baleg a panggayaga. Insan inmaplika ed sikara iray salitan: “Maliket iraman so abagaan ed pangdem diad bansal na Kordero.” (Apocalipsis 19:9) Diad parabolo nen Jesus, intarok na limaran makabat a mamarikit so magenap a suplay na managliwawan larak ta pian nayarian dan paliwawaen lamet iray silewan tan sirin miulop ed maliket a libot na kasal a sankaegnaan daray maliwawan silewan. Sanen sinmabi so Nobyo, “saray mamarikit so akaparaan ya akila ed sikato diad piesta na kasal; tan say puerta so akaputan.”—Mateo 25:1-10.
18. (a) Kayari na Guerra Mundial I, say alanaan a nakdaan so siansia nin walaan na magenap a managliwawan Salita na Dios tan say masanton espiritu to ed dalem da a manggawa na anto? (b) Anto so niyabawag ed samay inmunan kumbension kayari na bakal?
18 Tua ed retrato na limaran makabat a mamarikit, say alanaan a nakdaan so angitultuloy ya angiter na masnag tan makapaliket a panangabrasa ed mangatatawen a Nobyo, say panaon na pikasal to ed nobyan kongregasyon to so sinmabi la. Kayari na espiritual a gonigon ya asagmak da kaleganan na Guerra Mundial I, siansia nin walaan ira ed dalem da na magenap a managliwawan Salita na Dios tan say masanton espiritu to a bilang “basehan dalin” a manelsel ed kimey na panagliwawa ed katooan nipaakar ed Panarian na Dios diad panamegley na Nobyon-Ari to. (2 Corinto 4:7) Matukotukoy, nen Setyembre 1-8, 1919, say ‘makabat a marikit’ a klase so nanggawa ed inmunan internasyonal a kumbension da ed Cedar Point, Ohio. Diman et inyanunsio ra so improponin kipalapag na balon magasin a niarum ed The Watch Tower. Sayan balon palapagan so tawagen na The Golden Age, ngaran a mangisalaysay ed nengneng na panaon a panggayagaan na nipawil a katooan kaleganan na Sanlibon Taon ya Uley na Nobyon-Arin si Jesu-Kristo. Satan a magasin so siansia nin nipapalapag, natan et diad leksab na ngaran ya Awake!
19. (a) Panon so impagmaliw na ‘makabat a marikit’ a klase a manunan nengneng na “tanda” na “kiwawala” nen Jesus? (b) Siopa ra natan so maliket ed dalin?
19 Kayarin tuloy na saman a kumbension, say inmunan paway na The Golden Age—Oktubre 1, 1919—so nipalapag. Tekep na saman a palapagan tan arum niran palapagan na Watch Tower Bible and Tract Society, say matoor a ‘klasin marikit’ so angitultuloy ed kimey dan manliwawa ed mundo. Inkurang da so kayari-bakal a kimey na ‘panangipulong ed sayan maong a balita na panarian ya onkanan pantasi ed amin a nasyones’ sakbay ya onsabi so anggaan na sayan sistema na bengabengatla. (Mateo 24:14) Diad sayan dalan say alanaan a nakdaan, say ‘makabat a marikit’ a klase, so nagmaliw a manunan nengneng na atugyop a “tanda” a mananda ed agnanengneng a “kiwawala” nen Jesus a bilang naikdan-na-pakayarin Ari tan “say konklusyon na sistema na bengabengatla.” Saman a managliwawan kimey so nagkalalon mabiskeg a prueba a “say panaon na anggaan” so ginmapo ed samay impanampot na Panaon Gentil nen 1914. Maliket ya amin iraman so makakanengneng a tekep na pakatalos ed sayan nipasakbay a nengneng na “tanda” ed amin a kabaliksan to!
Panon So Iyebat Yo?
◻ Ed anto a say kimey na panangipulong ed Panarian so sakey a nengneng?
◻ Siopa odino anto so inretrato na akakabayo ed amputin kabayo; say ambalangan kabayo; say andeket a kabayo; say mapusisaw a kabayo?
◻ Say nasyonal ya inkadesyang na Judios nen 70 K.P. so sakey a mapropetikon tipo na anto?
◻ Siopa so manibukel na ‘makabat a marikit’ a klase, tan akin a sikara so manliket?
[Litrato ed pahina 22]
‘‘Ibagam ed sikami, anto so tanda na kiwawalam?’