Onkiwas a Tampol Diad “TANDA”!

“Mansiansian aliing, lapud agyo amta so agew nisay oras.”​—MATEO 25:13, Byington.

1. Akin ya aliwan makabat so pagmaliw a singa saray makulangkulang a mamarikit ed parabolo nen Jesus?

DIAD liwawa na onsasabin binmalitok a panaon a para ed mundo na arondon a katooan, agaylan kakulangkulangan so pagmaliw a singa saraman so limaran makulangkulang a mamarikit ed parabolo nen Jesus! Kinmiwas iran atrasadon tuloy tan ag-ira akaloob ed “panarian na katawenan.” Saraman a makulangkulang so agkinmiwas a bilang managliwawa ed nakaukolan a panaon. (Mateo 25:1-12) Sano “sayan maong a balita na panarian” so nipulong “ed amin a panaayaman a dalin ya onkanan pantasi” tan “say anggaan” so onsabi, nabalang da so pankanawnawa ran mibiang ed satan ya aglan-balot-naulit a pribilehyo na kimey.​—Mateo 24:14.

2, 3. (a) Diad anton bilin so angisampotan nen Jesus na parabolo ed samploran mamarikit? (b) Akin a satan a bilin so siansia nin nipanpanaon, tan diad anto sirin so nakaukolan a lawas wala ed ‘makabat a marikit’ a klase?

² Sikato no akin a sinampotan nen Jesu-Kristo so parabolo to ed sayan bilin: “Mansiansia kayon manbantay, sirin, lapud agyo kabat so agew nisay oras.”​—Mateo 25:1-13.

³ Saraman a salita na Nobyon Jesu-Kristo so nipanpanaon a tuloy, ilautla natan, 71 taon ed sayan “konklusyon na sistema na bengabengatla.” Anggan diad sayan kaunoran a petsa say nakdaan na ‘makabat a marikit’ a klase so agmikabat ed agew odino oras sano “say puerta” so nakaputan ed malaknab nin pankanawnawa diad pakaawat ya onloob ed mangatatawen a Panarian pian mikasakey ed Nobyo ya akipaknaan dan piasawaan. Pirmin nakakaukolan to a saraman so mamaneknek na inkasikaran makabat a mamarikit so pansiansian naikdan na espiritual a larak. Diad panggawa na ontan et pasisindagen da so liwawa ra diad pangilalaknab ed “sayan maong a balita na panarian” ya onkana ed sankadalinan, internasyonal a pantasi ya anggad onsabi “so anggaan.”​—Mateo 24:14; Marcos 13:10; Apocalipsis 14:6, 7.

“Karnero” tan “Kanding” So Nibibiig Natan

4. Unong ed salaysay nen Mateo, anton kaunoran a parabolo nen Jesus so nepeg a nasumpal a bilang kabiangan na “tanda” na “kiwawala” To?

⁴ Sakbay ya onsabi “so anggaan” ed “konklusyon na sistema na bengabengatla,” sananey a kimey na panangibiig ed totoo so nepeg a nagawa tan manserbin kabiangan na “tanda” a mangipatnag a sikatayo so wala la ed “panaon na anggaan.” (Daniel 12:4) Saya so kasumpalan na parabolo nen Jesus ed karnero tan kanding, a kinaputan nen Mateo so salaysay to ed baleg a propesiya nen Kristo nipaakar ed “tanda” na agnanengneng a “kiwawala” To tan ed “konklusyon na sistema na bengabengatla.”

5. Kapigan so kagawa na kibiig na totoo a singa karnero tan kanding?

⁵ Imanoen natan so impasakbay nen Jesus nipaakar ed saya, a singa nikurit ed Mateo 25:31-46. Inggapo to so parabolo diad impangikuan: “Sano say Anak na too so onsabi ed gloria to, tan amin na saray angheles so kaiba to, saman la sikato so onyurong ed maglorian trono to. Tan amin na saray nasyones so natipon ed arap to, tan pambibiiganen toray totoo ed sinansakey, a singa say sakey a pastol et ibiig toray karnero a manlapud kanding. Tan saray karnero so ipasen to ed nikawanan to, balet saray kanding so diad nikawigi to.” Anto so ontumbok? Intuloy nen Jesus:

6. Anto so ibaga na Pastol-Ari ed totoo diad nikawanan to?

⁶ “Saman la say ari so mangikuan ed saraman so wala ed nikawanan to, ‘Galidia, sikayon benindito nen Amak, tawiren yo so panarian ya imparaan ed sikayo a nanlapud inkiletneg na mundo. Ta siak so narasan tan inikdan yoak na nakan; siak so napgaan tan inikdan yoak na inumen. Siak so sankaili tan pinarawes yoak; laksebak, tan kinawesan yoak. Nansakitak tan dinalaw yoak. Nipangaw ak tan linma kayo ed siak.’

7. Antoy itepet na matunong, malakarneron totoo, tan panon so iyebat na Ari?

⁷ “Saman la saray matunong so onebat ed sikato, ‘Katawan, kapigan so impakanengneng mi ed sika a narasan tan pinakan mi ka, odino napgaan, tan inikdan mi ka na inumen? Kapigan so impakanengneng mi ed sika a sankaili tan pinarawes mi ka, odino lakseb, tan kinawesan mi ka? Kapigan so impakanengneng mi ed sika a mansasakit odino nipangaw tan dinalaw mi ka?’ Tan inmebat so ari ed sikara, ‘Tua kuan ko ed sikayo, Diad kalaknab a ginawa yo ed sakey ed sarayan kamelagan ya agagik, ginawa yo met ed siak.’”

8. (a) Saray malakanding a totoo so agkinmiwas a tampol a manggawa na anto? (b) Sirin iner so pangibakian na Ari ed sikara a miduma ed matunong, malakarneron totoo?

⁸ “Saray kanding” so ag-onkiwas a tampol ed “tanda.” Agda gawaen iray bengatlan ginawa “na karnero” a klase. Sirin nabasa tayo: “Saman la ikuan to, met, ed saraman so walad nikawigi to, ‘Onarawi kayo ed siak, sikayon inayew, onla kayo ed andi-anggaan ya apuy ya imparaan ed Diablo tan saray angheles to. Ta siak so narasan, balet agyo ak inikdan na nakan, tan siak so napgaan, balet agyo ak inikdan na inumen. Siak so sankaili, balet agyo ak pinarawes; laksebak, balet agyo ak kinawesan; nansakit ak tan nipangaw ak, balet agyo ak dinalaw.’ Saman la onebat ira, ‘Katawan, kapigan so impakanengneng mi ed sika a narasan o napgaan o sankaili o lakseb o mansasakit o nipangaw tan agmi ka nanlingkoran?’ Saman la onebat ed sikara, ‘Tua kuan ko ed sikayo, Diad kalaknab ya agyo ginawa ed sakey ed sarayan kamelagan, agyo met ginawa ed siak.’ Tan saraya so onla ed andi-anggaan a kapegpeg, balet saray matunong so diad bilay ya andi-anggaan.”

9. Diad impanggawa ra na anto kaleganan na kaplesan-agew a kasumpalan na parabolo nen Jesus ed “saray karnero” tan “saray kanding” a sikayo so makapanliket?

⁹ Nayarin sikayo so mibibiang ed kasumpalan na sayan mapropetikon ilustrasyon. Kasin naimano yo so maabig iran bengatla a sinalambit nen Jesus? Kasin ginawa yo so ontan a bengatla ed saray “agagi” to? Maliket kayo no sikayo so kinmiwas a bilang sakey a “karnero” ed sikara!

10. Panoy impangiduma nen Jesus ed saray “agagi” to tan ed saraman so inretrato na “saray karnero” tan “saray kanding,” tan anton letnegan so wala ed saya diad Biblia?

¹⁰ Inter nen Jesus so pandumaan na saray espiritual ya “agagi” to tan saraman so mansumpal a singa karnero odino kanding. Diad panaon na sayan kasumpalan na parabolo, saray “agagi” to et saraman so mangaalig ed sikato diad panamegley na andi-kibot a pangipapalugar da’d inkasikara ed Dios. Singa si Jesus, inyapay da so mapublikon ebidensya na saya diad inkabautismoan da ed danum. Nagkalalo ni, si Jehova, say Ama na Arin Jesu-Kristo, so nagmaliw a mangatatawen ya Ama ra diad impangilalak to’d sikara ed masanton espiritu To tan sirin ginawa toran espiritual ya “agagi” na Anak to. Saya so angipasen ed sikara diad dasig a para ed sakey a pasen diad mangatatawen a Panarian a kaiba ra so Panguloan ya Agi ra, si Jesu-Kristo, say “Ari na arari tan Katawan na kakatawan.” (Apocalipsis 19:16) Diad saya nisulat nipaakar ed sikato: “Ta namparan saman so mamasantos tan saraman so napasantos so nanlapun amin ed sakey, tan nisengeg ed saya et sikato so ag-ambaing a manawag ed sikara ya ‘agagi,’ a singa kuanto: ‘Iyabawag ko so ngaran mo ed saray agagik; diad pegley na kongregasyon idayew taka ed kanta.’” (Hebreos 2:11, 12) Dia say Salmo 22:22 so niyaplika ed niglorian Anak na Dios, si Jesu-Kristo.

11. Kasin dakel ni natan ed dalin so espiritual ya “agagi” nen Jesus, tan anton klase, odino “kongregasyon,” so katibukelan da?

¹¹ Wala ni ed dalin so nakdaan na saratan ya espiritual ya “agagi” na manuuley lan Arin Jesu-Kristo. Bilang sakey a klase, odino “kongregasyon,” tibukelen da so “matoor tan makabat ya aripen” ya impasakbay nen Jesus ed propesiya to ed “konklusyon na sistema na bengabengatla.” Inkuanto: “Siopa a peteg so matoor tan makabat ya aripen a tinuro na katawan to a mangasikaso ed saray sankaabungan to, pian iter to ed sikara so tagano ra ed manepeg a panaon? Maliket itan ya aripen no sikato so nasabian na katawan to a manggagawa na ontan. Tua kuan ko ed sikayo, turoen To a mangasikaso ed amin na saray kayarian to.”​—Mateo 24:45-47.

12. (a) Nanlapulad 1919 say “aripen” a klase so matalona ed panggagawa na anto? (b) Diad antoran “kayarian” so akaturoan ya asikasoen na “aripen”? (c) Say “aripen” natan ya onkikiwas so kabiangan na anto?

¹² Saray maawaran a katuaan so onebat ed tepet nen Jesus nipaakar ed pakabidbir ed sayan “aripen.” “Say kongregasyon” a manserbin bilang “aripen” so tinibukel na inter-na-Dios ya “agagi” to a wala ni ed dalin. Sikato so pareho ed saman so ‘makabat a marikit’ a klase. Nanlapulad 1919 sayan “aripen” so matalona diad pangipaparungo to na tariwan espiritual a taganon manlapud Biblia ed “sankaabungan” na Katawan, a satan so gagawaen da ed sakey a panaon a “sankamanepegan” ed satan. Sirin, say agnanengneng a Katawan so anuro ed sayan napanmatalkan ya “aripen” a klasen “mangasikaso ed amin a kayarian to” ed espiritual a nengneng. Nagkalautlan saya so tua nipaakar ed panangipulong ed “sayan maong a balita na panarian” diad sankadalinan, a panuuleyan to. Anggad natan et sayan panagtasi ed Panarian so linmaknab! “Say matoor tan makabat ya aripen” ya onkikiwas so sakey a prominentin kabiangan na “tanda” a mangipapanengneng ed sikatayo no iner la so kawalaan tayon panaon.

13. Nanlapulad kapigan a saray “amin a nasyones” so natitipon ed arap na Ari, tan kapigan so inggapo na “aripen” a manitipon ed “saray karnero” ed nikawanan To?

¹³ Diad saray membro na “aripen” a klase so nanggawaan na saray matunong a “karnero” na maabig iran bengatla. Saray simbolikon karnero tan kanding so totoo ed amin a nasyones a kiiiteran natan na pantasi ed Panarian. Kanian, singa inrepresenta na ontan a karnero tan kanding, “amin a nasyones” so natitipon ed arap na Ari ya akayurong ed mangatatawen a trono to nanlapulad impanampot na Panaon Gentil nen 1914. Mitukoyan ed satan a nipasakbay a panagtipon, makatantanda so taon 1935. Say Watch Tower Bible and Tract Society, ya inusar na “aripen” a klase, so diad saman et walaan na 49 sangan opisina ed sankadalinan. Diad saman a taon et say imano na “aripen” so nagkalautlan nipaarap ed mangaraldalin a malakarneron totoo, tekep na panmorian panipon ed sikara diad nikawanan a dapag na manuuley lan Arin Jesu-Kristo. Sirin, sarayan nanlapud amin a nasyones so akilimog a maapit ed “aripen” a klase.

14. Diad liwawa na Juan 10:16, anton balon panmoria so inala ed matunong a malakarneron totoo, tan kaunongan karakel na sangasangan opisina na Watch Tower Society so manlilingkor ed sikara natan?

¹⁴ Saraman so matunong, malakarneron totoo so aglara naikdan na malaknab a klasipikasyon a bilang “totoon maong linawa.” (Lucas 2:14, Douay Version) Sikara la so agmoriaen a bilang agnapiho, aliwan organisadon klase na matakot-ed-Dios a totoo ed amin a nasyones​—abalang a karnero, a singa panangibaga. Inkuan nen Jesus a tiponen to so “arum a karnero” tan ikasakey tora ed “sakey a pulok” ed nakdaan na “aripen” a klase. (Juan 10:16) Say panagtipon ed ontan ya “arum a karnero” a nanlapulad saman so sakey a matalonan kabiangan na “tanda” a mananda ed “konklusyon na sistema na bengabengatla.” Tan pian sikara so nalingkoran say Watch Tower Society so walaan la natan na 95 sangasangan opisina.

Atumangan So Nipanpanaon ya Inkiwas ed “Tanda”

15. Pian “natawir so panarian,” antoran nakakaukolan so nepeg a sumpalen na “saray karnero”?

¹⁵ Unong ed parabolo nen Jesus, say matunong a “karnero” so nepeg a manumpal ed saray nakakaukolan kaleganan na “konklusyon na sistema na bengabengatla.” Nakaukolan dan bidbiren tan awaten iray espiritual ya “agagi” nen Kristo a manibukel na “matoor tan makabat ya aripen” a klase. “Say karnero” so nepeg met a manggawa na maabig iran bengatla ed “aripen” a klase, a sikara so dalawen da sano sikara so nipangaw ya agmakatunongan. Sayan “karnero” so nepeg a manggawa na ontan pian napanggayagaan da so bendisyon na mangatatawen ya Ama tan sikara so imbitaan na Arin Jesu-Kristo a “manawir ed panarian ya imparaan ed [sikara] nanlapulad inkiletneg na mundo.”​—Mateo 25:34.

16. Diad saray salitan “tawiren so panarian,” say Ari so mangiimbita ed “saray karnero” ya onloob ed anto, a makaliktar ed anton “bakal”?

¹⁶ Lapud sarayan “karnero” so aliwan espiritual ya “agagi” na Ari, agtora imbitaan a miyurong ed mangatatawen a trono tan miuley ed sikato diad nikabiig a sanlibon taon na uley to. Diad saray salita ton “tawiren so panarian,” sikara so iimbitaan ton onloob ed panaon na Panarian kayari na paneral to ed amin na saray agmaridios a panarian na sayan mundo kaleganan na “bakal na baleg ya agew na Dios a Makapanyarin-amin” diad Har-Magedon. (Apocalipsis 16:13-16) Dakel ed saray malakarneron totoo natan a manbibilay so makaliktar ed satan a bakal na amin a bakal tan onloob ed Sanlibon Taon ya Uley nen Kristo ya agla ompatey.

17. Panoy pisalita na Ari ed “saray karnero,” tan panon so impakagamor to ed bengatlan ipatawir ed sikara?

¹⁷ Kanian say Arin Jesu-Kristo so misasalita ed sarayan “karnero” a singa ed saray anak to a say panaon da so sinmabi la pian onloob ed sakey a tawir a manlapud sikato. Diad impatey to bilang sakey ya ayadyarin too pian itarya to so dondon bagat ed amin a katooan, insuko to so amin ya ilalo ed personal a panggayaga to ed mangaraldalin a Paraiso. (Lucas 23:39-43) Diad sayan pamaakaran si Jesus, “say unor ya Adan,” so aliwan singa “say inmunan toon Adan” a nankasalanan tan imbalang to so mangaraldalin a Paraiso a para ed amin ya ilalak to. Sirin say inkioli nen Jesu-Kristo, a nagmaliw ya “Andi-anggaan ya Ama” na amin ya arondon a mundo na katooan, so walaan na bengatlan ipatawir ed sarayan malakarneron totoo ed dalin. (1 Corinto 15:45; Isaias 9:6, 7) Say atooan a pamilya so niletneg ed “inmunan Adan,” a tekep na amin ya ilalo to ed Paraiso tan pankanawnawa. Balet saman ya abalang a paraiso so nipawil diad panamegley na Panarian na Dios ed lima na “unor ya Adan,” si Jesu-Kristo.

18. Diad anton pantalos a say nasasakupan na Panarian so “niparaan ed [saray karnero] a nanlapud inkiletneg na mundo?

¹⁸ Aliwan anggad kayari na inkapataynan da ed inmunan Paraiso a si Adan tan Eva so ginmapon nanilalak. Say komaduan anak da, si matunong ya Abel, so pinatey na inmunan anak da, si Cain. Kanian say anak dan si Seth so impasen ya angala na pasen nen Abel. Diad inkianak na ontan ya ilalak, say mundo na katooan so niletneg. Balet sakbay na saya, sanen saray atateng na mundo na katooan so apapaway ed Paraiso, ginawa nen Jehovan Dios so mapangasin sipan to nipaakar ed sakey a “bini” a manugat, odino manmekmek, ed ulo na simbolikon Uleg, si Satanas a Diablo. Satan a “bini” so magmaliw a sakey a maarin Bini, tan saya so managlawi ed sakey a Panarian, unong ed gagala tan asakbay ya anengneng na Dios. (Genesis 3:15) Sano si Satanas ya Uleg tan say bini to so nabalor la, sirin, say arondon a katooan so onloob ed nasasakupan na Panarian diad dalin, diad leksab na mangatatawen a gobierno na mananalon Bini a manmekmek ed Uleg tan ed bini to. Diad onia et “say panarian” a “tawiren” na malakarneron totoo ed Andi-anggaan ya Ama ra, si Jesu-Kristo, et say nasasakupan na Panarian ya “imparaan ed [sikara] a nanlapud inkiletneg na mundo.”

19. Anton nengneng na gapo so onwala ed dalin diad kayari-Armagedon a sistema na bengabengatla?

¹⁹ Lapud saray simbolikon kanding so naderal ed Armagedon, saray niliktar a “karnero” so mangiter na matunong a gapowan diad kayari-Armagedon a sistema na bengabengatla diad sakey a Paraison dalin. Nipaakar ed saya, inkuan nen Jesus: “Saraya [malakanding] so onla ed andi-anggaan a kepegpeg, ingen saray matunong so diad bilay ya andi-anggaan.”​—Mateo 25:46.

20. Panon so pakapaliis ed aliwan pangipatalos ed saray nengneng na “tanda”?

²⁰ Legan na sayan “konklusyon na sistema na bengabengatla” nanlapulad impangangga na Panaon Gentil nen 1914, “saray karnero” tan “saray kanding” so mandumaan diad nengneng na panangipatalos da ed “tanda” na “kiwawala” nen Jesus. Lapud sikatayo so agnasuppiat a wala ed panaon na panangukom, sayan tepet so makabaliksan: Anto so ituro na “tanda” ed sikatayo? No sikatayon dili so mangukom, nayarin aliwa so pangipatalos tayo ed saray nengneng na satan a “tanda.” Sirin maabig so pangitepet: Anto so inkuan nen Jesu-Kristo a nepeg ya ipanengneng na sayan atugyop a “tanda” ed sikatayo? Unong ed sikato, nepeg ya ituro to a say peles a sistema na bengabengatla so mangangga lan magano diad “baleg a kairapan” ed mas lalon mabiskeg a kadederal nen say sankagloboan a Delap ed agew nen Noe.​—Mateo 24:21.

21. (a) Anggaman say “baleg a kairapan” so wala ni ed arapen, akin a nepeg tayo so manliket? (b) Anton pankanawnawa tan posibilidad so wala ed “saray karnero” a klase natan?

²¹ Ingen, manliket, ta sayan “tanda” so mangituturo met a say Milenyon Uley nen Jesu-Kristo so asingger la, ya akaparaan lan onggapo diad kayari kaderal na sistema na bengabengatla nen Satanas ed dalin. (Lucas 21:28) Kanian, diad leksab na madibinon pananalimbeng walaan kayo na sankablian a pankanawnawan makaliktar ed satan a “baleg a kairapan” pian onloob ed balon sistema na bengabengatla, a ditan so panayaman na inkatunong ed ando lan ando. Peteg, niiyan ed arap yo so posibilidad na aglan balot ipatey noagta ed pambilay na andi-anggaan tan apapalar ed sakey a paraison dalin diad leksab na sankatalbaan ya inkasoberano nen Jehovan Dios!

22. (a) No sikatayo so onkiwas ed “tanda” a tampol tan susto, anto so gawaen tayo? (b) Nisiglaot ed “tanda,” panon so kaalangon nen Jesu-Kristo?

²² Balanglan sikatayo so kabiangan na espiritual ya “agagi” nen Kristo odino saray matunong a “karnero,” sirin, onkiwas itayo ed “tanda” a tampol tan susto. Mibiang itayon malaknab ed kasumpalan na manunan nengneng to: “Sayan maong a balita na panarian so nipulong ed amin ya atooan a dalin ya onkanan pantasi ed amin a nasyones.” Sirin andian itayo na takot sano “say anggaan” so onsabi. Imbes, say gayaga tayo so manliplippua! Sirin, met, si Jesu-Kristo so naalangon a bilang napanmatalkan a manangipasakbay ed dakel-a-nengneng a “tanda . . . na konklusyon na sistema na bengabengatla.”​—Mateo 24:3-25:46.

Kasin Naebatan Yo?

◻ Kapigan so kibiig na totoo a singa karnero tan kanding?

◻ Makapanliket kayo diad panggawa na anto kaleganan na kasumpalan na parabolo nen Jesus ed karnero tan kanding?

◻ Siopa so manibukel na “agagi” na Ari tan “say matoor tan makabat ya aripen”?

◻ Ta pian “natawir so panarian,” antoran nakakaukolan so nepeg a sumpalen na malakarneron totoo?

◻ Anto so gawaen tayo no sikatayo so onkiwas a tampol tan susto diad “tanda” na kiwawala nen Jesus?

[Antikey a Paimano ed pahina 12]

Onkiwas a tampol ed “tanda” na “kiwawala” nen Jesus. Say panggawa na ontan et kabaliksan to so maandon bilay ed Paraiso