Apalaknab ya Aktibidades Kaleganan na Kiwawala nen Kristo
“Saman la say Ari inkuan to’d saray wala’d nikawanan a lima to, Galidia, sikayo bendito nen Amak, tawiren yo’y panarian ya inparaan ed sikayo a nanlapu ed inletneg na mundo.”—MATEO 25:34.
1. Diad anton dalan a say pa·rou·siʹa nen Kristo so singa “saray agew nen Noe”?
KIWAWALA nen Kristo—say abayag lan aalagden ya ebento! Say panaon a singa “saray agew nen Noe,” a sinalita nen Jesus a mikonektaan ed “say angaan na mundo,” so sinmabi ed taon 1914. (Mateo 24:3, 37) Balet anto so kabaliksan na kiwawala odino pa·rou·siʹa nen Kristo parad alanaan a nakdaan a “matoor tan makabat ya aripen”? (Mateo 24:45) Siempre, sikaray magmaliw a lalon aktibo bilang manangakbibit na liwawa! Nagawa iray makapakelaw a bengatla! Sakey ya agnaparaan a pananugyop a kimey so ngalngali la onggapo.
2. Anton panaglinis so nagagawa diad kasumpalan na Malaquias 3:1-5?
2 Anggaman ontan, ununa sarayan alanaan a Kristianos so mankaukolan na panaglinis. Unong a nipasakbay ed Malaquias 3:1-5, NW; si Jehova a Dios tan say “mensahero na sipanan,” to si Jesu-Kristo so sinmabin mansukimat ed espiritual a templo diad primavera na 1918. Onggapo so panangukom ed “abung na Dios.” (1 Pedro 4:17) Impasakbay na Malaquias 3:3: “Sikato [si Jehova] onyorong naani a singa say manlinis tan mangogol na pilak, et gogolan to naani so saray anak nen Levi, et linisan to ra naani a singa say balitok tan say pilak.” Satan so peryodo na panaggogol tan panaglinis.
3. Akin ya importanten nagawa so espiritual a panaglinis?
3 Diad ilabas ed sayan panangukom, ya amantok nen 1918, say nakdaan na aripen a klase so alinisan manlapud minumundo tan relihyoson inkadutak. Akin a linisan ira nen Jehova? Lapud nalalanor so espiritual a templo to. Saya so singa-templon oksuyan parad panangidayew ed si Jehova diad letnegan na mananondon a bagat nen Jesu-Kristo. Labay nen Jehova a say templo to et walaan na malinis a kipapasen ta pian sano say baleg a bilang na saray managdayew a walaay mangaraldalin iran ilalo so nitarok diman et naromog day pasen a narerespetoy sankatalbaan ya inkasoberano to, a ditan et naaalangon so madibinon ngaran to, tan ditan natutulok iray matunong a ganggan to. Kanian, apresyaen day Jehova tan miulop ed pangipakabat ed saray engranden gagala to.
Kaaruman Iran Pribilihyo
4, 5. (a) Panon a say tepet nen Jesu-Kristo so manangat ed kada klasen aripen natan? (b) Diad antoran dalan a natalosan iray balikas a “matoor tan makabat ya aripen” tan “sankaabongan” to? (c) Anto so inganggan nen Jesus ed aripen to?
4 Nen 1919 say alinisan ya aripen a klase so makapanilalo ed lawas-onlalaknab ya aktibidades. Nen 1914, si Jesu-Kristo, say Katawan da, so akagamor na mangatatawen a Panarian. Sanen sikato so pinmawil ed sankaabungan to pian sukimaten ya amin so “sankaabongan” to, sikato so akawesan na maarin dignidad, ya agto akayarian sanen sikatoy wadia’d dalin. Anto so aromog to? Kasin say aripen a klase so okupadon manatalima para’d intereses na Katawan? Unong a nirekord ed Mateo 24:45-47, angitepet na sakey a tepet si Jesus a mankakaukolan ed balang alanaan a babangatan ya usisaen so personal a debosyon to’d Mesias nen Jehova: “Siopa sirin so matoor tan makabat ya aripen, a sikato’y inpasen na katawan to ya mangimaton ed sankaabongan to, a mangiter ed sikara na tagano ed panaon a kinepegto? Mapalar so satan ya aripen, a sikato’y nasabian na katawan to ya onta’y gagawaen to. Tua kuan ko ed sikayo, ya sikato’y ipasento’d amin a wala ed sikato.”
5 Mapatnag, say deskripsyon nen Jesus ed sayan matoor ya aripen so agmatukoy ed siopaman a sinansakey. Andi, balet dedeskribien to so matoor ya alanaan a kongregasyon nen Kristo bilang interamenti, bilang sakey a grupo. Saray sankaabungan so alanaan a papatumbok nen Kristo bilang indibidual. Amta nen Jesus a kaukolan ton saliwen irayan alanaan diad dilin dala to, kanian matukotukoy so impanukoy ton kolektibo ed si sikara bilang aripen to. Kuan na 1 Corinto 7:23 nipaakar ed sikara: “Sikayo asaliw kayo ed sakey a bili; ag kayo magmaliw ya aripen na toto-o.” Inganggan nen Jesus so aripen a klase to a mangisindag ed liwawa ra pian managyat tan manggawa na arum niran babangatan tan mantultuloy a pakanen [da] iray sankaabungan diad pangiter da’d sikara na espiritual a tagano ed dugan panaon.
6. Panon a say aripen so atumangan bilang resulta na impansukimat nen Jesus?
6 Nanlapulad inggapo na kiwawala nen Kristo ya anggad 1918, say aripen a klase, anggaman ed ag-inkapopular, panamasegsegang, tan anggan arum ya inkawetwet, so manggugunaet a mangiiter na nipanpanaon a tagano ed saray sankaabungan. Onia so aromog na Katawan sanen inggapo to so panagsukimat. Aliketan si Katawan a Jesus, tan nen 1919 et inyabawag ton maliket so matoor ya aripen a klase. Anto so makapagayagan tumang na aripen lapud ginawa to so nepeg a gawaen ton impabtang na Katawan? Sakey a promosyon! On, babaleg iran responsabilidad so niiter diad panangiyuna ed intereses na Katawan to. Lapud say Katawan so mangatatawen lan Ari, kanian saray mangaraldalin a kayarian to so nagmaliw a lalon mabli.
7, 8. (a) Antoray ‘amin a kien’ na Katawan? (b) Anto so kakaukolanen ed aripen diad pangasikaso’d sarayan kayarian?
7 Kanian, anto so “amin a wala ed sikato”? Saraya so amin ya espiritual a kaykayarian diad dalin a nagmaliw a kien nen Kristo a misiglaot ed autoridad to bilang mangatatawen ya Ari. Mapekder a laktipen na saya so ganggan a manggaway babangatan nen Kristo, tekep na say engranden pribilihyon onakto bilang saray representante na niletneg a Panarian ed amin a nasyones na mundo.
8 Say ontan a promosyon a mangasikaso ed amin a kayarian na Katawan so mankaukolan ed satan ya aripen a klase a mangiter na nagkalalon panaon ed panumpal ed kimey na Panarian tan siempre say panagpaalagey na babaleg iran pasilidad para’d satan a kimey. Walaan itan na malalaknab a lawak na kimey—say interon panaayaman a dalin.
Pananugyop na Karnero
9. Anto so nansumpalan na panangilaknab ed aktibidades na aripen?
9 Kanian, situtulok so matoor tan makabat ya aripen a klase nen Kristo ya angilaknab ed aktibidades to. Say resulta? Saray kaunoran ed alanaan ya 144,000 so atugyop. Insan say pasingawey nen Juan unong a nirekord ed Apocalipsis 7:9-17 so nagmaliw a makapagayaga, makapaliket a kapetegan. Nagkalautla nanlapulad 1935 a mangagayaga so aripen a klasen makakanengneng ed mantultuloy a panangiparungtal ed kasumpalan na sayan pasingawey. Diad interon dalin, sakey a “baleg ya olop” na minilyon so onloloob natan ed espiritual a templo nen Jehova bilang managdayew to. Imbaga na anghel nen Jehova ed si Juan ya anggapoy toon makayarin mamilang ed sayan baleg ya ulop. Kabaliksan ton anggapoy getar ed bilang na totoon itarok na aripen a klase ed espiritual a templo nen Jehova. Basta lukas so dalan, say kimey na pananugyop ed sikara so mantultuloy.
10. Diad anton maaron aktibidad a nalalanor natan so aripen?
10 Say matoor ya aripen a klase so walaan na seryoson responsabilidad diad pangasikaso’d mantutultuloy ya ondaraak a bilang na “arum a carnero,” ya amta ra’n sarayan mala-karneron manlalapud amin a nasyones so mablin tuloy ed Katawan, si Jesus. Sikaray peteg a pulok to. (Juan 10:16; Gawa 20:28; 1 Pedro 5:2-4) Kanian tekep na panangaro ed Katawan tan para’d pulok, malikeliket so aripen a klasen manatalima ed espiritual iran pankaukolan na baleg ya ulop.
11-13. Anto so matukoy ya inkomento na datin presidente na say Watch Tower Society nipaakar ed aktibidad na aripen?
11 On, say babaleg a kabiangan na mangaakbibit-liwawan kimey na aripen et lalanoren toy pananugyop ed sarayan mangaraldalin ya uuleyan na Panarian na Dios. Sisingbaten so lawas-ondarakel ya aktibidades na matoor ya aripen, inkuan na datin presidente na Watch Tower Society a si F. W. Franz sakbay na impatey to nen Disyembre 1992:
12 “Nagkalalon uusaren nen Jesu-Kristo so organisasyon a makapakelaw ed kapiganman, a singa naeksperiensiak ed 99 taon na bilay ko. Aliwan basta too so mangiwawanwan ed organisasyon, noagta si Katawan a Jesu-Kristo. Ta satan so nipapakurang a lalon engrande tan makapakelaw nen say naisip tayo. Natan et walaan tayoy organisasyon a linmaknab ed sankamundoan. Satan so nipapakurang ed Mamaamianen tan diad Mamaabalaten, diad Sagur tan Bukig. Saksakey a persona labat so responsable ed sayan makatantandan panangilaknab—say Anak na Dios, a mangaasikaso’d matoor tan makabat ya aripen a klase. Sikato so manusumpal ed saray responsabilidad to, tan satan so sengegan na sayan engranden panangilaknab a natatasian tayo.
13 “Say pamaakaran so agnagawaan na sakey a too. Walaan tayoy organisasyon a teokratiko, tan satan so nipapakurang ed teokratikon paraan, diad iwawanwan-na-Dios a paraan. Anggapoy too, nisay manangiletneg na Watch Tower Bible and Tract Society so makapangaksobi odino napagalangan ed agawaan diad interon dalin. Satan so basta makapakelaw?” Agta amin na saramay kabiangan na baleg ya ulop so sigpot-puson mipakna ed saramay liknaan na inatey lan si Brother Franz? On, peteg a sikaray misalamat a tuloy ed apalaknab ya aktibidades na matoor ya aripen.
Saray Uuleyan na Panarian
14, 15. (a) Anto so inyilustra nen Jesus diad parabolo na saray talento (Mateo 25:14-30)? (b) Matukotukoy, anto so ontumbok ed kapitulo 25 na Mateo?
14 Diad Mateo kapitulo 25, say ilustrasyon nen Jesus ed saray karnero tan kanding so manedeskribe ed sayan baleg a kimey na pananugyop ed mangaraldalin ya uuleyan na Panarian na Dios. Diad akadkaunan parabolo nipaakar ed saray talento, iyiilustra nen Jesus a saray alanaan a babangatan a maniilalon miuley ed sikato diad mangatatawen a Panarian to so nepeg a mankimey a padaaken iray mangaraldalin a kayarian to. Matukotukoy sirin diad ontumbok a parabolo ya iretrato nen Jesus no anto so nakakaukolan ed saramay malabay a magmaliw ya uuleyan na mangatatawen a Panarian to.
15 Imanoen iray balikas to’d Mateo 25:31-33: “Sano onsabi so Anak na too ed gloria to, tan kaolop to ray amin ya angeles, saman la onyorong ed trono na gloria to. Tan natipon naani ed arap to so saray amin a nacion: tan panbibiiganen to ra naani sakey tan sakey, a singa say pastol ibiig to so saray kanding. Tan ipasen to ’ray carnero ed nikawanan a lima to, balet saray kanding ed nikawigi.”
16. Panon a natutugyop iray nasyones tan nibibiig iray totoo?
16 Sinmabiy Jesus ed gloria to nen 1914. Diad pangiyuuna ed kiwas, sikato, pati ed amin ya angheles to so angataki tan amataynan ed demonikon kakabusol to’d tawen. Say tinmumbok ed parabolo to so ontulong ed sikatayon mangapresya a say iyurong nen Jesus ed maglorian trono et mangirerepresenta na posisyon ed panangukom kaleganan na kiwawala to. Say pananugyop na amin a nasyones ed arap to et kabaliksan ton si Jesus so onkikiwas para’d saray nasyones bilang say prospektibon pulok to, diad piguratibon panagsalita. Satan so pulok a tugyopen na saray karnero tan kanding. Anggaman mabayag so pangibiig na saray karnero manlapud kanding diad literal a pulok, say sankadalinan a panangibiig na totoo a bulos a manpili na maptek tan mauges so mas mabayag. Saya so lapud say panangibiig so nibase’d kada kurang na indibidual.
17. Akin a say situasyon natan so seryoso para’d amin a totoo?
17 Diad parabolo, say Pastol-Ari so mangipasen ed saray malakarnero ed nikawanan a lima to tan saray malakanding ed nikawigi to. Say wala’d nikawanan-a-lima et mansumpal ed panangukom a walaan na paborablen resulta—andi-anggaan a bilay. Say wala’d nikawigin-lima et irerepresenta to so agpaborablen panangukom—say andi-anggaan a kadederal. Say panetermina na Ari ed pamaakaran so walaan na seryoso iran pansumpalan.
18. Akin a say agpakanengneng ed Ari et agmangipuera ed siopaman?
18 Say agnanengneng a pananguley na Anak na too kaleganan na kiwawala, odino pa·rou·siʹa to, so agmangipuera ed siopaman. Nagkalalon ondarakel iray malakarneron miuulop ed aripen a klase natan diad panagpulong na maong a balita na Panarian na Dios ed sankamundoan, ya isisindag daray liwawa ra. Peteg a say panagtasi ra so onsasabi ed saray arawin suyok na dalin.—Mateo 24:14.
19. Antoran kalidad na karneron klase so iyiilustra diad parabolo na saray karnero tan kanding?
19 Akin a tumangan na Pastol-Ari iramay kabiangan na karneron klase na abenditon arapen? Lapud sigpot-puson pananuporta ra ed panangipulong-na-Panarian a kimey tan say panangasin ipapanengneng da ed saray alanaan ya agagi to, ya ipapasen nen Jesus a gagawaen ed sikaton mismo. Kanian ikuan na maarin Anak na too ed sikara: “Galidia, sikayo bendito nen Amak, tawiren yo’y panarian ya inparaan ed sikayo a nanlapu ed inletneg na mundo.”—Mateo 25:34; 28:19, 20.
Tutulongan so Ari
20, 21. Anton ebidensya so iiter na karnero a sikaray ontatalindeg ed dapag na Panarian?
20 Imanoen a sanen iimbitaan na Ari irayan karnero a manawir ed mangaraldalin a pasen na Panarian na Dios, sikaray kinmelaw. Sikatoy tinepetan da: “Katawan, kapigan so inpakanengneng mi’d sika?” Inmebat: “Tua kuan ko’d sikayo, Bangta sikato’y ginawa yo ed sakey ed saraya’n agik, angan saraya a kamelagan, sikato’y ginawa yo ed siak.” (Mateo 25:40) Sanen si Jesus so pinmatnag ed si Maria Magdalena diad agew na kioli to, sikatoy nansalita nipaakar ed saray espiritual ya agagi to sanen inkuanto ed sikato: “Onla ka ed saray agagik.” (Juan 20:17) Kaleganan na agnanengneng a kiwawala to, si Jesus so walaan labat na melag a nakdaan ed 144,000 ya espiritual ya agagi to a siansian mabilay ed dalin.
21 Lapud si Jesus so agnanengneng diad katawenan, kanian agdirektan gagawaen na malakarneron totoo irayan maaron bengatla ed sikato. Sikatoy nanenengneng da ed trono to dia lambengat ed saray mata na pananisia ra. Aapresyaen nen Jesus so amin iran sagpot da a mangasisti ed espiritual ya agagi to, a magmaliw a kaiba ton mangatatawen a mananawir. No antoy ginawa ed saray agagi to et ipapasen ton personal a gagawaen ed sikato. Saray malakarnero so sigagagalan manggagawa na maong ed saray agagi nen Kristo lapud bibidbiren dan sikaray ontan. Aapresyaen da a saray espiritual ya agagi nen Jesus so embahadores na Panarian nen Jehova, tan labay da so mangiter na espisipikon ebidensya ya ontatalindeg ira ed dapag na satan a Panarian.
22. Panon a say karneron klase so natutumangan? (Ipareng so Apocalipsis 7:14-17.)
22 Anengneng la nen Jehova a sayan malakarneron klase so ompatnag kaleganan na sayan panaon na kiwawala na Anak to, tan sikato so walaan na niganan makapakelaw a tumang para’d sikara! Tawiren na baleg ya ulop iray bendisyon na kareenan diad dalin legan na maliket a Milenyon Uley na Ari nen Jehova, si Jesu-Kristo.
23. Diad antoran paraan a saray karnero so sikakabat ya ontutulong ed saray agagi na Ari?
23 Sano kunsideraen tayoray propesiya na Biblia ya onaaplika ed panaon na kiwawala nen Kristo, pati ed parabolo nen Jesus ed saray karnero tan kanding, anto so naimano tayo? Saya: Satan so aliwan kipapasen ya ag-amta tan tsansa so panggawa na maong ed sakey ed saray espiritual ya agagi na Ari a manggawa’d too a karneron walaay matunong a talindeg ed arap na Dios tan ed Ari to. Amta na saray kabiangan na karneron klase so gagawaen da, anggaman agda nanenengneng so manuuley ya Ari ed literal a kamataan da. Panbabanikelan dan tulongan iray agagi na Ari aliwa labat diad materyal a paraan noagta diad espiritual met a paraan. Panon? Diad pangaasisti ed sikara diad panangipulong na maong a balita na Panarian na Dios tan diad panangikondukta na saray panagaral na Biblia ta pian manggawa na saray babangatan nen Kristo. Kanian, natan et wala la so masulok ya apatiran laksan mangaakbibit-liwawan manangiyabawag na Panarian na Dios.
Apalaknab ya Aktibidades
24. Antoran maaron kimey so nanggawa’d aripen a klasen sankaliketan a totoo ed dalin natan?
24 Bitlaen tayo pa iray pigara ed dakel a maabig iran kimey na matoor tan makabat ya aripen. Ununa, say aripen a klase so tinuron mangasikaso’d amin a kayarian na katawan—saray intereses na Panarian to diad dalin—tan sarayan kayarian so mantutultuloy ya ondaraak. Komadua, satan a klase so aliwa labat lan mamapakan ed nakdaan a sankaabungan noagta ed lawas-ondaraak a baleg ya ulop na arum a karnero na espiritual a tagano. Komatlo, say aripen a klase so mangidadaulo ed pangiwawakawak na liwawa na Panarian. Komapat, say sankabalgan a panangilaknab na aktibidades so diad pananugyop na baleg ya ulop na arum a karnero, ya itatarok ira ed espiritual a templo nen Jehova. Komalima, say aripen a klase, tekep na sigpot-puson pananuporta na saray malakarnero so mangitatarya na apabaleg iran pasilidad para’d saray organisasyon na sanga ed sankagloboan, ontan met diad saray hedkuarter diad Estados Unidos. Saratan a maaron sagpot so nanggawa ed aripen a klase a sankaliketan a totoo ed dalin natan, tan apaliket da met so minilmilyon ya arum a totoo natan. Amin na saraya so misasalamat ed si Jehova a Dios tan si Jesu-Kristo, a sikaray mangiwawanwan ed apalaknab ya aktibidades na makabat ya aripen!
25. Panon a saray karnero so makapantultultoy a manuporta ed aripen a klase, tekep na antoran ilalo ed arapen?
25 Say aripen a klase so mamapasyan mankikimey natan ed saray impabtang-na-Dios iran kimey nen say nensaman. Say panaon a natitilak sakbay na iterak na “baley ya irap” so ngalngalin anggapo la! (Mateo 24:21) Agaylan importante a saramay karnero na Dios so mansiansia ed nikawanan a dapag ya apaboran na Pastol-Ari to! Kanian sikatayon amin sirin so mantultuloy a sisisimoon a manuporta ed matoor tan makabat ya aripen a klase. Diad panggawa lambengat ed saya a diad asingger lan arapen et amin a malakarnero so makarengel ed saraman a maliket a salita: “Galidia, sikayo bendito nen Amak, tawiren yo’y panarian ya inparaan ed sikayo a nanlapu ed inletneg na mundo.”
Kasin Naebatan Yo?
◻ Anton inmunan panangukom so tinmumbok ed inkitrono na Ari?
◻ Panon a say Mateo 24:45-47 so walaan na modernon-agew a kasumpalan?
◻ Nipaakar ed apalaknab ya aktibidades, diad antoran aktibidades a misalamat a tuloy so aripen a klase tan say baleg ya ulop?
◻ Panon a say Mateo 25:34-40 so nasusumpal legan na pa·rou·siʹa?
[Litrato ed pahina 16]
Inmatalek na katawan so amin a kayarian to ed matoor ya aripen
[Litrato ed pahina 18]
Inala nen Jesus so maglorian trono to pian ukomen so katooan