Nisan 14​—Sakey ya Agew a Nodnonoten

“Saya so itultuloy yon gawaen a pakanodnonotan ed siak.”​—1CORINTO 11:24.

1. Panon so impanalo nen Jesus ed mundo?

“MANPAKPEL! Tinalok so mundo.” Diad saratan a salita na panamaligliwa tan panamaseseg, pinabiskeg nen Jesus so 11 a matoor ya apostoles to ed saman a labi sakbay na impatey to. Pinaneknekan nen Jesus so inkasikaton mananalo ed mundo! Matalonan atulakan to so amin a getma na Kabusol, si Satanas a Diablo, diad pamuyak to ed katooran to ed si Jehova. Tan natan, diad ipapatey ed panamairapan a kiew ya aarapen to ed pigaran oras, sikato so matalek a pamasiansia na katooran to ya anggad kasampotan.​—Juan 16:33; Hebreos 12:2.

2. Akin ya inggapo nen Jesus “so pangdem na Katawan”?

² Sayan ebenton walaan na kakanaan ed talba so agawa ed apalabas lan labinsian lasus tan limamplo tan duan taon ed samay koma-14 ya agew na Nisan, say primeron lunar a bulan ed Judion sagradon kalendaryo. Sayan agew so sakey ya agbalot nalingwanan na saray debosyonadon patumbok to. Pian nipaseguro a saray matoor a patumbok to so agdan balot ibaliwala so kakanaan na samay agawa nensaman, inggapo nen Jesus so nikadkaduman pannodnonot ed pangdem, a dineskribe nen apostol Pablo a “say pangdem na Katawan.” Diad silong na madibinon puyan insalaysay nen Pablo a diad sayan okasyon et ingganggan tora may babangatan to a wadman nensaman: “Saya so itultuloy yon gawaen a pakanodnonotan ed siak.” (1 Cor. 11:20, 24) No liknaen yon sikayo so sakey ed saray patumbok nen Jesus, kasin apresyaen yo no akin a saman so ingganggan to, ed no anto so anawagan to’d sikayo a gawaen, tan no anto so kabaliksan to ed arapen yo?

Sakey ya Agew ya Agnalingwanan

3. Akin, tan diad leksab na antoran sirkumstansya, a say Nisan 14 so agawan inmuna a sakey ya agew a nodnonoten?

³ Saman so aliwan kaunaunaan ed awaran na too a say Nisan 14 so nigana a bilang sakey ya agew a nodnonoten. Nen 1513 K.K.P., si Jehova, ed panamegley na aripen ton si Moises, et ingganggan toray Israelitas: “Sayan agew [Nisan 14] so manserbin sakey a pakanodnonoten ed sikayo, tan nepeg yon selebraan bilang sakey a piesta ed si Jehova ed amin na saray kapolian yo.” Anto so anagdag diad panggawa ra ed saman a selebrasyon nensaman? Inmebat si Jehova a mismo: “Sikato so pangibagat na paskua ed si Jehova, a linmabas ed saray kaabungan na anak a lalaki ed Ehipto sanen binakbak toray Ehipsio.”​—Exodo 12:14, 27.

4. Antoran importantin salisalan so alanor diad inkiliktar na Israel a nanlapud Ehipto?

⁴ Saman a makapakelkelaw ya inkaliktar na saray papanguloan ya anak na Israelitas ed Ehipto, a nilanor to so too tan ayep, so agawa ed saman a labi na Nisan 14. Saman so komaplon bakbak a sumpad saray demonyon dirios a dadayewen na saray Ehipsio, a mangidadanet ed akauna lan nibagan gagala nen Jehova a niiter ed si mapangtan Paraon: “Diad tua, nisengeg ed saya, impansiansia taka, nisengeg ed pangipanengneng ko’d sika na pakayarik tan pian say ngaran ko so niyabawag ed amin a dalin.” Pigaran agew ed saginonor say ngaran tan pakayari nen Jehova so nipatnag ni sanen inliktar toray minilmilyon ya Israelitas tan say baleg ya alaoklaok ya ulop ed Ambalangan Dayat, bangta nilener toray armada nen Paraon. Agtanto pankelawan a si Moises tan saray anak na Israel so angikanta: “Mankanta ak komon ed si Jehova, lapud sikato so nitantandoro”!​—Exodo 9:16; 15:1.

5. Anton gagala so nilingkoran na selebrasyon na Paskua?

⁵ Nen saray Israelitas so maligen la ed dalin ya insipan ed saray atateng dan si Abraham, say Paskua so sankanasyonan a sinelebraan a maminsan ed sakey taon diad Jerusalem, diad katutulok ed ganggan diad Deuteronomio 16:1-8. Sirin inyuksoy nen Jehova a say Nisan 14 so naynay a sankadumaan ed kanonotan na tipikon katooan to. Anton gagala so lingkoran na saya? Sikato so sakey ya agew na panangitandoro ed ngaran nen Jehova, diad pannodnonot to ed saray angkabaleg a gawa na panangiliktar to. Kanian dakel a siglos ed saginonor say kakanaan na Paskua so sankamatalonaan ed kapusoan tan kanonotan na saray atateng nen Jesus a, nibaga ed sikatayo, “naugalian da so onlan tinaon ed Jerusalem a para ed piesta na Paskua.” Unong ed Judion kustombre, say anak dan si Jesus so kaiba ra.​—Lucas 2:41, 42.

6. Nisesengeg ed antoran rason a si Jesus so magunaet a manggawa ed Paskua nen 33 K.P. a kaibay toray matoor ya apostoles to?

⁶ Kayari na inkabautismoan nen Jesus ed Jordan tan say inggapo na ministeryo to, intultuloy ton sinelebraan a kaiba toy Maria, say mangaraldalin ya ina to, tan saray ananak to, agagi to’d laman. Anggaman kuan, diad Nisan 14, 33 K.P., inyuksoy nen Jesus a selebraan so piesta a kaiba toray 12 apostoles to. Ibabaga’d sikatayo na awaran nen Lucas ed no panon so liknaan nen Jesus ed sayan okasyon: “Kinaliktan kon tuloy so mangan ed sayan Paskua a kaiba takayo sakbay na panirap ko!” (Lucas 22:15, Today’s English Version) Akin ya ontan lan baleg a pilalek ed biang nen Jesus? Lapud kabat to so kabaliksan na saray maganggano lan nagawa ed saman a makatantandan agew a ginmapo ed kaselek na agew. Kabat met nen Jesus a saray ontan a nagawa so mas lalon makabaliksan nen saman so agawa nen 1513 K.K.P. Itandoro ra so ngaran nen Jehova a mas nagkalalo nen say nensaman tan igaton to so letnegan a para ed ultimon kabendisyonan na amin a pamilya ed dalin. Ontan met, sikato so walaan na dakel ya ibaga ed saray babangatan to sakbay na ipatey to, ya impurek to so tepel ed sikara a mansiansian matoor a patumbok to. Say detalyadon awaran na ebanghelyo so mangabuloy ed sikatayon ontalineng, a singa panangibaga, ed imbaga tan ginawa nen Jesus.​—Juan 12:31; 17:26.

Anto So Agawa? Anto So Kabaliksan To?

7. (a) Antoran agawgawa kaleganan na unor a panangan ed Paskua nen Jesus so angitonton ed impangigapo to ed Memoryal na impatey to? (Juan 13:1-30) (b) Deskribien so oksuyan nen Jesus diad impangiletneg to’d Pangdem na Katawan.

⁷ Legan a sikara so mamangan, si Jesus so inmalagey tan inurasan toray sali na babangatan to, a diman et impanengneng to so ayadyarin ehemplo na kaumildian. Insan inkuan nen Jesus, “Sakey ed sikayo so mangitapat ed siak.” Kayarin tuloy na saman, inmarap ed si Judas tan kuanto, “Say gawaen mo so gawaen mo lan tampol.” Isalaysay na awaran nen Juan: “Sikato so pinmaway a tampol, tan labi la ed saman.” (Juan 13:21, 27, 30) Kayari na saya et inggapo nen Jesus so Memoryal na impatey to. Dengelan no panon so impaneskribe nen akaimaton a Mateo diad agawa: “Legan a sikara so mamangan, angala na tinapay tan, kayari ton binendisyonan, pinisagpisag to tan, inter to’d saray babangatan to, inkuanto: ‘Ala yo, kanen yo. Saya et kabaliksan to so laman ko.’ Ontan met, angala na sakey a kopa tan, kayari na impangiter toy pisasalamat, inter to’d sikara, a kuanto: ‘Inumen yo, amin yo; ta saya et kabaliksan to so “dala na sipanan” ko, a nikalbo a nisesengeg ed dakerakel diad kaperdona na kasalanan. Balet ikuan ko ed sikayo, agak la oninum a balot manlapud natan na anggan anton bunga na sayan ubas ya anggad satan ya agew sano inumen ko lamet a kaiba takayo diad panarian nen Amak.’ Kaunoran, kayari ran anganta, sikara so linma ed Palandey Olivo.”​—Mateo 26:26-30; nengnengen met so Marcos 14:22-26; Lucas 22:19, 20, tan 1 Corinto 11:23-26.

8. Akin ya importantin tuloy a natalosan so kabaliksan na saray salita tan kiwas nen Jesus diad impangigapo to’d Memoryal?

⁸ Anto so nagnap a kabaliksan na imbaga nen Jesus tan ginawa to ed saman ya okasyon? Indanet nen Pablo no panon ya importante ed amin na saray alanaan a patumbok nen Kristo so pangapresya ed saya, a kuanto: “Kanian sirin siopaman a mangan na tinapay odino oninum ed kopa na Katawan ya agmakana so mankasalanan nisesengeg ed laman tan dala na Katawan.” Seguradon anggapo ed saray alanaan so malabay ya ‘agmakana’ ed imaton nen Jehova, a mansumpal ed ansakit a kaukom. Nagkalalo, say “baleg ya ulop” so malabay a nibilang a makanan kakaiba na alanaan a nakdaan. Sirin, diad panasingger na sananey a Memoryal, nipanpanaon a sikatayon amin so mangusisan maong ed sayan pamaakaran.​—1 Corinto 11:27.

9. (a) Akin a say impangipatalos ed saray salita nen Jesus, “Saya et kabaliksan to so laman ko” so mas duga nen say, “Saya so laman ko”? (Nengnengen so paimanod-leksab.) (b) Anton nikaduman kabaliksan so inyan nen Jesus ed tinapay? (c) Ed alak?

⁹ Inkuan nen Jesus, “Saya et kabaliksan to so laman ko.”a Diad impangikuanto ed sarayan salita, impasen nen Jesus so nikaduman kabaliksan ed tinapay​—sikato so sakey a simbolo na dilin andi-kasalanan a laman to ya inter to “a nisesengeg ed bilay na mundo.” (Juan 6:51) Mipadpara, sanen inkuanto nipaakar ed kopa na alak, “Saya et kabaliksan to so ‘dala na sipanan’ ko, . . . a nikalbo . . . diad kaperdona na saray kasalanan,” uusaren to so pinaapseng ya alak ed kopa a bilang simbolo na dilin dala to. Sayan dala so magmaliw a letnegan diad pangikurang ed “sakey a balon sipanan.” Say apaagos a dala to so magmaliw met a paraan diad kiiter na “kaperdona na saray kasalanan.”​—Mateo 26:28; Jeremias 31:31-33; Hebreos 9:22.

10. Anto so tutukoyen na pibibiang ed tinapay tan alak?

¹⁰ Anto, sirin, so atukoy ed biang na saraman so mibiang a mangan ed tinapay tan oninum ed alak kaleganan na selebrasyon na Memoryal? Say gawan mismo so mangipanengneng ed saray mibibiang, tan ed saray manag-imaton, a sikara la so agunggunaan ed dondon bagat nen Kristo Jesus, balet diad nikadkaduman dalan tan diad nikadkaduman gagala. Panon so kagawa na saya? Diad letnegan na pananisia ra ed bagat nen Kristo tan diad dedikasyon da’d si Jehova, sikara so pagalangan nen Jehovan Dios diad merito na atooan a bagat nen Jesus. Diad anton gagala? Ta pian niiter ed sikara so atooan ya inkayadyari tan sirin et nawalaan na matunong a talindeg ed arap na Dios. Insan sikara so ilalaken nen Jehova ed panamegley na masanton espiritu to tan magmaliw iran espiritual ya anak to. Sikara la so walad talindeg a mangisakripisyo ed kanepegan dan manbilay ed dalin a para ed mangatatawen a tawir. Amin na saya so nagawa sakbay a sikara so mibiang ed Pangdem na Katawan.​—Roma 5:1, 2, 8; 8:15-17; Santiago 1:18.

11, 12. (a) Anton duaran kaaruman a bengatla so ipanengneng na iyinum ed alak? (b) Isalaysay so sipanan a ginawa nen Jesus ed saraman so mibibiang?

¹¹ Imanoen natan no anto ni atukoy diad iyinum ed alak. Anggaman impabtang la nen Jehova so inkatunong ed saray espiritual ya anak to tan tinagibi tora a bilang ananak, sikara nin siansia so walad ag-ayadyarin laman. Sikara ni so makapankasalanan tan saya so bidbiren. Diad iyinum ed alak, ditan et bibidbiren da so inagew-agew a panagmatalek da ed dala nen Kristo Jesus, a sikato so “nikalbo a nisesengeg ed dakel diad kaperdona na saray kasalanan.”​—1 Juan 1:9, 10; 2:1.

¹² Wala ni so bengatla, anggaman kuan, ya atukoy diad iyinum ed alak. Saray mibibiang so mamekder a sikara so nitarok ed “balon sipanan” ya abayaglan impasakbay nen Jehova ed panamegley nen propeta Jeremias. Sayan sipanan so agawan kinmurang diad panamegley na dala nen Jesus. Saray dapag ed satan s sipanan et si Jehovan Dios tan saray espiritual ya anak to, a manibukel na espiritual ya Israel. Kada membro so pinili na Dios. Si Jesus so Manamegley na sipanan, a diad panamegley to et tulongan to raman so 144,000 a membron nisipanan a magmaliw a kabiangan na bini nen Abraham. (Jeremias 31:31-34; 2 Tesalonica 2:13; Hebreos 8:10, 12;12:22-24; Galacia 3:29) Saraya met so awiten nen Jesus ed ‘sipanan nipaakar ed sakey a panarian.’ Bilang nansumpalan, sikara ed kaunoran so nausar a kaiba na Ari ran Jesu-Kristo a mangipaakseb na saray bendisyon nen Jehova ed bilay diad amin a pamilya ed dalin.​—Lucas 22:28-30; Juan 6:53; Apocalipsis 5:9, 10; Genesis 22:15-18.

13. Anto so arum ed saray bengatla a nepeg a nonoten natan ed Nisan 14?

¹³ Tua, legan ya usisaen tayo so sigpot a kabaliksan na saray salita nen Jesus a sinalita to ed sayan agew a nodnonoten, sikatayo so napaskar a napanonotan ed panangaro nen Jehova diad impangitarya to ed inad-aro ton Anak. Sikatayo met so napanonotan ed panangaro nen Jesus diad impangiter to’d bilay to a bilang dondon ed amin a mananisian katooan. (Juan 3:16; Roma 5:8; 1 Timoteo 2:5, 6) Anggaman kuan, walaray arum a mablin katuaan a sinalaysay nen Jesus ed saray patumbok to ed saman a labi. Diad saray managsulat na Biblia, si apostol Juan lambengat so angikurit ed sayan sankamaapitan a tongtongan.

Gloria, Aro, tan Pankakasakey

14. (a) Panon a nigloria si Jehova ed kada selebrasyon na Memoryal? (b) Anton biang so gawaen na aro diad pannodnonot ed si Jesus, tan anton dilin-panangusisa so idagdag na saya ed kanonotan na amin a mibibiang?

¹⁴ Inkuan nen Jesus: “Natan say Anak na too so nigloria, tan say Dios so nigloria nipaakar ed sikato.” (Juan 13:31) Nanlapulad inkiliktar na Israel a nanlapud Ehipto, say Nisan 14 so nisiglaot ed kaalangon ed ngaran na Dios, inkasoberano to, tan say pakayari to. Natan, diad katooran nen Jesus ya anggad patey tan diad ontumbok a maglorian inkioli to ed panamegley na pakayari na Dios, siansia nin babaleg a dayew tan gloria so nitarok ed ngaran na Dios. (Ipareng Uliran 27:11.) Imbaga nen Jesus ed saray patumbok to a pruebaan da so kipapasen dan babangatan diad panumpal da ed “balon ganggan,” a ‘manaarowan so balang sinansakey unong na impangaro to ed sikara.’ (Juan 13:34, 35) Say kaaralem na arowan tayon sanaagi so sindag na apresasyon tayo ed aron imbalikas nen Jesus ed sikatayo diad saman a panaon.​—1 Juan 4:19.

15. (a) Anton ilalo ed bilay so niiyan ed arap na amin na saraman so mibiang a makana? (b) Panon ya apaneknekan so aro ed si Jesus?

¹⁵ Say ilalo ed sakey ya agew a pambilay ed mangatatawen ya ayaman so kabiangan na gayagan niiyan ed arap na saraman so apilin kakaiba nen Kristo a kaiba ton manuley. (Apocalipsis 20:6) Sayan ilalo so imparungtal nen Jesus, a kuanto: “Onlaak a mangiparaan na pasen ed sikayo. . . . Ompawil ak lamet tan awaten takayo ed inkasiak.” (Juan 14:2-4) Agaylan isesempet so manaalagar ed amin na saraman so mansiansian matoor ya anggad kasampotan! Sirin, isisimbawa nen Jesus, “No inaro yoak, sumpalen yoray ganggan ko.” Kabaliksan na saya so amin a ganggan to, a pati say ganggan a manbangat tan manggawa na babangatan.​—Juan 14:15, 21; Mateo 28:19, 20.

16. (a) Panoy impangidanet nen Jesus ed pankaukolan na pankakasakey ed limog na saray patumbok to, tan akin a sayan pankakasakey so importante? (b) Diad anto so nepeg ya arapen na amin a patumbok nen Jesus, balet antoy ontulong ed sikaran manggawa ed saya?

¹⁶ Agaylan importante ed saray patumbok nen Jesus so pansiansian mikasakey ed sikato tan ed balang sinansakey! Inusar nen Jesus so ilustrasyon na sakey ya ubas tan sangasanga to a mangidanet ed sayan katuaan. Say pankakasakey so mansumpal ed pamawala na bunga tan saya, met, so mangigloria ed Ama. (1 Corinto 1:10; Juan 15:1, 5, 8) Say panamasegsegang tan isusumpa so nipaarap ed amin na saray patumbok nen Jesus. Balet agaylan makapabiskeg-pananisia a naamtaan a si Jesus et impansiansia to so katooran to bilang sakey a mananalo ed mundo anggaman ed amin na saray panangataki nen Satanas!​—Juan 15:18-20; 16:2, 33.

17. Isalaysay so arum ed saray kerew nen Jesus ed pikakasi a nikurit ed Juan kapitulo 17.

¹⁷ Sinampotan nen Jesus so labi diad sakey ya impapuson pikakasi ed Ama to. Say kigloria na Ama to so walaan na manunan pasen ed kerew to. Impikasi to a saray patumbok to so nasalimbengan komon a manlapud marelmeng, si Satanas, legan a sikara so mansiansian biig ed mundo. Tan impikasi to met a say parehon maaron pankakasakey a wala ed baetan to tan si Ama to so komon mantultuloy ya ombulaslas ed limog na saray lawas-ondadaak a bilang na patumbok to.​—Juan kapitulo 17.

18. Diad pangimano ed dagup a bilang na inmatendi ed Memoryal nen 1984, akin a pigpigaran tuloy so akibiang ed saray emblema?

¹⁸ Asalaysay tayo so pigara lambengat ed saray mablin katuaan tan kaisipan ya impinabang nen Jesus ed saray babangatan to ed saman a labi ngalngalin 1,952 taon lan linmabas, balet seguradon saraya so ontulong ed sikatayon mantalos no akin a say Nisan 14 so peteg ya agew a nodnonoten. Agtanto pankelawan, sirin, a nen katantaon et 7,416,974 a Tastasi nen Jehova tan kakaaro ra so akanengneng ed kaimportantian na pandaragup a manumpal ed Pangdem na Katawan. Tan ingen, diad satan a karakel, et wala lambengat so 9,081 ya akibiang ed saray emblema. Akin? Lapud say karaklan a bilang na saray Tasi nen Jehova natan so makakanengneng ed inkasikara a bilang kabiangan na “baleg ya ulop” a manalalagey ed “arap na trono tan ed arap na Kordero.” Saraya so onnengneng ed arapen diad pambilay ed planetan Dalin a bilang andi-anggaan ya ayaman da, aliwan say pambilay ed katawenan a ditan et saray 144,000 so “manuley bilang arari a kaiba ra si [Kristo] diad sanlibon taon.”​—Apocalipsis 7:9; 20:6; Salmos 37:11.

19. Antoran porma so basiyan na ontumbok ya aralen, tan akin ya importante ed amin so iyatendi?

¹⁹ Arum iran tepet, anggaman kuan, so linmesa nipaakar ed relasyon na Pangdem na Katawan tan say “baleg ya ulop” na “arum a karnero.” (Juan 10:16) Singa ompatnag a matukoy, sirin, a sarayan pamaakaran so nasingbat ed ontumbok a paway, ta pian anggapo so lingon pakatalos ed biang na siopaman legan a manasingger so ontumbok a selebrasyon na Memoryal.​—1 Tesalonica 5:21.

[Paimano ed Leksab]

Kasin Nanonotan Yo​—

◻ Siopara so mibiang ed saray emblema ed Memoryal?

◻ Antoran importantin bengatla so ipanonot na Memoryal?

◻ Panon ya apaneknekan so inagew-agew a pannodnonot ed si Jesus?

◻ Anton importantin salisalan so nisiglaot ed Nisan 14?