No Akin a Say Pangdem na Katawan so Walaay Kabaliksan ed Sikayo

INLETNEG nen Jesu-Kristo so pangdem na Katawan diad kaunoran a labi na atooan a bilay to. Saman so labi na Huebes, Marso 31, tan inatey si Jesus ed ngarem na Biernes, Abril 1. Lapu’d saray agew ed Judion kalendaryo so onggapo manlapu’d labi na sakey ya agew ya angga’d ontumbok, say Pangdem na Katawan tan say impatey nen Jesus so namparan agawa nen Nisan 14, 33 K.P.

Akin ya inletneg nen Jesus iyan panangan? Anto so kabaliksan na inusar ton tinapay tan alak? Sioparay mibiang? Panon kabetbet so nepeg a panselebra ed sayan panangan? Tan panon a walaay kabaliksan to’d sikayo?

Akin ya Inletneg?

Nipaakar ed Pangdem na Katawan, inkuan nen Jesus ed saray apostoles to: “Gawayo’ya a pakanodnonotan ed siak.” Unong ed sananey ya impangipatalos, kuanto: “Gawayo ’ya a bilang pakanonotan ed siak.” (1 Corinto 11:24; The New English Bible) Diad tua, say Pangdem na Katawan so mabetbet a tinukoy bilang say Memoryal ed impatey nen Kristo.

Si Jesus so inatey bilang mamebenben-katooran a manangitandoro na inkasoberano nen Jehova tan sirin et pinaneknekan ton si Satanas so matilan managmudmora diad pangibabagan say matunong a katooan so manlilingkor ed Dios lapu lambengat ed sinisiblet iran motibo. (Job 2:1-5) Say impatey to so amaliket ed puso na Dios.​—Uliran 27:11.

Diad panamegley na impatey to bilang ayadyarin too, si Jesus met et ‘inter to’y bilay to a panondon ed amayamay.’ (Mateo 20:28) Diad inpankasalanan sumpa’d Dios, say inmunan too so angibalang ed ayadyarin atooan a bilay tan saray ilalo to. Balet “ontan la’y inpangaro na Dios ed mundo [katooan], ya inter to so bogbogtong ya Anak to, pian siopaman a manisia ed sikato agnatawtaw, no ag ingen wala so bilay to’n andi angaan.” (Juan 3:16) On, “say bayar na kasalanan say patey; bangbalet say langcap ya andi bayar na Dios say bilay ya andianga ed Cristo Jesus a Katawan tayo.”​—Roma 6:23.

‘Inawat ed Katawan’

Mangiiter na liwawa iray salita nen apostol Pablo ed pakanodnonotan diad impatey nen Kristo: “Ta inawat ko ed Katawan a sikato met so inyawat ko ed sikayo, a say Katawan a Jesus dia ed saman a labi ya inkiawa’to, angala na tinapay; tan nen akapisalamat la, pinisag to, tan inkuan to, saya sikato so laman ko, a napisag lapu ed sikayo: gawa yo so saya a pannodnonotan yo ed siak. Ontan met say copa, nen kayari to a nangdem, kuan to, saya’n copa sikato so Balon Sipan ed dalak: gawa yo so saya kapag no inuman yo, a pannodnonotan yo ed siak. Ta kapag no [mabetbet, NW] kanen yo so saya a tinapay, tan inuman yo so copa, ipakabat yo so inpatey na Katawan anga ed isabi to.”​—1 Corinto 11:23-26.

Lapu’d agpresente si Pablo nen Nisan 14, 33 K.P. a kaibay Jesus tan 11 ya apostoles, sayan impormasyon so mapatnag ya ‘inawat ed katawan’ diad panamegley na impuyan a panangipaamta. Inletneg nen Jesus so Memoryal “dia ed saman a labi ya inkiawa’to” ed saray Judion kakabusol diad panamegley nen Judas, a nansugsog ed saray Romano a mangipasak ed Kristo. Saramay manepeg a mibiang ed embleman tinapay tan alak so manggawa na ontan diad pakanodnonotan ed sikato.

Panon Kabetbet a Selebraan?

Anto’y labay ya ibaga na saray balikas nen Pablo: “Ta kapag no [mabetbet, NW] kanen yo so saya a tinapay, tan inuman yo so copa, ipakabat yo so inpatey na Katawan anga ed isabi to”? Saray matoor ya alanaan a Kristianos so mibiang ed saray emblema na Memoryal a “mabetbet” angga’d ipatey da, a diad saginonor et napaoli ed mangatatawen a bilay. Diad imaton na Dios tan mundo, sikara sirin so mabetbet a mangiyabawag na pananisia ra ed bagat nen Jesus a probisyon nen Jehova. Panon kabayag? “Anga ed isabi to,” inkuan nen Pablo, mapatnag a sarayan panagselebra so mantultuloy angga’d isabi nen Jesus a mangawat ed saray alanaan a patumbok to diad tawen ed panamegley na kioli legan na “kiwawala” to. (1 Tesalonica 4:14-17, NW) Saya so mitukoyan ed saray salita nen Kristo ed saray 11 a matoor ya apostoles: “Et no onlaak tan mangiparaanak na pasen ya onkana’d sikayo, onlaak dia lamet, tan awaten ta kayo ed inkasiak; pian no iner so kawalaan ko, diman makapanayam kayo met.”​—Juan 14:3.

Nepeg kasin selebraan so impatey nen Jesus ya inagew-agew odino sinimba? Bueno, inletneg nen Jesus so Pangdem na Katawan tan sikato’y pinatey ed Paskua, a pakanodnonotan itan ed inkibulos na Israel manlapu’d impangaripen na Ehipto. Diad tua, sikato’y natawag a “say pasko [paskua] tayo . . . salanti si Cristo” lapu’d sikato’y Korderon nibagat para’d saray Kristiano. (1 Corinto 5:7) Say Paskua so senelebraan a maminsan labat ed sakey taon, diad Nisan 14. (Exodo 12:6, 14; Levitico 23:5) Isusuhiri na saya a say impatey nen Jesus so nepeg a selebraan labat a singa kabetbet na Paskua​—tinaon, aliwan inagew-agew odino sinimba.

Diad pigaran siglos, dakel a mankuan a Kristianos so nanselebra ed impatey nen Jesus a maminsan ed sakey taon. Lapu’d ginawa da ’tan ed Nisan 14, sikaray atawag a Quartodecimans, a kabaliksan to’y “komalabin-apat.” Nipaakar ed sikara, insulat nen manag-awaran a si J. L. von Mosheim: “Niyugali na saray Kristiano ed Asya Minor so panselebra ed sayan sagradon piesta, a pakanodnonotan ed impangiletneg na pangdem na Katawan, tan say impatey nen Jesu-Kristo, diad parehon panaon sanen saray Judios so angan na Paschal lamb da, salanti diad komalabin-apat ya agew na ununan bulan [Nisan]. . . . Kinonsidera da so ehemplo nen Kristo a singa ganggan a kaukolan dan tumboken.

Kabaliksan na Saray Emblema

Inkuan nen Pablo a si Jesus so “angala na tinapay; tan nen akapisalamat la, pinisag to.” Satan a masalangsang a tinapay ya inluto ed tapong tan danum ya anggapoy lebadura so kaukolan a pisagen pian kanen. Diad panangisimbolo na Biblia, say lebadura et isisimbolo to’y kasalanan odino kabubulok. Diad pamaseseg ed saray Kristiano ed Corinto ya ekalen manlapu’d kongregasyon so imoral a too, inkuan nen Pablo: “Ag yo ta amta a say daiset a levadura palebagen to so ami tipay? Punas yo sirin so daan ya levadura, ta pian onbalo kayo a tipay, a singa kayo andian na levadura. Ta say pasko tayo nibagat met, salanti si Cristo. Kanian ngilinan tayo so fiesta, aliwa a pati daan a levadura, aliwa met a dia ed levadura na panangisip na mauges tan say karelmengan, no ag dia ed angapo a levadura na tinapay na kalinisan tan katuaan.” (1 Corinto 5:6-8) Unong a say daiset a lebadura et palebagen to so interon tipay, odino masa, na tinapay, say kongregasyon so magmaliw met a marumsis ed imaton na Dios no say makasalanan ya impluensya na too so ag-inekal. Nakaukolan dan papawayen so “levadura” ed limog da, a singa saray Israelita et anggapo so levadura ed saray ayaman da legan na Piesta’y Andi-lebaduran Tinapay a tinmunbok ed Paskua.

Nipaakar ed andi-lebaduran tinapay ed Memoryal, inkuan nen Jesus: “Saya so laman ko, a napisag lapu ed sikayo.” (1 Corinto 11:24) Say tinapay et irerepresenta to’y ayadyarin laman nen Jesus, a nipaakar ed satan et insulat nen Pablo: “Kanian sano [si Jesus] onloob dia ed mundo, kuan to: bagat tan patanir sikara so ag mo ginabay, ingen sakey a laman so inparaan mo ed siak; dia ed saray patanir a napoolan tan saray bagbagat nisengeg ed kasalanan ag ka linmiket: Sirin inkuan ko, Nia, siak onsabi ak (dia ed lokot na libro walan nisulat so nipaakar ed siak), pian gawaen ko, O Dios, so linawam. . . . Et dia ed saya’n linawa apasantos kami lapu’d inkisaklang na laman nen Jesu-Cristo ya agawa’n aminpinsan a nipaakar ed andi angaan.” (Hebreos 10:5-10) Say ayadyarin atooan a laman nen Jesus so andia’y kasalanan tan kinmana bilang dondon bagat para’d sankatooan.​—Hebreos 7:26.

Kayari impanpikasi ed kopa na ag-alaokan ya ambalangan alak, inkuan nen Jesus: “Saya’n copa sikato so Balon Sipan ed dalak.” (1 Corinto 11:25) Say sananey ya inpangipatalos et: “Sayan copa et kabaliksan to’y balon sipanan ya apaletan diad panamegley na dalak.” (Moffatt) A singa say dala na saray inbagat a baka tan kanding et pinaletan to’y Ganggan na sipanan ed baetan na Dios tan say nasyon na Israel, ontan met say niyibung a dala nen Jesus so amaelet ed balon sipanan. Say katuaan a say balon sipanan et asaglawi so ontulong ed sikatayon nabidbiran iray manepeg a mibiang ed saray emblema ed Memoryal.

Siopa’y Nepeg a Mibiang?

Saray alanaan a patumbok nen Jesus, a walad balon sipanan so makanepegan a mibiang ed saray emblema ed Memoryal. Sayan sipanan so agawa ed baetan na Dios tan say espiritual ya Israel. (Jeremias 31:31-34; Galacia 6:16) Balet say balon sipanan so diad kaunoran et mangitarok na saray bendisyon ed amin a matulok a katooan, tan nayarin sakey kayon makaawat ed saraman a bendisyon.

Saray mibibiang ed saray emblema ed Memoryal so nepeg a personal ya akisipananan para’d Panarian a ginawa nen Jesus. Sanen inletneg iyan panangan, imbaga nen Jesus ed saray matoor ya apostoles to: “Et manoroak ed sikayo na sakey a panarian, a singa say Amak anoro ed siak.” (Lucas 22:29) Say sipanan ed Panarian a ginawa na Dios ed si Arin David so mangituturo ed isabi nen Jesus, samay manuley ya ando lan ando, diad mangatatawen a Panarian. Saray 144,000 ya espiritual ya Israelitas, a miuley ed sikato, so nipapatnag a manalalagey ed mangatatawen a Palandey Sion a kaibay Kordero, si Jesu-Kristo. Diad kioli ra, sikaray miuley ed si Kristo bilang kaiban arari tan saserdote. (2 Samuel 7:11-16; Apocalipsis 7:4; 14:1-4; 20:6) Saraman labat so wala’d balon sipanan tan personal ya akisipanan ed si Jesus so manepeg a mibiang diad saray emblema ed Pangdem na Katawan.

Say espiritu’y Dios so mangipaamta ed espiritu na saray alanaan a sikaray ananak To tan kaiban mananawir nen Kristo. Insulat nen Pablo: “Say dili’n Espiritu so mamatua ed espiritu tayo, ya anak itayo na Dios. Tan no anak itayo, tomatawir itayo met; tomatawir na Dios, tan mitatawir ed Cristo; a no ontan a mantepel itayo pati sikato, pian iba to itayo a nigloria.” (Roma 8:16, 17) Say masanton espiritu’y Dios, odino aktibon puersa, so mamalesa ed limog na alanaan na panamaseguron sikaray nitalaga para’d mangatatawen a bilay. Minoria da unong a niwanwan ed sikara so kada bengatlan ibabaga na Kasulatan nipaakar ed mangatatawen a bilay tan mabulos a mangibagat ed amin a mangaraldalin a bengatla, pati ed atooan a bilay. Anggaman say bilay ed mangaraldalin a Paraiso et magmaliw a makapaliket, sikara’y andian na satan ya ilalo. (Lucas 23:43) Say peteg tan agnasalatan a mangatatawen ya ilalo ya agnibase’d panmoria na palson relihyon so manggawa ed sikaran makanepegan ed pibiang ed saray emblema ed Memoryal.

Napaermen si Jehova no say too et irepresenta to’y inkasikato bilang sakey a tinawag a magmaliw a mangatatawen ya ari tan saserdote bangta agmet tinawag. (Roma 9:16; Apocalipsis 22:5) Dinusa na Dios si Kora lapu’d sitatangas a nanpilalek ed inkasaserdote. (Exodo 28:1; Numeros 16:4-11, 31-35) Kanian, anto no say mabiskeg iran liknaan odino datin relihyoson ideya so nanggawa ed toon sililingon mibiang ed saray emblema ed Memoryal? Sirin sikato (laki odino bii) so nepeg a mangitunda ed pibibiang tan sipaabeban mangipikasi ed Dios na kaperdona.​—Salmo 19:13.

Panon a Sikayo’y Naapektaan?

Say too so agnakaukolan a mibiang ed saray emblema ed Memoryal ta pian nagunggunaan ed dondon bagat nen Jesus tan mangawat na andi-anggaan a bilay diad dalin. Alimbawa, ag-iter na Biblia so pakabidbiran a saray matakot ed Dios a totoo a singa si Abraham, Sara, Isaac, Rebecca, Boaz, Rut, tan David so akibiang ed sarayan emblema. Balet sikara tan amin nin arum a manpipilalek ed agmanganggan bilay ed sayan globo so nepeg a mangagamil na pananisia ed Dios tan si Kristo tan diad dondon bagat nen Jesus a probisyon nen Jehova. (Juan 3:36; 14:1) Say tinaon a selebrasyon ed impatey nen Jesus so onkanan manangipanonot ed satan a baleg a bagat.

Say a kaimportantian na bagat nen Jesus so nipanengneng sanen inkuan nen apostol Juan: “Saraya’n bengatla isulat ko ed sikayo pian ag kayo mankasalanan. Tan no wala so toon mankasalanan, wala so apireng tayo ya onarap ed Ama, si Jesu-Cristo a matunong; Tan sikato so manamaandi kasalanan tayo, tan aliwa lambengat ed saray kasalanan tayo, no ag met kasalanan na lapag a mundo.” (1 Juan 2:1, 2) Saray alanaan a Kristianos so makapangibaga a si Jesus so “manamaandi kasalanan tayo.” Anggaman ontan, sikato met so bagat para’d kasalanan na interon mundo, a manggawan posibli ed magnayon a bilay para’d matulok a katooan diad asingsingger lan tuloy a Paraison dalin!

Diad pagmaliw a presente ed pakanodnonotan ed impatey nen Kristo, sikayo’y nagunggunaan manlapu’d makatenyeg-kanonotan a paliwawa ed Biblia. Sikayo’y napanonotan ed no panon kaimportante so ginawa nen Jehova a Dios tan si Jesu-Kristo ed sikatayo. Makagungguna ed espiritual so pilimog ed saramay walaay aralem a panangikuenta para’d Dios tan si Kristo tan para’d dondon bagat nen Jesus. Say okasyon et nayarin pabiskegen ton maong so pilalek yo a magmaliw a manangawat ed agkanepegan a panangasi na Dios, a mangitonton ed maandon bilay. Maliket kamin mangimbita ed sikayo a mitipon ed saray Tasi nen Jehova kaselek na agew sano Abril 6, 1993, pian nodnonoten so impatey nen Jesu-Kristo lapu’d say Pangdem na Katawan so walaay baleg a kabaliksan ed sikayo.