‘Pananebek ed No Anto Itayo’ Diad Panaon na Memoryal
“No tebeken tayo no anto itayo, sikatayo so agnaukom . . . pian sikatayo so agkomon nadusa.—1 CORINTO 11:31, 32.
1. Saray tuan Kristianos so pihon malabay ya ompaliis ed anto, tan akin?
SAY unor a bengatlan labay na sakey a Kristiano et say ansakit a pangukom nen Jehova ed sikato. Say agpakapaliket “ed Ukom na amin a dalin” so nayarin mangitonton ed sikatayo diad ‘pagmaliw a kadusa a kaiba na mundo’ tan nabalang so kilalaban. Satan so tua balanglan sikatayo so maniilalo a para ed bilay diad tawen a kaiba si Jesus odino para ed andi-anggaan a bilay ed mangaraldalin a paraiso.—Genesis 18:25; 1 Corinto 11:32.
2, 3. Diad anton pamaakaran a nayarin sikatayo so naukom na ansakit, tan anto so imbaga nen Pablo nipaakar ed saya?
2 Diad 1 Corinto kapitulo 11, impaliwawa nen apostol Pablo so sakey a pasen a nayarin pakaratengan tayo ed kaukom. Manwarin impaarap toray komento to ed saray alanaan a Kristianos, say simbawa to so importante ed amin, nagkalautla ed sayan panaon. Say panebek tayo ed inkasikatayo no anto itayo so ontulong ed sikatayon nawalaan na panangabobon na Dios tan agnaukom. Diad panasalaysay to ed tinaon a selebrasyon na Pangdem na Katawan, insulat nen Pablo:
3 “Say Katawan a Jesus ed samay labin kiyawat to so angala na tinapay tan, kayari na impisalamat to, satan so pinisagpisag to tan inkuanto: ‘Saya et kabaliksan to so laman ko a nisesengeg ed sikayo. Saya so itultuloy yon gawaen a pakanodnonotan ed siak.’ Ontan met so ginawa to ed kopa, kayari na impangdem to, kuanto: ‘Sayan kopa et kabaliksan to so balon sipanan diad birtud na dalak. Saya so itultuloy yon gawaen, a singa kabetbet ya iyinum yo, diad pakanodnonotan ed siak.’ Ta diad kabetbet a pangan yo ed sayan tinapay tan iyinum yo ed sayan kopa, itultuloy yon iyabawag so impatey na Katawan, ya anggad isabi to.”—1 Corinto 11:23-26.a
4. Anto so nagawa ed labi na Abril 10, 1990?
4 Kaselek-na-agew ed Abril 10, 1990, saray Tasi nen Jehova so manselebra na Memoryal na impatey nen Kristo. Gendagendat, say grupon mandaragup so sakey a kongregasyon; sirin wala so lugar na totoon aliwa nin Tastasi. Anto so itsura na miting? Wala so sakey a paliwawa ed Biblia. Insan, kayari na pikakasi, say tinapay so ipasa. Sananey a pikakasi so mangiparungtal ed kipasa na kopa. Imbes ya amin na saya so unong ed pormal a ritual odino estrikton oksuyan, say bilang na tinapay odino kopa tan say paraan na kipasa ra so oksuyen unong ed lokal a kipapasen. Say manunan bengatla et saray emblema so nitarya ed amin ya onaatendi, anggamano maslak so basta mamalabas ed satan ya agmibibiang. Antoran bengatla, anggaman kuan, so nipasa, tan anto so kabaliksan da? Nagkalalo ni, anto so nepeg tayon imanoen ed sakbay ta pian natebek tayo so inkasikatayo no anto itayo?
“Saya et Kabaliksan To So Laman Ko”
5, 6. (a) Anto so ginawa nen Jesus ed sakey a tinapay? (b) Anton nengneng na tinapay so inusar to?
5 Abasa tayo no anto so “inawat [nen Pablo] a nanlapud Katawan” no nipaakar ed Memoryal. Wala met iray salaysay na taloran managsulat na Ebanghelyo, sakey ed saratan so presente sanen inggapo nen Jesus iyan selebrasyon. (1 Corinto 11:23; Mateo 26:26-29; Marcos 14:22-25; Lucas 22:19, 20) Sarayan salaysay so mangibabaga a si Jesus so angalan inmuna na tinapay, nampikasi, tan insan pinisag to tan inyutob to. Anto itan a tinapay? Matukoy, anto so uusaren natan? Anto so kabaliksan na satan odino irerepresenta to?
6 Say akatarya ed saman et saramay nanlapud pangdem na Judion Paskua, agnilebaduraan a tinapay, a tinawag nen Moises na “agnilebaduraan a tinapay, say tinapay na kairapan.” (Deuteronomio 16:3; Exodo 12:8) Sayan tinapay so ginawa ed arinan trigo ya ag-inusaran na lebadura, asin, odino timpla. Lapud anggapoy-lebadura (Hebreo, mats·tsahʹ), satan so plastado tan masalangsang; pisagen ed kabaleg a naakan.—Marcos 6:41; 8:6; Gawa 27:35.
7. Anto so usaren na saray Tasi nen Jehova a tinapay legan na Memoryal?
7 Inusar nen Jesus so anggapoy-lebaduran tinapay ed Pangdem na Katawan, sirin ontan met so gawaen na saray Tasi nen Jehova natan. Say gendagendat a Judion matzoth so manserbi ed sayan gagala no sikara so agginawan inaruman na rekado, a singa say bubor, sibuyas, odino iknol. (Say matzoth a nankarga ed saratan a suplemento so mairap a mipara ed deskripsion a “tinapay na kairapan.”) Odino saray mamatatken na kongregasyon so nayarin manpagawa ed sananey na agnilebaduraan a tinapay a manlapud masa na arinan trigo tan danum. No anggapo so arinan trigo, say agnilebaduraan a tinapay so nayarin gawaen ed arinan manlapud sebada, belas, mais, odino arum a bukel. Say masa so lukoten a maimpis tan lutoen ed nilarakan na samet a kawali.
8. Akin a say anggapoy-lebaduran tinapay so matukoy a simbolo, tan anto so ituro na pibiang ed satan? (Hebreos 10:5-7; 1 Pedro 4:1)
8 Say ontan a tinapay so matukoy lapud anggapo so laok ton panagpaalsa (lebadura), ya uusaren na Biblian mangirepresenta ed kadederal odino kasalanan. Insimbawa nen Pablo nipaakar ed sakey a lakin imoral ed sakey a kongregasyon: ‘Say daiset a lebadura so mamaalsa ed interon masa. Ekal yo so daan a lebadura, pian sikayo komon so nabulos a manlapud kapaalsa. Si Kristo a pasko tayo so nibagat. Sumpalen tayo so piesta, aliwan diad lebadura na kaugsan tan karelmengan, noagta diad anggapoy-lebaduran tinapay na inkasimoon tan katuaan.’ (1 Corinto 5:6-8; ipareng so Mateo 13:33; 16:6, 12.) Say anggapoy-lebaduran tinapay so manepeneg a simbolo na atooan a laman nen Jesus, lapud sikato so “matoor, anggapoy-kasalanan, anggapoy-tilol, nisian a manlapud saray makasalanan.” (Hebreos 7:26) Si Jesus so wadman a presente ed ayadyarin atooan a laman to sanen imbaga to ed saray apostoles: “Alaen tan kanen yo iyan [tinapay], kabaliksan to so laman ko.” (Mateo 26:26, A New Translation of the Bible, nen James Moffatt) Say pangan ed tinapay et kabaliksan ton say sakey a too so manisia ed gungguna na bagat nen Jesus a nisesengeg ed sikato tan awaten to. Nagkalalo ni, anggaman kuan, so nalalanor.
Alak a Walaan na Kabaliksan
9. Anton sananey ya emblema so imbaga nen Jesus ya usaren?
9 Inusar nen Jesus so sananey a simbolo: “Sikato met so angala na sakey a kopa, tan kayari na impisalamat to ed Dios et inter to ed sikara a kuanto, ‘Inumen yo, amin yo; saya et kabaliksan to so dalak, say balon sipanan-a-dala, naibung a para ed dakel, pian nagamoran so kapunas na saray kasalanan da.” (Mateo 26:27, 28, Moffatt) Anto so wala ed satan a kopan komunal ya impasa to, tan anto so kabaliksan to ed sikatayo legan a pambabanikelan tayon tebeken no anto itayo?
10. Panoy impakaromog na alak na pasen to diad Judion Paskua?
10 Sanen inmunan indatak nen Moises so piesta na Paskua, agto sinalambit so iinumen. Sisiaen na dakel ya eskolar a say alak so ag-impibali ed Paskua ed saginonor, anganko nen komaduan siglo K.K.P.b Diad angggan anton inkagawa, say impangusar ed alak ed sayan panangan so kaslakan nen inmunan siglo, tan satan so agsinuppiat nen Jesus. Inusar to so alak na Paskua sanen inggapo to so Memoryal.
11. Alak na anton nengneng so matukoy ya usaren legan na Pangdem na Katawan?
11 Lapud say Judion Paskua so agawa ed abayag kayari na panagani ed ubas, si Jesus so nayarin angusar, aliwan say pinaapseng a tabol, noagta ambalangan alak a magmainomay a mangirepresenta ed dala to. (Ipareng so Apocalipsis 14:20.) Say dala nen Kristo so agnakaukolan ya aruman, sirin say puron alak so matukoy, imbes a saray alak a pinabiskeg ed brandy (a singa say port, sherry, odino muscatel) odino aruman na rekado odino tantanaman (vermouth, Dubonnet, odino dakel niran iinumen). Agtayo nakaukolan, anggaman kuan, so magmaliw a mapaga ed no panon so inkagawa na alak, no kasin inaruman na daiset ya asukal legan na panagpaapseng pian gawaen ed kabkaabigan a taway odino nankarga na alkohol odino kasin inusaran na samet ya asupre ta pian agnaderal.c Dakel a kongregasyon so manguusar na komersyon ambalangan alak (a singa say Chianti, Burgundy, Beaujolais, odino claret) odino simplen ginawa-ed-abung ya ambalangan alak. Say alak tan say tinapay so emblemas ira lambengat, odino simbolo; sirin, anggan anton agnausar so nayarin isempet tan usaren ed saginonor a basta singa arum a tagano odino iinumen.
12. Impaliwawa nen Jesus a say alak so walaan na anton manangilaman a kabaliksan?
12 Say katuaan a sinalita nen Jesus so dala to ed labi na Paskua so nayarin angipanonot ed dala na kordero diman ed Ehipto. Balet imanoen no panon so aktual ya impanggawa nen Jesus na duman kumparasyon, a kuanto: “Sayan kopa et kabaliksan to so balon sipanan diad birtud na dalak, a nikalbon nisesengeg ed sikayo.” (Lucas 22:20) Say Dios so akadkaunan nanggawa na sakey a sipanan ed nasyon na silalaman ya Israel, tan nainaguraan ed dala na saray bagbagat ya ayep. Wala so pampetekan ed baetan na dala na saraman a bagbagat tan say dala nen Jesus. Namparan asaglawi ed impaninagura na Dios ed sakey a sipanan diad sakey a nasyon na totoo to. (Exodo 24:3-8; Hebreos 9:17-20) Sakey a punto na Ganggan a sipanan et say silalaman ya Israel so walaan na ilalo ed katibukel a sakey a nasyon na saray arari-saserdote. (Exodo 19:5, 6) Anggaman ontan, kayari insaew na Israel a manumpal ed sipanan nen Jehova, imbaga to a sandian to “so datin sipanan” ed “sakey a balon sipanan.” (Hebreo 9:1, 15; Jeremias 31:31-34) Say kopa na alak ya impasa natan nen Jesus ed limog na saray matoor ya apostoles to so angirepresenta ed sayan balon sipanan.
13, 14. (a) Say kiwawala ed balon sipanan so mankabaliksan na anto? (b) Anto so inturo na pibibiang na sakey a too ed saray emblemas?
13 Saray Kristianon nitarok ed sayan balon sipanan so sinmabin manibukel na sakey ya espiritual a nasyones na arari-saserdote. (Galacia 6:16) Insulat nen apostol Pedro: “Sikayo so ‘sakey ya apilin rasa, sakey a maarin inkasaserdote, sakey a masanton nasyon, sakey a totoo a para ed nikabkabiig a pankayarian, pian nepeg yon iyabawag ed arawi iray karlangan’ na samay sakey ya anawag ed sikayo a nanlapud kabilungetan ya inyakar ed makapakelaw a liwawa to.” (1 Pedro 2:9) Malinew no anton kilalaban so awaten da—bilay ed tawen bilang kaiban-manuley nen Jesus. Saya so pepekderan na Apocalipsis 20:6: “Maliket tan masanto so siopaman a walaan na pibiang ed ununan kioli; . . . sikara so magmaliw a saserdote ed Dios tan ed Kristo, tan manuley a bilang arari a kaiba to diad sanlibon taon.”
14 Diad tua, kayari na impangiganggan nen Jesus ed saray apostoles a mangan tan oninum ed saray emblemas a tinapay tan alak, imbaga to ed sikara ya agda ‘kanen tan inumen ed lamisaan to diad panarian to, tan onyurong ed saray trono a mangukom ed labinduan tribu na Israel.’ (Lucas 22:28-30) No ontan sirin, say pibiang ed saray emblemas ed Memoryal so mankabaliksan a nagkalalo nen say basta panisia ed bagat nen Jesus. Kada Kristiano so nepeg a mangawat ed dondon tan mangagamil na pananisia pian nagamoran to so andi-anggaan a bilay ed inerman a pasen. (Mateo 20:28; Juan 6:51) Ingen say pibiang ed saray emblema so mananda a say sakey so wala ed balon sipanan, apilin mikasakey ed si Jesus diad Panarian to.
Pankaukolan na Panebek ed Panaon na Memoryal
15. Panoy impangiparungtal nen Jesus na sakey a balon ilalo a para ed saray ariripen na Dios?
15 Sakbay na panaon nen Jesus saray matoor ya ariripen na Dios so andian na ilalon onla ed tawen. Sikara so ninmengneng ed arapen diad pakagamor ed andi-anggaan a bilay diad dalin, say orihinal ya ayaman na katooan. Si Jesu-Kristo so inmunan apaoli a bilang sakey ya espiritu, tan sikato so nagmaliw ya inmuna a nanlapud katooan a niyakar ed tawen. (Efeso 1:20-22; 1 Pedro 3:18, 22) Saya so pinekderan nen Pablo, insulat to: “Walaan kami na tepel a para ed dalan na iloob ed masanton pasen diad panamegley na dala nen Jesus, ya ininaguraan to a para ed sikatayo bilang sakey a balo tan mabilay a dalan.” (Hebreos 10:19, 20) Siopa so ontumbok, kayari na impangilukas nen Jesus ed satan a dalan?
16. Say arapen so mangitatarya na anto a para ed saraman so mibiang ed tinapay tan say alak?
16 Diad samay labin impangiletneg nen Jesus na Pangdem na Katawan, imbaga to ed saray matoor ya apostoles to a sikato so mangiparaan na sakey a pasen ed sikara diad tawen. (Juan 14:2, 3) Nonoten, anggaman ontan, ya imbaga met nen Jesus a saramay mibiang ed tinapay tan ed kopa so onla ed Panarian to tan onyurong ed saray trono pian mangukom. Kasin saraman lambengat so apostoles? Andi, ta diad saginonor et naamtaan nen apostol Juan ya arum a Kristianos met so manalo tan ‘onyurong a kaiba nen Jesus ed trono to,’ tan mankakasakey a sikara so magmaliw a ‘sakey a panarian tan saserdote a manuley ed dalin.’ (Apocalipsis 3:21; 5:10) Naaralan met nen Juan so dagup a bilang na saray Kristianos a “sinaliw a nanlapud dalin”—144,000. (Apocalipsis 14:1-3) Lapud saya so relatibon melag a grupo, “melag a pulok” no ipareng ed amin a mandadayew ed Dios ed inlabas na saray panaon, say nikadkaduman pananebek so nakaukolan diad panaon na Memoryal.—Lucas 12:32.
17, 18. (a) Arum a Kristianos ed Corinto so naplag ed anton ugali? (b) Akin a say panagpaglet ed tagano tan iinumen so seryoson tuloy? (Hebreos 10:28-31)
17 Saya so impaliwawa nen Pablo diad sulat to ed saray taga Corinto diad sakey a panaon sanen arum ed saray apostoles so siansia nin mabilay tan sanen say Dios so manatawag ed saray Kristianos a “magmaliw a masanto.” Imbaga nen Pablo a binmaleg so mauges ya ugali ed limog na saramay obligadon mibiang ed saray emblema. Arum so angan lan asakbay a ditan et sikara so angan odino inminum na dakel, a sikara so pantemegen to, epel ed saray liknaan. Bilang nansumpalan, agda “natebek so laman,” say pisikal a laman nen Jesus ya inrepresenta na tinapay. Kasin saman so seryoson tuloy? On! Diad pibiang ya agmakana, sikara so nagmaliw a “makasalanan nipaakar ed laman tan ed dala na Katawan.” No sikara so sililiing ed nonot tan espiritual, ‘nayarian dan tebeken no anto ira tan ag-ira naukom.’—1 Corinto 1:2; 11:20-22, 27-31.
18 Anto so nakaukolan a tebeken na saraman a Kristianos tan panon? Manuna, nakaukolan dan apresyaen ed puso tan nonot so inkatawag da a kaiba na 144,000 a mananawir ed mangatatawen a bilay. Panon so pakatebek da ed saya, tan kasin dakel natan so manisia a sikara so kabiangan na sayan melag a grupon pinili na Dios nanlapulad agew na saray apostoles?
19. Anton manangipatnag a kipapasen so tinmalona legan na 1989 a Memoryal?
19 Diad tua, melmelag lambengat ya ulop na saray tuan Kristianos natan so makatebek ed saya nipaakar ed inkasikaran dili. Diad selebrasyon na Pangdem na Katawan nen 1989, masulok a 9,479,000 so nandaragup ed saray kongregasyon na saray Tasi nen Jehova ed sankadalinan. Daiset nen say 8,700 so mangibabagan walaan na ilalo ed ‘kiliktar a para ed mangatatawen a panarian.’ (2 Timoteo 4:18) Say baleg a karaklan—on, nilaksalaksa ed arum a matoor, benditon Kristianos a nandaragup—so akatebek a say makanan ilalo ra et say pambilay na ando lan ando ed dalin.
20. Panon a saramay kabiangan na 144,000 so sikakabat a sikara so atawag? (1 Juan 2:27)
20 Diad Pentecostes 33 K.P., inggapo na Dios a pipilien so 144,000 a para ed mangatatawen a bilay. Unong a sayan ilalo so balo, anggapo ed saray ariripen na Dios ed sakbay na panaon nen Jesus, panoy pikabat na saramay pinili odino napaseguroan ed sayan ilalo? Saya so natebek da diad pangawat na pantasi ed satan ya inter na masanton espiritu na Dios. Agkabaliksan na satan ya anengneng dan aktual so espiritu (satan so aliwan sakey a persona) odino nawalaan na pakanengneng ed nonot ed espiritu a mitatalosan ed sikara, nisay sikara so makadngel na saray boses a manlapud espiritun ayaman. Impaliwawa nen Pablo: “Say espiritun mismo so mangitarok na pantasi ed espiritu tayo a sikatayoray anak na Dios . . . Sikatayo met so mananawir: mananawir a peteg ed Dios, balet kaiban mananawir nen Kristo, daput no sikatayo so manirap a mankakasakey pian sikatayo met komon so niglorian mankakasakey.”—Roma 8:16, 17.
21. (a) Panoy pikabat na alanaan a sikara so walaan na mangatatawen ya ilalo? (1 Corinto 10:15-17) (b) Anton nengneng na sinansakey iray alanaan, tan panon so mauyamon pantasi ra ed ilalo ra?
21 Sayan pantasi, odino kapetegan, so mangipasal ed panagnonot da tan ilalo. Sikara so siansia nin totoo, a manggagayaga ed saray maabig a bengatla ed mangaraldalin a palsa nen Jehova, ingen say manunan direksion na bilay da tan kapagaan da et say pagmaliw a kaiban mananawir nen Kristo. Ag-ira sinmabi ed sayan indengan diad panamegley na emosyonalismo. Sikara so normal a sinansakey, asimbang ed saray panmoria tan kondukta ra. Diad inkapasantos ed panamegley na espiritu na Dios, anggaman kuan, sikara so kumbinsido ed inkatawag da, ya andian na mantultuloy a panduaruwa ed satan. Namoria ra a say kilalaban da so diad tawen no sikara so mansiansian matoor. (2 Tesalonica 2:13; 2 Timoteo 2:10-12) Diad impakatalos ed kabaliksan na bagat nen Jesus ed sikara tan atebek dan sikara so alanaan-na-espiritun Kristianos, sikara so mauyamon mibiang ed saray emblema na Memoryal.
22. Anto so natebek na maslak ed saraman so onaatendi ed Pangdem na Katawan?
22 Maslak ed saraman so situtulok a mandaragup no Abril 10 so andian na satan ya ilalo, lapud sikara so agnilanaan na Dios na espiritu, tawagen ira ed mangatatawen a bilay. A singa naimano tayo, inggapo na Dios a pipilien so 144,000 ed agew na saray apostoles. Ingen diad kakumpleto na satan a panagtawag, nailaloan a saray arum ya ondadagon mandayew ed sikato so walaan na ilalon intandoro nen Moises, David, Juan a Managbautismo, tan arum niran matoor ya inaatey ed sakbay na impangilukas nen Jesus ed dalan a mamaarap ed bilay diad tawen. Sirin, nilaksalaksan matoor tan magunaet a Kristianos natan so agmibibiang ed saray emblema na Memoryal. Saratan a Kristianos so makatebek no anto so kipapasen da ed arap na Dios diad pantalos a natalosan da so makanan ilalo ra. Sikara so mangungguna a manlapud dala tan laman nen Jesus diad kaperdona na saray kasalanan da tan insan gamoran da so agmanganggan bilay ed dalin.—1 Pedro 1:19; 2:24; Apocalipsis 7:9, 15.
23. Akin a say Memoryal so sakey a magayagan selebrasyon? (Ipareng so 2 Awaran 30:21.)
23 Sikatayo komon, sirin, so onnengneng ed arapen diad maliket a selebrasyon no Abril 10. Sikato so sakey a panaon na pangusar na pakatebek balet ta sakey met a panaon na gayaga. Gayaga a para ed melag a bilang a walaan na mangatatawen ya ilalo a manepenepeg tan matulotulok a mibiang ed tinapay tan say kopa. (Apocalipsis 19:7) Gayaga met a para ed saray nilaksalaksan maliket a Kristianos a diad satan a labi et manimaton tan manaral tan manilalon mannodnonot ed ando lan ando ed dalin ed satan a makabaliksan a selebrasyon.—Juan 3:29.
[Saray paimano ed leksab]
a “Diad samay labin Sikato so niyawat et say Katawan a Jesus so angala na tinapay; akisalamat, pinisagpisag To tan kuanto: ‘Saya so laman ko a para ed sikayo; saya so gawaen yo a memoryal ed siak.’ Ontan met a Sikato so angala ed kopa sanen asumpal la so pangdem, tan kuanto: ‘Sayan kopa so balon sipanan, tinatakan na dalak; kapag satan so inumen yo, gawaen yo a memoryal ed siak.’”—An Expanded Paraphrase of the Epistles of Paul, nen F. F. Bruce.
b Sakey ya eskolar so angiyopresi ed sayan opinyon ed no akin a say alak so inyarum: “[Say Paskua] so aliwa lan sakey a mabintan tinaon a panagtipon ed saray lalakin matatken; satan so magmaliw ya okasyon a para ed piesta na pamilya, a say iyiinum ed alak so akaromog na sakey a pasen a natural.”—The Hebrew Passover—From the Earliest Times to A.D. 70, nen J. B. Segal.
c Manlapud kadaanan iran panaon et say asin, amputi na iknol, tan arum niran sustansya so inusar diad pamalinew odino pangitarok ed kulor tan taway na alak, saray Romano so angusar ni ingen na asupre bilang panangamper-ed-kabulok diad panaggawa na alak.
Anto So Ebat Yo?
◻ Akin ya anggapoy-lebaduran tinapay so ipasa legan na Memoryal, tan anto so isimbolo to?
◻ Anto so kopan impasa legan na Pangdem na Katawan, tan anto so irerepresenta to?
◻ Akin a kinaukolan so pakatebek nipaakar ed selebrasyon na Memoryal?
◻ Akin a sikayo so manalaran ed onsasabin Memoryal?