Isalba Itayo na Panangasi nen Jehova Manlapud Kaandi-ilalo

“Kasian moak komon, O Dios, a unong na maaro ya abig-nalinawam [maaron-panangasi, NW], unong na kinaraklan na malamoy a panangasim, bural mo so saray impakasumpak.”​—SALMO 51:1.

1, 2. Panon a say sakey ed ariripen nen Jehova so naapektaan ed seryoson kasalanan?

SAY ganggan nen Jehova so agnasumlang a bulos ed dusa. Agaylan tua itan no seryoson mankasalanan itayo sumpad Dios! Anggaman nayarin sitotoor a manlilingkor tayo’d si Jehova ed loob na taotaon, say isumlang ed ganggan to so nayarin sengegan na baleg a kapagaan odino aralem a gonigon. Nayarin liknaen tayon pinaulian itayo nen Jehova tan agtayo la makanan manlingkor ed sikato. Say kasalanan tayo so singa makapal a lurem a manasanib ed liwawa na pabor na Dios.

² Aminsan et aromog nen Arin David na kadaanan ya Israel so inkasikato ed ontan a kipapasen. Panon ya agawa iyan kipapasen?

Saray Agsuston Kundang so Makapangitonton ed Graben Kasalanan

3, 4. Anto so agawa ed si Arin David legan na peryodoy aligwas?

³ Anggaman inaro nen David so Dios, [sikatoy] nanggaway lingo iran kundang ya angitonton ed seryoso iran kasalanan. (Ipareng so Galacia 6:1.) Saya so nagawa ed siopaman ya ag-ayadyarin too, nagkalautla no sikatoy walaay autoridad ed arum. Bilang maaligwas ya ari, nangayagaan nen David so kabantogan tan pakayari. Siopa so makpel a manangat ed salita to? Saray makayarin lalaki so akaparaan tan mabulos a manlingkor ed sikato, tan maseet a tinmulok iray totoo ed sikato. Ingen, alingo si David diad impamarakel to na asawa to tan diad impanbilang ed totoo.​—Deuteronomio 17:14-20; 1 Awaran 21:1.

⁴ Legan na sayan peryodo na aligwas ed materyal, akagaway seryoson kasalanan si David sumpad Dios tan too. Siempre, say kasalanan so ompugta ed sananey a kasalanan, a singa nilaga iran inaramey na abel a dinisenyo nen Satanas! Bangta mibabakal iray kapara [ton] Israelitas ed saray Amonitas, siniim nen David manlapud toktok na abung to si manaames a maganganan asawa nen Urias a si Batseba. Lapud walad bakalan si Urias, inpaawit na ari so bii ed palasyo to tan akikalugoran ed sikato. Isipen pay inkakebbiew to’d impakaamtan alukonan to! Impatawag nen David si Urias, diad ilalon akdolan toy Batseba ed saman a labi tan diad ontan et ipasen toy lukon a dilin anak to. Anggaman binuek nen David, inpulisay nen Urias so piakdol ed asawa to. Natan et agaylay panaburido to, angipawit si David ed si pangulon Joab na sekreto iran ganggan ya ipasen ed manunaan a linya si Urias ta pian seguradon ompatey. Si Urias so inatey ed bakal, tan say balo to so nanagugol ed gendagendat a peryodo, tan sikatoy inasawa nen David sakbay a naamtaan na totoo so nipaakar ed lukon to.​—2 Samuel 11:1-27.

5. Anto so agawa kayari impankasalanan nen David ed si Batseba, tan antoy epekto na kasalanan to ed sikato?

⁵ Diad panamegley nen propetan Natan ya inwalwal na Dios iray kasalanan nen David tan kuanto: “Nia, paalageyen ko so mauges sumpa ed sika a manlapu ed dili ya abung mo.” Mitunosan ed satan, say ugaw ya inyanak nen Batseba so inatey. (2 Samuel 12:1-23) Say panguloan ya ilalak nen David a si Amnon so amasoot ed si Tamar a dilin agi to’d ama tan sikatoy pinatey na agi ton laki. (2 Samuel 13:1-33) Sinali na ilalak na Ari a si Absalon a samsamen so trono tan pinabaingan [toy] ama to diad impiakdol ed saray bibii nen David. (2 Samuel 15:1–​16:22) Say sibil a bakal so anampot ed impatey nen Absalon a lalon amaermen ed si David. (2 Samuel 18:1-33) Anggaman ontan, saray kasalanan nen David so amapaabeba ed sikato tan angipalikna ed sikato ed pankaukolan a mansiansian maapit ed maabagey a Dios to. No sikatayo so nalingo, sikatayo so manpaabeba tan maapit ya onasingger ed si Jehova.​—Ipareng so Santiago 4:8.

6. Akin a nagkalautlan nagogonigon si Arin David?

⁶ Nagkalautlan nankasalanan si David ta bilang manuley ya Israelita et sigpot ya amta toy Ganggan nen Jehova. (Deuteronomio 17:18-20) Sikato so aliwan paraon na Ehipto odino ari na Babilonia a kulang ed ontan a pikakabat tan nayarin naynay a manggaway bengabengatlan ag-abobonan na Dios. (Ipareng so Efeso 2:12; 4:18.) Bilang membro na nasyon a nidedika ed si Jehova, amoria nen David a say pikakalugoran tan panagpatey so grabe iran kasalanan. (Exodo 20:13, 14) Amta met na saray Kristiano so ganggan na Dios. Anggaman ontan, singa si David arum ed sikara so tinmunganga ed satan lapud nisipor ya inkamakasalanan, kakapuyan na too, tan agnabarangkaan a tukso. No nagawa itan ed siopaman ed sikatayo, nakaukolan ya agtayo mansiansia ed abilungetan a kipapasen a mamuragas ed espiritual a pakanengneng tayo tan balkoten to itayo diad aralem a kaandi-ilalo.

Mangitarok na Pakainawaan so Panangipatua

7, 8. (a) Anto so agawa ed si David sanen sinali ton iyamot iray kasalanan to? (b) Akin ya ipatua tan tundaan so pankasalanan?

⁷ No nagogonigon ed seryoso iran impakalukso ed ganggan na Dios, nayarin mairap tayon ipatua iray kasalanan tayo, anggan diad si Jehova. Anto so nagawa ed silong na saratan a sirkumstansya? Inaksobi nen David ed Salmo 32: “Bangnen agak oneseesel [imbes a mangipatua], saray pukel ko natming ira ed panaglem ko a sanagew. Ta agew tan labi a say limam [Jehova] ambelat nen saman ed siak: say kalambotan ko nagmaliw a kelang na tiagew.” (Bersikulo 3, 4) Say impanggunaet ton pangiyamot ed kasalanan to tan pamokpok ed nagogonigon a konsiensia so amakapuy ed matungangan David. Ontanlan nanpaletey so ermen ed sikato a kuanmono amagaan a kiew ya andian na mangiter-bilay a kalambotan. Diad tua, nayarin naeksperiensia toray epekto na sakit ed mental tan pisikal. Diad ontan et abalang toy gayaga to. No naromog na siopaman ed sikatayo a walad parehon kipapasen, anto so nepeg tayo komon a gawaen?

⁸ Say panangipatua ed Dios so makapangitarok na panamerdona tan pakainawaan. “Bidbiren ko so kasalanan ko ed sika, tan say kasulitan ko agko inyamot,” inkansion nen David. “Inkuan ko, ipatuak ed Jehova so saray insusungay ko; et sika perdonaen mo so kasulitan na [saray] kasalanan ko.” (Salmo 32:5) Kasin sikayoy naaaburido lapud niyamot a kasalanan? Agta sankaabigan so pangipatua tan pangitunda ed kasalanan ta pian naawat so panangasi na Dios? Akin ya agpatawag so mamatatken ed kongregasyon tan onkerew na espiritual a pakatambal? (Uliran 28:13; Santiago 5:13-20) Nabidbir so magbabawin espiritu yo, tan agmanbayag et nipawil so Kristianon gayaga yo. “Mapalar so naperdona so saray insusumlang to, say asakbongan so kasalanan to,” inkuan nen David. “Mapalar so too ya ag napakasalanan ed Jehova ed kasulitan, tan dia ed espiritu to angapo so saol.”​—Salmo 32:1, 2.

9. Kapigan atibukel so Salmo 51, tan akin?

⁹ Si David tan si Batseba so walaay eebatan ed si Jehova a Dios lapud impanggawa ra na mauges. Anggaman sikara komon so pinapatey lapu ed saray kasalanan da, kinasian ira na Dios. Nagkalautlan sikatoy mapangasi ed si David lapud sipanan na Panarian. (2 Samuel 7:11-16) Say magbabawin awawey nen David ed saray kasalanan ton lalanoren [toy] Batseba so nanengneng diad Salmo 51. Sayan makatiknan salmo so tinibukel na manpipinetensyan ari kayarin niliing nen propeta Natan so konsiensia to ed inkabaleg na saray impakalukso to ed madibinon ganggan. Mankaukolan na inkakpel si Natan ya ipaimano ed si David iray kasalanan to, ontan met a saray aturon Kristianon mamatatken so nepeg a manpakpel ta pian gawaen iratan a bengatla natan. Imbes ya iburi so dalem tan iganggan so pamatey ed si Natan, sipapaabeban nanpatua so ari. (2 Samuel 12:1-14) Ipapanengneng na Salmo 51 so imbaga to ed Dios diad pikakasi nipaakar ed mabanday iran kiwas to tan lalon matukoy parad sipipikasin panagdalepdep, nagkalautla no sikatayoy alingo tan mankaliktan ed panangasi nen Jehova.

Walaan Tayoy Eebatan ed Dios

10. Panon nen David a naeksperiensia so espiritual ya iyaabig?

¹⁰ Agpinatunong nen David so kasalanan to noagta kinmerew na perdona: “Kasian moak komon, O Dios, a unong na maaro ya abig-nalinawam [maaron-panangasi, NW], unong na kinaraklan na malamoy a panangasim, bural mo so saray impakasumpak.” (Salmo 51:1) Diad impakasumpa, si David so linmanpas ed saray ketegan na Ganggan na Dios. Anggaman ontan, wala so ilalo na espiritual ya iyabig to no panengnengan na Dios na pabor unong ed maaron-panangasi, odino matoor ya aro To. Say inkadaakan na apalabas iran panangasi na Dios so angibasiyan na magbabawin arin nawalaan na pananisia a punasen na Managgawa to iray impakalukso to.

11. Anto so inpaimano na saray bagat ed Agew na Pananakbong, tan anto so kakaukolanen parad kilalaban natan?

¹¹ Diad panamegley na saray mapropetikon anino na saray panagbagat ed Agew na Pananakbong, inpaimano nen Jehova a sikatoy walaan na paraan ed panlinis ed saray magbabawi ed kasalanan da. Amta tayo la a say panangasi tan panamerdona to so nilalaknab ed sikatayo diad letnegan na pananisia tayo ed dondon bagat nen Jesu-Kristo. No si David, a tekep labat na saray tipo tan anino na sayan bagat ed kanonotan to so makapanmatalek ed maaron-panangasi tan saray panangasi nen Jehova, agaylan nagkalalo ed kaplesan-agew ya ariripen na Dios a mangagamil na pananisia ed dondon ya intarok parad kilalaban da!​—Roma 5:8; Hebreos 10:1.

12. Anto so kabaliksan na pankasalanan, tan anto so liknaan nen David ed impanggawa toy mauges?

¹² Diad pikekerew na panangasi’d Dios, inyarum nen David: “Urasan moak a maong ed kasulitan ko, tan linisan moak ed kasalanan ko. Ta amtak so saray impakasumpak; tan say kasalanan ko wala a naynay ed arapan ko.” (Salmo 51:2, 3) Say pankasalanan so pakasaew ed tanda nipaakar ed saray estandarte nen Jehova. Seguradon agawa itan nen David. Ingen, sikato so aliwan singa managpatey odino mikakalugoran ya agsinononot nipaakar ed kasulitan to, a mapaga labat ed kadusa to odino ed posibilidad a naalisay sakit. Bilang manangaro ed si Jehova, kagula nen David so mauges. (Salmo 97:10) Dinimla toy kasalanan ton mismo tan kinaliktan ton kumpleton linisan na Dios. Sigpot a kabat nen David iray impakalukso to tan magbabawin tuloy ya inabuloyan toy makasalanan a pilalek ton manalona ed sikato. Lawas walad arap toy kasalanan to, lapud say nagogonigon a konsiensia na matakot-ed-Dios a too so agbalot napadeen anggad wala so panagbabawi, panangipatua, tan panamerdona nen Jehova.

13. Akin a nibaga nen David a sikatoy nankasalanan sumpad Dios labat?

¹³ Diad pamidbir ed eebatan to’d si Jehova, inkuan nen David: “Onsumpa ed sika, dia ed sika labat, so nankasalananan ko, tan ginawak so saya a mauges ed nanengneng mo; pian sano mansalita ka et napamintuaan ka, tan sano mangokom ka et malinew ka.” (Salmo 51:4) Asumlang nen David iray ganggan na Dios, pinabanday [to] so maarin betang, tan ‘angiter na baleg ya anamot . . . a manayew’ ed si Jehova, a Sikatoy niparungtal ed kababaingan. (2 Samuel 12:14; Exodo 20:13, 14, 17) Saray makasalanan a kiwas nen David so panamasakit met sumpad sosyedad na Israelita tan saray membro na pamilya to, a singa met say bautismadon managgaway-mauges natan so sengegan na ermen odino gonigon diad Kristianon kongregasyon tan ed limog na saray inaro. Anggaman kabat na magbabawin ari ya akapankasalanan sumpad kapara ton too a singa si Urias, amoria toy atagtagey a responsabilidad ed si Jehova. (Ipareng so Genesis 39:7-9.) Binidbir nen David a say panangukom nen Jehova so matunong. (Roma 3:4) Saray Kristianon akapankasalanan so nakaukolan a nawalaan na mipadparan panmoria.

Panamalemew Iran Sirkumstansya

14. Antoran panamalemew a sirkumstansya so insitas nen David?

¹⁴ Anggaman agsinali nen David ya ikatunongan so inkasikato, peteg ya inkuanto: “Nia, nipaway ak ed kasulitan; tan dia ed kasalanan innginew ak nen inak.” (Salmo 51:5) Si David so nitarok ed kasulitan, tan naeksperiensia nen ina toy panagpasakit lapud atawir ya inkamakasalanan. (Genesis 3:16; Roma 5:12) Agkabaliksan na saray salita to a saray suston siglaotan ed panamaley, pannginew, tan pananak et kasalanan, unong ta intarya na Dios so panamaley tan pananak; nisay tinukoy nen David so antokaman ya espisipikon kasalanan nen ina to. Sikatoy ninginew ed kasalanan lapud makasalanan iray ateng to a singa ed amin ya ag-ayadyarin totoo.​—Job 14:4.

15. Anggaman kunsideraen na Dios iray panamalemew a sirkumstansya, anto so nepeg ya agtayo komon gawaen?

¹⁵ No sikatayoy nankasalanan, nayarin ipikasi tayo ed Dios so antokaman iran panamalemew a sirkumstansya a nayarin angarum ed impanggawa tayoy mauges. Balet agtayo komon pagmaliwen so agkanepegan a panangasi na Dios a baraan parad malukak a kondukta odino usarey atawir a kasalanan a bilang sakbong a pangiyamotan na eebatan tayo’d kasalanan. (Judas 3, 4) Inawat nen David so eebatan ed marutak a panagnonot a nansumpal ed inkatukso to. Ipikasi tayo ya agtayo komon napaulyanan ed tukso tan insan sikatayoy onkiwas a mitunosan ed ontan a pikakasi.​—Mateo 6:13.

Kerewey Pakalinis

16. Diad anton kalidad a napaliket so Dios, tan panon itan a mangapekta ed kondukta tayo?

¹⁶ Nayarin ompatnag iray totoon maabig ya indibidual a debosyonado ed Dios, balet sikatoy onnenengneng ed labas na tapew tan ed walad loob. Inkuan nen David: “Nia, sika [Jehova] pirawat mo so katuaan ed saray kalkalamanan a dapit ed loob; tan dia ed masanib a kalamanan ipaaral mo ed siak so pakaamta na kakabatan.” (Salmo 51:6) Si David so nankasalanan na katilaan tan panamalikdo ed impangimaneobra’d impatey nen Urias tan diad panasalin iyamot iray katuaan nipaakar ed impanlukon nen Batseba. Anggaman kuan, kabat ton maliket so Dios ed katuaan tan kasantosan. Nepeg iyan mangapekta ed kondukta tayo diad maabig a paraan, ta kondenaen itayo nen Jehova no manamalikdo itayo. (Uliran 3:32) Amoria met nen David a no ‘ipaaral [na Dios] ed sikato so pakaamta na kakabatan,’ bilang magbabawin ari, sikato so makayarin makadampot ed saray madibinon estandarte legay bilay to.

17. Anto so kabaliksan na panpikasi ed kagogolan ed hisopo?

¹⁷ Lapud anengneng na salmista so pankaukolan to na tulong na Dios diad panalona ed saray makasalanan a tendensya, inyarum ton kinerew: “Gogolan moak na hisopo, et malinis ak: urasan moak et onpotipoti ak nen say nieve.” (Salmo 51:7) Sakey ed dakel a bengatla, say tanaman a hisopo (nayarin marjoram, odino Origanum maru) so inusar ed panaglinis a seremonya ed totoon datin akating. (Levitico 14:2-7) Kanian matukoy a nepeg ya ipikasi nen David a nagogolan manlapud kasalanan diad panamegley na hisopo. Say ideya na panag-gogol so nisiglaot met ed kerew to a sikatoy urasan nen Jehova ta pian sikato so interamentin nalinisan, ya onputiputi nen say nieve ya andian na uring odino arum a dutak. (Isaias 1:18) No siopaman ed sikatayo so maniirap ed biglan ot-ot ed konsiensia lapud arum a gawan-mauges, nawalaan tayo komon na pananisia a no magbabawi tayon onkerew na panamerdonay Dios et nagogolan tan nalinisan to itayo diad letnegan na dondon bagat nen Jesus.

Kerewey Pakapawil

18. Anto so kipapasen nen David sakbay a sikatoy nagbabawi tan nanpatua, tan panon a say pikakabat ed saya so makatulong natan?

¹⁸ Siopaman a Kristianon apairap na nagogonigon a konsiensia so makatalos ed saray salita nen David: “Parengel moak [Jehova] na gayaga tan liket, pian saray pukepukel a piniley mo et makapansayaksak ira.” (Salmo 51:8) Sakbay a nagbabawi tan nanpatua si David ed saray kasalanan to, say agmaligen a konsiensia to so amaermen ed sikato. Agto anggan nanliketan iray kanta na pangayaga tan panliket ya inparungtal na maong iran kumakanta tan onsianon musiko. Ontanlan baleg so irap nen makasalanan a David ed agpanangabobon na Dios a sikato so singa toon apiley. Panpirpirawatan toy kaperdona, iyaabig ed espiritual, tan kipawil na gayagan datin naeksperiensia to. Say magbabawin managgaway-mauges natan so mankaukolan met na panamerdona nen Jehova ta pian makagamor lamet na gayagan wala ed sikato sakbay ton angiyan na kaatapan ed relasyon to ed Dios. Say kipawil na “gayaga na masanton espiritu” ed magbabawin too so mangipanengneng a sikatoy pinerdona la tan inaro nen Jehova. (1 Tesalonica 1:6, NW) Agaylan satan so mangitarok na ligliwa!

19. Panon so liknaan nen David no ekalen na Dios so amin a kasulitan to?

¹⁹ Inyarum ya inpikasi nen David: “Saniban mo so lupam ed saray kasalanan ko, tan bural mo so saray kasulitan ko.” (Salmo 51:9) Agnailaloan si Jehova ya onnengneng a walaay panangabobon ed kasalanan. Kanian, sikato so kinerew a saniban toy lupa to manlapud saray kasalanan nen David. Kinerew met na ari a buralen na Dios so amin a kasulitan to, ekalen ya amin so ag-inkatunong to. No gawaen labat komon itan nen Jehova! Mamakasil itan ed espiritu nen David, mangekal ed belat na agmaligen a konsiensia, tan mangipaamta ed magbabawi lan ari a sikatoy pinerdona na maaron Dios to.

Anto no Sikayoy Nankasalanan?

20. Anto so nirerekomenda ed siopaman a Kristianon seryoson nankasalanan?

²⁰ Ipapanengneng na Salmo 51 a siopaman ed dedikadon ariripen nen Jehova a seryoson nankasalanan balet ta magbabawi so makapanmatalek ya onkerew ed sikaton mangipanengneng na pabor tan linisan tora manlapud saray kasalanan da. No sikayoy Kristiano ya alingo ed ontan a dalan, akin ya ag-onkerew ed mangatatawen ya Ama tayo na panamerdona diad mapaabeban panagpikasi? Bidbiren yoy pankaukolan ed tulong na Dios ta pian ontalindeg a naabobonan ed arap to, tan kerewen ya ipawil toy datin gayaga yo. Saray magbabawin Kristianos so makapanmatalek a manpikasi ed si Jehova tekep na saratan a kerew, ta “sikato so perdonaen to naani ed daakan.” (Isaias 55:7; Salmo 103:10-14) Siempre, kaukolan a tawagen iray mamatatken ed kongregasyon ta pian niiter da so nakakaukolan ya espiritual a tulong.​—Santiago 5:13-15.

21. Anto so ontumbok ya usisaen tayo?

²¹ Peteg a mangisalba so panangasi nen Jehova ed totoo to manlapud kaandi-ilalo. Balet usisaen tayo pa so arum ya impapuson kerew nen David diad Salmo 51. Ipanengneng na aralen tayo ya agbalawen nen Jehova so maralit a puso.

Panon Yon Ebatan?

◻ Anto so epekto na seryoson kasalanan diad sakey ed saray ariripen nen Jehova?

◻ Panon a naapektoan si David sanen sinali ton iyamot so kasalanan to?

◻ Akin ya imbaga nen David a sikatoy nankasalanan sumpad Dios labat?

◻ Anggaman kunsideraen na Dios iray panamalemew a sirkumstansya no mankasalanan tayo, anto so nepeg ya agtayo komon gawaen?

◻ Anto so nepeg a gawaen na Kristiano no sikato so seryoson akapankasalanan?