Agbalawen nen Jehova so Maralit a Puso
“Saray bagbagat ed Dios saray maralit ya espiritu: say sakey a puso a maralit tan mansisibkel, agmo la balbalawen, O Dios.”—SALMO 51:17.
1. Panon so panmoria nen Jehova ed saray seryoson nankasalanan a managdayew to balet ta magbabawi?
‘NASAKBONGAN [nen Jehova] so inkasikato ed sakey a lurem, pian agmakalabas so pikakasi.’ (Tagleey 3:44) Balet labay ton makaasingger iray totoo to ed sikato. Anggano seryoson nalingo so sakey ed saray managdayew to balet ta magbabawi, natandaan na mangatatawen ya Ama tayo so maong a ginawa na satan a too. Kanian, nibaga nen apostol Pablo ed kaparan Kristianos: “Say Dios aliwan ag matonong pian nalingoanan to so gawa yo tan say aro ya inpanengneng yo ed ngaran to.”—Hebreos 6:10.
2, 3. Anto so nepeg a kunsideraen na saray Kristianon mamatatken diad pideneng ed nalilingo iran kapananisiaan?
2 Nepeg a kunsideraen met na Kristianon mamatatken iray taon na matoor ya impanlingkor ed Dios na saray kapananisiaan. Ilaktip na saya so sagradon serbisyo na saray managbabawin angala na palson kundang odino seryoson nankasalanan ni ingen. Pilalek na Kristiano iran pastol so espiritual a pankaabiganan na amin a walad pulok na Dios.—Galacia 6:1, 2.
3 Kaukolan na say magbabawin managgaway-mauges so panangasi nen Jehova. Ingen, nagkalalo ni so nakakaukolan. Ipapalinew iya na saray salita nen David diad Salmo 51:10-19.
Nakaukolan so Maralus a Puso
4. Akin ya inpikasi nen David so maralus a puso tan apasimbalon espiritu?
4 No say dedikadon Kristiano so walad mauges ya espiritual a kipapasen lapud kasalanan, anto so nayarin kaukolan to nilikud ed panangasi tan panamerdona nen Jehova? Bueno, kinerew nen David: “Palzaen mo dia ed loob ko so sakey a malinis a puso, O Dios; tan mamasimbalo ka na matunong a espiritu dia ed loob ko.” (Salmo 51:10) Mapatnag, kinerew iya nen David lapud amoria ton say inklinasyon parad graben kasalanan so siansian walad puso to. Nayarin agtayo ni alanor ed saray nengneng na kasalanan ya amatit ed si David a mitukoyan ed si Batseba tan si Urias, balet kaukolan tayoy tulong nen Jehova pian napaliisay katukso ed antokaman a seryoson makasalanan a kondukta. Nagkalalo ni, nayarin personal a kaukolan tayo so madibinon tulong ya ekalen ed puso tayo iratan a makasalanan ya ugali a singa say inkaagap tan panamusol—saray krimen a mitunosan ed panagtakew tan panagpatey.—Colosas 3:5, 6; 1 Juan 3:15.
5. (a) Anto so kabaliksan na nawalaan na maralus a puso? (b) Anto so pilalek nen David sanen sikato so kinmerew na apasimbalon espiritu?
5 Kakaukolanen nen Jehova ed ariripen ton nawalaan na “malinis a puso,” salanti, inkamaralus ed motibo odino intensyon. Diad pakamorian agto nipanengneng so ontan ya inkamaralus, inpikasi nen David a linisan na Dios so puso to tan itukoy itan ed madibino iran estandarte. Kinaliktan met na salmista so balo, maptek ya espiritu, odino mental ya inklinasyon. Nakaukolan toy espiritu ya ontulong ed sikaton manbarangka ed tukso tan mansiansian malet ed saray ganggan tan prinsipyos nen Jehova.
Makana so Masanton Espiritu
6. Akin a kinerew nen David ya ag-ekalen nen Jehova so masanton espiritu ed sikato?
6 Sano andiay-ilalo ed saray lingo tayo odino gawan-mauges, nalikna tayon say Dios so ngalngali la mangipuera ed sikatayo tan iyarawi to ed sikatayo so masanton espiritu to, odino aktibon puersa. Ontan so alikna nen David, ta kinerew to ed si Jehova: “Ag moak ibantak ed arawi ed arap mo; tan agmo ekalen ed siak so masanto ya Espiritum.” (Salmo 51:11) Nagbabawi tan mapaabeba si David ya alikna ton saray kasalanan to so nanggawa ed sikaton agmakanan manlingkor ed si Jehova. Say kibantak ed arawi manlapud arap na Dios so mankabaliksan na kaandiay pabor, ligliwa, tan panamendisyon to. Pian si David so nipawil ed espiritual, nakaukolan to so masanton espiritu nen Jehova. Diad impakawalaan na masanton espiritu, say ari so sipipikasin makakerew na madibinon panangidirihi ta pian napaliket [to] si Jehova, napaliisay kasalanan, tan makapanuley tekep na kakabatan. Lapud abidbir toray kasalanan to sumpad Manangiter na masanton espiritu, matukotukoy a kinerew nen David ya ag-ekalen nen Jehova itan ed sikato.
7. Akin a nepeg ya ipikasi tayo so masanton espiritu tan manbantay sumpad pamaermen ed satan?
7 Komusta itayo? Nepeg ya ipikasi tayo komon a nawalaan na masanton espiritu tan nepeg a manbantay sumpad pamaermen ed satan diad isaew ya itumbok ed panangidirihi to. (Lucas 11:13; Efeso 4:30) Tano andi, nabalang tayo so espiritu tan agtayo nipanengneng iray inter-Dios a bunga to a singa say aro, gayaga, deen, andukey-a-panagtepel, panangasi, kaabigan, pananisia, kaumildian, tan dangka. Nagkalautlan ekalen nen Jehova so masanton espiritu to ed sikatayo no agtayo magbabawin mantultuloy a mankasalanan sumpa ed sikato.
Panliket ed Kilalaban
8. No sikatayo so nankasalanan balet ta labay tayoy nawalaan na gayaga na kilalaban, anto so kaukolan a niwala ed sikatayo?
8 Say magbabawin managkasalanan a manasagmak na kipawil ed espiritual so makapangayaga lamet ed probisyon nen Jehova a kilalaban. Diad panpirawat ed saya, iney-ey nen David ed Dios: “Ipawil mo ed siak so gayaga na panangilaban mo; tan ampayaen moak na mabolos ya espiritu.” (Salmo 51:12) Agaylan makapakelaw so panliket ed seguradon ilalo na panangilaban nen Jehova a Dios! (Salmo 3:8) Kayari impankasalanan sumpad Dios, nanggunaetan nen David so kipawil ed gayaga na kilalaban diad panamegley To. Diad saginonor iran panaon, intarok nen Jehova so kilalaban diad panamegley na dondon bagat na Anak to, si Jesu-Kristo. No sikatayo bilang dedikadon ariripen na Dios so seryoson mankasalanan balet kaliktan tayon nipawil so gayaga na kilalaban ed sikatayo, kaukolan a nawalaan tayo na magbabawin awawey ta pian naarawiay pankasalanan sumpa ed masanton espiritu.—Mateo 12:31, 32; Hebreos 6:4-6.
9. Anto so kinerew nen David sanen akikasi ed Dios a sikatoy ampayaen to tekep na “mabolos ya espiritu”?
9 Kinerew nen David a sikatoy ampayaen nen Jehova diad “mabolos ya espiritu.” Mapatnag, ya agtutukoyen na saya so inkamabulos na Dios ya ontulong odino ed masanton espiritu to, noagta diad mapilit a mental ya inklinasyon nen David. Labay nen David a sikatoy ampayaen na Dios diad pangipabtang ed sikato na espirituy inkamabulos a manggawa na maptek tan agmankasalanan lamet. Mantutultuloy ya aampayaen nen Jehova a Dios iray ariripen to tan ipapaalagey toramay niparokol lapud nanduruman subok. (Salmo 145:14) Agaylan makaligliwa so pakamoria ed saya, nagkalautla no sikatayoy alingo balet ta magbabawi tan mankaliktan a nagkalalon sitotoor a lingkoran si Jehova!
Anto so Ibangat ed Saray Mananumpa?
10, 11. (a) Anto so nayarin ibangat nen David ed saray mananumpan Israelitas? (b) Nayarian nen David ya ibangat lambengat iray managkasalanan kayari impakagawa to na anto ed sikaton mismo?
10 No abuloyan itan na Dios, andi siblet a kinaliktan nen David so manggawa na bengatlan mangipanengneng na panamabli to ed panangasi nen Jehova tan ontulong ed arum. Diad panamegley na sipipikasin liknaan a nipaarap ed si Jehova, tinmunbok ya inyabawag na magbabawin ari: “Ibangat ko so saray dalan mo ed saray mananumpa; et saray makasalanan napapawil ed sika.” (Salmo 51:13) Panon a nayarin bangatan nen makasalanan a David iray mananumpa ed Ganggan na Dios? Anto so nayarian ton ibaga ed sikara? Tan anton kaabigan so nagawaan na saya?
11 Sanen ipapanengneng [to] ed saray mananumpan Israelita iray dalan nen Jehova diad ilalon niarawi ra manlapud marelmeng a basbas, nituro nen David no panon kauges so kasalanan, no antoy kabaliksan na panagbabawi, tan no panon a naawat so panangasi na Dios. Diad impakalikna ed irap na andiay pabor nen Jehova tan nagogonigon a konsiensia, andi duaruwan si David so magmaliw a maabagey ya instruktor ed saray magbabawi, maralit ed puson managkasalanan. Siempre, nayarian ton usaren so alimbawa to pian bangatan so arum kayari labat na impakaawat ton mismo na saray estandarte nen Jehova tan panamerdona To, ta saramay mangipulisay a manpasakup ed madibino iran kakaukolanen so andian na kanepegan a ‘mangipaamta ed saray gangan’ na Dios.—Salmo 50:16, 17.
12. Panon ya agunggunaan si David ed impakaamta a sikatoy inliktar na Dios ed inpankasalanan ed dala?
12 Diad pangulit na saray intensyon to diad sananey a porma, inkuan nen David: “Iliktar moak ed inpankasalanan na dala, O Dios, sika a Dios na kilalaban ko; tan say dilak mancanta a maksil ed inkatunong mo.” (Salmo 51:14) Say pankasalanan ed dala et itarok to so panangondena ed ipapatey. (Genesis 9:5, 6) Kanian diad impakaamtan say Dios na kilalaban to so angiliktar ed sikato manlapud inpankasalanan ed dala a nisiglaot ed si Urias so mangiter ed si David na deen na puso tan kanonotan. Diad satan et makapankanta lan sigagayaga so dila to ya aliwan diad dilin inkatunong to noagta ed inkatunong na Dios. (Eclesiastes 7:20; Roma 3:10) Agnabaliwala nen David so imoralidad to odino napaoli [to] si Urias ed lubok, a singa say kaplesan-agew a too et agto met nipawil so kalinisan ed sekso na toon akirelasyonan to odino paolien to so siopaman a pinatey to. Agta nepeg tayon isipen itan no sikatayo so tutuksoen? Tan agaylan nepeg ya apresyaen tayo komon so panangasin impanengneng nen Jehova ed sikatayo diad inkatunong! Diad tua, say panamabli so manangguyor ed sikatayon iwanwan iray arum ed sayan Subol na inkatunong tan panamerdona.
13. Diad silong lambengat na antoran sirkumstansya a say managkasalanan so nawalaan na dugan panagbeswat ed saray bibil ton mangidayew ed si Jehova?
13 Anggapoy managkasalanan a walaan na dugan panangibeswat na saray bibil ton mangidayew ed si Jehova nilikud no saratan so sipapangasin beswaten na Dios, a singa panangibaga, pian salitaen iray Katuaan To. Kanian nankanta si David: “O Katawan [Jehova, NW], beswaten mo so saray bibil ko; et say sangik ipatnag to so dayew mo.” (Salmo 51:15) Tekep na konsiensian nibulos lapud panamerdona na Dios, napakiwas si David ya ibangat iray mananumpa ed daladalan nen Jehova, tan nayarian ton sibubulos a Sikatoy dayewen. Amin iramay aperdona ed saray kasalanan da a singa si David so nepeg a mangapresya ed agkanepegan a panangasi nen Jehova, tan nepeg dan anamoten so amin a pankanawnawan iyabawag so katuaan na Dios tan ‘sikatoy galgalangen da.’—Salmo 43:3, NW.
Naabobonan Iran Bagat ed Dios
14. (a) Antoran bagat so kinaukolan unong ed Ganggan na sipanan? (b) Akin a mauges a nonoten a nabayaran tayoy mantutultuloy a gawan-mauges diad panggawa na maabig iran bengatla?
14 Agamoran nen David so aralem a pakatalos a nanggawa’d sikaton mangikuan: “Ta sika [Jehova] agmo panliketan so bagat; ta no andi sikato so yapay ko komon: sika agmo pakarambaan so bagat a pinoolan.” (Salmo 51:16) Kinaukolan na Ganggan a sipanan a saray bagat ya ayep so isaklang ed Dios. Balet saray kasalanan nen David a pikakalugoran tan panagpatey, a manepeg ed dusan ipapatey, so agnabayaran na saratan a panagbagat. Tano andi, angisaklang komon na saray bagat ya ayep ed si Jehova. No anggapoy impapuson panagbabawi, saray bagat so andi kana. Kanian mauges so panisip a nabayaran tayoy pantultuloy a panggaway-mauges diad panggawa na maabig a bengabengatla.
15. Anto so awawey na dedikadon toon walaan na maralit ya espiritu?
15 Inyarum nen David: “Saray bagbagat ed Dios saray maralit ya espiritu: say sakey a puso a maralit tan mansisibkel, agmo la balbalawen, O Dios.” (Salmo 51:17) Diad kaso na magbabawin managkasalanan, say naabobonan a “bagbagat ed Dios saray maralit ya espiritu.” Say ontan a too so andian na masepak ya awawey. Say puso na dedikadon toon walaan na maralit ya espiritu so maermen a tuloy ed impankasalanan to, nipaabeba lapud impakalikna to ed agpanangabobon na Dios, tan mabulos a manggawa na antokaman ta pian nagamoran to lamet so madibinon pabor. Anggapoy kakanaay isaklang tayo ed Dios no agtayo magbabawi ed saray kasalanan tayo tan iter so kapusoan tayo ed sikato diad nikabkabiig a debosyon.—Nahum 1:2.
16. Panon so inengneng na Dios ed toon maralit ed puso lapud kasalanan to?
16 Ag-ikakaindan na Dios so bagat a singa say maralit odino mansisibkel a puso. Antokaman so kairapan a naaabet tayo bilang totoo to, agtayo komon onsuko ed kaandi-ilalo. No sikatayo so naparugso ed basbas na bilay diad arum a pamaakaran a manggawa ed puso tayon manpirpirawat na madibinon panangasi, say situasyon so walaay ilalo. Anggan sikatayoy seryoson nankasalanan balet ta magbabawi, ag-ikaindan nen Jehova so maralit a puso tayo. Perdonaen to itayo diad basiyan na dondon bagat nen Kristo tan ipawil to itayo ed pabor To. (Isaias 57:15; Hebreos 4:16; 1 Juan 2:1) Anggaman ontan, singa si David saray pikakasi tayo so nepeg a parad kipawil na madibinon pabor tan aliwan parad kalegyas manlapud nakakaukolan a disiplina odino panangorihe. Aglabat pinerdona na Dios si David, sikato met so nilinisan to.—2 Samuel 12:11-14.
Mapaga Parad Puron Panagdayew
17. Nilikud ed ikekerew parad panamerdona na Dios, anto so nepeg a gawaen na saray managkasalanan?
17 No seryoson akapankasalanan tayo, maseguron mangisturbon tuloy iya ed sikatayo, tan say magbabawin puso so mamakiwas ed sikatayo pian onkerew na panamerdona na Dios. Anggaman kuan, ipikasi tayo met iray arum. Anggaman nanilalo si David ed pangisaklang lamet na naabobonan a dayew ed Dios, say salmo to so agsinisiblet ya angipuera ed arum. Ilalaktip to iyan kerew ed si Jehova: “Dia ed maabig a kaliktan mo gawam so maabig ed Sion: ipaalagey mo so saray bakbakor na Jerusalem.”—Salmo 51:18.
18. Akin ya inpikasi nen magbabawin David so Sion?
18 On, nanilalo si David ed kipawil to lamet ed madibinon pabor. Anggaman ontan, diad saman lamlamang a sipapaabeban pikakasi na salmista a ‘dia ed maabig a kaliktan [na Dios] et gawaen [to] so maabig ed Sion,’ say Jerusalem a kabiseran syudad na Israel, a ditan et inilaloan nen David a pangipaalageyan na temploy Dios. Saray seryoson kasalanan nen David so anigensigen ed interon nasyon, ta amin lawarin totoo so nanirap lapud gawan-mauges na ari. (Ipareng so 2 Samuel, kapitulo 24.) Diad pansumpalan, saray kasalanan to so amakapuy ed “bakbakor na Jerusalem,” kanian natan et saratan so kaukolan ya ipaalagey lamet.
19. No sikatayo so akapankasalanan balet ta aperdona, diad anto so matukoy tayon ipikasi?
19 No sikatayo so seryoson nankasalanan balet naawat tayo lay panamerdona na Dios, matukoy ya ipikasi ya anggan panon et apigeren to so antokaman a deral a ginawa na kondukta tayo. Nayarin akapangitarok tayo na balaw ed masanton ngaran to, nayarin apakapuy tayoy kongregasyon, tan nayarin apaermen tayoy pamilya tayo. Say maaron mangatatawen ya Ama tayo so makapangekal ed antokaman a balaw a nitarok ed ngaran to, makapanpaseseg ed kongregasyon diad panamegley na masanton espritu to, tan makaligliwa ed kapusoan na saray inadaro tayon mangaaro tan manlilingkor ed sikato. Balanglan say kasalanan so nalalanor odino andi, siempre, say kapasantos na ngaran nen Jehova tan say pankaabigan na totoo to so lawas a nepeg tayon nonoten.—Mateo 6:9.
20. Diad silong na antoran sirkumstansya a naliketan si Jehova ed saray bagat tan iyaapay na Israel?
20 No ipaalagey lamet nen Jehova iray bakor na Sion, anto ni so nagawa? Nankansion si David: “Insan ka [Jehova] napaliket na saray bagbagat na inkatunong, pinoolan ya ipangaro tan tibokel a pinoolan a bagat: insan ira mangisaklang na kilaw na baka ed panagbagatan mo.” (Salmo 51:19) Sisisimoon a pinilalek nen David a sikato tan say nasyon so mangayaga ed pabor nen Jehova ta pian naabobonan a makapandayew ed Sikato. Insan naliketan so Dios ed saray pinoolan a bagat da tan ed intero iran iyaapay. Saya so lapud saraya so bagat na inkatunong ya insaklang na dedikado, masimoon, tan magbabawin totoo a mangagayaga ed pabor na Dios. Lapud pisasalamat ed panangasi nen Jehova, diad altar to et iyapay daray kilaw na baka—say sankaabigan tan sankablian iran bagat. Natan et gagalangen tayo si Jehova diad pangitatarok tayo ed sikato na sankaabigan a walad sikatayo. Tan saray saklang tayo et laktipen to so “saray baka a kalakian na saray bagat na bibil” tayo, saray bagat a panangidayew ed mapangasin Dios tayo, si Jehova.—Oseas 14:2; Hebreos 13:15.
Denglen nen Jehova Iray Nangis Tayo
21, 22. Antoran leksyon parad kagunggunaan tayo so kargaen na Salmo 51?
21 Ipanengneng ed sikatayo na impapuson pikakasi nen David a nirekord ed Salmo 51 a nepeg tayon onkiwas ed kasalanan tayon tekep na tuan magbabawin espiritu. Karga met na sayan salmo iray espisipikon leksion parad kagunggunaan tayo. Alimbawa, no mankasalanan tayo balet ta magbabawi, makapanmatalek tayo ed panangasi na Dios. Anggaman ontan, manunan sinononot tayo komon ed antokaman a balaw a nitarok tayo ed ngaran nen Jehova. (Bersikulo 1-4) Singa si David, makapanapelo tayo ed mangatatawen ya Ama tayo parad panangasi diad basiyan na atawir ya inkamakasalanan tayo. (Bersikulo 5) Nepeg a sikatayo komon so magmaliw a matua, tan kaukolan tayon gegemtanen so kakabatan a manlapud Dios. (Bersikulo 6) No sikatayo so nankasalanan, nepeg a kerewen tayo ed si Jehova so pakalinisan, maralus a puso, tan matoor ya espiritu.—Bersikulo 7-10.
22 Manlapud Salmo 51 naimano tayo met ya agtayon balot abuloyan so inkasikatayon magmaliw ya inmawet ed kasalanan. No gawaen tayo so ontan, ekalen nen Jehova ed sikatayo so masanton espiritu to, odino aktibon puersa. Anggaman ontan, dingan na espiritu na Dios ed sikatayo, sitatalonan nibangat tayoray arum ed saray dalan to. (Bersikulo 11-13) No nalingo tayo balet ta magbabawi, abuloyan itayo nen Jehova a mantultuloy a mandayew ed sikato lapud agton balot balawen so maralit tan mansisibkel a puso. (Bersikulo 14-17) Ipanengneng ni na sayan salmo a saray pikakasi tayo so nepeg ya agnisentro ed inkasikatayo labat. Imbes, nepeg tayon ipikasi so panamendisyon tan espiritual a kaabigan na amin na saramay mibibiang ed puron panagdayew ed si Jehova.—Bersikulo 18, 19.
23. Akin a pakiwasen itayo na Salmo 51 a magmaliw a makpel tan optimistiko?
23 Sayan makapasagyat a salmo nen David so nepeg a mamayubo ed sikatayon magmaliw a makpel tan optimistiko. Tutulongan to itayon manmorian agtayo kaukolan a nonoten ya amin et kaandi-ilalo no niparugso tayo ed kasalanan. Akin? Lapud no sikatayo so magbabawi, makapangisalba ed sikatayo so panangasi nen Jehova manlapud kaandi-ilalo. No sikatayo so magbabawi tan sigpot a debosyonado ed maaron mangatatawen ya Ama tayo, denglen toray nangis tayo parad panangasi. Tan agaylan makaligliwan naamtaan ya agbalawen nen Jehova so maralit a puso!
Panon Yon Ebatan?
◻ Akin a kaukolan na Kristianos so maralus a puso tan masanton espiritu na Dios?
◻ Anto so nayarian ya ibangat na magbabawin too ed saray mananumpa ed ganggan nen Jehova?
◻ Panon so panmoria nen Jehova ed maralit tan mansisibkel a puso?
◻ Antoran leksion so naromog ed Salmo 51?
[Litrato ed pahina 15]
Kasin ipipikasi yo so masanton espiritu tan manbantay sumpad pamaermen ed satan?
[Litrato ed pahina 17]
Ipanengneng so panamabli ed agkanepegan a panangasi nen Jehova diad pangiyabawag ed katuaan to