Say “Arum a Karnero” tan say Pangdem na Katawan
“Si [Jesus] so manamaandin bagat ed saray kasalanan tayo, ingen aliwan diad saray kasalanan tayo lambengat noagta ontan met ed kasalanan na interon mundo.” —1 JUAN 2:2.
1. Antoran positibon resulta so sinmabi diad ‘panangipulong ed maong a balita na panarian’?
INKUAN nen Jesus: “Sayan maong a balita na panarian so nipulong ed amin ya atooan a dalin ya onkanan pantasi ed amin a nasyones; tan insan onsabi so anggaan.” (Mateo 24:14) Arum ed kapolian na 1914 so siansia nin mabilay a manasin saray Tasi nen Jehova so matoor a manusumpal ed sayan ganggan. Bilang nansumpalan, nilasus nilibon masimpit-impanpuson totoo, ya adismaya ed saray insaew na sayan mundo, so positibon kinmiwas ed maong a balita. Indedika ra so inkasikara ed si Jehovan Dios tan impauleyan ira ed Panarian to, a sayan dedikasyon so impaamta ra diad panamegley na bautismo ed danum. Wala so 179,421 ya angala na ontan a kurang na kakabatan kaleganan na 1984. Diad epekto, inkuan da ed saray totoon ningaran ed ngaran na Dios: “Mila kami ed sikayon totoo, lapud nadngelan mi a say Dios so wala ed sikayon totoo.”—Zacarias 8:23.
2. Anton sengegan so anguley ed panaon na panitipon nen Jesus ed “arum a karnero” to?
2 Sayan lawas-ondadaak a “baleg ya ulop” na saray managdayew so kabiangan na saraman so dineskribe nen Jesus a bilang “arum a karnero” to. (Apocalipsis 7:9, 15; Juan 10:16) Walaan ira na engranden ilalo diad pambilay na ando lan ando ed mangaraldalin a paraiso. (Salmo 37:29) Impasakbay nen Jesus a sarayan matoor a patumbok so tiponen to kayari na ununan impangiter to na agnaapag ya imanon panagpastol diad katipon na “melag a pulok” na malakarneron totoo diad balon sipanan a sikato so manamegley. (Lucas 12:32; Hebreos 9:15) Sinononot ed sayan panagtipon na duaran malakarneron klase na totoo ed “sakey a pulok,” natalosan tayo no akin ya imbaga nen apostol Juan a si Jesu-Kristo “so manamaandin bagat ed saray kasalanan tayo, ingen aliwan diad kasalanan tayo lambengat noagta ontan met ed kasalanan na sankamundoan.”—1 Juan 2:1, 2.
Saray Impanguman ed Punto de Bista
3, 4. (a) Anton nauman a punto de bista na dakel nipaakar ed panagselebra ed Pangdem na Katawan? (b) Antoy labay nen Pablo ya ibaga diad impangikuanto na, “Ta unong a singa kabetbet na pangan yo . . . tan iyinum yo”?
3 Dakel ed saray balobalon atipon ed “arum a karnero” so datin manseselebra ed misa odino komunyon, a say inkabetbet tan nengneng na selebrasyon so uuleyan na saray sisisiaen na partikular a relihyoson muyongan a kawalaan da. Natan, anggaman kuan, saraya so akabidbir a say Pangdem na Katawan so nepeg a selebraan a maminsan lambengat ed kada taon. Akin ya ontan? Bueno, say Judion Paskua so sinelebraan lambengat a maminsan ed kada taon, tan inggapo nen Jesus so Memoryal ed saman a parehon labi na Paskua, Nisan 14. Insan imbaga to ed saray babangatan to: “Saya so itultuloy yon gawaen a pakanodnonotan ed siak.” Inyarum nen Pablo: “Ta unong ed kabetbet na pangan yo ed sayan tinapay tan iyinum ed sayan kopa, itultuloy yon iyabawag so impatey na Katawan, ya anggad isabi to.” (1 Corinto 11:24-26) Malinlinew a tutukoyen nen Jesus a saray babangatan to so mangitultuloy ed selebrasyon na impatey to ed Agew na Paskua, a nagawan maminsan ed sakey taon. Sirin, sikato so sinelebraan a “mabetbet” kaleganan na bilay na Kristianon kongregasyon. Diad tua, say Memoryal so sinelebraan la ed 1,953 danay.
4 Wala ni so sananey a pandumaan ed punto de bista ya inapresya na “arum a karneron” klase. Imbes a sikara so mibiang ed tinapay tan say alak a singa datin ginawa na dakel ed sikara diad arum ya iglesia, aromog da la natan so kipapasen dan “niyarunsa” ed saman so kipapasen a manag-imaton. Akin ya onia, tan kasin walaan itayo na Makasulatan a suporta diad oksuyan a mangipalugar ed saray manag-imaton tan ontan met ed saray mibibiang?—2 Corinto 13:11; 2 Timoteo 3:16, 17.
5. (a) Deskribien iray pundamenton kundang a nepeg ya alaen na sakey a too pian nagunggunaan ed bagat nen Jesus? (b) Akin a say Dios so nikaduman kinmiwas a nisesengeg ed 144,000 a patumbok nen Kristo Jesus?
5 Pian nagunggunaan so siopaman ed “manamaandin bagat” nen Kristo Jesus, walaray pigaran kundang a nakaukolan a gawaen, anggaman balanglan say sakey so walaan na ilalo ed bilay diad tawen odino ilalo ed bilay diad mangaraldalin a paraiso. Sarayan pundamenton kundang so onggendan: (1) panangala na suston pikakabat ed Salita na Dios (Roma 10:13-15); (2) panangagamil na pananisia (Hebreos 11:6); (3) panagbabawi (Mateo 4:17); (4) kakumberte (Gawa 3:19); (5) dedikasyon (Lucas 9:23); tan (6) bautismo (Mateo 28:19). Diad kayari na impangala ed sarayan kundang a say Dios so onkiwas ed nikaduman dalan diad sakey a toon pilien to a kaiba na 144,000, odino “melag a pulok.” Nipaakar ed anton gagala? Pian say too so magmaliw ya espiritual ya anak na Dios a walaan na ilalon magmaliw a saserdote tan ari a kaiba nen Kristo Jesus. (Apocalipsis 20:4, 6) Wala lambengat so nakdaan na ontan iran espiritual ya anak a mabilay natan, tan saraya so manepeg a mibiang ed saray emblemas. Saya, sirin, so rason diad karaklan a bilang na saray Tasi nen Jehova a say kipapasen da so manag-imaton tan aliwan mibibiang.
Say Paskua tan say Memoryal
6. Akin ya imbaga na arum a say “arum a karnero” so nepeg a mibiang ed saray emblemas, tan anton tepet so pinalesa na saya?
6 Insuhiri na arum a say ondaraak a baleg a bilang na “arum a karnero” so nepeg a mibiang ed saray emblemas. Say rason da so: Lapud “say Ganggan so walaan na anino ed saray maabig a bengatlan onsabi,” tan lapud say sakey a nakakaukolan na Ganggan et say panumpal ed Paskua na namparan saray Israelitas tan saray agalsiman a sankailin manaayam, saya so mangikabaliksan a saratan a klase na malakarneron totoo ed “sakey a pulok” ed leksab na “sakey a pastol” so nepeg a mibiang ed saray emblemas na Memoryal. (Hebreos 10:1; Juan 10:16; Numeros 9:14) Saya so mamatalindeg na importantin tepet: Kasin say Paskua so sakey a tipo na Memoryal?
7. Diad antoran pamaakaran a say Paskua “so sakey ya anino na maabig a bengatlan onsabi”?
7 Tua a saray pigaran nengneng na pananumpal ed Paskua diad Ehipto so andi-duaruwan asumpal ed si Jesus. Impareng nen Pablo si Jesus ed kordero na Paskua, a kuanto, “Si Kristo a paskua tayo so nibagat.” (1 Corinto 5:7) Say impangiwalsik ed dala na kordero ed Paskua diad saray puerta so angipaseguro ed inkaliktar na saray papanguloan diad kada Israelitan pamilya. Miulibay, sikato so diad panamegley na inkiwalsik na dala nen Kristo a “say kongregasyon na panguloan a nilista ed katawenan” so makaawat na kililiktar da, odino “kabulos diad panamegley na dondon.” (Hebreos 12:23, 24; Efeso 1:3, 7) Nagkalalo ni, anggapo so puteren a pukel na kordero ed Paskua, tan saya met so akaromog na kasumpalan ed si Kristo Jesus. (Exodo 12:46; Salmo 34:20; Juan 19:36) Sirin, tua so pangibaga a say Paskua, ed arum a pamaakaran, so sakey ed dakel a nengneng na Ganggan ya angitarya na “sakey ya anino ed saray maabig a bengatlan onsabi.” Amin na sarayan nengneng so angituro ed arapen diad si Kristo Jesus, “say Kordero na Dios.”—Juan 1:29.
8-10. (a) Diad anton importantin respeto nipaakar ed dala so piduma na Paskua ed Memoryal? (b) Panon a saray sipanan a nisiglaot ed Memoryal so mangipabitar na sananey a piduma? (c) Diad anton konklusyon so pangipaarapan na saya?
8 Anggaman kuan, say Paskua so aliwan estrikton sakey a tipo na Pangdem na Katawan. Akin ya andi? Sanen say Paskua so inggapo ed Ehipto, say laman na inkalot a kordero so kinan, balet anggapo ed dala na kordero so kinan. Diad piduma, anggaman kuan, sanen inggapo nen Jesus so pakanodnonotan na impatey to espesipikon binilin to raman so wadman nensaman a mangan ed laman to tan oninum ed dala to, ya insimbolo na tinapay tan alak. (Exodo 12:7, 8; Mateo 26:27, 28) Diad sayan sankaimportantian a nengneng—say dala—say Kordero so aliwan sakey a tipo na Pangdem na Katawan.
9 Wala ni so bengatlan nepeg ya imanoen. Insingbat nen Jesus so duaran nansiglaotan a sipanan ed saray babangatan to, “say balon sipanan” tan ‘sakey a sipanan ed panarian.’ (Lucas 22:20, 28-30) Namparan saratan a sipanan so walaan na gawaen ed saray mibibiang a walad dasig na pagmaliw a saserdote tan ararin kaiba nen Kristo Jesus. Balet diad Israel et anggapo so agalsiman a sankailin manaayam a makapagmaliw a saserdote odino ari. Diad sayan pamaakaran, met, naromog tayo so pandumaan na piesta ed Paskua ed Israel tan say Pangdem na Katawan.
10 Sirin diad anton konklusyon so pangipaarapan na saya ed sikatayo? Say katuaan a saray agalsiman a sankailin manaayam so angan ed andi-lebaduran tinapay, ampait iran pisipising, tan kordero ed Paskua so agmangiletneg a saraman natan so wala ed “arum a karnero” na Katawan a presente ed Memoryal so mangan ed tinapay tan oninum ed alak.
Kablian na Iyatendi ed Memoryal
11. Nipaakar ed antoran importantin rason a say “arum a karnero” so nepeg ya onatendi ed Memoryal?
11 Kasin saya, anggaman kuan, so mangipanengneng ya aliwan importante ed saray “arum a karnero” a klase so iyatendi ed selebrasyon na Memoryal? Peteg ya andi! Saya so sakey ya okasyon diad pannonot na saray malakarneron patumbok nen Jesus ed sikato diad sankadumaan a pantalos. Say “arum a karnero” ed satan ya okasyon so mannonot a sikara la so agunggunaan lapud pananisia ra ed naibong a dala nen Kristo diad kalaknab a sikara la natan so impasen nen Jehova a “saray kawes da so naurasan tan apaputi ed dala na Kordero.” Saya no akin a nayarian da so mangisaklang na “sagradon lingkor ed agew tan labi diad templo [na Dios].” (Apocalipsis 7:14, 15) Nanonotan da met a sikara so mantultuloy a ‘mananap ed si Jehova, inkatunong, tan kauyamoan’ tekep na ilalo ed kiliktar kaleganan “na agew na sanok nen Jehova,” tan kayari to et panggayagaan da so pakagamor na inkayadyari diad inkatoo. Diad kaunoran et nayarin sikara so peteg ya iyabawag nen Jehova a matunong, diad kayari na pangiyawat nen Jesus na Panarian ed si Ama to.—Sofonias 2:2, 3; 1 Corinto 15:24; Apocalipsis 20:5.
12. Antoran gungguna so pansumpalan na italineng diad paliwawa ed Memoryal?
12 Sananey ya importantin rason na iyatendi et saray katuaan a nasingbat kaleganan na paliwawa ed Memoryal et “saray aralem a bengatla na Dios,” ‘anawet a taganon kayarian na matatken a totoo,’ ya aliwa lambengat a say gatas na “manunan doktrina.” (1 Corinto 2:10; Hebreos 5:13-6:1) Say Makasulatan a paliwawa so mamaaralem na apresasyon ed aron impanengneng nen Jehova diad impangiletneg to na ontan a makapakelaw ya areglo ed Panarian a para ed kabendisyonan na pamilya na too. Sikato met so pankanawnawa na ‘inengneng a lalon mapetepet ed Manunan Ahente tan Manamayadyari na pananisia tayo, si Jesus.’ Komon ta say aron impanengneng nen Jesus ed sikatayo, nisaray dinalan ton impanirap, so agleglemewen. (Hebreos 12:2, 3) Nagkalalo ni, miabobon itayon amin a dakel ed saray mablin kaisipan ya insingbat nen Jesus ed saray apostoles to sanen inggapo to so Memoryal—saray kaisipan nipaakar ed pankakasakey, aro, tan kigloria na ngaran nen Jehova—so nayarin pibiangan na “arum a karnero” tan ontan met ed “melag a pulok.”
Panangipanengneng na Aro ed Amin
13. Akin ya importante a saray emblemas so nipasa ed amin ya inmatendi?
13 Importante a napanonotan so amin a presente ed Pangdem na Katawan diad oksuyan ya inletneg nen Jesus. Say aktual a kiliber na tinapay tan say alak so ontulong a mamaaralem na apresasyon ed saray sagradon bengatla a sinalaysay ed satan a labi. Gawaen to met a makayari so balang sakey a mangipanengneng no anto so ilalo to ed bilay—mangatatawen odino mangaraldalin.a Say panumbok ed manepeg ya oksuyan so mangitarok ed kongregasyon a mitukoyan ed saman so nagagawa ed sankadalinan diad satan a labi.—1 Corinto 14:40.
14. Panoy pakapangipanengneng na mamatatken na aro ed sakey ya alanaan a mansasakit ed labi na Memoryal?
14 Singa bilang no say sakey ya alanaan ed kongregasyon so maniinagem tan agto nayarian so onatendi ed Memoryal. Anto ey? Gawaen so anggaan na nayarian a sakey ed saray mamatatken so mangawit na saray emblemas ed satan a Kristianon mansasakit tan, no kumbeniente, say matatken so mangiter na pigaran matukoy a komento sakbay ya iyopresi toray emblemas tan kaputan to ed matukoy a pikakasi. Agaylan makapaseseg so nalikna na mansasakit a too! Saray ontan a gawa na aro so mangiyalibansa ed espiritu na aro diad dalem na kongregasyon.—Salmo 133:1.
15. Deskribien so arum iran dalan a pakapangipanengnengan na respeto ed Pangdem na Katawan.
15 Arum iran makapainteres a tepet so tinmalindeg nipaakar ed oksuyan tan say nengneng na saray emblemas ya usaren ed Memoryal. Saray ebat ed sarayan tepet so naromog ed pahina 13 diad silong na “Panangipanengneng na Respeto ed Pangdem na Katawan.” Maong no saray responsablen mamatatken so maalwar a manumbok ed saray wadtan a nidatak.
Say Pankaukolan na Dilin-Panangusisa
16, 17. (a) Anton tepet so intepet na arum nipaakar ed pibibiang diad Memoryal, tan siopa lambengat so makapangiter na ebat? (b) Panoy pangiter na Dios na makakumbinsin ebidensya ed saraman so inilalak na espiritu to?
16 Wala raman so agonigon diad panduaruwa no kasin kanepegan da so mibiang ed saray emblemas. Sayan tepet so no maminsan onlesa ed pigaran simba sakbay na ontumbok a selebrasyon na Pangdem na Katawan. Saray ontan a panangusisa so mabetbet a gawaen na saraman so agano nin mililimog ed saray Tasi nen Jehova. Kasin sakey ka ed saraman so manduaruwa? Panon so pakadeterminam ed suston kurang a gawaen?
17 Inrekomenda nen Pablo nipaakar ed Pangdem na Katawan: “Ununan abobonan na sakey a too so inkasikato kayari na pangusisa, tan sirin sikato komon so mangan na tinapay tan oninum ed kopa.” (1 Corinto 11:28, 29) Kasin naimanom ya ibabaga nen Pablo a sika so sakey a manggawa na ‘panangabobon kayari na pangusisa’? Siempre, aliwan mauges so pangitongtong ed satan a seryoson pamaakaran diad sakey a Kristianon matatken, balet sika lambengat so nepeg a mandetermina ed personal a relasyon mo ed si Jehova tan ed Anak to. Anggapo ed saray 144,000 so tinaynanan na Dios a manduaruwa. Apaseguroan itayo: “Say espiritu a mismo so mangitarok na pantasi ed espiritu tayo a sikatayoray anak na Dios.” Say espiritu na Dios so mangipaliing na kumbiksion ed puso na anggan siopan membro na laman nen Kristo a sikato so sakey ed saray espiritual ya anak na Dios. Say apilin sakey so mikabat ed saya tan agto nakaukolan a tepetan so sananey ed kongregasyon diad pamekder.—Roma 8:15, 16.
18. Antoran maawaran a katuaan nipaakar ed “arum a karnero” so makapainteres ed sikatayo?
18 Say modernon awaran na saray Tasi nen Jehova so mangipanengneng a nanlapulad 1931 et ginmapon niiter so lalon imano ed “arum a karnero” diad panemegley na mensahe na Panarian. Insan nen Mayo 31, 1935, diad impangipaliwawa ed teman “The Great Multitude,”b say “baleg ya ulop” ya anengneng nen apostol Juan ed pasingawey so malinlinew a kapara na “arum a karnero.” Anto so ipanengneng na sayan balon danet? Peteg a say panagtipon ed “melag a pulok” so manasingger lan manampot tan say panaon so sinmabi pian si Jesus, diad panamegley na administrasyon na “matoor tan makabat ya aripen,” et iyarap to so imano to diad panipon ed “arum a karnero.”—Mateo 24:45-47.
19. Anton personal a panangusisa so nayarin nisimbawan gawaen na saraman so balobalon mangibabagan sikara so kabiangan na alanaan?
19 Diad panisip ed saray akaunan salaysay, nibaga tayo ed amin na saraman so agano nin mililimog ed saray totoo nen Jehova tan diad saraman so nayarin mangibabaga a sikato so sakey ed alanaan a klase: Usisaen mon maalwar so relasyon mo ed si Jehova. Tepetan mo so inkasika, Kasin say mangatatawen ya ilalo a nibabagan walad siak so makasengeg ed akaunan bangat na iglesia ya amin a membro na iglesia so onla ed tawen? Kasin say ilalok ed anggan anton pamaakaran so nisiglaot ed sinisiblet a pilalek odino emosyonal a liknaan? Imbaga nen Pablo: “Agnayarin mantila so Dios.” (Hebreos 6:18) Nisay say masanton espiritu na panagtagibi so mantila. Kanian sirin, siopaman a petepeteg ya inilalak na espiritu na Dios so agmantultuloy a nagonigon ed panduaruwa noagta nayarian ton pekderan ed amin a maabig a konsiensia a sikato so sakey ed saray anak na Dios.
Panselebra ed 1986
20. Diad anton kablian so Memoryal ed saray Tasi nen Jehova?
20 Say Pangdem na Katawan, anggapoy suppiat, so sankabalgan a selebrasyon ed taon a para ed amin na saray tuan Kristianos. Anggapo so sananey ya okasyon a singa satan no nipaakar ed kaimportantian, gagala odino oksuyan. Sirin, diad itelek na dalin, a gawaen to so agew a mankalkalnan onakseb diad seselekan ed liber na dalin, kada kongregasyon na saray Tasi nen Jehova, namparan melag tan baleg, tan amin a grupo so mankakasakey diad panulok ed bilin na Katawan.
21. Anton awawey tan ilaloan so nepeg a patalindegen na Memoryal ed 1986 diad kapusoan na saray totoo na Dios?
21 Amin a malakarneron babangatan sirin so manggayagan tuloy diad panilalon mandaragup ed sananey a selebrasyon na Memoryal. Komon ta say okasyon ed ontumbok a taon so napaneknekan a panaon na pampapabiskegan ed amin na saray ariripen nen Jehova. Komon ta nipaslep ed sikara so parehon espiritu na talek a singa ed saman so Ehemplo ra, si Jesu-Kristo, a kuanto: “Manpakpel! Tinalok so mundo.”—Juan 16:33.
[Saray Paimano ed Leksab]
a Diad sakey a baleg a kongregasyon ugali na saraman so mangiserbi na emblemas so onalagey ed sampot na kada dasig na yurongan tan sinyasan da lambengat iraman so akayurong. Siopaman a malabay a mibiang so maninyas ed saman so manseserbi. Anggaman kuan, a singa nipanengneng ed tagey, saya so aliwan matukoy.
b Sayan paliwawa so niiter ed Washington, D. C., nen J. F. Rutherford, presidente na Watch Tower Bible and Tract Society ed saman.
Kasin Nanonotan Yo
◻ Akin a say Paskua so aliwan tipo na Memoryal?
◻ Akin a say anemiran kundang so nepeg ya alaen sakbay a nagunggunaan ed bagat nen Jesus?
◻ Akin a say iyatendi yo ed Memoryal so makanan tuloy?
◻ Akin a say dilin-panangusisa so makagungguna sakbay na Memoryal?
[Kahon ed pahina 12]
Panangipanengneng na Respeto ed Pangdem na Katawan
Saray Embleman Usaren
Andi-lebaduran tinapay: Tinapay, a singa say agtinimplaan a Judion matzoth, a ginawa lambengat ed arinan trigo tan danum so nayarin usaren. Agmanguusar na matzoth a ginawa ed inaruman iran ingrediente a singa say asin, masamit, malt, iknol odino bawang. Sarag yo so manggawa na dilin andi-lebaduran tinapay ya usaren so onggendan a resipe: Pankamesan so sakey tan kapalduan kopa na arinan trigo (no anggapo, usaren so belas, mais odino arum ya arina) diad sakey a kopa na danum, a masaen. Insan tapyaken a maimpis. Ikarga ed panaglutowan tan turokturoken pian naabotan. Lutoen ed ampetang a pugon ya anggad namaga tan onsalangsang.
Alak: Mangusar na agnilaokan ya ambalangan alak na ubas a singa say Chianti, Burgundy, odino claret. Ag-usaren so tinto a brandy, a singa say sherry, port odino muscatel. Ag-uusaren iray alak a walaan na inyarum a rekado a singa say Dubonnet tan arum niran alak ya aperitif. Say ginawa ed abung ya ambalangan alak so nayarin usaren no agminasamitan, odino nirekadoan.
Panagparaan ed Kingdom Hall
Lamisaan a para ed emblemas: Apisan so lamisaan na malinis ya abel tan supisyentin plato tan kopita na alak a para ed mauksoy a kiserbi. Say tinapay so nayarin pisagpisagen tan say alak so ikarga la sakbay na miting. Ag-inletneg nen Jesus so anggan anton ritualistikon kabaliksan nipaakar ed sayan pamaakaran. No kakaukolan na saray kipapasen, sakuban iray emblemas na malinis ya abel pian nasalimbengan ed bigis.
Managserbi: Ipaliwawa lan masakbay so nipaakar ed oksuyan a tumboken ta pian napaliisan so anggan anton pakaabala odino gutgutan diad pangiserbi ed saray emblemas ed amin ya inmatendi, a pati say managpaliwawa tan saray managserbi.
Attendants: Nepeg a wala so magenap iran attendant sakbay ya onggapo so pantitipon ta pian amin so naabrasa ed isabi ra tan naikdan ira na yurongan.
Dekorasyon a rosas: Saya so nayarin gawaen, balet ta nepeg a gawaen labat a simpli tan marakep.
Oksuyan na Miting
Oras na selebrasyon: Anggaman say paliwawa so nayarin onggapon masakbay, saray emblemas so agnepeg ya iliber ya anggad say agew so sinmelek la. Nepeg a determinaen ed lokal no kapigan so iselek na agew diad ontumbok a selebrasyon diad lugar yo.
Paliwawa ed Memoryal: Say managpaliwawa so nepeg a manparaan a maong ta pian nipresenta to so materyal to ed loob na nigeter a panaon. Nepeg a nipresentan malinlinew tan makapaseseg ed amin a presente.
Say Memoryal so mamaaralem na aro ed si Jehova tan ed Anak to