‘Pepelesan’ nen Jehova
“Siak a dili, si Jehova, pelesan ko ed dilin panaon to.”—ISAIAS 60:22.
1. Panon a say indengan na saray totoo nen Jehova so miduma ed mundo nen Satanas, tan akin?
NATAN, panliliket tan pansayaksak so naromog aliwan diad mangatatawen a muyongan nen Jehova labat noagta ontan met ed interon muyongan na saray Tasi nen Jehova ed dalin. Say liket tayo so niduman tuloy ed bilunget ya angulabot ed mundo nen Satanas. (Salmo 144:15) Daakan so espiritual a tagano tan iinumen tayo, ta pian sikatayo so “onkelyaw a magaygayaga lapud maabig a kipapasen na puso.” (Isaias 65:13-19) Sikatayo so aliwan agsikakabat ed sengegan na peles a krisis ed mundo. Say ilalo tayo ed masakbay a pangiliktar na Panarian na Dios so napapabiskeg legan a nanenengneng tayon nasusumpal iray propesiya na Biblia ya agnaamper a mamapaarap ed Armagedon. Kabat tayo a sayan “bakal na baleg ya agew na Dios a Makapanyarin-amin” so onsabin eksakto diad “aturon panaon,” lapud say pasingawey so “lawas mansiglat a mamaarap ed anggaan, tan agmantila.”—Apocalipsis 16:14, 16; Habacuc 2:3.
2. Antoran kipapasen so daakan ed muyongan nen Jehova, a mangipaarap ed anton tepet?
2 A singa ed tawen, sirin diad dalin et wala so inkapermanente na teokratikon muyongan nen Jehova. Nagkalalo ni, lapud si Jehova so sengegan na dinamikon enerhya, gawaen ton ‘ondaak so sigpot a biskeg ed saraman so manilalo ed sikato.’ (Isaias 40:29-31) Say muyongan to so mabilay ed kimey tan pirmin onaabante. (Ipareng so Ezequiel 1:15-21.) Saray 47,869 kongregasyon na saray Tasi nen Jehova ed 203 daldalin ed sankadalinan so organisadon tuloy a mangiyaabantin maseseg ed kimey na Panarian. (Mateo 24:14) Panon so inkianak na sayan dinamikon sankagloboan a muyongan?
3. (a) Panon so kasusumpal na Isaias 60:17 ed modernon panaon? (b) Antoran mipadparan oksuyan so angitarok na aligwas ed panaon na Biblia?
3 “Organization” so titulo na aaralen iran artikulo na The Watchtower na Hunyo 1 tan 15, 1938. Saraya so aningbat a malaknab ed Isaias 60:17, a ditan et pisasalitaan nen Jehova so mangatatawen a muyongan to, a kuanto: “Imbes a gansa siak so mangiyakar na balitok, tan imbes a balatyang siak so mangiyakar na pilak, tan imbes a kiew, gansa, tan imbes a bato, balatyang; tan turoen ko so kareenan a manangasikaso yo tan say inkatunong a mangipabtang na kimey yo.” Diad impangisindag to ed sayan magmaong a kipapasen, say muyongan nen Jehova ed dalin so apabiskeg. Unong a singa say balitok so mas lalon mabli nen say gansa (tan sikato so miulibay ed arum a materyal ya abitla dia), satan met so tua ed teokratikon oksuyan ya impaliwawa na Watch Tower Society ed saray kongregasyon na totoo na Dios nen 1938—tan saratan so sigpot-puson inawat da—a lalon lablabayen nen saraman so datin demokratikon oksuyan. Sikato so Makasulatan. Gawaen to so maabig a muyongan diad kagawa na kimey na Dios, a singa saray miulibay ya oksuyan et angitarok na aligwas ed panaon nen Moises tan diad samay asakbay iran agew na Kristianon kongregasyon.—Exodo 18:25; Gawa 6:3-7; Tito 1:5; 1 Pedro 5:1-3.
4. (a) Panon a saray Tasi nen Jehova so apabiskeg a para ed saray subok nen 1939-45? (b) Antoy mamaneknek a say bendisyon nen Jehova so wala ed saman a teokratikon oksuyan?
4 Sirin, nen 1938, taon sakbay na interak na Guerra Mundial II, saray “manangasikaso” tan “saray manangipabtang na kimey” ed amin a kongregasyon so nagmaliw a “kareenan” tan “inkatunong.” Say mabiskeg, nankakasakey ya oksuyan na muyongan so inmabante a tekep na mabungan indaak. Benindisyonan nen Jehova so nankakasakey a tastasi to. Saray bilang da so ngalngalin adoble manlapud 71,509 ya anggad 141,606 ed baetan na 1939 tan 1945, anggaman ed saray irirap tan panamasegsegang ed saraman a taon na bakal.
‘Anggapo la So Karawalan’
5. No nipaakar ed “kareenan,” panon a saray totoo nen Jehova so miduma ed mundo?
5 Anggaman kuan, kumusta so kayari-Guerra Mundial II a panaon? Anggapo so kareenan ed limog na nasyones ed dalin. Diad tua, nibalita a masulok a 30,000,000 totoo so atawtaw ed saray “angkelag” a bakal nanlapud 1945. Anggad 40 “angkelag iran bakal” so agawa ed liber na globo ed sakey a panaon. Agaylan sikatayo so maliket, sirin, a manserbin kaiba na sakey a muyongan ya angitalirak ed karawalan! (Isaias 2:4; Uliran 20:22) Nagkalalo ni, bilang sankagloboan a muyongan, panggagayagaan tayo so kareenan ed limog tayon dili. Diad panaakar a kaiba so “Dios na kareenan,” naeksperiensia tayo “so kareenan na Dios a talonaan to so amin a kanonotan.”—Filipos 4:7-9.
6, 7. (a) Anto so manggawa ed totoo na Dios a nidumaduma? (b) Panon so kasusumpal na Isaias 60:18 ed sikatayo? (c) Diad anton matalonan dalan a sikatayo so miduma ed saray palson relihyonista?
6 Lapud say “kareenan” tan “inkatunong” so tinmalona ed limog na totoo nen Jehova, sikatayo so miduma ed mundo nen Satanas. Diad pakaimano ed saya, arum ed saray kakaabay tayo so angikuan, ‘Respetoen mi kayon totoo, balet agmi labay so relihyon yo.’ Anggaman kuan, agta say relihyon so nanggawa ed sikatayon totoo ya onia? Andian itayo na interes ed saray onsusumpan ideolohya tan panggugulaan a mangaapag ed saray nasyones. Imbes, say nankaduan interes tayo et say (1) pangibangat ed mauyamon totoo diad dalan na kilalaban a mamaarap ed Panarian nen Kristo tan (2) mangidayew ed si Jehova, ya ipakabat so ngaran to ed arap na amin a totoo bilang sakey a pantasi. Sikatayo so “aliwan kabiangan na mundo.”—Juan 17:14, 16.
7 Sirin, mibibiang itayo ed kasumpalan na sipan nen Jehova: “Anggapo la so karawalan a narengelan ed dalin mo, panagbagbag odino panaggeba ed saray ketegan mo. Tan peteg a tawagen mo so saray dilin bakor mo a Kilalaban tan saray pintom a Dayew.” (Isaias 60:18) Amin a dayew so onla ed Dios tayon si Jehova! Saray relihyoson papangulo na Kakristianoan (tan amin na saray apostatan kakaiba ra) so manmumodmora ed satan a ngaran—ya angga ni ingen ed punton mansimpisimpitan a sasalien dan paandien ed saray patalos na Biblia. “Balet, sikatayo, diad biang tayo, manakar itayo ed ngaran nen Jehova a Dios tayo ed ando lan ando, lawas.”—Miqueas 4:5.
8. (a) Anton panamaseseg so inter nen Jehova ed totoo to diad Isaias 60:19-21? (b) Anton ‘inmutmut’ so mamaparakep ed si Jehova, tan panon?
8 Papasesegen itayo nen Jehova a manakar ed ngaran to. Diad Isaias 60:19-21, papaseguroan to so mangatatawen a muyongan to a sikato so magmaliw ed sikato a “maandon liwawa,” a talonaan to so inkasnag na agew tan bulan. Diad espiritual, sikato so magmaliw a kalimgasan to, a sumpalen to met so sipan to ed saray totoo to: “Amin da so magmaliw a matunong; diad ando lan ando et kayarian da so dalin, say mutmut na intanem ko, say kimey na saray limak, so diad siak et napalimgas.” Tua, pinaaligwas nen Jehova “so dalin,” odino ayaman na kimey, na tastasi to. Ondadaak, sikato so ‘onmumutmut’ ed inkamabunga unong a saray dakerakel a balobalo so natitipon ed dapag na Panarian tan natutulongan a mangisulong na Kristianon personalidad. (Colosas 3:10, 12-14) Saya so ‘mamarakep’ ed si Jehova, a mangitarok na dayew ed mablin ngaran to.
9. (a) Panon so pamibendisyon nen Jehova ed saray tasi to ed Mexico, tan akin? (b) Anto so imbaga na sakey a peryodiko diad impakaimano to ed katooran da?
9 Sakey ya agano nin ehemplo et say Mexico. Diad apalabas a duaran taon, say pantok na manangipalapag ed saman a dalin so dinmaak a manlapud 113,823 ya anggad 151,807—komendablen 33 porsiento! (Say 1984 a selebrasyon da ed Memoryal na impatey nen Jesus so inatendian na 695,369.) Saray Mexicanon agagi tayo so sankasesegan ed kimey ed lawak. Agano nin naimano na sakey a peryodiko ed Monterrey, met, so katooran da diad pangabet ed salisalan ed neutralidad, a kuanto: “Agaylan daakan a respeto so nipaseseg ed sikatayo diad inkamapekder tan tepel na kumbiksion da. Anggamano saray anak da so apabtik ed eskuelaan lablabayen da so mansiansian matoor ed pananisia ra, sisisiaen da. Panon kasi so kipapasen no amin tayon Kristiano so ontan, ya anggapo so pambibiigan na grupo tan denominasyon? Say Mexico so magmaliw a sangan opisina na tawen.”
10. (a) Antoy mangipanengneng a saray Tasi nen Jehova so mabunga ya anggan diad leksab na panangisebel? (b) Anton tepet so tinmalindeg dia?
10 Saray Tasi nen Jehova so mantutultuloy a mamapawala ed sayan bunga na dayew, anggan diad saray dalin ya anggapo so tunda na panamasegsegang. Agaylan makapaliket so pakaimano ed 1984 Serbisyon Taon a Report a diad 28 bansan wala so panangisebel na gobierno odino arum a panameget et dinmaak na 3.1 porsiento so dagup a bilang na manangipalapag, a nansumpal ed masulok a kakapat na sakey a milyon, tan saray payunir so dinmaak na 23 porsiento! Kasin naisip yo so manpayunir ed ontan iran kipapasen? Sakey a promedio na 6,905 na agagi tayon lalaki tan bibii ed sarayan dalin so manggagawa na ontan ed kada bulan! No sikayo so walaan na kawayangan ed panaayaman yo, kasin dampoten yo so panregular payunir, odino anggan man-auxiliary payunir?—Ipareng so Lucas 17:5, 6.
‘Nagmaliw a Sanlibo’
11, 12. (a) Anto so ununan kabiangan na sipan a gagawaen nen Jehova natan? (b) Anto so arum ed saray ehemplo na ‘daiset a nagmaliw a sanlibo’? (c) Akin a wala so ontan lan maples ya imbulaslas?
11 Nisesengeg ed mablin ngaran to, gagawaen nen Jehova natan so nankatlon sipan. (Isaias 60:22) Ununa et imbaga to ed sikatayo: “Say daiset a mismo so magmaliw a sanlibo.” Legan a babasaen yo so Yearbook of Jehovah’s Witnesses, kasin naimano yo no panon ya agawa so inggapo ed sakey lambengat a manangipalapag na Panarian, odino pigpigara, ed arum iran dalin a natan et wala la so nilibu-libo? Alimbawa, say agin lakin payunir ya inmunan tasi ed Chile so angabang na sakey ya apartment tan inimbitaan toray totoo ed sakey a miting ed Simba. Kalamor et wala so sakey ya interesadon sinmabi. Intepet na sayan too, ‘Saray arum ey, kapigan so isabi ra?’ Sikato so pinaseguroan na payunir: “Sikara so onsabi.” Tan tuan sikara so sinmabi. Kayari na 50 taon, saman a melag so nagmaliw a 23,985.
12 Diad Italya, saray Tasi nen Jehova so ampaipait a pinasegsegang na pasistan uley nen Mussolini. Diad kayari-bakal a taon nen 1946, 120 lambengat ed sikara so manrereport ed kimey. Balet nonoten a 120 lambengat a presente ed samay Pentecostes nen taon 33 K.P. Tan isipen pa so ginmapo ed saman a panaon! (Gawa 1:15; 2:1-4, 41) Natan, diad sananey a pamaakaran, nikalbo so espiritu nen Jehova ed Italya. Diad 38 taon saray manangipalapag so binmaleg ed pantok a 119,408, so nanreport, ngalngalin maminlibon danay ya indaak. A singa tua ed dakel iran Katolikon bansa ed sankadalinan, saray Tasi nen Jehova ed Italya so makakasagmak na maples ya imbulaslas.—Ipareng so Salmo 69:9; Isaias 63:14.
“Mabiskeg a Nasyon”
13, 14. (a) Panon so kasusumpal na komaduan kabiangan na sipan nen Jehova? (b) Diad sayan pamaakaran, panon so kiyaplika na 1 Pedro 2:9 tan Isaias 59:21? (c) Anto so angiter na lalon biskeg ed panagpulong tayo?
13 Say komaduan kabiangan na nankatlon sipan nen Jehova et saya: “Say melag [so magmaliw] a mabiskeg a nasyon.” Peteg a sikato so “melag,” nikaykayat a nakdaan na alanaan, a nipawil ed “dalin” na pabor nen Jehova nen 1919. Ingen ta sikato so dinmakel, ya anggad amin ya espiritual ya Israel so linmoob—say nagnap a bilang na 144,000 a mananawir na Panarian. (Roma 11:25, 26) Tua, bilang kabiangan na “masanton nasyon,” say alanaan a nakdaan ed dalin so atawag ed makapakelaw a liwawa to a nanlapud kabilungetan. Sikara so nanliket a mangiyabawag a malaknab ed saray karlangan na Dios da, si Jehova. (1 Pedro 2:9) Anggaman daiset ed bilang no ikumpara, sikara so mabiskeg diad panamegley na espiritu na Dios. “‘No nipaakar ed siak, saya so sipanan ko ed sikara,’ kuan nen Jehova. ‘Say espirituk so wala ed sika tan saray salitak so inyan ko ed sangim—sikara so agnaekal ed sangim odino manlapud sangi na ilalak mo odino manlapud sangi na ilalak na ilalak mo,’ kuan nen Jehova, ‘manlapud natan ya anggad ando lan ando.’”—Isaias 59:21.
14 Diad sayan balikas ipapaseguro nen Jehova ed sikatayo a say pangiyaabawag ed “maong a balita na maong a bengatla” so nepeg a mansumpal ed seguradon aligwas, tan saya so ipipikasi tayon masimoon ed sayan ‘agew nen Jehova.’ Say panangipulong tayo so binmisbiskeg unong a say piguratibon “ilalak” na alanaan a nakdaan, say “baleg ya ulop,” tan ontan met ed saray “ilalak” da (saray balobalon impaarap da ed muyongan na Dios) so angyan ed sayan mensahe na kilalaban ed saray sangi ra, a sikato so impalapag da. Bilang nansumpalan, amin na saray kongregasyon so binmulaslas ed espiritualidad, ontan met ed bilang.—Roma 10:10, 15; Salmo 118:24, 25; 1 Tesalonica 3:12.
15. Panon so nagmaliwan a karakel na piguratibon “nasyon” na Dios, tan akin a sikato so maliket?
15 Diad agano niran panaon, agaylan makapakelaw so indaak na bunga na Panarian! Diad inyarum na dakel a bilang na “baleg ya ulop,” say piguratibon nasyon na Dios so mandagup natan na 2,842,531 ya aktibon Tastasi. Sayan “nasyon” so mas lalon dakel nen say 92 nasyones tan naapag-apag ed pulitika na mundo. Tekep na gayaga uliten tayoray salita na managkanta: “Diad ando lan ando say mismon simbawa nen Jehova so ontalindeg; saray kanonotan na puso to so wala ed sakey a kapolian ya anggad sananey a kapolian. Maliket so nasyon a say Dios to et si Jehova, say katooan a pinili to a bilang tawir.”—Salmo 33:11, 12.
‘Pepelesan To’
16, 17. (a) Antoy mangipanengneng a say komatlon kabiangan na sipan nen Jehova so nasusumpal natan? (b) Panon a say aro ed Dios tan ed si Kristo so nipatnag? (c) Anton magayagan kimey tan espiritu so tinmulong ed “pamapeles”? (d) Panon so kiyaplika natan na Mateo 9:35-38?
16 Inyarum nen Jehova so komatlon kabiangan na sipan to: “Sika a dili, si Jehova, pelesan ko ed dilin panaon to.” Legan a sikatayo so akatanyareg ed tambib na “baleg a kairapan,” say panaon a para ed saya et NATAN! (Marcos 13:10, 18, 19) Say maples a kimey ed Panarian legan na apalabas a duaran taon so mangipatua ed saya. Sayan ‘panameles’ so nanaimatonan ed sankadalinan, anggan ed saray dalin a saray Tasi nen Jehova so nepeg a mangipanengneng na aro ra ed si Jehova a Dios tan si Jesu-Kristo diad pampulong ed arap na panamasegsegang odino arum nin kipapasen a mangyan ed saray mismon bilay da ed kaatapan. Unong a saray ulop na sigpot-panaon a manangipalapag so lawas ondadaak, saray payunirs so wala ed unaan. Tan agaylan gayaga so naromog da diad kimey nen Jehova!—Uliran 10:22.
17 Sayan maliket ya espiritu na panagpayunir so amaseseg ed saray kongregasyon ed amin a pasen a ‘mameles’ na pibibiang da ed ultimo lan panagtipon. Anggaman ed engranden indaak, nibaga tayo “a say aaniyen so baleg, balet saray komikimey so daiset.” Diad sayan andian na ilalon mundo natan, nalikna tayo so panangabagey ed totoo, a singa si Jesus sanen wadia ed dalin, ta peteg a sikara so “kinatatan tan imbantak a singa karneron andian na pastol.” Sirin “kerewen tayo ed Katawan na panagani a mangibaki na komikimey ed aaniyen to,” tan manliket itayon makanengneng a saray pikakasi tayo so makapakelkelaw a naebatan.—Mateo 9:35-38.
18, 19. Antoray arum a report a mangipanengneng a say lawak na mundo so “aluto la ed panagani”?
18 Diad pangala na sakey lambengat ed saray dakel a makapaligsan ehemplo: Nen Abril na 1984, inreport na Ecuador so 1,048 auxiliary payunir ed lawak, 106 porsienton mas dakel nen say imbeneg ya Abril. Nen Hunyo sayan dalin so angireport na 12,238 a panangiyaral ed Biblia, 24-porsienton indaak ed taon, tan 8,044 a manangipalapag, 17-porsienton indaak. Say inmatendi ed Memoryal so dinmakerakel ed 40,728, resyo na masulok a 5 ed kada manangipalapag. Manlapud sankagloboan et sinmabi so mipadparan report, tan say sankamundoan ya inmatendi so 7,416,974 ed selebrasyon na Memoryal nen Abril 15, 1984, mangipapanengneng a saray lawak so “aluto la ed panagani” ed saraman so natitipon a “para ed bilay ya andi-anggaan.”—Juan 4:35, 36.
19 Mabetbet a ‘pepelesan’ nen Jehova ed nikadkaduman dalan. Sakey a managbiahen manangasikaso so angisulat ed saya diad katakelan na baybay a Papua New Guinea: “Sakey a toon akapitongtongan na sakey ya special pioneer so pinmawil ed nisulinek ya ayaman to ed sakey a baryo ed palandey. Pigaran taon ed saginonor, sikato so anengneng ed sakey ya asamblea sirkito—tekep na sakey a kerew. Sayan agni-abautismoan a too so nantasi ed baryo to tan diad saray kaliberliber a ‘takel’ ed ontan lan inkaepektibo a saray mamatatken na baryo so malabay la ed saray Tasi nen Jehova ya onlad’man tan mangasikaso ed espiritual ya interes na interon lugar.” Aminsan a nitanem so bukel, say Dios so ‘mantultuloy a mamabaleg.’—1 Corinto 3:6.
20. Panon so inlaknab na saray sanga na Watch Tower a mangasikaso ed idadaak?
20 Diad dakel iran dalan, si Jehova so mangipaparaan ed totoo a para ed engranden idadaak ya onsasabi natan. Manliket itayo a, diad agano niran taon, et ontan lan makapakelkelaw ya inasikaso nen Jehova so kilalaknab na saray pasilidad na sanga na Watch Tower. Natan, sarayan sanga so akinlongan ya ontulong ed saray baleg ya ulop na “malapati.”
21. Panon so pakapantultuloy tayon mibiang ed ‘pamapeles’?
21 Sirin, sikatayon amin komon so mibiang a mangisindag na liwawa na maong a balita na Panarian ed saray minilmilyon ni! Ituro ed amin na saray “malapati” so dalan na “kilalaban” ed loob na asalimbengan iran bakor na muyongan nen Jehova tan padaaken so “dayew” ed sikato diad saray wangalan to. Komon ta ipikasi tayo a say Soberanon Katawan a Jehova tan say ulo na Kristianon kongregasyon, say inad-aro tayon Arin Jesu-Kristo, so mantultuloy a “mamapeles” legan a say panangiyabawag ed Panarian so mamaarap ed pantok to!
Panrepaso ed Sayan Impanaral:
◻ Anton makatantandan kasumpalan na Isaias 60:17 so agawa nen 1938?
◻ Mitukoyan ed Isaias 60:18, antoran intereses so wala ed sikatayo?
◻ Panon iray report ed lawak a ‘mamarakep’ ed si Jehova?
◻ Panon a say nankatlon sipan ed Isaias 60:22 so mamapaarap ed pantok?
[Litrato ed pahina 20]
Saray apis na Watchtower nen 1930’s so angiretrato ed pasingawey nen Ezequiel ed dinamikon muyongan nen Jehova