Panangawat ed Angat na Kristianon Inkatatken
“Salitaen so katuaan, sikatayo komon so ombaleg ed aro diad amin a bengatla ed sikato ya ulo, si Kristo.”—EFESO 4:15.
1, 2. (a) Diad antoran dalan a ‘say bunga na eges’ so sakey a tumang? (b) Anto so nailaloan ed kapangyanak iran ugugaw?
TUAN baleg a gayaga so sakey ya ugaw a mabunigas tan malikliksi. Pigpigaran totoo so makaresiste ed makapasagyat a sayaksak to. Sikato so subol na agmanganggan panliket tan gayaga, say sentro na imano inerman a laen to. Natalosan, sikato so inaro na atateng to a bilang say ‘kinon tan gayaga ra’ anggaman ed amin na saray sagpot tan banabanal ya itarok to. Peteg, “say bunga na eges so sakey a tumang.”—Salmo 127:3.
2 Nayarin makapalikliket so sakey ya ugaw, anggaman kuan, anto so nagawa no anggapo so nanengneng ya anggan anton tanda na ibabaleg to? No sikato so mansiansia ed ontan a kipapasen ed kayari na pigaran bulan odino nayarin taotaon na maaron panangasikaso na atateng, sirin mapatnag a wala so bengatlan seryoson makapuy. Peteg, say ibabaleg so nagmaliw a kapara na bilay; satan so ilaloan tayo ed amin a mabilay a bengatla. Sikato so pantasi ed manamalsan pakayari tan kakabatan nen Jehova.—Lucas 2:52.
Nakaukolan So Ibabaleg ed Espiritual
3. Anton ibabaleg so impasakbay nen Jesus, tan anton kasumpalan so anengneng?
3 Tua ed propesiya nen Jesus, nagagawa so ibabaleg ed sananey a nengneng. Diad sankamundoan, mantutultuloy so espiritual a “panagani.” (Mateo 9:37) Kaleganan na 1984 a serbisyon taon, alimbawa, anemiran bansa so angireport na promedion masulok a sanlasus libon manangipalapag ed Panarian. Taloran taon lambengat ed asasakbay, nen 1981, duara lambengat a bansa so akadampot ed satan. Diad unor ya anemiran taon, 827,144 balon tastasi nen Jehova so abautismoan tan masulok a 5,000 balon kongregasyon so aporma. Pinelesan nen Jehova so kimey to.—Isaias 60:22.
4. Anto so resulta na sankamundoan ya imbaleg ed limog na totoo nen Jehova?
4 Sarayan bilang so mangipanengneng a ngalngalin sakey ed kada taloran totoon maparanay a mililimog ed saray totoo nen Jehova tan mibibiang ed kimey na panagpulong natan so abautismoan ed loob na unor ya anemiran taon. Kasin sakey ka ed sikara? No ontan, sika so sengegan na baleg a gayaga na saraman so tinmulong ed sika diad impakaaral ed katuaan, diad amin a Kristianon kalimog mo, tan ed mangatatawen ya Amam, si Jehovan Dios. (Uliran 27:11) Singa say ununan kundang na sakey ya ugaw, say kurang a ginawam diad impangidedikam na inkasika ed si Jehova so makapalikliket. Ipanengneng to so abante, progresibon iyaaligwas ed biang mo. Sikato so sakey a tanda na ibabaleg.
5. Antoran tepet so nepeg ya itepet na balang sakey ed inkasikato? Anto so makatulong diad pananap ed saray ebat?
5 Kumusta balet nanlapulad saman? Tekep na maaron panangimano na saray kaparam a Kristiano, kasin ipapanengneng mo so pamatnagan na mantutultuloy ya ibubulaslas ed espiritual? ‘Panon so pakapangibagak?’ nayarin itepet mo. Bueno, nonoten so imbaga nen apostol Pablo nipaakar ed ibabaleg: “Sanen siak so sakey ya ugaw, siak so nansalita a singa ugaw, pian manisip a singa ugaw, pian mankatunongan a singa ugaw; balet natan ta siak la so nagmaliw a toon matatken, inkaindan ko laray ugugali na sakey ya ugaw.” (1 Corinto 13:11) Sirin, aliwa lambengat a say ilabas na panaon noagta say pangikaindan ed “saray ugugali na sakey ya ugaw” so nanggawa ed sikaton sakey a toon matatken. Anto so sarayan ugugali?
6, 7. (a) Deskribien so sakey ya ‘ugali na sakey ya ugaw’ tan say kaatapan ya ipaarap to. (b) Panon so kipatnag na sayan ugali? Anto so nayarin pansumpalan?
6 Sakey a bengatla nipaakar ed saray ugugaw et sikara so walaan na antiktikey a panat na panangimano. Anggaman sikara so mausisa nipaakar ed amin a bengatlan walad kaliberliber da, sikara met so manguman-uman tan aliwan maligen. Mapatnag, siopaman a mansiansia ed ontan a kipapasen so wala ed graben espiritual a kaatapan. Nayarin sikato so “ipaligpalig na saray daluyon tan itektekkiab dia tan diman na amin a dagem na bangat diad panamegley na saray kasiliban na totoo, diad panamegley na saray kasaolan,” a singa insalaysay nen apostol Pablo ed Efeso 4:14.
7 Saray daluyon tan dagem so nayarin onterak a tampol. Natan, sano implano a saray bengatla so magmaliw ya andi-kana, saray kalareker, tan saray uso so onsabi tan onlabas. Saray bengatlan impasen a nakaukolan ed agano nin linmabas so nagnap ya andi la ed uso tan alingwanan la. Balanglan diad lawak na panligliwaan, panagkawes tan panag-ayos, odino antokaman ni, agaylan kakulangkulangan—tan inuugaw—so katalikebkeban diad naynay a panlabay odino panggamor ed sankabaloan a bengatla, a kabekta et tampol ya alaslasan tan makapadismaya. Diad espiritual iran bengatla, say pansumpalan na ontan iran agkaligenan so makadesyang.—Ipareng so Santiago 1:6-8.
8. Anto so sananey ya ‘ugali’ na saray espiritual ya ugugaw, tan anton kaatapan so iparungtal to?
8 Sananey ya ‘ugali na ugugaw’ et say samsamet a panagtebek da ed maong odino mauges, susto odino aliwa. Mipadpara, saray espiritual ya ugugaw so agni “apasal ed saray pakayari na panagmorekdek da diad pangibiig ed susto tan aliwa,” tan sikato no akin a pinaseseg nen apostol Pablo iray kapara ton Kristianos ya “ontundas ed inkatatken, ya agmangigagaton na sakey a letnegan lamet.” (Hebreos 5:14; 6:1) Saramay ugugaw ed espiritual so mankaukolan na pirmin panamaseguro a say inawat dan katuaan so peteg a katuaan, tan say nibangat ed sikara a gawaen so peteg a nepeg dan gawaen. Nakaukolan da so tulong ya anggan diad saray sankamanunaan iran bengatla. Tano andi et sikara so magmainomay a nagutgut, nadismaya, tan natalonaan na saray panduaruwa a nayarin maneral ed pananisia ra.
9. Akin a nepeg tayon awaten so angat na Kristianon inkatatken?
9 Kasin naimano yo a saray ugugaw so naynay a magunaet a manggawa ed saman so nanenengneng dan gagawaen na matatatken? Diad sikara, siempre, sikato lambengat so sakey a galaw. Kabiangan na panliket, andi-duaruwa, et say pakayarin manggawa ed labay dan gawaen ya ag-ira mangawat na responsabilidad a kaulop na satan. Satan, tutal, so interamentin bilay na sakey ya ugaw. (Nengnengen so Mateo 11:16, 17.) Balet diad ibabaleg tan ibubulaslas onsabi so kimey tan responsabilidad. Sikato so sakey ya angat a nepeg a pakatulongan na sakey ya ugaw ya awaten. No panon inkamaabig so ikiwas to ed satan so mandetermina, ed malalaknab, na aligwas to odino isaew to ed saginonor a bilay. Diad espiritual, lalo nin importante a balang sakey ed sikatayo so seryoson mangonsidera ed angat na Kristianon inkatatken. Kasin sika so mabulos, magunaet, a mangawat ed responsabilidad a katekep na pagmaliw a nagnap-inkatatken, matatken, espiritual a too? Odino kasin sika lambengat so manaltalabay, a paulianan mo la so arum a manakbat na responsabilidad mo?—Galacia 6:4, 5.
Kristianon Inkatatken—Anto ’tan?
10. Akin a pinaseseg nen Pablo iray Hebreon Kristianos ya “ontundas ed inkatatken”?
10 Sanen pinaseseg nen apostol Pablo iray Kristianos ya “ontundas ed inkatatken,” anto so wala ed kanonotan to? (Hebreos 6:1) Ipapanengneng na konteksto a dati et walaan na malaem ya ibaga ed saray Hebreon Kristianos nipaakar ed “atagey a saserdote unong ed nengneng nen Melkizedek,” si Jesu-Kristo. Balet alikna ton sikara so ag-akaparaan ed satan lapud say wala ed kanonotan to so “mairap ya ipaliwawa.” (Hebreos 5:10, 11) Imbes, pinanonotan tora: “Nagmaliw kayon singa saraman so mankaukolan na gatas, ya aliwan say anawet a tagano. Ta siopaman a mangagamil na gatas so agmikabat ed salita na inkatunong, ta sikato so sakey ya ugaw. Ingen say anawet a tagano so para ed saray matatken a totoo, diad saraman so diad panamegley na impangusar et apasal so pakayari na panagmorekdek da a mangibiig ed susto tan aliwa.”—Hebreos 5:12-14; ipareng so Judas 3.
11. Anto so ituro na pagmaliw a matatken?
11 Kasin kabaliksan na saya, sirin, a say inkatatken so sakey lambengat a pamaakaran na pakawalaan na pikakabat ed saray aralem a bengatla na Biblia? Manwarin say Kristianon inkatatken so mangisakup ed pikakabat tan pakatalos ed Biblia, wala ni so mas nen say satan. Say pakatalos ed saray salitan inusar nen apostol Pablo so ontulong ed sikatayon makanengneng a lalon malinew ed pamaarakan. Say Griegon salitan nipatalos ya “inkatatken” so te·lei·oʹtes, tan say adhetibon “matatken” so nipatalos a manlapud teʹlei·os. Sarayan salita so misiglaotan ed teʹlos, a kabaliksan to so “anggaan.” Say W. E. Vine’s Expository Dictionary of New Testament Words, sirin, so mangipapaliwawa a say pagmaliw a matatken (teʹlei·os) so “mananda ed pakadampot ed anggaan to (teʹlos), asumpal, inkagnap, inkayadyari.” Sirin, say sakey a Kristianon matatken et saman so akadampot ed sakey a sampot, odino kalat. Anto so sayan kalat?
12. Unong ed Efeso 4:11-13, anto so lalanoren na inkatatken?
12 Si apostol Pablo, ed Efeso 4:11-13, so angipaliwawa a si Kristo Jesus, a bilang ulo na Kristianon kongregasyon, so angitarya na dakel diad panulong ed saray “sasantos” diad pakarapat ed satan a kalat, salanti, pian “nagegemtan tayon amin so inkasaksakey ed pananisia tan diad suston pikakabat ed Anak na Dios, diad nagnap-imbaleg a too, diad sukat na kipapasen a kayarian na inkagnap nen Kristo.” Dia, ed pagmaliw a matatken, odino inkagnap (Griego, teʹlei·os), so aglambengat misiglaotan ed pakawalaan na “suston pikakabat” noagta ontan met ed “inkasaksakey ed pananisia” tan diad impanukat ed inkasikatayo unong ed kipapasen ya agamoran nen Kristo.
13. Akin ya anggapo so Kristianon inkatatken no anggapo so “inkasaksakey ed pananisia”?
13 Say “inkasaksakey ed pananisia” so mananda na pankakasakey. Sakbay a naaralan na sakey a too so “sakey a pananisia,” nayarin sikato so walaan na dilin ideya tan opinyon nipaakar ed no panon so nepeg a kagawa na saray bengatla, nipaakar ed no anto so susto tan no anto so aliwa, tan arum nira. (Efeso 4:4, 5) No abuloyan to so ontan iran ideya a mansiansia, naromog ton sankairapan so ibaleg ed espiritual. Aminsan a tinawag nen Pablo iray Kristianos ed kadaanan a kongregasyon na Corinto ya “ugugaw ed si Kristo” tan “silalaman” lapud sikara so tinabek na “imon tan siblangan,” ya ibabaga na arum a tutumboken da si Pablo, arum et si Apollo. (1 Corinto 3:1-4) Magmainomay, sirin, a say pankakasakey, odino “inkasaksakey ed pananisia,” so mikatambayan ed Kristianon inkatatken. Agnayarin onwala so sakey no anggapo so sananey. Sirin nepeg tayon tepetan so inkasikatayo: Kasin tinaynanan tayo laray datin minumundon nengneng na panag-isip? Kasin nanengneng tayo so kaimportantian na pankakasakey ed kaisipan tan kiwas ed saray totoo nen Jehova? Say “inkasaksakey ed pananisia” so nakaukolan ya ingrediente ed Kristianon inkatatken.—Efeso 4:2, 3.
14. Diad anto ni so pisiglaotan na inkatatken?
14 Say Kristianon inkatatken so misiglaotan met ed pakawalaan “na sukat na kipapasen a kayarian na inkagnap nen Kristo.” Anto so kabaliksan na saya? Ituloy nen Pablo ya ibaga a saraman so makadampot ed sayan kipapasen so aliwa laran ugugaw, ya “ipaligpalig na saray daluyon tan itektekkiab dia tan diman na amin a dagem na bangat diad panamegley na saray kasiliban na totoo” a manggawa na kapalikdoan. Imbes, sikara so walaan na suston pikakabat ed katuaan. Sikara so binmaleg diad panangaro ed si Kristo, tan ipapanengneng da so arum iran maridios a kalidad, a singa say kakabatan, inkatunong, tan pakayari. (Efeso 4:13, 14; Juan 15:12, 13; 1 Corinto 1:24, 30; 2:7, 8; Uliran 8:1, 22-31) Manwarin sikatayo, bilang ag-ayadyarin totoo, so nayarin agmakayarin makagegemtan a nagnap ed ‘kipapasen nen Kristo,’ seguradon sikato so nayarian tayon gawaen ya Ehemplo, ya igeter tayo ed inkasikatayo so sampot, odino kalat, diad pamayubo na parehon nengneng na maridios a personalidad. (Colosas 3:9) Diad kalaknab a narapat tayo so sayan kalat a sikatayo so magmaliw a matatken.
Ombaleg ed Aro
15. Anto so ununan kundang diad pangegemtan ed inkatatken?
15 Diad impanalaysay ed kabaliksan na terminon “Kristianon inkatatken,” nakaukolan tayon kabaten no panon so pakagegemtan ed satan. A singa anengneng tayo la, ipapanengneng na Hebreos 6:1 a diad kurang na Kristianon inkatatken et wala so seguradon pundasyon a nepeg tayon pampaalageyan. Bektaman a saya so nagawa, saray malaknab nin sagpot so nipaarap diad itundas ed inkatatken. Ununa ed limog na saray nanduruman elementon manitibukel na satan a pundasyon et say “panagbabawi a manlapud saray inatey a gawa.”
16. Manlapud antoran “inatey a gawa” so nepeg a pagbabawian tayo?
16 Mapatnag, “saray inatey a gawa” so mangisakup ed saray gawa na makasalanan a laman, a no sikara so agnasita, et mangitonton ed ipapatey. Sipaparaan itayon mamidbir ed saray impakalukso a singa say pilalawanan, karutakan, malukak a kondukta, panagtalintao, tan espiritismo a kasalanan, tan sikara so paliisan tayo. Balet saray gawa na laman, “saray inatey a gawa,” so mangisakup met ed saraman so nayarin tatawagen na arum a walewaleng na personalidad a singa say pambubusolan, siblangan, imon, sanok, pankokolkol, inkaapag-apag, saray sekta tan pansisibletan. (Galacia 5:19-21) Anggad sano saratan a walewaleng na personalidad so nalakseb tan nasaltan “na balon personalidad ya apalsa unong ed linawa na Dios ed tuan inkatunong tan katooran,” nayarin mairap na sakey a dampoten so Kristianon inkatatken.—Efeso 4:22-24.
17. Anto ni so impasen ya “inatey iran gawa”? Akin?
17 Nilikud ed saray gawa na laman, “saray inatey a gawa” a nepeg tayon lakseben et isakup to so saray gawa tan gegemtan a sikara so espiritual ya inatey, andi-kakanaan, tan andi-bunga. Nayarin saray gegemtan ed panag-anap na kuarta, maples-ya-iyaman. Nayarin saray planon ambisyoso tan manangupot-panaon a para ed abanten edukasyon, odino nayarin saray pakurang a minumundo a para ed kareporma na sosyal, kareenan, tan arum nira. Amin na sarayan bengatlan so nayarin ompatnag a walaan na kablian ed inkasikaran dili, balet sikara so “inatey a gawa” lapud nayarin sikara so mangipasingawey na espiritual ya ipapatey ed saraman so natalikebkeban da. Amin na saraman so interesado ed pakagegemtan na Kristianon inkatatken so nepeg ‘a magbabawi a manlapud’ odino ontunda la diad pangusil, ed ontan iran “inatey a gawa” tan tumboken da so simbawa nen Jesus ya “itultuloy, sirin, ya anapen ya ununa so panarian tan say inkatunong [na Dios].”—Mateo 6:33.
18, 19. (a) Diad Efeso 4:15, anto so kabaliksan na “pansalita ed katuaan”? (b) Panon so pisiglaotan to ed Kristianon inkatatken?
18 Bektaman a nigaton so letnegan, anto ey? Isisimbawa nen Pablo: “Balet diad pansalita na katuaan, sikatayo komon so ombaleg ed aro diad amin a bengatla ed sikato ya ulo, si Kristo.” (Efeso 4:15) Ununa ed amin, imanoen tayo a sasalambiten nen Pablo so pankaukolan na “pansalita na katuaan.” Sayan balikas so mapatnag a lalanoren to so mas nen say basta pansalita; peteg a kabaliksan to so “pamasiansia ed katuaan.” (Kingdom Interlinear) Saray arum a patalos so angusar ed satan a singa “pambilay unong ed katuaan”; “simamaaron tumboken so katuaan ed amin a panaon—mansalitan matua, mideneng a matua, manbilay a matua”.—Efeso 4:15, The Jerusalem Bible; The Living Bible.
19 Sirin, say pangusil ed Kristianon inkatatken so mankaukolan na pamasiansia, odino pangitandoro, ed katuaan diad nengneng na pambilay tayo, panagsalita, kiwas, tan pidedeneng ed arum. Kabaliksan na saya so pangusar ed inagew-agew a kurang na bilay diad pikakabat ed Biblia ya agamoran tayo tan sirin magmaliw a kaiba na “saraman so diad panamegley na impangusar et nipasal so pakayari na panagmorekdek da a mangibiig ed susto tan aliwa.” (Hebreos 5:14) Kasin saya so gagawaen yo? Kasin sikayo so mankatunongan unong ed prinsipyo na Biblia diad kada bektan nidunget kayo ed sakey a desisyon? Kasin awaten yo so angat diad pagmaliw a matatken a Kristiano, ya itandoro so katuaan diad salita tan gawa, odino lablabayen yo so mansiansian ugaw ed espiritual, bulos ed saray responsabilidad tan bulos ed panangusil ed saray dilin pilalek yo tan kalikaliktan?
20, 21. (a) Panon a say aro so nalalanor diad ibaleg ed inkatatken? (b) Antoran tepet so manaalagar na kaaruman nin salaysay?
20 Ibabaga nen Pablo: “Sikatayo komon so ombaleg ed aro diad arum a bengatla ed sikato ya ulo, si Kristo.” (Efeso 4:15) Dia, ituturo nen Pablo so puso na pamaakaran—say motibasyon. Diad 1 Corinto 13:1-3 ipapanengneng to a saray kimey a nayarin mabli so magmaliw a sigpot ya agpinabangan no sikara so gawaen ya anggapo so manepeg a motibasyon. Sirin nepeg tayon usisaen so motibo tayo diad amin a bengatlan gawaen tayo. Kasin gagawaen pian nanengneng na arum, pian nasagyat ira ta pian manisip a sikatayo so matatken? Odino, imbes, gagawaen nisesengeg ed aro ed Dios tan aro ed kaabay tayo? No aro so motibo tayo, sikatayo so “ombaleg ed amin a bengatla,” magmaliw ya asimbang, napanmatalkan, matatken iran Kristiano, diad sigpot a pamidbir ed “sikato ya ulo, si Kristo.”
21 Manwarin say pambanikel a pakadampot ed Kristianon inkatatken so sakey a mabmablin kalat, aliwan sikato so sampot. Maminsan a narapat na sakey a too so sayan kalat, kasin wala ni so bengatlan nagkalalo nen say sikato a gawaen? Anto so nipaakar ed saraman so wala ed katuaan diad dakel laran taon tan adampot da la so Kristianon inkatatken? Saya so usisaen tayo ed ontumbok ya artikulo.
Kasin Nipaliwawa Yo?
◻ Anto so arum ya “ugali na sakey ya ugaw,” tan antoran kapeligroan so ipaarap da?
◻ Panon a say “inkasaksakey ed pananisia” tan “inkagnap ed Kristo” so misiglaotan ed inkatatken?
◻ Pian nadampot so Kristianon inkatatken, antoran “inatey a gawa” so nepeg tayon kaindanan?
◻ Panon a say sakey so “ombaleg ed aro”?
[Antikey a Paimano ed pahina 15]
DIAD APALABAS YA ANEMIRAN TAON
—827,144 balon Tastasi so abautismoan
—Masulok a 5,000 balon kongregasyon so aporma
—Ed saraman so mibibiang natan ed kimey na panagpulong, sakey ed kada talora so abautismoan legan na sayan panaon
[Antikey a Paimano ed pahina 15]
Legan na 1984 a serbisyon taon, anemiran bansa so akapromedio na masulok a sanlasus libon manangipalapag na Panarian
[Litrato ed pahina 17]
Dakel natan so amili ed ministeryo a manuna nen saray materyalistikon gegemtan