Kaabigan nen Jehova ed “Unor a Kabiangan na Saray Agew”

“Galidia, sikayon totoo, tan ontatdang itayo ed palandey nen Jehova.”​—ISAIAS 2:3.

1, 2. (a) Anton graben kaatapan so mangekebbiew natan ed katooan? (b) Anto so ibabaga na papangulo na mundo nipaakar ed Armagedon?

“SAY UNOR A KABIANGAN NA SARAY AGEW.” Akin a say propesiya na Biblia so angulit-ulit ya angusar ed sayan balikas? Kasin kabaliksan ton saray agew na katooan so abilang la tan say dalin tayo tan amin a bilay a walad tapew to so natawtaw la ed sankagloboan a desyang? Saray papangulo na mundo so mabetbet a mansesgan manutongtong ed ontan a nagawa. Alimbawa, diad sakey ya interbio ed telebisyon nen Enero 13, 1985, pinasakbayan nen Andrei Gromyko a foreign minister na Moscow so totoo ed Unyon Sobyet a “say graben kaatapan, graben kakigtotan so mamaypayong ed interon katooan.” Inyarum to: “Nepeg a gawaen so amin a bengatla pian naekal itan a panangigtot, ta pian say Armagedon a katatalagnawan na totoo ed saray siglos so komon agnagawa.”

² Diad pigaran okasyon, tinukoy met nen Presidente Ronald Reagan na Estados Unidos so Armagedon. Say New York Daily News na Oktubre 30, 1983, so angaon ed sikato a kuanto: “Siak so inmarap ed saray kadaanan a propetas yo ed Daan a Sipan tan say tandan mangipapasakbay ed Armagedon, tan aromog ko so inkasiak a manmorekdek no​—no kasin sikatayo so kapolian a makanengneng ed isabi na satan.” Lalon agano ni, nen Pebrero 8, 1985, imbalita na The Wall Street Journal: “Ibabaga nen Presidente Reagan ya iisipen tan totongtongen to so nipaakar ed Armagedon, . . . balet sikato so agmangipaplano ed satan.”

3. (a) Anto a peteg so Armagedon? (b) Anto so kabaliksan na “unor a kabiangan na saray agew”?

³ On, totongtongen na saray papangulo na mundo so Armagedon. Balet kasin natatalosan da no anto so kabaliksan na satan a salita ed Biblia? Mapatnag andi, lapud say Armagedon so aliwan gaway-toon kadesyang. Sikato so sankatalbaan a bakal na Dios a pangidapoan to tan say katambayan ton Ari, si Jesu-Kristo, ed panangukom a sumpad saray marelmeng a nasyones tan marelmeng a totoo. Onsabi ed sakey a pantok diad “unor a kabiangan na saray agew.” (Daniel 10:14; Apocalipsis 16:14, 16) Tan anto so natalosan tayo ed “unor a kabiangan na saray agew”? Arum a patalos so angusar ed sayan balikas a bilang “kayari na saray agew,” “say unor ya anggaan na saray agew.” (Rotherham, Young) Saray Hebreon salita a nipatalos so ’a·charithʹ hay·ya·mimʹ. Unong ed Theological Dictionary of the Old Testament, mabetbet a kabaliksan da so “Say Anggaan a Panaon,” ya ituturo to so aliwa labatlan say arapen noagta “no panon so pamantok na awaran, sirin pansumpalan to.”

4. Panon a say “Anggaan a Panaon” so ondedere ed pantok to, tan tekep na anton pansumpalan?

⁴ Diad 70 lan taon, say katooan so manbibilay “ed konklusyon na sistema na bengabengatla,” ya impasakbay nen Jesus ed Mateo 24:3-25:46. Sayan peryodo, a ginmapo nen 1914, so “Anggaan a Panaon” a kaleganan to et saray nagawgawa so mantultuloy a mamaarap ed pantok da. Satan so diad “baleg a kairapan” sano amin ed marelmeng ya organisasyon nen Satanas so naderal. (Mateo 24:21, 22) Say engranden pansumpalan et say kaalangon na masanton ngaran nen Jehova.​—Ezequiel 38:16, 23.

Kaabigan nen Jehova

5. Antoran makapaseseg a salita so naromog ed Oseas 3:5?

⁵ Si Jehova so sakey a Dios na panamaseseg. Agaylan makapakelaw a manamaliing iran balikas so intayak to ed interon Salita to, say Masanton Biblia! Sakey ed ontan a balikas so naromog ed Oseas 3:5, a nabasa: “Kayari to saray anak na Israel so ompawil tan peteg ya anapen da si Jehova a Dios da, tan si David ya ari ra; tan peteg a sikara so onsabin manggiwgiw ed si Jehova tan diad kaabigan to diad unor a kabiangan na saray agew.”

6. Panon so piduma na espiritual ya Israel ed saray sekta na Kakristianoan?

⁶ Sakey a nakdaan na Israel so pinmawil a nanlapud inkadakep ed Babilonia nen 537 K.K.P. pian ituloy da so panagdayew ed si Jehova diad Jerusalem. Mipadpara ed modernon panaon, nen 1919 say alanaan a nakdaan na espiritual ya Israel so ‘pinmawil’ a nanlapud inkadakep ed organisasyon nen Satanas, a sigugunaet ya ‘aanapen da si Jehova a Dios da.’ Agaylan miduma ed saray apostatan sekta na Kakristianoan! Anggapo ed saraya so malabay a mamidbir ed si Jehova a bilang “Dios da.” Imbes a sikara so “mananap ed si Jehova,” papaliisan da so anggan anton pangusar ed ngaran to.

7. Panon a saray totoo nen Jehova so amagalang ed ngaran to?

⁷ Asasakbay ed “unor a kabiangan na saray agew,” say Enero 1, 1926, a paway na The Watch Tower so angipalapag ed manangayat ya artikulon “Who Will Honor Jehovah?” Say atipon-lamet a nakdaan na espiritual ya Israel so sitotoor ya inmebat ed satan a tawag, tan nen 1931 et sikara so nanggayagan angawat ed ngaran a Tasi Jehova. (Isaias 43:10, 12) Anggad sayan agew et itutultuloy dan itatandoro so ngaran nen Jehova a manuna diad arap na saray manaayam ed dalin. Akin, nen 1984 impalapag da, diad saray minilyon a kopya ed dakel iran lenguahe, so makatawag-imanon de-kolor a brosyur ya apauloan na The Divine Name That Will Endure Forever.

8, 9. (a) Anto so kabaliksan na ‘pananap ed si David ya ari ra’? (b) Kapigan tan iner so nitandoroan na Ari? (c) Panon a saray totoo nen Jehova so akatalos ed sayan pamaakaran?

⁸ Anggaman kuan, impasakbay met nen Oseas a sarayan espiritual ya anak so “ompawil tan peteg ya anapen da . . . si David ya ari ra.” Say silalaman ya Israel so andian na ari nanlapulad inkagba na Davidicon dinastya nen 607 K.K.P. Saman so angigapo na 2,520 taon na andi-dios ya uley​—“say aturon panaon na nasyones,” odino Panaon Gentil. (Lucas 21:24; Daniel 4:16) Balet nen 1914, diad inggapo na “unor a kabiangan na saray agew,” intandoro na Dios so Sakey ya intipo nen David​—si Jesu-Kristo​—a bilang Ari ed Sion, say “mangatatawen a Jerusalem.”​—Hebreo 12:22; Salmo 2:6.

⁹ Saray totoo nen Jehova ed dalin so agtampol akatalos ed amin na saya. Anggaman kuan, say impananap da ed si ‘David ya ari tayo’ so amantok sanen say The Watch Tower na Marso 1, 1925, so angipalapag ed artikulon “Birth of the Nation.” Saya so angidatak na malinew a prueba, a nibase ed Apocalipsis kapitulo 12, a say Mesianicon Panarian nen Jehova so nianak ed katawenan nen 1914 tan si Kristo la natan so ‘manuuley ed pegley na kakabusol to.’​—Salmo 110:1, 2, King James Version; 2:1-6.

10. (a) Siopa so “onggiwgiw ed si Jehova,” tan panon? (b) Akin a “say takot ed si Jehova” so importante natan?

¹⁰ Say alanaan a nakdaan, tan peteg amin a manggawa na dedikasyon da ed si Jehova, so sinononot a tuloy ed saray kasalanan da nen inmuna ran panaon. Sipapaabeba, sikara so “manggiwgiw ed si Jehova,” ya onkerew na panamerdona ed abenegan iran kasalanan. Tan natan legan a “say unor a kabiangan na saray agew” so mandere ed pantok to, saray manangaro ed si Jehova so lalon manbabantay a maalwar ya ag-ira mankasalanan a sumpad Dios tan diad saray matunong a ganggan to. Nepeg tayon itultuloy so “onggiwgiw ed si Jehova,” a leweten tayoray laman tayo, pian naromog so kilalaban diad Balon Oksuy na Dios. (1 Corinto 9:27) Nepeg tayon naynay a nonoten a “say takot ed si Jehova so gapowan na kakabatan.”​—Salmo 111:10.

11. (a) Diad antoran pamaakaran a si Jehova so maong? (b) Akin a nepeg tayo so “onggiwgiw ed kaabigan nen Jehova”?

¹¹ Panon, anggaman kuan, a nayarin sikatayo so “onggiwgiw . . . ed kaabigan to”? Si Jehova so tuan peteg a sankaabigan. Sikato so segek na katalunggaringan ed moral. Sikato so nagnap diad pangitatarya na amin a nakakaukolan tayo. Sirin, matalek itayon mangibaga a singa inkuan nen David: “Si Jehova so Pastol ko. Agak onkulang. . . . Peteg a say kaabigan tan maaron-panangasi so manumbok ed siak ed amin na saray agew na bilay ko.” (Salmo 23:1-6) Natan, tan kaleganan na anggaan na “unor a kabiangan na saray agew,” sikatayo so nepeg ya ‘onggiwgiw ed kaabigan nen Jehova,’ a sitatalek a saray kasalanan tayo so nasakbongan na mablin bagat na Anak to, si Jesus. (1 Juan 2:1, 2) Misalsalamat, iyabawag tayo: “O Jehova, . . . agaylan daakan so kaabigan mo, ya insimpen mo a para ed saraman so ontatakot ed sika!”​—Salmo 31:17, 19.

12. (a) Panon so nayarin pangalig tayo ed kaabigan nen Jehova? (b) Akin a makana so panggawa tayo na ontan?

¹² Legan a say mundo nen Satanas so onlelereg a mapalalo ed lunek na kaugsan, komon ta aligen tayo so kaabigan nen Jehova diad pangipakabat ed saray kakaabay tayo ed maong a balita na Panarian tan diad pangipatnag na maridios iran kalidad ed saray dilin bilay tayo. Komon ta sikatayo so peteg a mamayubo ed bunga na espiritu, a pati say kaabigan, ed amin a pisiglaotan tayo​—diad saray pamilya tayo, diad saray kongregasyon tayo, tan diad saray pidedeneng tayo ed totoo na mundo. (Galacia 5:22, 23; Salmo 119:65-68) Say panggawa ed saya so nakaukolan pian sikatayo so makaliktar “ed unor a kabiangan na saray agew.”

Patriarkan Simbawa

13. (a) Siopa natan so nayarin nagunggunaan diad panalaysay ed dokulan-na-ipapatey a propesiya nen Jacob? (b) Anton konseho so kinarga na satan a propesiya?

¹³ Diad apalabas lan 3,700 taon, say patriarkan Jacob (a ningaran met na Israel) so angiter na propesiya ed dokulan na ipapatey to. Impaarap to’d saray 12 ilalak ton lalaki, saray uloen na labinduan tribu na Israel, inkuanto: “Mantitipon kayo ta pian ibagak ed sikayo so nagawa ed sikayo diad unor a kabiangan na saray agew.” Saray salita to so onaplika natan ed saray nakekeraan na espiritual ya Israel tan diad saray kakaiba ra, say “arum a karnero.” Anggapo ed saraya so nayarin mangibaliwala ed saray estandarte nen Jehova ed moral, a singa say ginawa nen Reuben, nisay abuloyan da so pangipanengneng na maruksan disposisyon a singa saman so ginawa nen Simeon tan Levi. Imbes, nepeg dan bayuboan iray kalidad a singa say tepel, panagmatalek ed si Jehova, tan say inkamabunga, a singa impanengneng na arum ya anak na Israel.​—Genesis 49:1, 3-7, 9, 18, 22; Juan 10:16; ipareng so 2 Pedro 1:8-11.a

14. Anton duaran mansiglaotan a propesiya ed “Anggaan a Panaon” so mangitarya na konseho ilautla ed “arum a karnero”?

¹⁴ Anggaman kuan, niiter so nikaduman konseho a para ed “arum a karnero” a walaan na ilalo diad pakaliktar ed “Anggaan na Panaon.” Saya so naromog tayon nibaga, a singano diad pangidanet, ed duaran nansiglaotan a propesiya na Biblia, diad Isaias 2:2-5 tan Miqueas 4:1-5.

Unagos ed Abung na Dios

15. (a) Panon so inkasumpal na Isaias 2:2? (b) Anton pandumaan so nanengneng natan na saray maamon totoo, tan panon so ikiwas da?

¹⁵ Nabasa so Isaias 2:2: “Tan nepeg a nagawa ed unor a kabiangan na saray agew a say palandey na abung nen Jehova so niletneg a malet ed tuktok na saray palandey, tan sikato so peteg a nipaatagey ed tuktok na saray pukdol; tan diad sikato so agusan na amin a nasyones.” Diad masulok lan 50 taon, nanlapulad 1935, sarayan “kalikaliktan a bengatla ed amin a nasyones” so natitipon ed abung na panagdayewan ed si Jehova, ‘a papanoen da itan ya abung ed gloria.’ Sayan ‘iyaagus’ so mapatnag ya ombabaleg legan a say “unor a kabiangan na saray agew” so mandere lan maapit ed pantok to. Say simbolikon palandey na puron panagdayew ed si Jehova so manpapalalon prominente, ta pian saray maamon totoo so makanengneng no panon so piduma to ed saray sektaryanon “pukdol” tan “palpalandey” na malukak a mundo nen Satanas. Sikara so “pinmaway” ed palson relihyon tan binmatik ed ombabaleg a bilang diad palandey na panagdayewan ed si Jehova.​—Aggeo 2:7; Apocalipsis 18:2, 4, 5; Salmo 37:10, 11.

16. (a) Anton tawag so eebatan natan na saray maamo? (b) Panon so panusumpal nen Jehova na sipan to a “pelesan”?

¹⁶ Sarayan maamo so oneebat ed tawag na Isaias 2:3: “Galidia, sikayon totoo, tan ontatdang itayo ed abung nen Jehova, diad abung na Dios nen Jacob; tan bangatan to itayo ed saray dalan to, tan manakar itayo ed saray basbas to.’ Ta manlapud Sion et ompaway so ganggan, tan say salita nen Jehova so ompaway ed Jerusalem.” Susumpalen la nen Jehova so sipan to diad “pamepeles ed dilin panaon to.” (Isaias 60:22) Sakey ya ondaraak a “baleg ya ulop . . . a nanlapud amin a nasyones” so mamapaarap diad panagdayew ed si Jehova. Diad saraya, 138,540 so abautismoan nen 1982; 161,896 nen 1983; 179,421 nen 1984. Kaliktan da so niliktar “ed unor a kabiangan na saray agew.”​—Apocalipsis 7:9, 14.

17. (a) Panon a nayarin saray balon Tastasi so mangipanengneng na apresasyon ed kaabigan nen Jehova? (b) Antoran positibon ganggan so nakaukolan tayon amin a tuloken?

¹⁷ Sarayan balon Tastasi so mangaapresya ed kaabigan nen Jehova diad pangitatarok to ed sikara diad liwawa na katuaan, tan sikara so magunaet a mapilalek diad pangipanengneng na kaabigan ed arum. Abrasaen da so bilin ya itatarya nen Jehova ed panamegley na Salita to tan muyongan to. Say Ganggan nen Moises so nankarga na dakel iran ‘agnepeg,’ tan say Israel so manepeg a mangunor ed saraya. (Nengnengen so Exodo 20:3-17.) Balet say duaran sankabalgan a ganggan ed saray Kristiano, a singa imbaga nen Jesus, so positibon bilin ya ‘aroen si Jehova a Dios tayo ed amin a puso tayo, kamarerwa, kanonotan, tan biskeg, tan kaabay tayo a singa sikatayon dili.’ (Marcos 12:29-31) Nankakasakey, saray Tasi nen Jehova natan so manguunor ed “ganggan” ya impaakseb na Dios a manlapud “mangatatawen a Jerusalem,” ya iyaplika so matunong iran prinsipyo to.

18. (a) Antoran nengneng na totontonen so nakaukolan tayon sumpalen? (b) Ed anton pankaabigan so pangunor ed saray mabunigas a totontonen?

¹⁸ Agkabaliksan na saya, anggaman kuan, a say katooan nen Jehova so agnakaukolan a manumpal ed anggan anton totontonen. Sikatayo so pinanonotan nen apostol Pablo: “Komon ta amin a bengatla so nagawan masimpit tan unong ed oksuyan.” (1 Corinto 14:40, NW Ref. Bi., paimano-ed-leksab) Pigaran totontonen so nayarin nakaukolan diad saray Kingdom Hall tayo, alimbawa, pian makapanigot na koriente odino pian naamper iray angkelag ya ugugaw diad panggawa ed abung na panagdayewan ed Dios a bilang galawan kayari na saray pantitipon. Saray ulo na pamilya so nayarin nakaukolan a manggawa na arum iran mauksoy ya areglo, a singa say pangitarya na maparanay a panalaysay ed inagew-agew a teksto na Biblia ed abung. Diad saray pamilya na Bethel et walaray totontonen, a singa say pankaukolan ed membro na pamilya a mamarakep ed maong a balita diad panamegley na masimpit a panangawes tan panag-ayos. (1 Timoteo 2:9) Saray “lukot” a nalukasan kaleganan na Sanlibon Taon ya Uley nen Jesus so andi-duaruwan mankarga ed saray totontonen a mangungguna ed katooan. Maabig la natan so pangiyugalin mangunor ed saray mabunigas a totontonen a ginawan para ed inkaoksuy tan diad panangonsidera ed arum.​—Apocalipsis 20:12; 1 Corinto 10:24; Filipos 2:3, 4.

Diad Sayan Mundo na Karawalan

19, 20. (a) Panon so inkiwas na saray totoo nen Jehova diad prinsipyo ed Miqueas 4:3? (b) Panon a saya so mangungguna ed sikara legan “na unor a kabiangan na saray agew”?

¹⁹ Sikatayo so maples a mamapaarap ed panaon sano amin a lima na too so “ontalindeg a sumpad lima na kaiba to.” (Zacarias 14:13) Kuantomas say mundo so lawas lalon onuuges tan marawal, panon so ikiwas na saray totoo nen Jehova? Sikara so onkiwas a mitukoyan ed Miqueas 4:3, a kuanto: “Pitpiten daray kampilan da a pagmaliwen dan dingding na lukoy tan saray gayang da a kalkalawit.” Saray Tasi nen Jehova so angitalirak ed amin a nengneng na karawalan. “Aglara manaral na bakal ed anggan kapigan.” Andi-duaruwa, saya so mantultuloy a mankimey diad pankaabigan da diad interon “unor a kabiangan na saray agew.” Satan la so agawa ya ontan.

²⁰ Alimbawa, sanen say Hulyo 15, 1983, a magasin a Watchtower so angituro a saray paltog so aliwan para ed saray Kristiano, saray Tasi nen Jehova ed New Caledonia so amaandi ed saray paltog da. Ag-abayag kayari na saman, sakey a grupon pulitikal so nansakusak ed baley, a pinuulan da so kada abung ya akaromogan da na paltog. Balet anggapo so abung na Tasi a dineral. Say kabkabat a neutralidad so mabetbet a sankaabigan a depensa, a singa apaneknekan a tua ed Baybay ya Ireland, Lebanon, Zimbabwe, tan arum iran daldalin.

21. (a) Anton tawag so nepeg tayon ebatan, tan anton desisyon so nepeg tayon gawaen no labay tayo so magmaliw a tuan maliket? (b) Panon a nayarin sikatayo so napaseguroan diad pinabang ed kaabigan nen Jehova?

²¹ Maliket itayo no ebatan tayo so tawag na Isaias 2:5: “Galidia tan manakar itayo ed liwawa nen Jehova”! Maliket, met, itayon amin a mikasakey diad mapekder a desisyon ya imbalikas nen propeta Miqueas a, diad kayari na impaneskribe to ed malaparaison kaligenan tan kareenan a wala ed limog na dilin katooan na Dios, et kuanto: “Amin a totoo, diad biang da, so manakar balang sakey ed ngaran na dios to; balet sikatayo, diad biang tayo, manakar itayo ed ngaran nen Jehova a Dios tayo ed andi-anggaan a panaon, ed ando lan ando.” Peteg a say kaabigan nen Jehova so nibalikas ed sikatayon amin a mantultuloy diad pankakasakey a mareen ed tuan panagdayew, a para ed kililiktar diad “unor a kabiangan na saray agew.”

[Paimano ed Leksab]

Tepetepet Diad Panegek

◻ Anto so natalosan yo diad “unor a kabiangan na saray agew”?

◻ Panon a nayarin sikatayo so ‘onggiwgiw ed si Jehova tan diad kaabigan to’?

◻ Anton panangiwanwan so itarya na walad dokulan na ipapatey a propesiya nen Jacob?

◻ Antoran positibon kundang so nayarin alaen tayo a mitukoyan ed Isaias 2:2-5 tan Miqueas 4:1-5?