Pananalo Diad “Unor a Kabiangan na Saray Agew”
“Wala so sakey a Dios ed katawenan a sikato so Manangiparungtal ed saray inyamot, tan impakabat to . . . so nagawa ed unor a kabiangan na saray agew.”—DANIEL 2:28.
1. (a) Panon a saray propesiya nen Jeremias, Ezequiel, tan Daniel so makanan makapainteres ed sikatayo natan? (b) Akin a saratan ya apuyanan a sulsulat so nipreserba?
JEREMIAS, EZEQUIEL, DANIEL—agaylaran makapaligsan propesiya so ipanonot na saratan a kangaranan! Ngalngalin 2,600 taon ed apalabas, saratan a taloran makpel ya ariripen na Soberanon Katawan a Jehova so nambilay ed unor iran agew na apostatan Jerusalem, anggaman sikara so nanlingkor ed nanduruman pasen tan diad leksab na miduman tuloy iran sirkumstansya. Balet balang sakey ed dili ton punto so angipropesiya nipaakar ed saray nagawa a mamantok ed saginonor ya “unor a kabiangan na saray agew.” Saratan ya apuyanan a sulsulat so nipreserba diad kapasesegan na amin a manangaro ed Dios tan ed inkatunong, tan saraman so manpilalek a makaliktar ed “baleg a kairapan” ya ondapo ed panaon tayo.—Mateo 24:3-22; Roma 15:4.
2. Akin a kinaukolan nen Jeremias so biskeg a manlapud si Jehova?
2 Si Jeremias so nampropesiya ed Jerusalem. Legan a manasingger so desyang, namparan saray manuley tan totoo so naplag ed kaugsan tan inkabulok. Sirin, pinabiskeg nen Jehova so propeta to a singa “salimbengan a bakor a gansa” pian ontalindeg a malet ed utel na kaugsan da.—Jeremias 15:11, 20; 23:13, 14.
Propetas na Kareenan
3. Antoran tilan salita so sasalitaen na saray propetas?
3 Nipaakar ed mauges iran relihyoson papangulo na Jerusalem, inyabawag nen Jehova ed panamegley nen Jeremias: “Agyo tatalinengen iray salita na propetas a manpropesiya ed sikayon totoo. Gagawaen da kayon andi-kakanaan. Say pasingawey na dilin puso ra so salitaen da—aliwan manlapud sangi nen Jehova. Uulit-uliten dan ibaga ed saraman so manmomodmora ed siak, ‘sinalita nen Jehova: “Kareenan so onwala ed sikayon totoo.”’” Saraman a palson propetas so mangibabaga, “Wala so kareenan! Wala so kareenan!” anta anggapo so kareenan.—Jeremias 23:16, 17; 6:14.
4. Diad anton ilalo so pepeketan na dakel ed Kakristianoan?
4 Ontan met, diad apostatan Kakristianoan natan, walaray propetas na kareenan. Dakel ed saraya so maniilalo ed samay dineskribe nen Papa Paulo VI a bilang “say unor ya ilalo ed pankakasakey tan kareenan,” say Nasyones Unidas. Magano la, satan ya ulopan so mangiproklama ed 1986 a bilang say Internasyonal a Taon na Kareenan. Diad impangiyanunsyo ed getma ton mibiang ed Taon, inyabawag na Holy See a “pabiskegen to so ilalo a sayan Taon so mamawala na pinilalek iran pansumpalan tan mananda ed makabaliksan a balitang diad kitarok na kareenan a siglaotan ed limog na totoo tan nasyones.” Balet kasin realistiko so panilalo a saray nasyones so mangiletneg na tuan kareenan?
5. Anto so impasakbay nen Jehova, tan panon so kasumpal to ed “unor a kabiangan na saray agew”?
5 Say Dios a mismo so maneskribe ed no anto so nagawa: “Nia! Say bagyo nen Jehova, say sanok ton mismo, so peteg ya ompaway, anggan say alimbusabos a bagyo. Sikato so onalimbusabos ed tapew na ulo na marelmeng. Say sanok nen Jehova so ag-ompawil ya anggad nasumpal to tan anggad nagawaan ton ontua so kanonotan na puso to. Diad unor a kabiangan na saray agew et sikayon totoo so mangimano ed satan a tekep na pakatalos [odino, “sigpot a natalosan yo,” The New English Bible].” (Jeremias 23:19, 20; nengnengen met so 30:23, 24.) On, saray papangulo na palson relihyon so makatalos ed no anto so kabaliksan na “unor a kabiangan na saray agew” ed sikara. Ingen antokaman a panangimanon iter da so atrasado la!—Ipareng so Apocalipsis 18:10, 16; 19:11-16; Mateo 24:30.
6. Anton maliket a pansumpalan so wala a para ed dakel?
6 Makapaliket, anggaman kuan, dakel iran totoon akautibon aminsan ed palson relihyon ‘so mangiimano ed satan.’ Eebatan da so tawag: “Ompaway kayo ed sikato [palson relihyon], baley ko,” lapud agda labay so mibiang ed saray kasalanan to odino mangawat ed kabiangan na panangukom na Dios a sumpad sikato. No sakey kayo ed saraya, komon ta itultuloy yon talinengen so ibabaga na Salita na Dios nipaakar “ed unor a kabiangan na saray agew” tan say maglorian panaon na kareenan ya ontumbok.—Apocalipsis 18:2, 4, 5; 21:3, 4.
Panangataki nen Gog
7. Diad leksab na antoran sirkumstansya so nanpropesiyaan nen Ezequiel?
7 Panon so kipapasen na saray dilin totoo na Dios legan “na unor a kabiangan na saray agew”? Abuloyan si propeta Ezequiel a mangibaga ed sikatayo. Bilang sakey a lakin walad kalangweran, andi-duaruwan kabat to si Jeremias, balet diad saman et si Ezequiel so nitarok ed Babilonia. Diman, diad gilig na ilog Chebar, sikato so niganggan nen 613 K.K.P. ya onkiwas bilang propeta nen Jehova tan bantay ed saray Judion adestiero, kimey a sinumpal ton sitotoor ed 22 taon. Anggaman kuan, saray propesiyas to so nasumpal ya onlampas ed dilin panaon to. Diad kapitulo 38 tan 39, ibabaga to so nipaakar ed ‘Gog na Magog.’
8, 9. (a) Anton manunan salisalan so nepeg a naareglo, tan kapigan? (b) Siopa si Gog, siopa so manutumbok ed sikato, tan anton totontonen so tutumboken to? (c) Anto so gawaen nen Jehova ed si Gog?
8 Siopa iyan ‘Gog na Magog’? Bueno, siopa so manunan kabusol nen Jehova a nepeg ton pangaregloan na manunan salisalan “na unor a kabiangan na saray agew,” salanti, say sankatalbaan ya inkasoberano? Sikato si Satanas a Diablo, ya imbantak na Pastol-Ari, si Jesu-Kristo, a nanlapud tawen kayari na dilin inkitrono to nen 1914. Say ayurakan tan sinmanok a Gog so nikulong natan ed limitadon espiritun ayaman, “say dalin na Magog,” ya asingger ed sayan dalin. Kabaliksan na saya so “inkaabagey na dalin” lapud kabat nen Gog ya antiktikey la so panaon to diad pangitarok to ed sankarelmengan a gegemtan to a ‘manuley odino naderal.’—Ezequiel 37:24-28; 38:1, 2; Apocalipsis 11:18; 12:9-17.
9 Inaon nen Ezequiel so Soberanon Katawan a Jehova a kuanto: “Nia wadia ak ya onsumpa ed sika, O Gog, sika ya uloen [manuley na mundo] . . . Tan sika so peteg a patleken ko tan tagaan taka ed ngalangala tan ipaway taka a pati amin a biskeg na inayuraan mo, . . . dakel a totoon kaibam.” (Ezequiel 38:3-6; Juan 12:31) On, si Gog so walaan na dakel a totoon kaiba to, lapud “say sankamundoan so mandukdukol ed pakayari na sakey a marelmeng.” (1 Juan 5:19) Ingen, nayarian nen Jehova a piguratibon tagaan so ngalangala nen Gog pian taloen to. Balet akin, tan panon?
10. (a) Diad piduma ed nasyones, iner so pangiteteenan na saray Tasi nen Jehova na talek da? (b) Akin a si Gog tan saray ulop to so onsanok? (c) Anto so nepeg tayon gawaen ta pian makaliktar?
10 Diad pananugsog nen Gog, saray mabibiskeg a pakayari natan so mangisasangsang a say sankamundoan a kareenan so mandepende diad panlusbo ra ed saray makapakebbiew ya armas nuklar. Saray arum a nasyones so mangiiter na suporta ra. Anggaman ontan, saray totoo na Dios ya “atiptipon a nanlapud nasyones” so angibantak la ed saray armas na karawalan. Saray Tasi nen Jehova so “nasyon” lambengat ed dalin a simamatuan makapangibaga, “Diad Dios so panmamatalkan mi.” (Isaias 2:4; 31:1; Uliran 3:5) Sarayan mareen a tastasi nen Jehova so “manaayam ed kaligenan, amin da so manaayam ya andian na bakor, tan andian ira na anggan balewet tan puerta.” Sikara so “manaayam ed pegley na dalin,” lapud diad amin a nasyones et sikara so walad pegley a bilang sakey a katooan ya agnadampot nen Gog. (Ezequiel 38:11, 12) Sirin, say sisasanok a Gog na Magog so mangitarok ed interon demonikon organisasyon to diad lawak na bakalan. Singa umoang a leon, say niyurakan a Satanas so akaparaan la diad inyupo-upot a panangataki. Pian niliktar, nepeg tayon amin so ‘ontalindeg a sumpad sikato, putel ed pananisia.’—1 Pedro 5:8, 9.
11. Panon nen Jehova ya ‘itarok si Gog a sumpad dalin To,’ tan nisengeg ed anton gagala?
11 Binilin nen Jehova si Ezequiel: “Kanian manpropesiya ka, O Anak na too, tan ikuan mo ed si Gog, ‘Saya so inkuan na Soberanon Katawan: “Agta diad satan ya agew sano say baley kon [espiritual] Israel so manayam ed kaligenan a satan so kabat mo?”’” Si Gog tan say ulop to so onsiblet ed kaligenan tan aligwas a nanenengneng da ed limog na saray Tasi nen Jehova. Sikara so sisasanok a saraya et gagawaen da so inkasikara ya “aliwan kabiangan na mundo nen [Satanas].” Sirin kantiawan nen Jehova si Gog, a sagyaten ton onataki ed andian na salimbeng a Tastasi. Ibaga nen Jehova ed si Gog: “Sika so ontatdang a sumpad baley kon Israel, a singa lurem a manakbong ed dalin. Diad unor a kabiangan na saray agew et nagawa, tan peteg a sika so itarok ko a sumpad dalin ko, diad gagalan pian saray nasyones et naamtaan da ak komon sano pasantosen ko so inkasiak ed sika diad pakanengneng da, O Gog.”—Ezequiel 38:14, 16; Juan 17:14, 16.
12. Unong ed Ezequiel 38:18-23, anto so pansumpalan na panangataki nen Gog?
12 Say sinmanok a Gog so onabantin onlubak ed maaligwas a “dalin” na katooan nen Jehova. Anggaman kuan, kasin si Gog lambengat so onsanok? Anto ey so nipaakar ed sanok na Soberanon Katawan a Jehova a sumpad si Gog tan saray ulop to? Diad Ezequiel 38:18-23 dedeskribien nen Jehova no panon so ‘pamasantos to ed inkasikato diad pakanengneng na nasyones’ diad paneral to ed si Gog tan diad pangiliktar to ed saray matoor ya ariripen to. Diad impangisampot to ed balita na impanalo to ed si Gog tan say ulop to, say Soberanon Katawan a mismo so mangiyabawag: “Nepeg dan naamtaan a siak si Jehova.” Say maglorian ngaran to so naalangon!
‘Niparungtal Iray Inyamot’
13. Panoy impangiletneg nen Daniel na maabig ya ehemplo ed saray tobonbalon Tastasi?
13 Legan a si Ezequiel so manpopropesiya ed limog na saray destieron Judio diad asingger ed Babilonia, say tobonbalon Daniel, a sikato so nanlapud maprinsipen Judion kapolian, so nanaral ed maarin korte nen Nabucodonosor. Diman, bilang sakey a manamemben na katooran, inletneg to so maabig ya ehemplo a para ed amin a walad kalangweran ya ariripen nen Jehova natan.—Daniel 1:8, 9.
14. Diad anton pamaakaran a si walad kalangweran a Daniel so angiter na amin a galang ed Dios?
14 Diad komaduan taon kayari inkagba na Jerusalem, si Nabucodonosor so ginonigon na sakey a kugip. Diad inliing to, agto anggan nanonotan so kugip. Balet say matakot ed Dios a Daniel so angipaamta ed ari na kugip tan say kabaliksan to. Diad impanggawa to na onman, inter to ed Dios so amin a galang, a kuanto ed ari: “Wala so sakey a Dios ed katawenan a sikato so manangiparungtal ed saray maamot, tan impakabat to ed Arin Nabucodonosor so nagawa ed unor a kabiangan na saray agew.” (Daniel 2:28) Anto so naaralan tayo ed kugip tan say aplikasyon to ed “unor a kabiangan na saray agew?”
15, 16. Anto so kabaliksan na kugip nen Nabucodonosor?
15 Dia et nanengneng tayo so abalbaleg, atagtagey ya imahen, a ginawa ed maslak a kabiangan na nanduruman metal a nantutumbokan. Insalaysay nen Daniel a saraya so mangirepresenta ed pantutumbokan na saray panarian tan inkuanto ed si Nabucodonosor, “Sika a dili so ulo a balitok,” a tutukoyen ton mapatnag so dinastya na Babilonia. Diman et tinmumbok so arum a pakayari na mundo, saray pagew a pilak tan taklay so mangitalindeg ed Medo-Persia, say eges a gansa tan tapi so Gresya, tan saray bitking a balatyang so Roma tan, saginonor, say pakayari na mundo a Britanya tan America. (Daniel 2:31-40) Diad “saray aturon panaon na nasyones,” manlapud 607 K.K.P. ya anggad 1914 K.P., sarayan pakayari so nanuley ed panarian na ‘dios na sayan mundo.’—Lucas 21:24; 4:5, 6; 2 Corinto 4:4.
16 Anggaman kuan, “diad unor a kabiangan na saray agew” a “say ilalak na katooan,” say kabanyakan a too, so omparungtal. Diad dakel iran dalin saray arari, kaisers, tan czars so sinandian na saray rebolusionaryo tan demokratikon manuley. Say mauges ya impanguley na too ed dalin so nagmaliw a bunton na saray mapasang a diktador tan lalon legeylegey a demokratikon porma na gobierno. A singa balatyang tan pitek, saraya so agmankames. Anggan diad Nasyones Unidas et sikara so agmantetekep noagta, ingen, et sikara so manbabanggaan ed sisasanok iran debati tan panangigtot. Tua, ‘say panarian so nansumpal a naapag-apag.’—Daniel 2:41-43.
17. Panon so kasumpal na propesiya ed “unor a kabiangan na saray agew”?
17 Sirin, diad “unor a kabiangan na saray agew,” say salisalan na pananguley ed mundo so sinmabi la ed pantok to. Tan anto so solusyon? Nia! Onkukurang la nanlapulad 1914 so Mesianicon Panarian na Dios. Sikato so “bato” ya atapsing ed “palandey” na sankatalbaan ya inkasoberano nen Jehova. Anggapo so pulitikon too a mibibiang ed satan! Nia, duga ed dalan, tekep na inkasusto. Diad manepeg a panaon na Dios, basigan to so sali na talintao tan mekmeken to. Singa taep ed dagem, ompalir ed arawi so uley-na-too, ya anggapo lan balot so pakasuysuyan. Balet say “bato”—say Panarian na abalbaleg a Dios tan si Kristo to—so nagmaliw ya abalbaleg a palandey a mamano ed interon dalin. Satan a panarian ‘so aglan balot naderal tan aglan balot niiter ed anggan siopan arum a too.’ Sikato so mansiansia lawas. Agaylan sikatayo so misalsalamat ed si Jehova nipaakar ed abantin ‘panangiparungtal’ to ed ontan iran inyamot!—Daniel 2:29, 44, 45.
Modernon-Agew a “Pantutulakan”
18. (a) Anton saginonor a pasingawey so niiter ed si Daniel? (b) Anto so makatantanda nipaakar ed sayan pasingawey?
18 Anggaman kuan, si Daniel so walaan ni na bengatlan nibaga nipaakar ed atooan a gobierno tan “say unor a kabiangan na saray agew.” Ngalngalin 70 taon kayari na impangipaamta to ed kugip nen Nabucodonosor, say masiken lan Daniel so wala ni ed Babilonia ingen ta manlilingkor ed leksab nen Ciro, ari na Persia. Legan a sikato so walad gilig na ilog Hiddekel, pinmatnag so sakey ya anghel ed sikato a kuanto: “Siak so sinmabi a mangipatalos ed sika no anto so nagawa ed katooan diad unor a kabiangan na saray agew, lapud sikato so sakey a pasingawey a para ed saray agew ya onsabi.” (Daniel 10:14) Intuloy na anghel a dineskribe ed baleg a detalye iray manuley tan nagawgawa ya ompatnag ed awaran na saray Persiano, Griego, Ehipsio, Romano, Germanico, Anglo-Americano, tan saray sosyalistikon porma na pananguley. Agaylan makatantanda ya amin na sayan awaran, a sasakupen to so masulok a 2,500 taon, et nisulat ed asakbay! Ikdan to itayo na baleg a talek ed apuyanan a mapropetikon Salita nen Jehovan Dios!a
19. Antoran modernon nagawgawa so impasakbay na propesiya?
19 Sayan propesiya so mangibaga a, diad pankurang na panaon, duaran mabibiskeg a pakayari so omparungtal, “say ari na abalaten” tan “say ari na baybay.” Kabekta, inkuan na anghel, say ari ed baybay so “mangitandoro ed inkasikato ed tagey na amin a dios; tan salitaen to so makapakelaw iran bengatla a sumpad Dios na dirios”—aliwan saray maapabor a bengatla, lapud ‘diad dios na salimbengan so pangiteran to na gloria.’ Sumpad sayan mapangtan “ari,” wadtan “so ari na abalaten,” a sikato met so mabiskeg ed pakayari na militar. A singa nipasakbay, sarayan duaran arari so . . . “mantulakan.” Say modernon-agew a pambabakal ed salita diad baetan na saray mabibiskeg a pakayari so inyilustran maong na saya. No maminsan et sikara so ‘mangitulak’ na ansakit legan a sikara so mansasangsangan nipaakar ed saray armas nuklar, legan a pababalegen da so panagparaan da ed bakal.—Daniel 11:36-45.
20. Anto so mandetermina ed pansumpalan, tan panon so inkalanor nen “Miguel” ed saya?
20 Anggaman ipapasakbay na propesiya a “say ari na baybay” so ombagyo a singa delap ed dakel iran dalin, satan so agmanitermina ed pansumpalan. Say maniterminan sengegan so nibalikas ed Daniel 12:1: “Tan kaleganan na satan a panaon et si Miguel so onalagey, say baleg a prinsipen manalalagey a nisesengeg ed anak na katooan mo.” Sayan Miguel et si Jesu-Kristo, ya ‘inmalagey’ ed Panarian to nen 1914, a tampol ton imbatak si Satanas a nanlapud katawenan. Tan sayan “Ari na arari” so onkiwas ed Armagedon pian piarapan to so amin ya “arari na dalin,” a pati saraman so arari na “baybay” tan “abalaten,” diad kadederal.—Apocalipsis 12:7-10; 19:11-19.
21. Anto, sirin, so pansumpalan diad “unor a kabiangan na saray agew”?
21 Ditan, diad pantok “na unor a kabiangan na saray agew,” say pansumpalan so mapatnag, diad pananalo na Panarian na Dios. Dedeskribien na anghel ed sarayan kaaruman a salita: “Tan peteg a nagawa so sakey a panaon na irap ya agnin balot agawa nanlapulad inlesa na sakey a nasyon ya anggad satan a panaon.”—Daniel 12:1; ipareng so Jeremias 25:31-33; Marcos 13:19.
22. Bilang katooan na Dios, panon so nepeg tayon ikiwas ed sarayan propesiya tan tekep na anton ilalo?
22 Kasin nepeg tayon takotan itan a panaon na kairapan tan gonigon? Andi no sikatayo so walad dapag nen Jehova, ta intuloy na anghel ya ibaga: “Kaleganan na satan a panaon saray katooan mo so makaliktar, balang sakey ya aromog a nisulat ed libro.” (Daniel 12:1) Komon ta amin tayo, sirin, so maseseg diad panagaral na Biblia tan ibanikel tayo so inkasikatayo diad panaglingkor ed si Jehova. Sirin, diad “unor a kabiangan na saray agew,” komon ta naromog tayoray kangaranan tayo a nisulat ed “libro na pakanodnonotan” na Dios a “nisulat ed arap to iraman so tinmakot ed si Jehova tan ed saraman so nannonot ed ngaran to.” (Malaquias 3:16) Diad panggawa, sikatayo so napribilehyoan a mibiang diad pananalo to “ed unor a kabiangan na saray agew.”
[Paimano ed Leksab]
a Para ed detalye, nengnengen so libron “Your Will Be Done on Earth,” ya impalapag na Watchtower Bible and Tract Society of New York, Inc., nen 1958, pahina 220-323.
Nipapaakar ed “unor a kabiangan na saray agew”—
◻ Anton pansumpalan so impropesiya nen Jeremias no nipaakar ed kareenan na mundo?
◻ Say pangataki nen Gog so mansumpal ed kaareglo na anton salisalan, tan panon?
◻ Say kugip nen Nabucodonosor so mangituturo ed anton abalbaleg a pantok?
◻ Panon so pangangga na puligesgesan ed pakayari diad baetan na duaran “arari”?
[Kahon ed pahina 8]
SAY LOGO ya inaprobaan na NU a para ed International Year of Peace (1986) so mangipapanengneng na sakey ya olibon korona, sakey a malapati, tan lima na too. Saraya so nipaliwawa a singa onggendan: “Say malapati so simbolo na kareenan a misiglaotan ed koronan olibo ya emblema na Nasyones Unidas. Saray lima na toon mangaampatot ed malapati ya akaparaan ya ontekkiab so mangipabitar ed betang na totoo diad panamasiansia na kareenan.”
Diad sayan panaon nuklar, peteg a wala so pankelyaw ed pankaukolan diad pankaukolan na pangiletneg tan pamasiansia ed kareenan. Balet kasin satan so nayarian na saray lima na too a gawaen? Papanonotan itayo nen Jeremias: “Kabat kon maong, O Jehova, ya agkayarian na mangaraldalin a too so dalan to. Agkayarian na too so panakar to ya anggan say pangiwanwan ed kurang to.” Tan inyarum na propeta iyan kerew: “O Jehova, . . . ikalbom so sanok mo ed saray nasyones ya angipulisay ed sika.”—Jeremias 10:23-25.
Say malapati tan say bulong na olibo so binayes ed kuritan na Biblia nipaakar ed agew nen Noe. (Genesis 8:11) Panon so inkipawil na kareenan ed saman a panaon? Saman so diad gawa na Dios, say sankagloboan a delap ya amunas ed abulok a kapolian na katooan. Inkuan nen Jesus a “saray agew nen Noe,” a tekep na karawalan tan kaugsan to, so propetiko ed panaon na “kiwawala,” a salanti natan.—Mateo 24:37-39; Genesis 6:5-12.
Lamet, “say Dios a mangiter na kareenan” so nepeg a mamunas ed Satanicon sistema na bengabengatla, a kayari na satan et say “Prinsipe na Kareenan,” si Jesu-Kristo, so manuley ed maandon kareenan.—Roma 16:20; Isaias 9:6, 7; 33:7.
[Litrato ed pahina 8]
Inturo nen Jeremias so tuan ilalo ed kareenan
[Litrato ed pahina 9]
Papasakbayan itayo nen Ezequiel a manparaan natan diad panangataki nen Gog
[Litrato ed pahina 11]
Ipaparungtal nen Daniel so pansumpalan na “unor a kabiangan na saray agew”