Kasin Say Relihyon Yo so Peteg a Mamapaliket ed Dios?

‘SAY Dios so aliwan sakey a Dios na gutgutan noagta kareenan.’ (1 Corinto 14:33) Peteg, sirin, saray dakerakel a relihyon a tekep na saray manggugutgutan a doktrina ra so andian iran amin na panangabobon na Dios. Sirin, wala lambengat so sakey a relihyon a makasusumpal ed saray nakakaukolan to a para ed tuan panagdayew. Panon so pakaromog tayo ed satan a relihyon a peteg a mamapaliket ed Dios?

Andi-duaruwa, liknaen na dakel a say ontan a pansukimat so singa pananap na dagum ed bunton na dayami. Say pambukay a pananap ed satan so baleg a trabaho! Ingen wala so mas simplen metodo​—say pangusar na mabiskeg a bato-balani. Papeketen to so dagum tan ibiig to ed dayami. Ontan met, say Biblia so nayarin singa bato-balani diad pangibiig na katuaan a manlapud katilaan. Balet panon so panggawa na Biblia ed satan? Diad pangisalaysay ed makapaliket a panagdayew a manlapud imaton na Dios.

Insulat nen apostol Pablo: “Amin a Sulat so impuyan na Dios tan maabig a kibangatan, ed panamaat, ed panametek ed saray bengatla, ed kadisiplinaan ed inkatunong, pian say too na Dios so komon magmaliw a nagnap, sigpot a nakinlongan ed amin a gawan maabig.” (2 Timoteo 3:16, 17) Say suston pikakabat ed Biblia so nakaukolan no kaliktan tayon agnabawasan so relihyoson debosyon lambengat ed saman so kumbeniente odino makapaliket ed sikatayo.

Niarum ni, si Jesu-Kristo, say Anak na Dios, inkuanto: “Say Dios so sakey ya espiritu, tan saraman so mandayew ed sikato so nepeg a mandayew ed espiritu tan katuaan.” (Juan 4:24) Panon so “pakapandayew [tayo] ed espiritu tan katuaan”? Diad panumbok ed matuan panangiwanwan ya intarya na Dios, diad panamegley na puyan, ed Salita to, say Masanton Biblia.

Ipatnag na Tuan Managdayew So Aro

Anto so pangitontonan na Salita na Dios ed sikatayon ilaloan diad tuan panagdayew? Walaan itayo na tampol ya ebat ed taloran salita: “Say Dios aro.” (1 Juan 4:16) Sirin, say panagdayew a makapaliket ed Dios so nepeg a niletneg ed puron aro.

Diad praktikal iran termino, anto so kabaliksan na satan? Say relihyon a makapaliket ed Dios so agmangipaslep odino mangabuloy ed panggugulaan na totoo. Say simplen ganggan na Biblia so, “Nepeg mon aroen so kaabay mo a singa sikan dili.” (Mateo 22:39) Kabaliksan na satan so isian a manlapud saray gulaan, panangibiigbiig, tan gutgutan na sayan mundo. Kabaliksan to so aglan balot panaral na bakal tan panumbok ed kareenan.​—Isaias 2:2-4.

Diad pangiyilustra ed punto: Kasin naisip tayo so sakey ya apostol Pablo a “Pranses” ya onlan mamatey ed sakey ya apostol Pedro ya “Aleman” lapu lambengat ta saray nasyon da so angideklara na bakal? Ingen, kaleganan na komaduan guerra mundial et kaslakan ed saray relihyon so akibabalin tuloy diad pambabakal na nasyon da a sikara ni ingen so angibaki na saray papari ed armada! Ontan met, saray “Kristianon” klero ed nantupag a dapag so angipikasi ed Dios na parehon pananalo. Kasin say Dios so naapag-apag? Kasin sikato so nipasen ed saman so dineskribe nen Propesor Albert Einstein a bilang “sakit na ugaw” ed nasyonalismo, “say gulotong na humanidad”? Siempre andi! Sikato no akin a saray managdayew a peteg a mamapaliket ed Dios so nepeg a mansiansian neutral tan mangagamil ed puron aro. (Juan 13:34, 35; 17:16) Sikara so ‘agmibakal unong ed kipapasen da diad laman.’​—Ipareng so 2 Corinto 10:3, 4.

Alangonen na Tuan Panagdayew So Ngaran na Dios

Inturo nen apostol Pablo so sananey a marka na relihyon a makapaliket ed Dios sanen inkuanto ya anggaman dakel iray tatawagen a dirios tan kakatawan, diad limog na saray tuan managdayew et wala lambengat so “sakey a Dios ya Ama.” (1 Corinto 8:5, 6) Peteg, sirin, saraman so mamapaliket ed Dios so mangamta tan mangusar ed ngaran to.

Say Biblia, ed orihinal iran lenguahe to, so espesipikon analambit ed ngaran na Dios diad masulok a 7,000 danay. Alimbawa, nabasa so Salmo 83:18: “Pian komon et naamtaan na totoo a sika, a say ngaran mo et Jehova, sika labat so Sankatageyan ed amin a dalin.” Sirin akin a saray patumbok na agaylan karakel na relihyon so mandadayew ed sakey a Dios ya andian-na-ngaran? Tan akin ya inekal da so ngaran to ed saray patalos dan Biblia? Peteg a satan so aliwan dalan na pamaliket ed Dios, lapud impikasi nen Jesus: “Napasantos komon so ngaran mo.”​—Mateo 6:9.

Say Relihyon a Mamapaliket ed Dios

Kasin wala so sankamundoan a relihyoson grupo a manusumpal ed duaran manunan nakakaukolan na tuan panagdayew a sinalaysay tayo la? Kasin wala so relihyon a peteg a mangaagamil ed aro ya imbangat nen Kristo? Tan kasin saratan a managdayew so tuan mangigogloria ed Dios tan mamapagalang ed ngaran to ed sayan koma-20 siglo?

Pinekderan a tuloy na katuaan a saray Tasi nen Jehova so mamebemben na neutralidad diad saray bakabakal na nasyones. Nisengeg ed sayan rason, sikara so apairap ed saray kampo na panangidetiniyan tan pangawan. Imbes ya ikumpromiso ra so niletneg-ed-Biblian prinsipyo, nilablabay da so dalan na pagmaliw a martir a sinagmak na saray inmunan Kristianos. Sayan talindeg so pinakiwas na aro ra ed Dios tan diad kapara ran totoo. Say ontan ya aro so sakey a marka na tuan panagdayew a mamapaliket ed Dios.

Dakel so akaimano ed maabig a rekord na saray Tasi nen Jehova ed sayan pamaakaran. Alimbawa, pigaran taon ed apalabas sakey a managpalapag na peryodiko ed Abalaten ya America so akaimano a saray Tastasi so “agmalabay a manlingkor ed puersa militar nisesengeg ed konsiensia.” Intuloy to: ‘Anggan singa ananak, saray Tasi nen Jehova so sikakabat a diad pakarateng ed edad a labinwalo et sikara so nakaukolan a manserbi ed ninatnat a panaon diad pangawan lapud neutralidad da. Awaten da so dusa a bilang kabiangan na relihyoson pananisia ra. Sikara so mauyamo tan mareen.’

Anto so nipaakar ed sananey a nakaukolan ed relihyon a mamapaliket ed Dios? Peteg, siopa so mamapagalang ed madibinon ngaran, a Jehova? Mapatpatnag a saray Tasi nen Jehova so manggagawa ed saya diad sankamundoan namparan diad panagpulong da tan ugali ra.​—Roma 10:13-15.

Akin ya agmikabkabat a maong ed saray Tasi nen Jehova? Say kaiban tsart so angilista na arum ed saray pananisia ra, a tekep na Makasulatan iran rason. Iyarap so porma na panagdayew na saray Tasi ed sayan simplen subok: Kasin nasusumpal toray estandarte na Dios ed katuaan a singa nidatak ed Biblia? Kasin pawawalaen to so mareen a bunga na aro a nepeg a manibukel na kabiangan na tuan panagdayew? Kasin papagalangan to so ngaran na Dios? No naromog yon amin na saya so gagawaen da, naromog yo la so relihyon a peteg a mamapaliket ed Dios.

[Kahon ed pahina 6]

PANANISIA NA SARAY TASI NEN JEHOVA

PANANISIA BIBLICAL A LETNEGAN

Jehova so ngaran na Dios Exodo 6:3; Salmo 83:18

Si Jesu-Kristo so Anak na Dios Mateo 3:16, 17; Juan 14:28

Agmanepeg iray relihyoson titulo Job 32:21, 22; Mateo 23:8-12

[Saray Litrato ed pahina 5]

Panon so pananap yo ed sakey a dagum diad bunton na dayami?

Panon so pananap yo ed tuan relihyon?