Maganat a Nakaukolan—Lalon Dakel a Komikimey ed Panagani!
“Say panagani, peteg, so baleg, balet saray komikimey so daiset. Sirin kerewen ed Katawan na panagani a mangibaki na komikimey ed aaniyen.”—LUCAS 10:2.
1. Panon so nayarin pankatunongan yo nipaakar ed saray salita nen Jesus ed Lucas 10:2, balet anto so asimbawaan yon maong a gawaen?
LEGAN a babasaen irayan salita nen Jesus, kasin nalikna yo a lalanoren da kayo? Lapud sikaray sinalita ed masulok lan 19 siglos a linmabas, nayarin ikatunongan yo a sikara la so aliwan makabaliksan natan. Say ontan a maples a konklusyon so peteg a lingo. Pian nanengneng so sigpot a kabaliksan na saray salita nen Jesus, onlingaw itayo ed saman so agawa sanen inmunan nibaga itan a balikas, tan insan usisaen tayo so dilin kipapasen tayo natan.—Ipareng so 1 Corinto 10:11.
2. Anton kipapasen a mankakaukolan na maganat a kiwas so nipaarap ed si Jesus nen 32 K.P., tan panon so impangarap to ed satan?
2 Nen 32 K.P., a say Piesta na Kubongkubong so asumpal la, anem bulan lambengatla so natitilak sakbay ya inarap nen Jesus so ipapatey ed panamairapan a kiew. Pian natulongan a mamapeles ed kimey na panagpulong, imbaki nen Jesus so 70 babangatan to “a sanderwa ya akauna nen sikato diad kada syudad tan pasen a laen ton mismo.” Sikara so linma a saray salita nen Jesus so onaaniweng ed kalayagan da: “Say panagani, peteg, so baleg, balet saray komikimey so daiset. Sirin kerewen ed Katawan na panagani a mangibaki na komikimey ed aaniyen to.”—Lucas 10:1, 2.
Nansumpal ed Baleg a Panagani
3. Deskribien so arum ed saray resulta na apadaak a panagpulong legan na unor a pigaran bulan na ministeryo nen Jesus?
3 Anto so resulta na sayan apadaak a sagpot na panagpulong? Nabasa tayo: “Insan saray pitumplo so pinmawil a magaygayaga, a kuan da: ‘Katawan, anggan saray demonyo so sinmuko ed sikami diad impangusar ed ngaran mo.’” Agaylan makapakelaw ya impangipatnag na saya ed pakayari na Dios diad saray demonyo! Say ontan a maabig a report ed serbisyo so peteg ya amaliket ed si Jesus, ta inkuanto: “Anengneng ko si Satanas a naplag lan singa kirmat a nanlapud tawen.” (Lucas 10:17, 18) Kabat nen Jesus a si Satanas tan saray demonyos to so diad kaunoran et napagit ed tawen kayari kianak na Mesianicon Panarian ed katawenan. Balet legan a si Jesus so wala ni ed dalin, sayan kapagit na agnanengneng a dedemonyo diad panamegley na totoo lambengat so nanserbin kaaruman a paseguro ed sikato ed satan ya onsabin magayagan nagawa. Sirin sinalita nen Jesus iyan arapen a kapelag nen Satanas a manlapud tawen a petepeteg.—Apocalipsis 12:5, 7-10.
4. Anto so gagala na kimey na panaganin ginawa nen Jesus tan saray babangatan to sakbay na Nisan 14, 33 K.P.?
4 Say panaganin sinalita nen Jesus so aliwan nipaakar ed bukel odino bunga noagta totoo, malakarneron totoo a sipaparaan ya onkiwas ed mensahe na Panarian. Saray bunga na satan a panagani so ompapatnag la. Anggaman kuan, say panaganin ginawa nen Jesus tan saray patumbok to ed saraman a pigaran nakekeraan a bulan sakbay na Nisan 14, 33 K.P., et say panangilira lambengat na letnegan ed mas babaleg a panaganin nagawa kayari na ipatey tan kioli nen Jesus.—Ipareng so Salmo 126:1, 2, 5, 6.
5. Anton makapasagyat iran ebento so agawa nen Pentecostes, 33 K.P., tan panon a saraya so angapekta ed kimey na panaganin ontumbok?
5 Say panaon natan so agew na Pentecostes, 33 K.P. Ngalngalin 120 patumbok nen Jesus so nandaragup ed Jerusalem. “Biglan agawa a nanlapud tawen so sakey ya ungol a singa banesbes na dagem, tan pinano to so interon abung a panyudyurongan da. . . . Tan sikaran amin so apano na masanton espiritu tan ginmapo ran nansalita na nanduruman salita, unong ya inter na espiritu ed sikara a pakapansalita.” Saman so gapowan na nikadkaduman panagani! “Diad saman ya agew ngalngalin talon libon kakamarerwa so niarum.” (Gawa 1:15; 2:1-4, 41) “Inagew-agew a sikara so pirmin walad templo a mankakasakey, . . . a mandadayew ed Dios tan kalkaliktanen na amin a totoo. Ontan met ya intultuloy nen Jehova ya inkasakey ed sikaran inagew-agew na saraman so niliktar.” (Gawa 2:46, 47) Diad saginonor naromog tayo: “Saray mananisia ed Katawan so nantultuloy a naaruman, dakerakel a lalaki tan bibii.” Siansian diad saginonor: “Say salita na Dios so nantultuloy a binmulaslas, tan say bilang na babangatan so nantultuloy a dinmakel ed Jerusalem; tan sakey a baleg ya ulop na saserdote so tinmulok ed pananisia.”—Gawa 5:14; 6:7.
6. Anto so epekto na isusumpa ed kimey na panagpulong diad bunga na Panarian?
6 Say isusumpa ed mensahe na Panarian so binmiskeg natan. Kasin saya so amatantan ed kimey na panagani? Andi, ta saraman so nitaytayak so linma ed dalin ya angiyaabawag ed maong a balita na salita.” Si Felipe so linma ed syudad na Samaria; saray ulop so tinmalineng ed sikaton magunaet; saray sinelepen na demonyo, saray paralitiko, tan saray lupoy so atambal ya amin. Agpankelawan a “wala so baleg a gayaga ed saman a syudad.”—Gawa 8:1-8.
7. Diad anton kalaknab a say ganggan nen Jesus ed saray babangatan to diad Gawa 1:8 so asumpal ed kaunoran?
7 Imbaga nen apaolin Jesus ed saray babangatan to: “Sikayo so tastasik ed Jerusalem tan ed amin a Judea tan Samaria tan anggad sankaarawian a pasen na dalin.” (Gawa 1:8) Say inkaawang na uma so mankaukolan na mas lalon dakel a komikimey—magangganat! Agaylan panagani na babangatan so nailaloan natan! Tan sikato la so nagagawa—amin diad leksab na panangiwanwan na masanton espiritu na Dios. Kayari na inkakumberte nen maisip-ed-panamatey a Saulo, nisalaysay ed sikatayo: “Sirin, peteg, say kongregasyon ed interon Judea tan Galilea tan Samaria so linmoob ed sakey a panaon na kareenan, ya apabiskeg; tan legan a nanakar diad takot ed si Jehova tan diad panamaligliwa na masanton espiritu et nantultuloy a dinmaak.” (Gawa 9:31) Legan a say panagani ed malakarneron totoo so ombibiskeg, andi-duaruwan saraman ya akaunan babangatan so mabetbet ya akanonot ed saray salita nen Jesus: “Kerewen ed Katawan na panagani a mangibaki na komikimey ed aaniyen to.” Kasin si Jehova, “say Katawan na panagani,” so angebat ed satan a pikakasi? Peteg! Tano andi, panon a satan so nikurit: “Say ilalo ed satan a maong a balita . . . so nipulong ed amin a pinalsa a walad silong na tawen”?—Colosas 1:23.
Babaleg a Pankaganatan Natan
8. Akin a nen 1980’s et say pankaukolan so babaleg a nagkalalo diad mas lalon dakel a komikimey ed Panarian?
8 Natan, diad 1980’s, say pankaukolan ed lalon dakel a komikimey ed panagani so lawas babaleg nen say nensaman. Akin? Lapud say kaawang na uma ed mundo so lalon malaknab. Bilang nansumpalan, say intanem ya aaniyen tan natitipon so lalon mas dakel. Saya so mitukoyan ed impasakbay nen Jesus. Inkuanto a saray patumbok to so manggawa na babaleg a kimey nen say ginawa to ed dalin, no nipaakar ed panangipulong na maong a balita.—Juan 14:12.
9. (a) Panon a say pankaganatan na kimey ed panagpulong natan so nidanet ed sakey a pasingawey nen Juan, ya adeskribe ed Apocalipsis 7:1-3? (b) Anton makatantandan konklusyon so naagwat diad balikas ya “ununan-bunga ed Dios tan ed Kordero” diad Apocalipsis 14:4?
9 Say pankaganatan ed panagpulong a kimey natan so nipabitar ed dramatikon letnegan ya adeskribe ed sakey a pasingawey a niiter ed si Juan, a nikurit ed Apocalipsis kapitulo 7:1-3. Diman, “apatiran anghel so manalalagey ed apatiran suyok na dalin” so anengneng a “sankaegnaan dan mapeget so apatiran dagem na dalin.” Panon kabayag so pantultuloy dan pangipuger ed saratan ya “apatiran dagem”? ‘Angga [lambengat] ed kayari katatakan na saray ariripen na Dios tayo ed kamulingan da.’ Panon kabayag so kaukolan na satan? Niiter so pamatnagan ed katuaan a diad selebrasyon na Memoryal nen Abril 15, 1984, 9,081 lambengat so mangibabagan membro na 144,000. Saray alanaan natan so unor a membro na saraman so adeskribe ed Apocalipsis 14:4 a bilang “asaliw a nanlapud limog na totoo a bilang ununan-bunga ed Dios tan ed Kordero.” Sirin ompatnag a maslak ed saray “ununan-bunga” so atipon la. Balet kasin say balikas ya “ununan-bunga” et kabaliksan ton walaray arum a bungan ontumbok? Akin, siempre! Saya so insimbolon maong na daakan ya arum a bungan atipon diad sampot na Judion panagdalos a taon diad panaon na Piesta na Kubongkubong.—Deuteronomio 16:13-15.
10. Anton duaran panagani so mankukurang ed modernon panaon, tan panon a sayan katuaan so mangidanet ed maganat a pankaukolan na lalon dakel a komikimey ed panagani?
10 Sirin mabitar a, legan a manasingger so impanampot na panagani ed nakdaan na saray alanaan, sananey a panaganin panagtipon so nilukas. Agta saya so nisindag diad ontumbok ya anengneng nen Juan ed pasingawey? “Kayari na sarayan bengatla anengneng ko, tan, nia! sakey a baleg ya ulop, ya agnayarin bilangen na too, a nanlapud amin a nasyones tan tribu tan totoo tan pansasalita.” Nibaga ed si Juan: “Saraya so nanlapud baleg a kairapan.” (Apocalipsis 7:9, 14) Wala lambengat so limitadon panaon a natitilak diad pangumpleto na panagtipon ed “baleg ya ulop.” Bektaman a saratan ya “apatiran dagem ed dalin” so lukposan, a sinyasan to so gapo na “baleg a kairapan,” atrasado lan tuloy! Agta nanengneng yo so maganat a pankaukolan ed lalon dakel a komikimey ed panagani diad pangitarok ed dakerakel a naroromog ni?
Nilibu-libo Natan So Onkikiwas
11. (a) Diad anton kalaknab a saray “arum a karnero” nen Jesus so mibibiang ed panagani? (b) Anto so impatnag na karakel na dinmagup nen 1984 Memoryal?
11 Impasakbay nen Jesus iyan iyaawang na panaganin kimey na malakarneron totoo sanen inkuanto: “Tan siak so walaan na arum a karnero, ya anggapo ed sayan panangipukokan; saraya met so awiten ko, tan talinengen da so boses ko, tan sikara so magmaliw a sakey a pulok, sakey a pastol.” (Juan 10:14, 16) Natan et wala la so masulok a 3,000,000 na sayan “arum a karnero” ya aktibon inkabat da so inkasikara a kabiangan na satan a “sakey a pulok.” Diad satan a bilang, wala so 179,421 ya abautismoan diad serbisyon taon na 1984! Ingen, say inmatendi ed selebrasyon na Memoryal so 7,416,974. Anto so ibaga na saya ed sikatayo? A wala niray dakel ya akadngel ed boses na Pastol, balet diad sakey a rason odino sananey, sikara so agkinmiwas diad ampetang ya imbitasyon nen Jesus: “Magmaliw a patumbok ko.”—Lucas 5:27.
12. Antoray importantin tepet a nepeg tayon itepet ed inkasikatayo?
12 Iner so talindeg yo no nipaakar ed sayan makanan panaganin kimey diad ‘konklusyon na sayan sistema na bengabengatla’? (Mateo 13:39) Kasin sikayo so nibilang diad limog na saray maliket ya ulop na saraman so mibibiang natan ed saray gayaga ed panagani? Odino kasin sikayo ni so siansian sakey a manag-imaton, a diad kanonotan et agyo labay ya awaten a sipaparaan so imbitasyon na Maabig a Pastol: “Magmaliw a patumbok ko”? Seguradon anggapo natan so malabay a manbaraan a singa saraman so taloran totoo ed Lucas kapitulo 9, ya asingbat ed akaunan artikulo tayo. Isipen so asaew na saraman a taloran totoo—say gayaga ed kimey na Panarian, a pati say posiblen pibiang diad panangibulos ed saraman so aselepen na demonyo!—Lucas 9:57-62; 10:17.
13. Panon a say pananisia so makanan kabiangan diad pagmaliw yon mabulos a komikimey ed panagani?
13 Imbaga nen apostol Pablo: “No anggapo so pananisia agnayarin paliketen a maong [so Dios].” (Hebreos 11:6) O, on, kaukolan to so pananisia diad biang na balang sakey a mangitalirak ed kasibletan tan sibubulos ya idedika na sakey so bilay to ed Dios a bilang komikimey ed panagani. Alimbawa, nayarin sikayo so walaan na seryoson problema ed bunigas na laman; angangko ta arum a membro na pamilya yo so maruksan sumpa ed saray Tasi nen Jehova; ompan liknaen yon sikayo so matatken lan tuloy a manggawa na nakakaukolan a pananguman ed bilay yo; diad biek a dapag, nayarin ipasen yo so inkasikayon agmakayarin mangarap ed probleman nasasagmak yo ed eskuelaan. Antokaman a kipapasen yo, agbalot lilingwanan a natalosan nen Jehova a magmaong iray problema yo nen say siopaman ni. Ontan met, sikato so akaparaan ya onasingger ed sikayo tan pabiskegen to so desisyon yon manlingkor ed sikato no gawaen yo lambengat iray nakakaukolan a kundang.—Salmo 103:13, 14; Santiago 4:8.
Say Pananisia So Mangiyalis ed ‘Palandey’
14. Isalaysay no anto so labay nen Jesus ya ibaga ed saray salita ton nikurit ed Mateo 17:20.
14 Inkuan nen Jesus: “No walaan kayo na pananisian singa kabaleg na bukel na mustasa, ikuan yo ed sayan palandey, ‘Alis ka ed satan a pasen,’ tan sikato so onalis, tan anggapo so agnayari ed sikayo.” Saya so personal ya eksperiensia na dakel ed saraman so nilasus-nilibon kinmiwas ed tawag na lalon dakel a managani legan na 1980’s. Saray personal a problema tan kairapan a pinmatnag a singa palandey ed sikara ya aminsan so atalonaan diad tulong nen Jehova. (Mateo 17:20; 19:26) Imanoen so onggendan ya eksperiensia:
15, 16. Deskribien no panon a say sakey a lakin walad kalangweran ed Estados Unidos tan sakey a Katolikon asawan laki ed Brazil so analona ed angkabaleg iran probleman tinmalindeg ed dalan da diad inkabautismoan da.
15 Sakey a lakin walad kalangweran diad California, E.U.A., so biktima na polyo, graben agmakayari tan makapaermen a kinaindanan na pamilya to. Kabekta sakey ed saray Tasi nen Jehova a mankakabkaabungan so akaromog ed sikato. Inggapo so panangiyaral na Biblia. Balet ta sikato so mabaing a tuloy a sano onsabi so Tasin mangikondukta na panagaral, sikato so onseksek ed sukong na kuarto tan iyamot to so lupa to pian agnanengneng. Kinaukolan na sayan walad kalangweran a laki so pigaran bulan a panalona ed arum a problema to. Agawaan to, anggaman kuan, tan natan et sikato la so maliket, bautismadon Tasi.
16 Sakey a sanasawan Katoliko ed Brazil so dismayado ed relihyon da tan kabekta et inggapo ra so nanaral na Biblia ed saray Tasi nen Jehova. Alikna ra a say nakakaukolan dan espiritual so napepenek natan, balet ta wala so baleg, pinmalandey, a problema: Say asawan laki, si Antonio, so sugapa ed sigarilyo. Sikato so nansigarilyo ed apalabas lan 48 taon, nanlapulad edad ton pitora! Diad saray taon et sinali ton itunda so bisyo to balet ta sinmaew. Diad sayan panaon, anggaman kuan, so duma la, unong ya inkuan nen Antonio: “Natan naaralan ko a no kaliktan kon paliketen so Dios tan idedikak so inkasiak a manggawa ed linawa to, nepeg kon itunda. Kayari na dakel a pikakasi, ayarian ko ed kaunoran.” Agaylan sikato so maliket ya ayarian ton isimbolo so dedikasyon to ed si Jehova diad panamegley na bautismo ed danum!—Salmo 66:19; Marcos 11:24.
17. (a) Anton mauges ya impluensya so naabet nen Jesus tan saray babangatan to a mabibiskeg a lalo natan? (b) Panon so impangarap nen Jesus tan saray babangatan to nen inmunan siglo ed pananelep na demonyo, tan panon so pangarap ed satan natan?
17 Say pananelep na demonyo ed saray Judios so sakey a probleman nantultuloy a naabet nen Jesus tan saray babangatan to. Saray parehon impluensya na mauges so mankikimey natan, ilautla natan a si Satanas tan saray demonyos to so nibantak ed sayan dalin a nanlapud tawen. (Apocalipsis 12:7-9, 12, 17) Miduma ed Inkakristiano diad samay inggapo to, ag-inikdan nen Jehova so totoo natan na mamilagron pakayari a mamagit ed saray demonyo. Anggaman kuan, say espiritual ya ayuran intarya to ed saray Kristianos so onkiwas a bilang salimbeng a sumpad impluensya na demonyo, tan nayarin nausar met a bilang paraan na pangibulos ed arum a manlapud panangontrol na demonyo. (Efeso 6:10-18) Sayan report so nanlapud Ghana: “Diad determinadon sagpot na agagi, dakel so nibulos a manlapud panameget na demonyo.” Nabet na sakey a Tasi so sakey a bii diad ministeryo, tan nen nigapo so tongtongan ed Biblia, “say bii so ginmapon nannangis.” Anto so problema? Insalaysay na Tasi: ‘Sikato so sinelepan na espiritu, tan kapiganman a gawaen to, sikato so gawaen ton mannangis, tan anggan anton kuartan walad sikato so naandipat.’ Say maparanay a panangiyaral ed Biblia so tinmulong ed sikaton mangibulos a manlapud sayan panamairap na demonyo, a tinulongan ton mangidedika na inkasikato ed si Jehova.—Juan 8:32.
18. Anton eksperiensia so mangiyilustra a saray angheles so aktibo diad panangidirihe ed kimey na panagpulong?
18 Saray probleman singa saray adeskribe ed tagey so nayarin magmaliw ya abalbaleg a tuloy ed kanonotan na sakey a too a molimolien so pambitkel. Alaen so kipapasen na sakey a biin walad kalangweran ed New Zealand. Say inmunan Tasin akitongtong ed sikato so akaimano a sikato so “apegetan ed emosyon tan mapatnag a nagogonigon ed bengatla.” Diad saginonor et inako na sayan too a “sikato so onlan manbitkel tan dinesidi to so manpikasi ed Dios ya ununa ya onkerew ed sikato na tulong.” Diad saman say Tasi so tinmuktok ed puerta to, kanian sikato so peteg ya “akisalsalamat ed Dios diad impangebat to ed pikakasi to.” Kasin saya so nibanbana? Sirin akin a say miulibay iran bengatla so nagagawan mabetbet? Anto so inkuan nen Jesus? “Sano say Anak na too so onsabi ed gloria to, tan amin na saray angheles so kaiba to, . . . pambibiiganen toray totoo a manlapud sinansakey, a singa say pastol et ibiig toray karnero a manlapud saray kanding.” (Mateo 25:31, 32; nengnengen met so Apocalipsis 14:6.) Saray angheles so ontutulong ed si Jesus diad kimey na panagpastol, tan ididirihe ra so “kakimeyan” na Katawan ed saraman so onkekerew ed Sikato na tulong.—1 Corinto 3:6, 9; nengnengen so Gawa 8:26-39; 16:9, 10.
19. Anton sankamundoan a kipapasen so wala natan, a mankaukolan na anton kiwas ed biang tayo?
19 Natan, inerman so nayarin panaayaman tayo, walaray nilibu-libon totoo a nabebelatan tan nanairapan ed parehon problema ya atalonaan la na dakel ed saray totoo nen Jehova. Arum ed sikara so nayarin manaayam ed kaabay yo! Sikara so maganat a mankaukolan na tulong. Tua, a singa inkuan nen Jesus: “Say panagani, peteg, so baleg.” Kekerewen tayon say Katawan na panagani so mangibaki natan na lalon dakel a komikimey ed panagani to legan na 1986 a taon. Komon ta say puso yo so napakiwas diad tawag: Maganat a Nakaukolan—Lalon Dakel a Komikimey ed Panagani!
Tepetepet ed Panrepaso
◻ Siopa so Katawan na panagani?
◻ Anton duaran panagani so mankukurang?
◻ Anto so babaleg a kimey ya inkuan nen Jesus a gawaen na saray patumbok to?
◻ Akin a say pananisia so nakaukolan na amin a komikimey ed panagani?