Saray Ayep ed Apocalipsis​—Akin a Basaen so Nipaakar ed Sikara?

APOCALIPSIS! Satan so sakey ed saray mabitar a ngaran a niiter ed unor a libro na Biblia. Sikato met so atawag na libro na Puyan. Say libro so napno na malinew iran salitan retrato, a matalona ed saratan et nipaakar ed sakey a dragon tan ed taloran atap ya ayep. Naromog na arum a sarayan ayayep so makapakebbiew. Arum so mangibabaliwala a singano kaisipan na sakey a masiken. Akin, sirin, a nepeg yon basaen so nipaakar ed saray ayep ed Apocalipsis? Lapud say liket so nasasaglawi.

Tua, si apostol Juan so sakey a masiken sanen insulat to so libro na Puyan ed apalabas lan ngalngalin 1,900 taon. Kasin kabaliksan na satan, anggaman kuan, a saray ayayep a dedeskribien to so kaisipan lambengat na sakey a kabaw? Andi, tan si Juan so aliwan inmunan masiken ya awalaan na ontan iran pasingawey. Sakey a lakin manngaran na Daniel so akanengneng met na pasingawey ed ayayep diad inkamasiken to, tan sarayan pasingawey so apaneknekan a suston propesiya na pananguman ed gobierno na too. (Daniel, kapitulo 7 tan 8) Nagkalalo ni, impasen nen Jesu-Kristo a mismo si Daniel a bilang pinuyanan na Dios, a tinawag to na sakey a propeta tan nanaon ed saray sulat to.​—Mateo 24:15.

Impanengneng nen Jesus a saray apostoles to so mangawat na kaaruman iran madibinon instruksion kayari na ipatey to. (Juan 16:12, 13) Tan lapud saray dakel a pasingawey ed libro na Puyan so asumpal ed makatantandan dalan, makapanseguro itayo a saray pasingawey nen apostol Juan ed saray ayayep diad Apocalipsis so pinuyanan met na Dios.​—2 Timoteo 3:16.

Say introduksion ed libro na Puyan so mangikuan: “Sakey a Puyan nen Jesu-Kristo, ya inter na Dios ed sikato . . . Tan imbaki to so anghel to tan imparungtal to ed saray tanda diad panamegley to ed si aripen ton Juan.” (Apocalipsis 1:1) Sirin, saray talintao ed libro na Puyan, a pati saraman so ayayep to, so simbolo, aliwan literal. Anggapo so pankaukolan na itakot diad pamasa nipaakar ed sikara. Sarayan simbolikon ayayep so mangiter ed saray Kristianos na makanan pikakabat, a gawaen toran makayarin mamasiansia na relasyon da ed Dios. Sirin, nayarian nen apostol Juan ya isulat: “Maliket so mamasan maksil tan saraman so ondengel ed sareay salita na sayan propesiya, tan saraman so manumpal ed saray bengatlan nisulat ditan; lapud say aturon panaon so asingger la.” On, say pakatalos yo ed sarayan simbolo so mangitarok na liket natan tan diad arapen.​—Apocalipsis 1:3.