Apocalipsis​—Anto ‘Tan?

“SAY Apocalipsis!” Anto so nanonotan yo sano satan a balikas so narengel yo? Kasin kadederal? Desyang? Guerra Mundial III? Anggaan na mundo? No sarayan retrato ed kanonotan so ompatnag, agyo bukbukor ed satan a pamaakaran. Impinta na siensia tan peryodiko so arapen na too a bilang maudiem. Sirin kasin pankelawan a dakel so mangisiglaot ed apocalipsis diad kaandipat na too ed desyang a nagawa?

“Say apocalipsis natan so aliwa lambengat a panangiretrato na Biblia noagta nagmaliw a sankapetegan a nagawa,” so impasakbay nen Javier Pérez de Cuéllar a Sekretaryo-Heneral na NU ed inagurasyon a paliwawa to. “Agnin balot agawa nensaman ed eksperiensia na too a sikatayo so nipasen ed inkaitup diad baetan na desyang tan kililiktar.” Anto so tutukoyen to? Sikato so pambanggaan ed nuklar ya onlelesa a manlapud ibibiskeg ed kaplesan a laslasan ed armas. Pinabiskeg to so pasakbay to ed Nasyones Unidas, imbaga to a “ngalngalin 500,000 sientista ed interon mundo so mangidedeboto na pikakabat da diad panusukimat ed saray armas a lalon mabiskeg tan lalon makapatey.”

Saray arum, met, so sikakabat ed peles a kipapasen. Si Hans Jonas, emeritus professor na pilosopya ed New School for Social Research, so angikuan a say manunan katatakotan to et say “apocalipsis a mangikigtot a manlapud saray ag-inggetman dinamikon teknikon sibilisasyon.” Insiglaot to so apocalipsis ed ‘kaupot, polusyon, pankibalatar na planeta, tan ontan met ed kebbiew na biglan kadederal ed panamegley na bomba atomika.’

Mipadpara, inkuan nen manag-awaran a Golo Mann: “Ag-itayo la nawalaan na sananey a guerra mundial. Say bakal so lingon salita. Nepeg a sebelan tayo so terminon ‘Guerra Mundial III’ tan imbes et ikuan tayo so apocalipsis odino palaspas a desyang.”​—Hamburg’s Die Zeit, Agosto 30, 1985.

On, bibidbiren na too a sikato so walad tambib na dilin-kadederal. Balet kasin kabliten to so apocalipsis? Andi unong ed Biblia, ya ibabaga to a si “Jehova a Dios, say Makapanyarin-amin”​—aliwan too​—so “mangitarok na kadederal ed saraman so mandederal ed dalin.” (Apocalipsis 11:17, 18) Sirin, say pakatalos ed apocalipsis a manlapud punto de bista na Biblia so nayarin mangiter ed sikayo na duman panmoria, sakey ya interamentin balo tan masnag.

No Anto ‘tan a Talaga

Adeskribe so apocalipsis ed sakey a sulat ed saray taga Tesalonica. Diman et imbaga nen apostol Pablo: “Matunong ed biang na Dios so pangibales na kairapan ed saraman so mamapairap . . . balet, diad sikayo a manasagmak na kairapan, inawa ed sikayo diad kipatnag [odino, apocalipsis] na Katawan a Jesus a manlapud tawen a tekep na saray mabibiskeg ya angheles to diad mandarlang ya apuy, legan ya idapo to so panangibales ed saraman so agmikabat ed Dios tan saraman so agmanguunor ed maong a balita nipaakar ed Katawan tayon Jesus. Saraya a mismo so managmak na maptek a kadusa ed andi-anggaan a kadederal.”​—2 Tesalonica 1:6-10.

Say apocalipsis, sirin, et say kipatnag nen Jesus legan na panaon na “baleg a kairapan.” (Mateo 24:21) Unong ed W. E. Vine’s An Expository Dictionary of New Testament Words, say Griegon salitan a·po·kaʹly·psis so manutukoy “ed Katawan a Jesu-Kristo sano onsabi a mangipaakseb na saray panangukom na Dios.” Inerman, tutukoyan na Biblia iyan kipatnag, odino apocalipsis, a bilang “say bakal na baleg ya agew na Dios a Makapanyarin-amin” diad Armagedon.​—Apocalipsis 16:14, 16; 19:11-21.a

Tua, nipaakar ed apocalipsis, anengneng tayo a sasalitaen na Biblia so “kairapan,” “panangibales,” tan “pananusa.” Anggaman kuan, et sasalitaen to met so “pakainawaan” na saraman so andi-kasalanan ya anagmak na kairapan. Isisipan na Salita na Dios ed sikatayo a “wala ni lambengat so daiset, tan say marelmeng so naandi la.” (Salmo 37:10) Sirin say apocalipsis so mamainawa ed katooan ed amin ya impluensya na marelmeng. Sikato so mananguman a punto ed magmaong iran kipapasen a para ed saray masimpit-impanpuso​—aliwan sakey a nagawan takotan da.

Sirin, imbes a kumpleton kadederal na amin o kaupot, say apocalipsis et sikato so matunong a solusyon ed saray problema na totoo. Kasin say ideya na pambilay ed sakey a balon panaon​—sakey a panaon na inkatunong, kareenan, tan ligliwa​—so makapasagyat ed sika tan say pamilyam?

Balet kasin sikatayo so manasingger ed apocalipsis na Biblia? No ontan, kasin walaan itayo na dalan diad pikabat ed eksakton panaon to?

[Paimano ed Leksab]