“Manpakpel tan Manpabiskeg a Maong”

“Sikayon lalaki so nepeg ya ag-ontakot ed sikara, ta si Jehova a Dios yo so sakey a mibabakal a nisesengeg ed sikayo.”​—DEUTERONOMIO 3:22.

1. (a) Anto so kipapasen ed Israel diad sampot na impanyatawyataw ed kalawakan? (b) Anton bilin so inter sirin nen Moises?

SINMABI so panaon a para ed makabaliksan iran nagawa ed awaran na Israel. Say masanton nasyon na Dios so nepeg la natan a manparaan ya onloob ed Insipan a Dalin! Diad nayarin 40 taon, impangulo nen Moises iray Israelitas ed maawaawang tan makapataktakot a kalawakan. Balet natan, diad rehyon na Ilog Jordan ed dalin na Moab, sikato so angiter na sampot lan paliwawa ed totoo na Dios. Diad edad a 120 anyos, say “mata to so agkinmuyep tan say biskeg to so ag-abawasan,” nisay kinmapuy so biskeg na bokadura to. Si Josue, a magano lan onsandi ed sikato, tan say amin ya Israel so peteg ya aliketan diad impakadngel ed mabiskeg a panangiparungtal nen Moises ed ganggan nen Jehova tan diad mabiskeg ya impanimbawa ton manpakpel sano sikara la so onloob a mangayarian ed dalin.​—Deuteronomio 1:1-5, 19, 21, 29, 30; 3:22; 31:6, 7, 23; 34:7.

2. Panoy pikabat tayo a say kuritan na sarayan bengatla so onkana a kibangatan tayo natan?

² Kasin saraman ya agawgawa ed abayag lan panaon so awaran lambengat? Arawin ontan! Ibabaga nen apostol Pablo ed sikatayo: “Amin a bengatlan nisulat nensaman so nisulat ya onkanan kibangatan tayo, pian diad panamegley na panagsungdo tayo tan diad panamegley na ligliwa a manlapud Kasulatan et nawalaan itayo komon na ilalo.” (Roma 15:4) Satan a kuritan so walaan na modernon-agew a kasimbangan. Nayarian to itayon pabiskegen natan a para ed espiritual a pibabakal. Manserbi met a bilang “sakey a pasakbay ed sikatayo a sinabian na kasampotan na saray sistema na bengabengatla,” a tulongan to itayon ompaliis ed saray patit nen Satanas.​—1 Corinto 10:11; 1 Pedro 4:7.

Biskeg nen Josue​—Nanlapud Anton Sengegan?

3, 4. (a) Akin a nakaukolan tayon bayuboan so inkaandi-takot? (b) Panon so nayarin panggawa tayo ed saya?

³ Magangano lan tuloy natan, saray totoo na Dios so manmartsan onloob ed balon sistema na bengabengatla nen Jehova. Nisesengeg ed saray nagagawan natitibukel ed mundo, nakaukolan tayon bayuboan so inkaandi-takot. Panon so pakapanggawa tayo ed saya? Legan a si Josue so akaparaan lan onloob ed Insipan a Dalin, sikato so binilin na Dios: “Manpakpel ka lambengat tan manpabiskeg ka a maong a mangasikason manggawa ed unong na amin a ganggan ya ingganggan ed sika nen Moises ya aripen ko. Agka onsisipa a manlapud sikato diad kawanan odino diad kawigi, ta pian sika komon so onkiwas a sikakabat ed inerman a laen mo. Sayan libro na ganggan so nepeg ya ag-onarawi ed sangim, tan sikato so nepeg mon basaen a maksil ed agew tan labi, ta pian naasikasom komon a gawaen so unong ed amin a nisulat ed sikato; pian diad ontan et nagawam so dalan mo a maaligwas tan sirin sika so onkiwas a sikakabat.”​—Josue 1:7, 8.

⁴ A, wadtan so sekreto! Basaen so Biblia ya inagew-agew. Kinarga to so ganggan na Dios ed sikatayo. Mandalepdep ed satan. Imanoen iray panonot to. Agmo abuloyan so inkasikan onsipa ed materyalistiko, imoral a mundon walad kaliberliber mo. Diad antokaman a kipapasen a pakaromogan mo na inkasika, onkiwas a tekep na kakabatan, iyaplikan praktikal so suston pikakabat tan espiritual a pakatalos ya agamoran mo ed panamegley na panaaral mo ed Salita na Dios. Satan so tongtongen mo ed arum. Diad panggawa na ontan tan diad panmatalek ed si Jehova, peteg a sika ‘so makpel tan mabiskeg a maong, tan nagawam so dalan mo a maaligwas.’​—Ipareng so Salmo 1:1-3; 93:5; 119:165-168.

5. (a) Singa si Josue, panon so nayarin pakagamor na saray tobonbalon ministro natan ed biskeg? (b) Anton maabig a kalat so wala ed saray katayatdang a Tastasi?

⁵ Si Josue “so ministro nen Moises a nanlapud inkatobonbalo to” a nampatuloy. (Numeros 11:28) Andi-duaruwan sayan maapit ya impilimog so tinmulong ed sikaton makagamor na espiritual a biskeg. Ontan met, saray tobonbalon ministros natan so makagamor na biskeg diad panamegley na pikimey ed saray debosyonadon atateng, payunirs, abayag laran Tasi, tan diad arum iran matoor ya ariripen nen Jehova. Say pibiang ed kabkaabungan a panagtasin kaiba so ontan iran maseseg so sengegan na gayaga tan ontulong a mamayubo na inkatatken diad inkatobonbalo tayo tan sakey a pilalek ya ontundas ed ministeryo. (Gawa 20:20, 21; Isaias 40:28-31) Agaylan sankaabigan a kalat so wala ed saray walad kalangweran a Tastasi diad iloob ed sigpot-panaon a serbisyo nisesengeg ed Panarian nen Jehova!​—Salmo 35:18; 145:10-12.

6. Panon a si Josue so sakey ya ehemplo ed sikatayo no nipaakar ed kampanya a sumpad si Amalek?

⁶ Sanen imbaki nen Moises si Josue a mibakal ed saray Amalekitas, “ginawa nen Josue so unong na imbaga nen Moises ed sikato.” Sikato so matulok; sirin, agamoran to so impanalo. Sikatayo, met, so mibiang diad kaalangonan nen Jehova no sikatayo so manimanon maapit ed saray instruksion ed bakal a nanaawat tayo ed panamegley na muyongan to. Imbaga nen Jehova ed si Moises a nodnonoten to so impanalo To ed si Amalek diad pangisulat to ed satan diad sakey a libro tan pabitaren to ed saray layag nen Josue. Andi-duaruwan nagkalalon intandoro nen Josue so impanalo nen Jehova diad impangitongtong ed satan diad arum. Diad parehon pamaakaran, sikatayo natan so makapangipakabat ed saray makapanyarin gawa na Soberanon Katawan a Jehova, tan nayarian tayon iyabawag so onsasabin “agew na panangibales” ed marelmeng.​—Exodo 17:10, 13, 14; Isaias 61:1, 2; Salmo 145:1-4.

7, 8. (a) Anton talek so imbalikas nen Josue tan si Caleb diad impawil da a nanlapud Canaan? (b) Anton pasakbay tan panamaseseg so naromog tayo diad panamemben nen Jehova ed saray pamaakaran diad saman a panaon?

⁷ Sanen imbaki nen Moises so 12 kakapitan a mansimasim ed Insipan a Dalin, insakup to si Josue ed bilang da. Nen sikara so pinmawil, samplora ed saray nansimasim so angibalikas na baleg a takot ed saray Canaananeon manaayam ed dalin tan tinangguyor daray totoon angikampanya na ipawil ed Ehipto. Balet si Josue tan si Caleb so makpel ya angiyabawag: “No si Jehova so akaromog na panliket ed sikatayo, sirin sikatayo so peteg ya iloob to ed sayan dalin tan iter to ed sikatayo, sakey a dalin a panag-agusan na gatas tan dilo. Salambengat ta ag-onaalsa a sumpad si Jehova; tan sikayo, agyo tatakotan so totoo ed dalin, ta sikara so tinapay ed sikatayo. Saray sakurong da so naekal ed sikara, tan si Jehova so wala ed sikatayo. Agyora tatakotan.”​—Numeros 13:1–14:38.

⁸ Anggaman kuan, say ulop na Israel so nantultuloy a nanmeremere, ta pian si Jehova so sinmalet tan dinusa toray Israelitas a matakot diad 40 taon na impanyatawyataw ed kalawakan. Likud ed si Caleb tan si Josue, amin na saray lalaki ra ed bakal so inatey ya agda anengneng so Insipan a Dalin. Agaylan sakey a pasakbay ed sikatayo natan! Agtayon balot komon manmemeremere a sumpad saray oksuyan nen Jehova. Anggano naabet tayoray mairap a teritoryan pantasian, sikatayo so manpakpel tan manpabiskeg diad iyakar ed kaabungan na totoo a tekep na manangisalbay-bilay a mensahe na Panarian. Ag-itayon balot komon magmaliw a singa saraman so modernon-agew ya apostata ya imbes, mangiter na pantasi ed lapag, et lablabayen dan paugesen so agagi ra tan ompawil ed saray daladalan na mundo​—say antitipikon Ehipto.​—Numeros 14:1-4, 26-30; Lucas 12:45, 46; ipareng so Gawa 5:27-29, 41, 42.

Pabitaren So Ngaran nen Jehova!

9. Panon so impanbilay nen Josue a tukoy ed balon ngaran to?

⁹ Say listaan na Biblia ed 12 espiya so nanngaran ed si Josue a Hoshea, a kabaliksan to so “Kilalaban.” Balet diad sayan punto et ibabaga na kuritan: “Intultuloy nen Moises a tawagen si Hoshea ya ilalak nen Nun Jehoshua [kabaliksan to so, ‘Si Jehova So Kilalaban’].” Akin sirin ya indanet nen Moises so ngaran nen Jehova? Saman so lapud si Josue so nanserbin manuna a para ed kaalangon na satan a ngaran. Si Josue so nagmaliw a mabilay ya ehemplo na katutulok ed ganggan ya indanet nen Moises ed saginonor diad Israel: “Nepeg yon aroen si Jehova a Dios yo ed amin a puso tan ed amin a kamarerwa yo tan ed amin a biskeg yo.” Diad impanggawa na ontan, sikato so apribilehyoan a mangipatnag a si ‘Jehova so Kilalaban.’​—Numeros 13:8, 16; Deuteronomio 6:5.

10. (a) Anto so kabaliksan na ngaran nen Jehova ed sikayo? (b) Anton biskeg so naagwat tayo a manlapud malaknab nin salita nen Jehova ed si Josue?

¹⁰ Agta asabi met ya impasen tayo so ngaran nen Jehova a sankablian tan sankamanepegan ed amin a dayew? Say bantog a ngaran to et kabaliksan to so “Gawaen To So Pagmaliwan To” no nipaakar ed pananumpal ed saray sipan to. Agaylan makapaligsay-puso iray sipan to ed Panarian! Tekep na seseg a singa wala ed si Josue, nepeg a labay tayon itandoro so ngaran nen Jehova tan saray gagala to ed arap na amin a nayarin mangabrasa ni ed ilalo diad malinis tan matunong a balon sistema na bengabengatla to. Diad sarayan magonigon a panaon, makaagwat itayo na biskeg diad malaknab nin salita nen Jehova ed si Josue: “Agta ingganggan ko ed sika? Manpakpel tan manpabiskeg. Agnakikigtot odino natalagnaw, ta si Jehova a Dios so wala ed sika inerman a laen mo.”​—Josue 1:9.a

11. (a) Panoy inkidanet na kabaliksan na ngaran nen Jesus sanen sikato so nankabayo a linmoob ed Jerusalem? (b) Panon so impangipasen nen Jesus ed ngaran nen Jehova, tan anto so ipapanengneng na saya?

¹¹ Say Griegon kasimbangan na ngaran a Josue, odino Jehoshua, et Jesus, a kabaliksan to met so “Jehova So Kilalaban.” Sikato so diad panamegley nen Jesu-Kristo ya intarya nen Jehova so kilalaban na katooan. Nen 33 K.P. sanen nankabayo si Jesus ya onloob ed Jerusalem diad sakey ya asno, inkelyaw na ulop: “Ilaban, pikasi mi! Bendito so onsabi ed ngaran nen Jehova!” (Marcos 11:9; Zacarias 9:9) Si Josue so sakey a tuan tipo nen Jesus, ya ‘angitilak ed sikatayo na panuliranan pian tumboken a maapit iray bakat to.’ (1 Pedro 2:21) Singa si Josue, pinabpabli nen Jesus so ngaran nen Jehova, tan satan a ngaran so intandoro to. Amiddua ed samay ultimo lan pikakasi to a kaiba toray babangatan to, indanet to so ngaran na Dios, a kuanto: “Imparungtal ko so ngaran mo ed saray totoon inter mo ed siak diad mundo. . . . Impakabat ko so ngaran mo ed sikara tan ipakabat ko, ta pian say aro ya impangarom ed siak so wala komon ed sikara tan siad a mikasakey ed sikara.” (Juan 17:6, 26) Agaylan pribilehyo so pangipakabat tayo ed satan a ngaran diad arum!

12. Antoran makapanyarin gawa so aalagden tayo natan, tan akin?

¹² Legan a basaen tayo so kuritan na Biblia diad matoor a panangipangulo nen Josue, nanonotan tayo a say babaleg a Josue, si Jesu-Kristo, so mangipapangulo ed totoo na Dios natan. Say “agew nen Jehova” ed panangalangon so asingsingger la natan. Agaylan sikatayo so magunaet a manalagar ed kasumpalan na sipan to ed sakey a matunong a balon sistema ya ontumbok ed satan ya agew! (2 Pedro 3:10-13, 17, 18) Sitatalek, sirin, onnengneng itayo ed arapen diad malaknab iran makapanyarin gawa nen Jehova, lalon mas makapanyari nen say saraman so ginawa to ed panamegley nen Josue.

Milagro nen Jehova ed Jordan

13. (a) Anto so singa imposiblen kipapasen a nidungetan na Israel ed bukig a dapag na Jordan? (b) Panon so inkatumangan na katutulok na Israel?

¹³ Saman so panaon na panagani ed taon 1473 K.K.P., tan say Jordan so manlippua ed delap. Panon so ibeltang na saray pigaran laksan kakamarerwa, matatatken tan walad kalangweran, lalaki, bibii, tan ugugaw, diad manbunlayon ya agos? Ingen ingganggan nen Jehova si Josue: “Natan ontalindeg ka, sayan Jordan so baliwen mo, sika tan amin na sayan katooan.” Diad saman, imbaga na totoo ed si Josue: “Amin ya ingganggan mo ed sikami so gawaen mi.” Tinaynanan na Israel so kampamento. Saray saserdote so nanmartsan inmuna, a sankaawit da so kaban na sipan, a sikato so maalwar a sinakbongan tan angirepresenta ed kiwawala nen Jehova ed sikara. Insan inggapo nen Jehova a ‘gawaen so makapakelaw iran bengatla ed pegley da,’ ta “diad bektan saray nansakbat na Kaban so akasabi ed Jordan tan saray sali na saserdoten nanawit ed Kaban so tinmaksong ed tambib na saray danum . . . saray danum ya unaagos so ginmapon kinmeneng.” Saray danum ed leksab so apultot ya unagos ed Inatey a Dayat, “tan saray totoo so binmeltang.” (Josue 1:2, 16; 3:5-16) Peteg a milagron makapakelkelaw!

14. Anton pisimbangan so wala ed sayan agew, tan anto so nansumpalan ed niiter a pantasi?

¹⁴ Say manbunlayon a Jordan so walaan na kasimbangan ed delap na katooan a mangigagalasugos natan ed kadederal diad Armagedon. (Ipareng so Isaias 57:20; Apoc. 17:15.) Natan, legan a say katooan so manalalagey ed tambib na satan ya ultimon kadederal, si Jehova so manalimbeng ed totoo, tan natan et manbilang na masulok a 3,000,000​—sakey a bilang a kapara na saman so totoo na Dios a nanmartsan kaiba nen Josue.​—Ipareng so Habacuc 2:3.

15. (a) Anto ed modernon panaon so piparaan na makpel a kiwas na saray saserdote ed saman? (b) Panon so inkirepresenta na “baleg ya ulop” ed sayan retrato?

¹⁵ Legan a saray nilaksalaksan Israel so ombebeltang ed ilog, “saray saserdoten manaawit ed kaban na sipan nen Jehova so nansiansian akatanyareg ya ag-nagalaw ed amagan dalin diad pegley na Jordan,” a mangirepresenta ed panangisalet nen Jehova a Dios ed saray pamaakaran. (Josue 3:17) Saman so nen 1919 a say melag ya ulop na saray alanaan a Tastasi so kinmurang a sitetepel ed arap na saray “danum” na katooan. Nen 1922 et sikara so makpel ya inmebat ed tawag ya ‘iyabawag, iyabawag, iyabawag so Ari tan say Panarian to,’ ya imbaga ra ed epekto: “Wadia ak! Ibaki moak.” Sikara so pinaseguroan nen Jehova: “No bilang ta sika so ombaliw ed saray danum, siak so wala ed sika; tan diad saray ilog, agda ka delapen.” Nen 1931, sikara so pinagalangan to diad impangiter to ed sikara na ngaran a Tastasi nen Jehova. (Isaias 6:8; 43:2, 12) Kaiba na saraman so binmaliw ed Jordan et saray aliwan-Leviticon Israelitas tan saray kapolian na aliwan-Israelitan “baleg ya alaoklaok ya ulop” a tinmaynan ed Ehipto ya akiulop ed si Moises. Diad mipadparan nengneng, say “baleg ya ulop” natan so mibibiang diad ibeltang ya onloob ed balon sistema na Dios, legan a saray nakekeraan na espiritual a saserdoten klase so manalalagey ya “agnagiing, agnagalaw,” a maabig-ehemplo ed pananisia ra.​—Exodo 12:38; Apocalipsis 7:9; 1 Corinto 15:58.

Pannodnonot ed Milagro

16. (a) Panon so impannodnonot ed samay milagro ed Jordan? (b) Anto so isuhiri na saya no nipaakar ed saray makapanyarin gawa nen Jehova natan?

¹⁶ Intultuloy nen Jehova a nodnonoten iyan milagro ed Jordan, ya ingganggan ton saray 12 lalaki, ya angirepresenta ed tribu na Israel, so mangala na 12 bato ed ilog tan saraya so isempen da ed sagur a gilig diad Gilgal. Saraman a bato so ontalindeg diman a bilang magnayon a pakanodnonotan ed ngaran nen Jehova tan diad saray makapanyarin gawa to. Nibaga ed saray arapen ya anak na Israel a sayan pakanodnonotan so “ta pian amin a totoo ed dalin so makaamta komon ed taklay nen Jehova, a satan so mabiskeg; ta pian sikayo komon so peteg ya ontakot ed si Jehova a Dios yo a naynay.” (Josue 4:1-8, 20-24) Diad saray modernon panaon, saray makapakelaw a gawa nen Jehova diad panangiliktar ed totoo to, anggaman ed saray maruksan panangataki na papangulo na pulitika tan relihyon, so ontalindeg a bilang sakey a pakanodnonotan a sikato so wala ed totoo to. Andi-duaruwan saray engranden modernon-agew a kimey to diad panangalangon ed ngaran to so nanodnonotan a permanente diad balon sistema na bengabengatla to.​—Apocalipsis 12:15, 16; Salmo 135:6, 13.

17. (a) Anton malaknab a pakanodnonotan so inletneg nen Josue? (b) Say katooan so agmakayarin ompaliis ed anton mipadparan pantasi natan?

¹⁷ Niyuksoy so nagkalalon pakanodnonotan: “Wala met so labinduan bato ya inletneg nen Josue ed pegley na Jordan diad nantanyaregan a pasen na saray sali na saserdoten nanawit ed kaban na sipan, tan sikara so nantultuloy diman ya angga ed sayan agew.” Nen saray saserdote so inmekal la ed amagan-ilog tan imbulos nen Jehova so naamper a manlippuan danum, saraya so nanbunlayon ed liber na 12 bato na pantasi. (Josue 4:9) Sirin, saman a delap so agmakapaliis ed kiwawala na saraman a bato. Ontan met natan, say katooan so nibasyo a lalon maples ed “Inatey a Dayat” diad Armagedon. Balet agto napaliisan so pantasi ya imbunton na saray Tasi nen Jehova ed sankamundoan legan a sikara so “ontalindeg a malet ed sakey ya espiritu, diad sakey a kamarerwan manbabanikel a benebenek diad pananisia ed maong a balita.” (Filipos 1:27, 28) Saray akataryan kuritan so mangipanengneng, a legan na 67 taon ya anggad sayan taon na 1986, saray Tasi so angipalima ed kaabungan na totoo ed sankadalinan, diad masulok a 200 lenguahe, na masulok a 570,000,000 iran libro tan pulyeto tan masulok a 6,400,000,000 iran kopya na magasin a Watchtower tan Awake! tan ontan met ed saray minilmilyon a suskripsion ed magasin​—peteg a pantasin makabaliksan!

18. (a) Antoran kalidad so impanengneng na saserdoten klase natan? (b) Panon so impakapakiwas ed amin a totoo na Dios?

¹⁸ Makapanliket itayo a say panagtasi so nantultuloy ya anggad taon na 1986. Say panggawa ed linawa na Dios so mairap a kimey, a singa sanen saray 12 lalaki so kada sakey et angisakbat ed pakanodnonotan a bato to tan inawit to ya anggad Gilgal. Ingen say engranden espiritu na panagpayunir so amakasakey ed saray modernon-agew a totoo na Dios, a pinakiwas toran naynay a “manpakpel tan manpabiskeg a maong.”​—Salmo 27:14; 31:24; Sofonias 3:9.

19. Diad panrepaso ed saray malaknab nin agawgawa ed agew nen Josue, anton talek so nayarin wala ed sikatayo?

¹⁹ Arum iran agawgawa ed agew nen Josue so nepeg a mamaseseg ed sikatayon mantultuloy ya onabante, matalek a gawaen nen Jehova so kaaruman niran milagro a nisesengeg ed totoo to. Say ontumbok ya artikulo tayo so mangirepaso na arum ed saraya.

[Paimano ed Leksab]

Morekdeken Iray Agawgawa ed Agew nen Josue​—

◻ Akin a saraya so moriaen a mas nen say basta awaran?

◻ Panon a nayarian tayon bayuboan so tepel tan espiritual a biskeg?

◻ Anton maabig a padron so intilak nen Josue ed sikatayo?

◻ Diad antoran dalan so impangiyanino nen Josue ed si Jesus?

◻ Antoran nagagawa natan so misimbangan ed saraman so agawa ed Jordan?