Say Kristianon Jubileo So Mamantok ed Milenyo

1. Anto so agnambanikelan na saray Judios ya inletneg ed Republika na Israel, tan akin?

ANGGAN diad Republika na Israel (niletneg nen 1948), saray dakel a Judion mangipapasen na inkasikara a walad silong na Mosaicon Ganggan so ag-angiletneg na panagselebra ed taon na Jubileo. Tan wala ra komon so dakel a kumplikasyon no sinali ra. Nayarin mansumpal so malaknab iran problema ed ekonomya, lapud saray pankanepegan ed kayarian so nalalanor. Say Republika na Israel so angukopa ed amin a dalin a nanayaman na kadaanan a 12 tribu. Sikato met so andian na templo a tekep na sakey ya atagey a saserdote ed tribu nen Levi, a saray pakabidbiran a tribu ed totoo so abalang.

2. Panon a saray arum a Kristianos so ginmapo lan manselebra ed Jubileo ya inyanino na saman so agawa ed kadaanan ya Israel?

² Iner so panaynanan na satan ed sikatayo, anggaman kuan, no nipaakar ed saray bendisyon ed sakey a selebrasyon na Jubileo? Nanonotan tayo a say kadaanan a Jubileo so sakey a piestan taon na kawayangan​—a saray Israelitan angilako na inkasikara ed inkaaripen so nabulos tan nipawil iray tawir a dalin. (Levitico 25:8-54) Diad akaunan artikulo, anengneng tayo a sayan oksuyan so angangga a kaiba na Mosaicon Ganggan na sipanan nen 33 K.P. (Roma 7:4, 6; 10:4) Insan nipakurang so sakey a balon sipanan a ditan et nayarian na Dios a perdonaen iray kasalanan na mananisia, a sikara so nilanaan to ed masanton espiritu, tan sikara so tinagibi to a bilang ananak ya awiten ed tawen. (Hebreos 10:15-18) Ingen saramay mangungguna ed sayan oksuyan na balon sipanan so “melag a pulok” na 144,000 “a sinaliw ed dalin.” Sirin panon so pakagegemtan na saray minilmilyon nin matoor a Kristianos na kabulos ya inyanino na Jubileo?​—Lucas 12:32; Apocalipsis 14:1-4.

Sakey a Bagat a para ed Amin!

3. Panon inkaepektibo tan inkamagnayon so bagat nen Jesus?

³ Diad saray sakbay-Kristianon panaon, saray gungguna ed tinaon ya Agew na Pananakbong so nantultuloy ed sakey taon lambengat. Saray gungguna na dondon bagat nen Katawan a Jesu-Kristo so mantultuloy, magnayon. Sirin say antitipikon Atagey a Saserdote, si Jesus, so agnakaukolan a magmaliw a sakey a too lamet, ibagat to so inkasikato, tan insan ompawil ed tawen pian ipresenta so bili na saman a bagat a kapag taon diad Sankasantosan nen Jehova a Dios. A singa ibabaga na Kasulatan: “Si Kristo, natan ta sikato la so apaoli a nanlapud saray inaatey, aglan balot ompatey; say patey so aliwa lan katawan ed sikato.”​—Roma 6:9; Hebreos 9:28.

4, 5. (a) Anto so nansumpalan na inkiyaplika na bagat nen Jesus nanlapulad Pentecostes 33 K.P.? (b) Walaan itayo na anton pakanengnengan a sayan bagat so niyaaplika la a lalon malaknab?

⁴ Sirin, diad saray taon nanlapulad Pentecostes 33 K.P., unong a saray mananisia so nagmaliw a nailalak-ed-espiritu iran babangatan na niglorian Katawan a Jesus, sikara la so ginmapon manselebra ed Kristianon Jubileo. Bektaman a ‘nibulos a nanlapud ganggan na kasalanan tan patey,’ sikara so nanggayaga ed makapaligsan kawayangan. (Roma 8:1, 2) Inyabawag da met so Kristianon mensahe ta pian saray arum ni so naperdona ed saray kasalanan da, a nalanaan, tan magmaliw iran espiritual ya anak na Dios. Kasin kabaliksan na saya, anggaman kuan, a no say sakey so aliwan kabiangan na satan a grupon nigeter ed 144,000, et agto la naeksperiensia so magayagan kabulos natan?

⁵ Makabaliksan ed saya et saray salita nen apostol Pablo ed Roma 8:19-21: “Say magunaet a panilalo na pinalsa so manaalagar ed kipatnag na saray anak na Dios. Ta say pinalsa so nisilong ed kaapaan [diad kipapasen a makasalanan tan agmakayarin mangekal na kasalanan].” Sirin indanet nen Pablo a wala so “ilalo a say pinalsa a mismo so nabulos met a manlapud panangaripen na kabubulok tan nawalaan na maglorian kawayangan na ananak na Dios.” Say ontan a kawayangan, sirin, so agnigetar ed saraman so magmaliw ya “ananak na Dios” ed tawen. Saray kabisadon salita ed Juan 3:16 so mamekder ed satan. Tan, singa asalambit la, say alanaan ya apostol Juan so angibaga a si Kristo so inatey “a para ed saray kasalanan tayo, ingen aliwan diad saray kasalanan tayo lambengat noagta ontan met ed interon mundo.”​—1 Juan 2:2.

1919​—Inmunan Inkabulos

6, 7. Nanlapulad 1919, anton nengneng na kabulos so niyaabawag, tan akin a nagkalautlan nanlapulad saman?

⁶ Diad saray modernon panaon say alanaan a manseselebra ed Kristianon Jubileo so mangiyaabawag ed manangibulos a maong a balita, nagkalautla nanlapulad 1919. ‘Akin a manlapud satan a panaon?’ nayarin morekdeken yo no sikayo so nianak ed lalon agano niran taon. Nengnengen tayo, a lawas nonoten a say panggayaga yo ed kabubulos so nasasaglawi.

⁷ Diad pigamplon taon sakbay na satan a petsa, saray nilanaan nen Jehova so angiyabawag ed saray katuaan na Biblia, a singa say wala ed samay bantog a serye na Studies in the Scriptures (1886-1917). Imbunog da met so dakel iran pakaaralan a pulyeto tan lepleta. Kaleganan na Guerra Mundial I, sinmabi so isusumpa, inkasubok tan inkayakayak, tan say intayer na kimey da. Balet nen 1919 say alanaan a nakdaan so kinmiwas a tekep na apasimbalon seseg a mangiyabawag ed saray katuaan na Biblia. A singa nayarian nen Jesus ya ibaga nen 30 K.P. a sikato so alanaan a mangipulong ed “kabulos na saray dinakep tan say pangipawil ed pakanengneng na saray bulag,” sirin ontan met ed sarayan modernon-agew ya alanaan. Kayari na makapalikliket a kumbension nen Setyembre 1-7, 1919,a sikara so maligligsan angituloy diad pangipulong ed saray katuaan ya angibulos ed saray agnabilang a totoo.​—Lucas 4:18.

8, 9. Diad anton pantalos a saray dakel so nibulos la, tan antoran katulongan so nausar diad panangiyabawag ed ontan a kabulos?

⁸ Imanoen, alimbawa, so katulongan na panagaral ed Biblia a The Harp of God (1921), ya angipresenta ed saray makanan katuaan a singano sikara so samploran deles na arpa. Binidbir na libro a “dakel so akigtot diad panagaral ed Biblia” ed doktrina a “say dusa na marelmeng . . . et andi-anggaan a kapairap ed sakey ya impiernon mandarlang ed agnaerep ya apuy tan asupre.” Naaralan na saray bumabasa ed ngalngalin 6,000,000 a kopya na sayan libro a sayan doktrina so “aliwan tua diad apatiran nambibiigan tan mabitar a rason: (1) lapud aliwan makatunongan; (2) lapud satan so sumlang ed inkahustisya; (3) lapud satan so sumpa ed prinsipyo na aro; tan (4) lapud satan so interamentin aliwan-makasulatan.” Naisip yo no panon ya agaylan satan so panangibulos ed totoon binmaleg ed takot diad maandon kapairap ed impierno odino diad paney-ey ed purgatoryo!

⁹ On, say maseseg a panangipulong ed katuaan na Biblia na sarayan alanaan so angibulos ed totoo diad interon globo ya naaripen ed saray palson bangat, ananito, tan aliwan-makasulatan iran ugali (a singa say panagdayew ed inatey ya atateng, takot ed saray anyani odino mauges ya espiritu, tan say panaglakes na saray klero ed kayamanan). Saray mismon titulo na arum ed saray katulongan na panagaral ed Biblia so mangisindag ed manangibulos ya impluensya a wala ed saray minilyon.b Sirin nansumpal a tua iray salita nen Jesus, sanen inkuanto a saray babangatan to so ‘manggawa ed saray kimey a babaleg’ nen say ginawa to. (Juan 14:12) Nipareng ed samay preliminaryon espiritual a kimey na panangibulos a ginawa nen Jesus diad impangipulong ed “kibulos na saray dinakep,” saray modernon-agew ya ariripen na Dios so nanggawa na mas babaleg ​—a sinabi to so dakerakel iran milyon ed interon globo.

10. Akin a nailaloan tayo a say kaaruman tan babaleg a kabulos so naeksperiensia?

¹⁰ Nonoten, anggaman kuan, a nen inmunan siglo et ginmapo so malaknab nin kabulos nen Pentecostes 33 K.P. Diman et ginmapo so Kristianon Jubileo ed “melag a pulok” a saray kasalanan da so aperdona, ya angitonton ed impagmaliw dan “ananak na Dios” ed tawen. Anto so nipaakar ed panaon tayo? Kasin saray minilmilyon na arum nin debosyonadon Kristiano so nibulos a manlapud panangaripen na kasalanan tan sirin manselebra ed engranden Jubileo? On, tan saya so impanengneng nen apostol Pedro sanen sinalita to “so saray panaon na kipawil na amin a bengatlan sinalita na Dios ed panamegley na sangi na saray masanton propetas to nensaman.”​—Gawa 3:21.

Sakey a Jubileo a para ed Nilaksalaksa

11. Panon so pangisuhiri na Levitico kapitulo 25 a sikatayo so makapanilalo ed kabulos ya onnatnat ed labas na espiritual ya Israel?

¹¹ Makatantanda ya amiddua ed Levitico kapitulo 25 saray Israelitas so apanonotan a manlapud imaton nen Jehova et sikara so “ariripen” to ya imbulos to a nanlapud Ehipto. (Bersikulo 42 tan 55) Sayan kapitulo ed Jubileo so analambit met ed saray “manaayam” tan ‘saray sankaili ed pegley da.’ Saratan so akaromog na kasimbangan natan diad “baleg ya ulop” a mibibiang ed saray espiritual ya Israelitas diad panangiyabawag ed Kristianon maong a balita.

12. Nanlapulad 1935, anton maliket ya agawa so mantutuloy?

¹² Nanlapulad 1935 say “maabig a pastol” a Jesu-Kristo so angitarok diad aktibon pililimog ed alanaan a nakdaan diad saraman so tinukoy to a bilang “arum a karnero.” Saraya so nakaukolan ton “itarok,” tan sikara so manibukel na “sakey a pulok” ed leksab na “sakey a pastol.” (Juan 10:16) Say “arum a karnero” natan so nilaksalaksa la ed bilang. No sika so kaiba na satan a maliket ya ulop, sika la so nibilang a matunong bilang sakey a kaaro na Dios, tan bilang kabiangan na toon pinalsa, sikayo so manatalaran ed arapen diad “kabulos a manlapud inkaaripen ed kabubulok” legan na onsasabin “panaon na kipawil na amin a bengatla” ed dalin. Saya so aliwan palson ilalo.​—Roma 8:19-21; Gawa 3:20, 21.

13. Anton bendisyon ed partikular so nepeg tayon imanoen a nagawa diad kayari na “baleg a kairapan”?

¹³ Kayari na impakanengneng nen apostol Juan ed 144,000 a manggagayaga ed Kristianon Jubileo a tekep na mangatatawen a destino, dineskribe to so “baleg ya ulop,” a kuanto: “Saraya so nanlapu ed baleg a kairapan, tan inurasan daray kawes da tan pinaputi da ra ed dala na Kordero. Sikato no akin a sikara so wala ed arap na trono na Dios; tan sikara so mangisasaklang ed sikato na sagradon lingkor ed agew tan labi diad templo to.”​—Apocalipsis 7:14, 15.

14, 15. Akin a saramay wala ed “baleg ya ulop” so walaan na nikaduman rason ed panliket natan?

¹⁴ Anggan natan, sakbay na baleg a kairapan, saraya so mangaagamil na pananisia ed niibung a dala nen Kristo tan sirin mangugungguna ed sakripisyon impatey to. Sikara met so manliliket diad inkibulos a nanlapud Babilonia a Baleg, diad impakawalaan na maabig a konsiensia ed arap nen Jehova a Dios, tan diad pribilehyo ra a mibiang ed kasumpalan na Mateo 24:14 diad panangipulong ed maong a balita na Panarian sakbay ya onsabi so anggaan.

¹⁵ Anggaman kuan, anto so nipaakar ed ilalo na kibulos na baleg ya ulop a manlapud nianakan a kasalanan tan ag-inkayadyari? Kasin satan a panaon so asingger la? Walaan itayo na maabig a rason ed panilalo a wala niran siansia ed sikatayo so arum ed kapolian na katooan ya impasakbay nen Jesu-Kristo ya agnapaso ya anggad amin na saray bengatlan nipasakbay so nasumpal. (Mateo 24:34) Sirin, say engranden kasampotan “na konklusyon na sistema na bengabengatla” so peteg ya asingsingger la.​—Mateo 24:3.

Sankaliketan a Nengneng na Kristianon Jubileo

16. Iner so talindeg tayo diad kasusumpalan na gagala na Dios, tan anto so manatalaran ed arapen?

¹⁶ “Say bakal na baleg ya agew na Dios a Makapanyarin-amin” so onsabi la, tan say nakdaan na “melag a pulok,” ontan met ed “baleg ya ulop” na saray matoor, masimoon a kakaiba ra so mamemben na katooran ed si Jehova a Dios tan onnengneng ed arapen diad pakawalaan na madibinon pananalimbeng. Sikara so magunaet a manatalaran ed panmekmek a pananalo nen Jehova ed amin a puersa na kakabusol, a para ed kaalangon to a bilang Sankatalbaan a Soberano. Agaylan sankaliketan a nengneng so pagmaliwan na saya diad panggayaga ed Kristianon kawayangan!​—Apocalipsis 16:14; 19:19-21; Habacuc 2:3.

17. Panon so pakaawat ni na saray nilaksalaksa na kabulos diad engranden Jubileo?

¹⁷ Say uley na mananalon Arin Jesu-Kristo ed alinisan a dalin so ontumbok, a say sankatalbaan ya inkasoberano nen Jehova so apekderan tan diad si Jesu-Kristo ed sigpot a panangontrol ed dalin a bilang Ari na arari tan Katawan na kakatawan. Insan direktan iyaplika to so merito na bagat to diad saray minilyon a totoo, a pati saray napaolin inaatey, a mangagamil na pananisia tan sibubulos a mangawat ed kaperdona na kasalanan da ya intarya na Dios ed panamegley nen Kristo. Saya so napatnagan diad pamunas na Dios ed “amin a lua ed kamataan da, tan anggapo la so patey, nisay pannangis nisay pandageyem nisay ot-ot.” (Apocalipsis 21:3, 4) No satan so aliwan tuan kabulos, anto ey?

18. Nipareng ed sakey a nengneng na kadaanan a Jubileo, anto so nagawa ed dalin diad balon sistema?

¹⁸ Nagkalalo ni, say dalin so aglan balot kontrolen, dutakan, tan deralen na saray maagum a totoo, korporasyon, tan gobgobierno na totoo. (Apocalipsis 11:18) Noag ingen, sikato la so nipawil ed saray tuan managdayew. Nipudir la ed sikara so kimey na pibiang diad literal a kasumpalan na propesiya nen Isaias: “Sikara la so peteg a mangipaalagey na kaabungan tan panayaman da ra; tan sikara la so peteg a mantanem na saray ubas tan mangan ed saray bunga ra. Sikara so agmanpaalagey tan sananey so manayam; sikara so agmantanem tan sananey so mangan . . . Sikara so agmansagpot na kaapaan, nisay sikara so mananak ed kaderya; lapud sikara so ilalak a tinibukel na saray pinapalar nen Jehova.” (Isaias 65:21-25) Diad sampot na Milenyon Uley, amin a pakasuysuyan na atawir a kasalanan tan ag-inkayadyari so napunas la tan saray matoor a totoo na Dios ed dalin so manselebra ed sigpot a pantok a panampotan na Jubileo. Sirin say kabulos ya inyanino na Jubileo so nasumpal la.​—Efeso 1:10.

Kayari na Milenyon Pantok na Jubileo

19, 20. Panon so panali nen Satanas tan saray demonyos a maneral ed saray bendisyon a nansumpal ed Milenyon Jubileo, balet diad anton pansumpalan?

¹⁹ Ipapasakbay na Apocalipsis 20:1-3 a si Satanas a Diablo, say manuley na demonyon armada, so napagit la ed eksena diad sanlibon taon ya uley nen Kristo ed katooan. Sano, diad sampot na Milenyo, say Diablo tan saray demonyos to so naabuloyan a magano ya ompaway, sarayan marelmeng ya espiritu so makanengneng ed dalin, aliwan diad kipapasen na impanaynanan da ed sikato, noagta diad agnibalikas a kalimgasan, sankagloboan a paraiso. Nanengneng da so dalin a panaayaman na matoor a “baleg ya ulop” tan diad saray binilbilyon ya apaolin inaatey a totoo ya inateyan nen Jesu-Kristo a bilang sakey a dondon bagat. Diad sampot na Milenyo, say Kristianon Jubileo so akasumpal la ed gagala to diad sigpot a pangibulos ed katooan a manlapud saray epekto na kasalanan. (Roma 8:21) Agaylan diniriablon kabandayan ed anggan siopa a manalin maneral ed satan a maabig a kipapasen! Balet diad panangiyabuloy na makapanyarin-amin a Dios, say Diablo so manggawa ed ultimo lan getma to, tan diad biskeg na ingongot to et sikato so onataki. Diad saya et nisulat ed Apocalipsis 20:7-10, 14.

²⁰ “Natan sano anampot la so sanlibon taon, si Satanas so nabulos ed pangawan to, tan sikato so ompaway a mamalikdo ed saratan a nasyones diad apatiran sukong na dalin, say Gog tan Magog, pian tiponen da ran pankakasakeyen a para ed bakal. Say bilang na saraya et singa buer ed dayat. Tan sikara so onsalida ed kaawangan na dalin tan liktuben da so kampamento na saray sasantos tan say inad-aron syudad. Balet ta inmakseb so apuy a nanlapud tawen tan sinimot to ra. Tan say Diablo a mamapalikdo ed sikara so nibantak ed dayat na apuy tan asupre.”

21. Kayari panampot na Kristianon Jubileo ed Milenyo, anton kiwas na saray mangatatawen ya anak na Dios so nanonotan ed Job 38:7?

²¹ Say tuan kawayangan, ya intarok na oksuyan ed Jubileo, so mantultuloy a panggayagaan ed amin a pasen; amin a pinalsa so bulos la tan mangigagalang ed samay Sakey a say ngaran to lambengat et Jehova. (Salmo 83:18) Satan so tua unong ya itultuloy nen Jehova a sumpalen so gagala to ed amin a talba. Diad inkapalsa na dalin, sakbay a say katooan so nikarga ed sikato, “saray bibitewen na kabuasan so nanggayagan nankelyaw a nankakasakey, tan amin na saray anak na Dios so nanliket” diad sankarakpan ya anengneng. (Job 38:7) Agaylan nagkalalon satan so gawaen da diad pakanengneng ed dalin a panaayaman na saray lalaki tan bibii ya angipanengneng tan amaneknek na sigpot a dedikasyon tan katooran da ed Makapanyarin-amin a Dios.

22. Anto so nepeg ya awawey tayo, a mitukoyan ed bilin a naromog ed Salmo 150:1-6?

²² Amin a bengatlan asaglawi ed liwawa na makaseleng a kasnagan a nisindag ed saray Kasulatan, sikatayo met so makapansayaksak a kaiba na katawenan tan ikuan, Hallelujah! Saya so bilin ed sikatayo ya angikaputan na libro na Salmo: “Hallelujah. Idayew so Dios diad santuaryo to; Sikato so idayew ed tagey, say biskeg To. Sikato so idayew ed saray makapanyarin gawa to; Sikato so idayew ed alablabas a kinabalgan To. Sikato so idayew diad tanol nnnnnna tambuyog; Sikato so idayew ed arpa tan leryo. Sikato so idayew ed pandereta tan sayaw; Sikato so idayew ed dinelesan tan plauta. Sikato so idayew ed saray manbanengbeng a piangpiang; Sikato so idayew ed saray maksil a tanol na piangpiang. Amin a manlinawa so mangidayew komon ed KATAWAN. Hallelujah.”​—Salmo 150:1-6, Tanakh Bible (1985), Jewish Publication Society of America.

[Saray Paimano ed Leksab]

Panon So Iyebat Yo?

◻ Manlapud anto so akabulosan na saray babangatan nen Jesus nen Pentecostes 33 K.P., a tinandaan to so gapowan na anto nipaakar ed sikara?

◻ Akin a wala so rason na panilalo ed babaleg a kabulos nen samay agawa nen inmunan siglo?

◻ Anton nengneng na kabubulos so nagagawa nanlapulad 1919?

◻ Panon tan kapigan so kagunggunaan na “arum a karnero” a manlapud engranden Jubileo?

◻ Kayari na pantok na Jubileo, anto so nengneng na dalin?

[Litrato ed pahina 15]

Niyabawag so kawayangan ed Cedar Point, 1919

[Litrato ed pahina 16]

Mibiang so “arum a karnero” ed Milenyon Jubileo