Jubileo nen Jehova—Panaon a Panliket Tayo
“Tan nepeg mon pasantosen so komalimanplon taon tan iyabawag so kawayangan ed dalin diad amin a manaayam ed sikato. Sikato so magmaliw a sakey a Jubileo ed sika . . . Sikato so nepeg a magmaliw a bengatlan masanto ed sika . . . Insan sika so peteg a manayam ed dalin diad kaligenan.”—LEVITICO 25:10-12, 18.
1. Antoran niyukit a salita so pinmatnag ed Liberty Bell, tan iner so angaonan ed saratan a salita?
INERMAN a panaayaman yo, nayarin nadngelan yo so bantog a Liberty Bell, a wala ed Philadelphia, Pennsylvania, E.U.A. Ibabaga na The World Book Encyclopedia a sayan kampana “so pinaknol nen Hulyo 8, 1776, a karingan na arum niran kampana na simbaan, pian iyabawag so impangadapta ed Deklarasyon na Independensya. Saray salitan niyukit ed sikato ya, ‘Iyabawag so Kawayangan ed interon dalin diad amin a manaayam ditan,’ so inaon ed Biblia (Levitico 25:10).”
2. Panon so liknaan yo nipaakar ed panilalo ed kawayangan, balet antoran problema so nayarin onlesa nipaakar ed satan?
2 Say kawayangan so mantutultuloy a makapasagyat, agta ontan? Nayarin sikayo so manliket diad ilalo ed peteg a kawayangan—manlapud saray palson kaisipan, manlapud saray pananeldet na pulitika o panamairap, manlapud saray manamakapuy iran epekto na katatkenan tan sakit a mansumpal ed patey. No ontan, wala so maabig a rason na panliket yo, tan wala so babaleg a rason a magano la. ‘Panon a nayarin ontan?’ nayarin itepet yo, lapud anggapo so gobiernon akapangiter na nagnap a kawayangan, tan nisaray sientista nisaray doktores so makayarin mangamper ed itatatken, sakit, tan kabekta say patey. Balet, uliten mi, wala so sakey a letnegan na panggayaga yo ed tuan kawayangan. Pian natalosan no panon, imanoen so arum ya importantin agawa nensaman ya impormasyon a manasaglawi ed sikayo—natan tan diad arapen.
3. Anto so Jubileo, tan anto so agawa kaleganan na satan a taon?
3 Say nisita-ed-tagey a balikas so angusar ed salitan “Jubileo.” Say Jubileo so sakey-taon-ed-karukey a peryodo na pananumpal-ed-Sabaton diad dalin na Israel. Ontumbok ditan so panggegendanan na pitoran agrikulturan taon na Sabaton ya ami-amin et sakupen to so 49 taon. Say koma-50 taon, say Jubileo, so pamantokan na sayan serye na pananumpal ed Sabaton a para ed dalin ya inter nen Jehova ed katooan to, a panumpal ed sipan ya agawa ed si ama ra ya Abraham, a “kaaro nen Jehova.” (Santiago 2:23; Isaias 41:8) Diad panaon na Jubileo, say kawayangan so niyabawag ed interon dalin. Kabaliksan na saya so kawayangan ed amin ya Israelitas ya angilako ed inkasikara diad inkaaripen lapud utang. Sananey a nengneng na Jubileo et amin a tinawir a kayarian a dalin (nayarin lapud kairapan ed pinansyal) so nipawil.—Levitico 25:1-54.
4. Kapigan so inkiyabawag na Jubileo, tan panon?
4 Diad satan ya agawa nensaman, nayarin naapresya yo no akin a say Jubileo so sakey a piestan taon na kawayangan. Saman so niyabawag diad pamaknol ed tambuyog diad Agew na Pananakbong.a A singa insulat nen Moises ed Levitico ed 25:9, 10: “Nepeg mon paknolen a maksil so tambuyog ed komapiton bulan diad komaplo na bulan; diad agew na pananakbong et sikayon totoo so nepeg a mamaknol na tambuyog ed amin a dalin yo. Tan nepeg yon pasantosen so komalimanplon taon tan iyabawag so kawayangan ed dalin diad amin a manaayam ed sikato. Sikato so magmaliw a sakey a Jubileo ed sikayo, tan nepeg yon ipawil ed balang sakey so kayarian to tan nepeg yon ipawil ed balang sakey diad pamilya to.” Nen 1473 K.K.P., impangulo nen Josue iray Israelitas diad imbeltang ed Ilog Jordan ya onloob ed Insipan a Dalin, a diman et sumpalen da so Jubileo.
Niyabawag So Inmunan Kawayangan
5. Antoran nengneng na kabubulos tan Jubileo so salaysayen tayo?
5 Say akauna so nayarin singa kadaanan ya awaran a samet so kipaakaran to ed saray bilay tayo, nagkalautla no sikato so agnanlapu ed kapolian a Judio. Anggaman kuan, sikatayo so inikdan nen Jesu-Kristo na makanan rason diad panilalo ed babaleg a Jubileo. Sikatoya so manitibukel na letnegan diad panggayaga tayo ed kabulos, odino kawayangan. Pian naapresya no akin, nakaukolan tayon nanengneng no panon nen Jesus ya intarya ed duaran dalan so kabulos nen inmunan siglo. Insan imanoen tayo no panon so pipetekan na saratan ed duaran kabubulos diad panaon tayo, balet kabubulos diad mas babaleg a kalaknab tan mangiter ed sikatayo na mas babaleg a sengegan na panliket.
6, 7. (a) Impasakbay na Isaias 61:1-7 so anton makapakelaw iran nagawa? (b) Panon nen Jesus ya impanengneng a say propesiya nen Isaias so asumpal?
6 Anggaman agto sasalitaen a direkta so kadaanan a Jubileon taon, sakey a mapropetikon reperensya ed onsabin tipo na kabulos so nibaga ed Isaias 61:1-7: “Say espiritu na Soberanon Katawan a Jehova so wala ed siak, lapud siak so nilanaan nen Jehova a mangibaga na maong a balita ed saray mauyamo. Imbaki toak a mamedber ed puson-maermen, a mangiyabawag na kawayangan ed saraman so dinakep tan say maawang a panangilukas ed mata na saray pinangaw; a mangiyabawag ed taon na abig-linawa ed biang nen Jehova tan say agew na panangibales ed biang na Dios tayo; a manligliwa ed amin a managogol . . . Panliket ed panaon ya ag-ageteran so onwala ed sikara.” Balet panon tan kapigan so pakaromog na satan a propesiya na kasumpalan?
7 Kayari na impanselebra ed Paskua nen taon 30 K.P., si Jesu-Kristo so linmoob ed sakey a sinagoga diad agew na Sabaton. Diman et binasa to so kabiangan na propesiya nen Isaias tan inyaplika to ed inkasikato. Ibabaga na Lucas 4:16-21, ed kabiangan: “Nilukasan to so lukot tan aromog to so pasen ya akasulatan na: ‘Say espiritu nen Jehova so wala ed siak, lapud siak so nilanaan ton mangiyabawag na maong a balita ed saray duruka, imbaki toak a mangipulong ed kibulos na saray dinakep tan say kipawil na pakanengneng na saray bulag, a mangibulos ed saray apairap, a mangipulong ed makapaliket a taon nen Jehova, . . . Insan inggapo ton imbaga ed sikara: ‘Natan sayan kasulatan a kadkadngel yo so asumpal.’”
8. (a) Anton preliminaryon kabubulos so inter nen Jesus? (b) Panon so inkiilustra na saya ed Juan 9:1-34?
8 Say maong a balitan inyabawag nen Jesus so angiter na espiritual a kibulos na saray Judios ya angawat ed satan. Diad inkilukas na saray mata ra ed peteg a kabaliksan tan nakakaukolan na tuan panagdayew, sikara so nibulos a nanlapud dakerakel a lingon kaisipan. (Mateo 5:21-48) Sayan kawayangan so walaan na babaleg a kablian nen saray katambal ed pisikal a ginawa nen Jesus. Sirin, anggaman nilukasan nen Jesus so mata na sakey a toon nianak a bulag, lalon magnayon a resultan maabig ed too so impamidbir to’d si Jesus bilang sakey a propetan nanlapud Dios. Saman a balon kawayangan na too so niduma ed kipapasen na saray relihyoson papangulo a naaripen ed saray tradisyon da tan lingon sisisiaen da. (Juan 9:1-34; Deuteronomio 18:18; Mateo 15:1-20) Ingen saya lambengat so sakey a gapowan odino preliminaryon kawayangan. Anggan nen inmunan siglo, si Jesus so tinmulong diad sananey a nengneng na kabulos a misimbangan ed Jubileo diad kadaanan ya Israel. Akin a makatunongan so pangibaga na ontan?
9. Anggan diad saraman so nibulos ed espiritual, anton nengneng na inkaaripen so nansiansia?
9 Imbaga nen Jesus ed samay datin toon bulag: “Nisengeg ed sayan panangukom et siak so linma dia ed mundo: pian saramay agmakanengneng so makanengneng komon tan saramay makanengneng so nabulag komon.” Insan imbaga to ed saray Pariseos: “No sikayo so bulag, andian kayo komon na kasalanan. Balet natan ikuan yo, ‘Makanengneng kami.’ Say kasalanan yo so mansiansia.” (Juan 9:35-41) On, say kasalanan a mangitonton ed patey so siansia nin manunan problema, anggan singa natan. (Roma 5:12) Saray Judios, pati saray apostoles, ya akagungguna ed inmunan inkibulos, say espiritual a kibulos ya intarya nen Jesus, so nansiansian ag-ayadyarin totoo. Sikara so nantultuloy ya aripen na kasalanan tan nansumpal ed patey. Kasin satan so nayarian nen Jesus ya umanen? Kasin gawaen to? Tan no ontan, kapigan?
10. Insipan nen Jesus ya iter to so anton kaaruman a kawayangan?
10 Akadkauna, imbaga nen Jesus: “No sikayo so mansiansia ed salitak, sikayoray peteg a babangatan ko, tan naamtaan yo so katuaan, tan say katuaan so mangibulos ed sikayo.” Saray Judion dumerengel to so inmebat: “Sikami so kapolian nen Abraham tan agkamin balot nagmaliw ya ariripen na anggan siopa. Panon ya ibagam, ‘Magmaliw kayon bulos’?” Inmebat si Jesus: “Tuatua kuan ko ed sikayo, Balang sakey a managgawa na kasalanan so aripen na kasalanan. Nagkalalo ni, say aripen so agmansiansia ed sankaabungan diad ando lan ando; say anak so mansiansia ed ando lan ando.” (Juan 8:31-36) Sirin, say silalaman a polin nanlapud si Abraham so agmakapangibulos ed saray Judios a manlapud panangaripen na kasalanan. Sayan maawaran a panangiyabawag so ginawa nen Jesus nipaakar ed kawayangan pian panawag na imano ed bengatlan onsabi tan satan so babaleg nen say asagmak na saray Israelitas ed anggan anton Jubileo.
Ginmapo So Kristianon Jubileo
11. Akin a say interes tayo ed Kristianon Jubileo so nisentro ed taon 33 K.P.?
11 Ag-anengneng na saray Judios a say Jubileo ed Mosaicon Ganggan a sipanan so tipiko na sakey a babaleg a Jubileo. (Colosas 2:17; Efeso 2:14, 15) Sayan Jubileo a para ed saray Kristianos so manasaglawi “ed katuaan” a makayarin mangibulos ed totoo—a satan a katuaan so nisentro ed Anak, si Jesu-Kristo. (Juan 1:17) Kapigan so inggapon kaselebraan na sayan babaleg a Jubileo a makayarin mangitarok na kawayangan ya anggan manlapud kasalanan tan saray epekto to? Saman so nen primabera na 33 K.P., ed agew na Pentecostes. Saya so samploran agew kayari na insegep nen Jesus ed tawen pian ipresenta to so merito na bagat to ed si Jehova a Dios.—Hebreos 9:24-28.
12, 13. Anto so agawa diad kayari na impatey nen Jesus ya agnambayag et angitarok na nikadkaduman asagmak ed saray babangatan to?
12 Sakbay nen Jesus, anggap
o so pinalsan toon apaoli a nanlapud saray inaatey a nantultuloy a nambilay na ando lan ando. (Roma 6:9-11) Imbes, amin so naugip ed patey tan mantultuloy a naugip ya anggad nigeter a panaon diad kioli na atooan a pamilya. Diad inkioli to ed panamegley na pakayari na Dios, si Jesu-Kristo so nagmaliw a singa saman so impanawag ed sikato na apuyanan a Kasulatan, “say ununan-bunga na saraman so naugip ed patey.”—1 Corinto 15:20.
13 Limanplon agew ed kayari na inkioli to, wala so pamatnagan a say apaolin Jesu-Kristo so sinmegep ed katawenan tan linmoob ed kiwawala nen Jehova a Dios a sankaawit to so bili na ayadyarin atooan a bagat to tan inyaplika to a nisesengeg ed katooan. Saman so diad agew na Pentecostes na 33 K.P. Diad katutulok ed saray bilin a nanlapud si Jesus, ngalngalin 120 babangatan so nandaragup ed Jerusalem. Insan inkalbo nen Kristo so masanton espiritu ed sarayan babangatan diad kasumpalan na Joel 2:28, 29. Saray dila a singano apuy so nanayam ed petek na saray kauloan da, tan sikara so ginmapon nansalita ed saray sankailin lenguahe ed sikara. (Gawa 2:16-21, 33) Saya so prueba a say apaolin Jesu-Kristo so sinmegep ed katawenan tan linmoob ed kiwawala na Dios a sankaawit to so bili na sakey ya ayadyarin atooan a bagat ya iyaplika a nisesengeg ed katooan.
14. (a) Anto so kipapasen na saray babangatan nen Kristo no nipaakar ed saray sipanan? (b) Say balon sipanan so anaglawi ed anton matalonan bendisyon?
14 Antoray nansumpalan ed saraman a babangatan? Diad sakey a bengatla, sikara so nibulos a nanlapud Mosaicon Ganggan a sipanan, a ginawa na Dios ed silalaman ya Israel balet sikato la natan so inekal to, ya impasak to ed panamairapan a kiew nen Jesus. (Colosas 2:13, 14; Galacia 3:13) Saman a sipanan so sinandian na sakey a balon sipanan ya agawa, aliwan diad nasyon na silalaman ya Israel, noagta diad balon “nasyon” na espiritual ya Israel. (Hebreos 8:6-13; Galacia 6:16) Sayan balon sipanan, a nipasakbay ed Jeremias 31:31-34, so niyuksoy diad panamegley na sakey a manamegley a babaleg nen say kadaanan a propetan si Moises. Nisesengeg ed interes diad kibulos, nepeg tayon nagkalautlan imanoen so sakey a punto na balon sipanan. Saya so angitawagan nen apostol Pablo na imano, insulat to: “‘Saya so sipanan a pisipanan ko ed sikara diad kayari na saraman ya agew, . . . Saray kasalanan da tan saray mauges a gawa ra so agko la nonoten a balot.’ Natan unong a wala so kaperdona na saraya, anggapo la so iyaapay a para ed kasalanan.”—Hebreos 10:16-18.
15. Akin a nibaga tayo a nen Pentecostes 33 K.P. et ginmapo so Kristianon Jubileo ed saray alanaan? (Roma 6:6, 16-18)
15 Sayan kibulos a manlapud kasalanan so ituturo nen Jesus sanen inkuanto: “No say Anak so mangibulos ed sikayo, sikayo so peteg a bulos.” (Juan 8:36) Isipen—say kawayangan a manlapud kasalanan so agawan posibli diad letnegan na bagat nen Kristo! Ginmapo nen agew na Pentecostes, saray mananisia so inyabawag na Dios a matunong tan insan sikara so tinagibi to a bilang espiritual ya ananak a walaan na ilalon miuley ed si Kristo diad tawen. Impaliwawa nen Pablo: “Ta agyo inawat so sakey ya espiritu na inkaaripen a pansengegan na takot lamet, noagta inawat yo so sakey ya espiritu na inkatagibi a bilang ananak . . . No, sirin, sikatayo so ananak, sikatayo met so mananawir: mananawir a peteg ed Dios, balet kaiban mananawir nen Kristo.” (Roma 8:15-17) Agnasuppiat, say Kristianon Jubileo so ginmapo la ed saray alanaan a Kristianos.
16. Antoran kaaruman a bendisyon tan iilaloan so asaglawi a para ed saraman so manseselebra ed Kristianon Jubileo?
16 Sirin diad saman ya agew na Pentecostes nen taon 33 K.P., say balon nasyon na espiritual ya Israel so linmesa. Sikato so tinibukel na saray totoon aperdona so kasalanan da diad letnegan na nibagat a dala nen Kristo. (Roma 5:1, 2; Efeso 1:7) Siopa ed sikatayo so makapangiburi a saraman ya inmunan membro na espiritual ya Israel a niloob ed balon sipanan so akasagmak na makapakelaw ya inkibulos diad inkaperdona na saray kasalanan da? Sikara so ginawa na Dios ed “‘sakey ya apilin rasa, maarin inkasaserdote, masanton nasyon, totoo a para ed nikabiig a kayarian, pian [sikara] so mangiyabawag ed karlangan’ na saman so anawag [ed sikara] a nanlapud kabilungetan diad makapakelaw a liwawa to.” (1 Pedro 2:9) Tua, saray silalaman a laman da so siansia nin ag-ayadyari tan nasabi panaon et sikara so ompatey. Ingen, natan unong ta sikara so inyabawag na Dios a matunong tan sikara so tinagibi to a bilang espiritual ya ananak, say silalaman ya impatey da so “inkibulos” lambengat ya angabuloy ed kioli ra diad “mangatatawen a panarian” nen Kristo.—2 Timoteo 4:6, 18.
17, 18. Akin a say kabulos ed Kristianon Jubileo so nagkalalon mabli nen say preliminaryon kawayangan ya inyabawag nen Jesus?
17 Say inmuna odino preliminaryon kundang diad impangibulos ed saray mananisian Judios a nanlapud lingon kaisipan tan ugugali so walaan na baleg a kablian. Angggaman kuan, anengneng tayo a si Jesus so linmanpas ni ed satan a kabulos ed espiritual. Nanlapud Pentecostes nen 33 K.P. a nampatuloy, saray mananisian katooan so imbulos To “a nanlapud ganggan na kasalanan tan patey.” (Roma 8:1, 2) Sirin ginmapo so Kristianon Jubileo a para ed saray alanaan a Kristianos. Peteg a saya so nagkalalon mabmablin inkibulos, lapud insakup to so ilalo ed bilay diad tawen bilang kaiban mananawir nen Kristo.
18 Asalaysay tayo lan malaknab so duaran nengneng na Kristianon kawayangan nen inmunan siglo, ya agnipukay a sikara so letnegan na panliket. Tan saray inmunan siglon mananisia so peteg a nanliket. (Gawa 13:44-52; 16:34; 1 Corinto 13:6; Filipos 4:4) Saman so nagkalautlan tua nipaakar ed pibiang da ed Kristianon Jubileo, ya angilukas na dalan ed sikara diad pakaawat ed andi-anggaan iran bendisyon ed katawenan.—1 Pedro 1:3-6; 4:13, 14.
19. Anto ran tepet so mansiansia ed saray Kristianos ya agnailalak ed espiritu, tan anto so mangipanengneng a sikara so nawalaan na pibibiang ed madibinon niiter a kabubulos?
19 Iner, anggaman kuan, so kinepegan na saray kaslakan a tuan Kristianos natan ed sayan retrato, lapud sikara so agniyabawag a matunong a para ed bilay tan alanaan na masanton espiritu? Wala so Makasulatan a rason diad inengneng ed malalaknab a kibulos da bilang kabiangan na Kristianon Jubileo. Nonoten so Gawa 3:20, 21: “Si Jesus, a sikato, peteg, so awaten na tawen ya anggad saray panaon na kipawil na amin a bengatla a sinalita na Dios ed panamegley na sangi na saray masanton propetas to nensaman.” (Ipareng so Gawa 17:31.) Diad parehon kipaakaran, si Juan, sakey ya alanaan ya apostol a manggagayaga la ed Kristianon Jubileo so nansulat nipaakar ed si Jesu-Kristo: “Sikato so sakey a mananakbong a bagat ed saray kasalanan tayo, ingen aliwan nipaakar ed saray kasalanan tayo lambengat noagta ontan met ed interon mundo.” (1 Juan 2:2) Kasin kabaliksan na satan a saray dakel a matoor a Kristianos natan ya andian na mangatatawen ya ilalo so makapanliket ed Kristianon kawayangan? Kasin satan so dia lambengat ed arapen, odino kasin sikatayo la so walaan na sengegan na panliket? Satan so naromogan tayo diad pangusisa ed saray nengneng na Kristianon kabulos tan say Jubileo a walaan na nikaduman kabaliksan ed saray tuan managdayew natan.
[Paimano ed Leksab]
a Say tinaon ya Agew na Pananakbong so agawa ed koma-10 na Tishri, sakey a bulan ed Hebreon kalendaryo, a mipetekan ed peryodo na Setyembre-Oktubre tayo.
Antoray Kaisipan Yo?
◻ Antoray gungguna ed Jubileo ed kadaanan ya Israel?
◻ Panon nen Jesus ya inyabawag so inmunan inkibulos, tan anto so lalanoren to?
◻ Kapigan so inggapo na Kristianon Jubileo, tan anto so letnegan diad pangibaga na ontan?
◻ Akin a walaan itayo na rason diad inengneng ed arapen diad kabubulos a manasaglawi ed saray minilmilyon a Kristianos ya aliwan alanaan na espiritu?
[Antikey a Paimano ed pahina 8]
“Say basbas na saray matunong so singa masnag a liwawa ya onsinag lan onsinag ya anggad say agew so malet a niletneg.” (Uliran 4:18) Mitukoyan ed satan a prinsipyo, sayan artikulo tan say onggendan so mangipresenta na imbansag-ed-panaon tan apalaknab a salaysay ed Jubileo.
[Litrato ed pahina 10]
Inyabawag nen Jesus so kawayangan nen 30 K.P.
[Litrato ed pahina 13]
Ginmapo so Kristianon Jubileo nen 33 K.P.