Sayaksak ed Limog na Totoo na Dios

SARAY salita nen Arin David, a nikurit ed Salmo 68, bersikulo 2-4, so angilaktip na ampetang ya imbitasyon ed amin a manangaro ed tuan kawayangan: “Kantaan yo so Dios, mankanta ed ngaran to; kantaan so Sakey a manluglugan ed saray patar na kabueran a bilang Jah, a sikato so ngaran to; tan mansayaksak ed arap to.” Anton babaleg a pribilehyo so onwala nen say pansayaksak ed arap na Dios tayo? (Isaias 12:2, 3) Kaleganan na taon 1986, si Jehova so makapakelkelaw ya anustine ed saray tastasi to unong ya itutultuloy dan iyaabawag so kawayangan ed saray totoo diad dalin.

Saray onggendan a pahina so mangiter na sakey a sumarya ed sankamundoan a kimey na saray Tasi nen Jehova kaleganan na 1986. Agaylan sengegan na pansayaksak! A singa ipanengneng na saray bilang, say pantok a bilang na saray aktibon Tasi ed 208 ed daldalin a nanreport so dinmaak ed 3,229,022, 6.8-porsienton indaak kaleganan na taon. Say bilang na abautismoan so 225,868.

Panagnonot ed Impatey nen Jesus

Say inmatendi ed manunan pantitipon ed taon, say Memoryal na impatey nen Jesus, so dinmakel ed 8,160,597, anggaman saray arum a report so agnaawat lapud unuuges a kipapasen na mundo. Say bilang na saray mibibiang ed saray emblemas ed Memoryal so kinmesay ed 8,927 unong ta saray matatatken laran alanaan so akasumpal la ed mangaraldalin a kimey da.​—Apocalipsis 2:10.

Dakel ed saraman so nandaragup diad katutulok ed ganggan nen Jesus so angipanengneng na maabig ya ehemplon tepel. (1 Corinto 11:23-26; Juan 16:33) Diad sakey a dalin ed Africa a say kimey nen Jehova so sinebelan, say kongregasyon so nantitipon ed abung na sakey ya agin bii pian selebraan so Memoryal. Waloran minuto lambengat ed paliwawa, saray mamakauley ed lokal so sinmabin mangerel ed saray agagi. Sikara so ingganggan dan mangitunda ed miting. Saray agagi so siuuyamo balet mapekder ya angipilit a nepeg dan pagalangan iyan Memoryal na sakripisyon impatey nen Jesus. Kayari na impikatunongan tan impikasi ed pulis, sikara so naabuloyan a mantultuloy diad indengel na saray opisyales. Say miting so anampot ed kareenan, tan insan amin so inerel. Kayari na sakey a peryodo na impanimbestiga, limara so impukok. Sikara so nanayam ed pangawan ed sakey a panaon balet kabekta et sikara so nibulos, maliket ta ayarian dan sinelebraan so Pangdem na Katawan!​—1 Juan 5:3, 4.

Diad Nigeria, a say bilang na saray Tastasi so dinmaak ed 128,461, so walaan na inmatendi ed Memoryal a 394,370​—say sankaunaan a sankatageyan. Sakey ya impantitipon ed Memoryal so agawa ed pampapaalageyan a pasen na balon paalagey na Bethel ed Igieduma, tan masulok a 700​—ngalngalin interon manaayam ed saman a lugar​—so wadman!

Sinmabi so report a nanlapud Mexico: “Amin a pasen a laen mi ed bansa, saray manangipalapag so manliplipua ed entusiasmo, tan say interon bansa so singano manliob ed katuaan. Say katuaan so nanlimbos ed saray agagi, tan saray bilay da so nanliktub ed katuaan. Saray interon pamilya so onkakamang ed katuaan. Sakey a maabig a porsiento na totoon manaaral so ginmapon onatendi ed saray miting a bansag. Saya so ontutulong ed sikaran manggawa na maples ya iyaaligwas.” Inreport na Mexico so inmatendi ed Memoryal a 838,467. Nen Agosto say 198,003 a manangipalapag na Panarian ed satan a dalin so mangikokondukta na 327,664 iran panangiyaral na Biblia ed kaabungan na totoo. Agaylan posibilidad so wala ed sikara diad mantultuloy ya idadaak!

Nagkalalo nin Sankagloboan ya Ilalaknab

Manlapud utel na Kakristianoan et sinmabi so miulibay iran report na ilalaknab. Adampot na Italya so sakey a balon pantok na 139,570 a manangipalapag nen Agosto, tan 301,009 so dinmago ed selebrasyon na Pangdem na Katawan. Saray Tasi nen Jehova so peteg a ‘mangisisindag na liwawa ra ed arap na totoo.’ (Mateo 5:16) Alimbawa: “Sakey ya agin bii so mangipepelag na kuarta ed makina na tiket ed sakey a bus sanen imbaga ed sikato na sakey a kabkabat ya agla nakaukolan so pambayar ed tiket unong ta say biahe so antikey. Impaliwawa na agin bii a kanepegan so pambayar na tiket, anggano diad sakey ya itunda lambengat. Kayari na saman, say kaaro to so inmepas ed bus. Diad saman sikato so nilingaw na drayber na bus tan inkuan to: ‘Kasin sakey ka ed saray Tasi nen Jehova?’ ‘On,’ kuan na agin bii, ‘akin ya intepet mo?’ Nadngel ko so tongtongan yo nipaakar ed panagbayar na tiket ed bus, tan kabat ko a saray Tasi nen Jehova so walad limog na saray pigpigaran totoo a manggagawa na ontan tan simamatua ed amin a bengatla.’ Pigaran bulan ed saginonor, inasinggeran na sakey a laki so agin bii diad sakey a miting tan kuanto, ‘Kasin kabat moak? Siak iman so drayber na bus ya akitongtong ed sika nipaakar ed panagbayar na tiket. Diad impakaimanok ed ugalim, denisidik so igapon panaral ed Biblia diad saray Tasi nen Jehova.’”

Say Britanya so walaan na pantok a 107,767 iran manangipalapag na Panarian, a pati sayan balobalon abautismoan ya agin laki: “Si George so manedad la natan na 84 anyos. Kayari na 50 taon a bilang managpulong ed lokal a simbaan, sikato so sinmabi diad pikakabat ed katuaan. Diad gapo, sano nasumpal to so panagaral to ed Biblia diad abung, sikato so mangganat ya onla ed sananey a kuarto pian manungap na sigarilyo. Sikato so maparanay a managsigarilyo ed 70 taon. Balet kayari na impakaaral to ed kapitulo 26 na libron Makapambilay Kayo na Ando lan Ando ed Paraiso diad Dalin, sikato so aglan balot nansigarilyo lamet. Si George so abautismoan la natan ed masulok a sakey taon tan sikato so maseseg a tuloy ed lawak na kimeyan, a mangibabaga ed arum diad saray bendisyon ya itarok nen Jehova ed balon sistema na bengabengatla to.”

Inreport na Republika Pederal na Alemanya so sakey a pantok na 118,645 a manangipalapag. Wala ra met so pigamplon libon matoor a Tastasin ‘mangisisindag na liwawa ra’ diad kaabay a Demokratikon Republika. Diad Alemanya saray matoor a matatatken so agmalabay a mangikban “ed kampilan na espiritu.” (Efeso 6:16, 17) Inreport na sakey a kongregasyon: “Walaan kami na sakey ya agin bii a manedad na 103 anyos tan siansia nin sikato so manbibilay a bukbukor. Inyuksoy na saray mamatatken so sakey a grupo na pitora ya anggad waloran agagin bibii a mansusublayan diad pangasikaso ed sikato diad kada simba. Saya so gagawaen da ed linmabas lan talora ya anggad apatiran taon. Saray managkimey ed sosyal, a babayaran na komunidad, so onlan mangasikaso diad pangames tan pamales. Balet tano sikara so mansakit odino manbakasyon, saray agagi tayon bibii so onsublay a manggawa ed kimey. Sayan ebidensya na Kristianon aro tan sakripisyo so nanserbin maabig a pantasi ed saray taga paway. Say agi tayon biin manedad na 103 anyos so alerto ed nonot tan saray managkimey ed sosyal so impasen ton ‘teritorya’ to. Sikato so magunaet a manpulong ed sikara legan a sikara so mangaames ed sikato tan iikdan tora na literatura.” Peteg, say “ubanan-ya-ulo so sakey a balanget na kalimgasan sano naromog ed dalan na inkatunong.”​—Uliran 16:31.

Anggaman kuan, say imbitasyon a mandayew ed si Jehova so ninmatnat ed saray totoo ed amin ya edad​—“sikayoran tobonbalon lalaki tan ontan met ed sikayoran mamarikit, sikayoran mamasiken a pati saray ugugaw a lalaki.” Dakel iran walad kalangweran a totoo so ‘mannononot ed Baleg a Manamalsa ra diad saray agew na inkatobonbalo ra.’ (Salmo 148:12; Eclesiastes 12:1) Diad Brazil, a wala so makapalikliket a balon pantok na 196,948 a manangipalapag, say Watch Tower Society so akaawat na sulat a nanlapud nisulinek a baley a nantasian na duaran walad kalangweran ya agagi tayon lalaki ed pigaran bulan. Nabasa ed kabiangan: “Labay takayon komendaan diad maabig a walad kalangweran iran totoo yo. Siak so sakey a maestro tan midedeneng ed saray tobonbalo, tan kabat kon sikara so aliwan unong a kipapasen da. Saray tobonbalo yo so peteg a sakey ya uliran. Rerespetoen daray matatatken da, sikara so makalakal tan masimpit ed panagkawes. Tan agaylan kabat da so Biblia ra! Peteg a satan so relihyon! Makapaermen ta sikara la so ontaynan.” Saray pamilya na agagi tayo so onaalis la natan a permanente diad arum ed sarayan nisulinek a pasen pian kumponien iray interesado.

Anton aligwas so gagawaen na katuaan diad saray aliwan-Kristianon pasen? Say The Wall Street Journal nen Hulyo 9, 1986, so angipalapag na andukey ya artikulo diad leksab na paulon “Barren Ground​—Christian Missionaries Sow the Seed in Japan But Find Little Grows.” Sakey a misionero na United Church of Christ so nibalitan angibaga, “Anggapo so dalan a say Inkakristiano so peteg ya onlamut ed Hapon,” tan sakey a parin Pransiscan so angikuan, “Say agew na biektaew a misionero ed Hapon so asumpal la.” Namparan sikara so nansagpot ya andi-kakanaan diad masulok a 30 taon. Inkuan na artikulo: “Kulang a 1% ed populasyon so Kristiano, tan anggaman ed amin a kimey na misionero, say porsiento so onkekesay.” Ontan a tuloy so kipapasen na saray relihyon ed Kakristianoan! Balet kumusta iray Tasi nen Jehova, a mangibabangat na puron Inkakristiano ed satan a dalin? Diad apalabas a 92 bulan a nantutumbokan, dinmaak so bilang na saray aktibon ministro ra diad sakey a pantok na 113,062 (a pati sakey a promedio na 46,390 a “payunir” a kada bulan). Diad Hapon 146,316 so nikokonduktan panangiyaral na Biblia ed abung diad saray balobalon interesadon totoo. Seguradon saya so sakey a manangitarya ed nagkalalo nin idaak. Dia et nanenengneng tayo so mabilay a kasumpalan na Isaias 65:13, 14.

Say Lawak na Panagpayunir

Kumusta so sentro na amin na sayan dinamikon kimey​—say Estados Unidos na America? Diman, 744,919 a manangipalapag na Panarian so wala ed lawak bilang sakey a pantok. Balet kasin saray ontan a ‘misionero ed abung’ so peteg a nakaukolan? Peteg, unong a say krimen, druga, imoralidad, sakit, tan kabubulok so tinmulasok ed mas lalon sankaugesan nen dia ed maslak a natatawag na paganon daldalin. Saray totoon manpirawat ed magmaong a bengatla so mankaukolan na ligliwa tan ilalo, tan saray Tasi nen Jehova so walaan na ontan a mensahe. (Isaias 61:1, 2; Mateo 24:14) Diad Estados Unidos, kaleganan na 1986, sarayan ministros so angideboto na 146,673,490 oras diad panangiyabawag ed maong a balita na Panarian. Satan so nansumpal ed 12.6-porsienton indaak, odino 16,449,229 a lalon dakel ya oras nen say imbeneg a taon. Satan a panaon so makagunggunan nausar, unong ta 6,138,938 iran libro so nibunog, a satan so 23.2 porsienton inaligwasan ed samay imbeneg a taon. Nen Abril lambengat, say dagup so masulok a 1,000,000 a libron mangipapaliwawa ed tuan ilalo ed kareenan tan kaligenan.

Sakey ed saray makapalikliket a kimey ed report na Estados Unidos et say indaak na serbisyo ed panagpayunir. Nen Abril et wala so sakey a pantok na 5,786 iran regular payunir, indaak na 23 porsiento nen say imbeneg a taon. Sano satan a bilang so itekep ed promedio na 43,369 iran auxiliary payunir tan say promedio na 279 iran special payunir, kabaliksan ton kada bulan et masulok a 90,000 so mangiyaabawag ed Panarian na Dios diad kimey na panagpayunir. Saraya so totoon wala ed kalangweran tan matatken, met, a sikara so sikakabat a manguusar ed panaon da diad panangidayew ed si Jehova.

Panangiter na Nagnap a Panagtasi

Diad panagbangat ed lapag tan diad kabkaabungan, si apostol Pablo so “nagnap ya angitarok na pantasi” ed maong a balita. (Gawa 20:20, 21) Niniiter so mipadparan pantasi ed dakel iran teritorya natan. Alimbawa, sayan report a nanlapud Guadeloupe so sinmabi: “Diad sampot na serbisyon taon, sikami so walaan na sakey a manangipalapag ed kada 72 totoo. Agla nakaukolan ya ibaga, sikami so nagkalalon bantog ed interon bansa! Diad tua, diad dakel iran pasen, sikami so onla ed parehon teritorya a kada simba. Nayarin ikuan na arum a seguradon saray totoo so natatama lan makakanengneng ed sikami, odino satan so sengegan na kadismayaan diad iyakar ed parehon teritorya a sinimbasimba. Balet diad kasuniyan, kapigan a lalon nakimeyan mi so teritorya, diman lalon nisasagyat so interes. Tan say prueba? Bueno, say pantok nen imbeneg ya Abril a 7,136 iran panangiyaral ed Biblia ya inkondukta na 4,558 a manangipalapag mi! Agano ni ed abasa so paulon-dasig na sakey a magasin: ‘Jehovah’s Witnesses​—Kings From Door to Door’! Satan so ipasen min sakey a kagalangan. Kaleganan na serbisyon taon, 458 balon agagin lalaki tan bibii so abautismoan.” Say inkabiskeg tan gayagan nipanengneng diad panagkimey a naulit-ulit ed teritorya mi, a kabaten tan kaaroen iray totoo, a simamaaron mangeekal ed saray panangiduma ra​—saya so mangitonton diad pakaromog ed dakel nin malakarneron totoo.

Si Jehova so siyayaman a mamibendisyon ed saray ariripen to diad sakey a bansa ed Africa a say kimey so sinebelan tan mabiskeg so nagagawan bakal sibil. Diad satan a dalin et dakel ed saray agagi tayo so maniirap ed saray pangawan, tan dakel iran tobonbalon Tastasi so pinatey. Ingen, say Abril so walaan na matalonan report, diad samploran sankaunaan iran pantok. Say balon bilang na manangipalapag so sakey ya indaak na 29 porsiento nen say imbeneg a taon. Agaylan seseg so impatnag na sarayan inad-aron agagi! Say promedio ed oras nen Abril so masulok a 18 ed kada manangipalapag, tan say panangiyaral ed Biblia so 2.6 ed kada manangipalapag.

Sakey a mensahen maamot a naawat na opisinan mangaasikaso ed sayan teritorya so magenap a mangipasabi na arum ya ideya na peles a kipapasen. Nabasa: “Say petang so mantutultuloy a mamapairap ed sikami. Say sagpot a nakaukolan diad iliber tan nengnengen so sakey et prueban sikami so walaan na daluyon na petang. Balet kabat min sikami so agawa ed ontan a paraan pian nitukoy ed anggan anton temperatura tan ed anggan anton kaliberliber. Anggaman ed antokaman, sikami so mansiasiansia tan manmamatalek a sikami so makaliktar.” Agaylan katooran!

Saray sinansakey a manamemben na katooran so manggawa na sakey a manamemben-katooran a muyongan. Say sankagloboan a muyongan na 3,229,022 a tastasi nen Jehova so peteg ya ontan! Sikara so onnengneng ed arapen diad pakaliktar ed onsasabin “baleg a kairapan” tan diad pibiang, ed leksab na Panarian nen Kristo, ed engranden kimey na panamasimbalo ed dalin diad sakey a paraiso. (Apocalipsis 7:14; 21:3, 4; Isaias 65:17, 21-23, 25) Sikara so masayaksak nipaakar ed dalan a gagawaen nen Jehova anggan natan diad pamibendisyon ed maseseg a kimey da, balanglan sikara so manpupulong ed salita “diad maabig a panaon” odino “diad magulon panaon.” (2 Timoteo 4:2) Saray onggendan a pahina so mangipanengneng ed no panon so impanulok da ed tema na 1986 a tinaon-a-teksto ra: “Onlakayo . . . , iyabawag ed arawi so panarian na Dios.”​—Lucas 9:60.

[Kahon/Litrato ed Pahina 7]

Arum a punto na Sankagloboan a Report na Saray Tasi nen Jehova Indaak:

Pantok ed manangipalapag: 3,229,022 6.8%

Binulan a promedio ed payunir: 391,294 21.2%

Dagup ya oras ed panagpulong: 680,837,042 15.3%

Promedio a binulan ed panangiyaral na Biblia: 2,726,252 14.6%

Dagup a bilang na abautismoan ed 1986: 225,868 19%

[Tsart ed Pahina 10-13]

1986 SERBISYON TAON A REPORT NA SARAY TASI NEN JEHOVA ED SANKAMUNDOAN

(tan tsart)

PANAGTASI ED “LAPAG TAN DIAD KABKAABUNGAN” “ANGGAD SANKAARAWIAN A PASEN NA DALIN”

Davao, Pilipinas

Venice, Italya

Castle Combe, Inglatera

Gålå, Norway

Kowloon Hong Kong

Taipei,Taiwan

Queenstown, New Zealand

Bolgatanga, Ghana

Paris Pransya

Quetzaltenango, Guatemala

Kerala, India

Banff, Canada