Iyabawag So Kawayangan!
SAY KOMALIMAN BILYON a too ed dalin so nibagan nianak nen Hulyo 7, 1986. Anton nengneng na arapen so kidungetan na sayan komaliman bilyon a too, tan ed amin a katooan? Kasin wala so anggan anton posibilidad a saray binilyon a katooan so nayarin manggayaga na tuan kawayangan ed arum ya agew? Sitatalek, ikuan tayo so on. Balet anto so natalosan tayo ed “kawayangan”? Kasin kabaliksan to so lisensya diad panggawa na antokaman a panliketan na sakey? Andi, ta unong a singa insulat na komalabinsiam a siglon nobelistan Ingles a si Charles Kingsley: “Wala so duaran kawayangan, say palso a ditan et say sakey so bulos a manggawa na labay to, tan say tua a ditan et sikato so bulos a manggawa na nepeg to.”
Nagamoran lambengat na too so tuan kawayangan diad panggawa ed “saman so nepeg to.” Tan anto so nepeg ton gawaen? Sanen wadia ed dalin si Jesus, simplen imbaga to a wala so duaran baleg a ganggan—say ununa, et say pangaro ed Dios ed amin a puso, kamarerwa, kanonotan, tan biskeg na sakey, tan say komadua, et say pangaro ed kaabay a singa sikan dili. (Marcos 12:29-31) No say peteg a kawayangan so nagegemtan lambengat na saraman so diad katuaan et mangipapatnag na ontan a puron aro—aro ed Dios tan ed kaparan totoo.—Juan 8:31, 32.
Kasin say ontan a nengneng na aro so ipapatnag natan na mundo? Makapaermen, andi. No anggapo so aro, say palson nengneng na kawayangan so ontalona. Ilinawa to so kasibletan, independentin espiritu. Ipilit to so ‘panggawa ed dilin labay to,’ ya andian na panangimano ed Dios odino kaabay. Sayan espiritu so onnatnat ed labas na indibidual diad saray komunidad, rasa, tan nasyones. Manwarin mantutultuloy so awawey a siak-so-ununa, say letnegan na anggan anton kawayangan, anggan anton kareenan, anggan anton liket ed sayan dalin, so nageba. Nonoten, imbaga nen Jesus, “Nepeg mon aroen so kaabay mo a singa sikan dili.” Say ontan a panangaro ed kaabay so makana diad panggayaga ed tuan kawayangan.
Say muyongan na Nasyones Unidas so atibukel pian mangibulos ed totoo diad pangisandi na salot na bakal ed “kareenan tan kaligenan.” Diad koma-40 anibersaryo to, inyabawag na NU so 1986 a sikato so Internasyonal a Taon na Kareenan. Balet kasin saya so nansumpal ed panangiyabawag na kawayangan a dingan na seguradon garantiya na kareenan? Kasin say abalbaleg a gastos ed armamento (a nandagup natan na masulok a $1,000 bilyon dolyar ed sakey taon) so akesayan? Kasin say terorismo tan panagbomba ed luluganan so dinmaiset? Kasin tinmayer so panagpatey a niletneg-ed-relihyon diad Baybay ya Ireland, diad Pegley Bukig, tan Asia? Saray papangulo na relihyon so sinmalta la ed saray pulitika tan manutongtong na malaem na nipaakar ed kareenan. Balet say malapati na tuan kareenan so pinmatnag a tinmekkiab ya agla nasingkat na NU tan saray relihyon na mundo.
Kasin wala so grupo natan ya angitalirak ed maruksa, siak-so-ununan awawey na mundo? On, wala! Say nipasakbay a “Prinsipe na Kareenan,” si Jesu-Kristo, so anipon ed saray manangaro ed kareenan a ‘nanlapud amin a tribu, pansasalita, binaleybaley, tan nasyones.’ (Isaias 2:3, 4; 9:6, 7; Apocalipsis 5:9; 7:9) Sikara so manliliket a say Panarian ed panamegley nen Kristo so magano lan mamunas ed amin a karelmengan tan pangipaloob na sankadalinan a paraiso na kareenan, a ditan et ontalona so tuan kawayangan. Sayan grupo so akabatan a Tastasi nen Jehova. (Daniel 2:31-35, 44; Isaias 43:10, 12; 65:17-25) Nankakasakey, sarayan Kristianos so mibibiang ed masayaksak a panangiyabawag ya inyanino na saray agawgawa ed oksuyan na Jubileo ed kadaanan ya Israel. Diad kada sakey ed 200 tan masulok nin daldalin ed globo, sikara so magaygayagan manutulok ed ganggan na Dios: “Iyabawag so kawayangan ed dalin diad amin a manaayam ed sikato.” (Levitico 25:10) Kasin satan a masayaksak a kelyaw so nadngel yo tan tinalineng yo?