Arapen Yo​—Magmaong a Dalan na Pangaral ed Satan

NEN 1962 impasakbay na saray astrologon Indian so sankamundoan a desyang “lapud sakey a mataltalag a nagawa ed waloran planeta diad tanda na Capricorn.” Anggapo so sinmabi, anggaman kuan. Lalon agano ni, diad sampot na 1980, maslak ya astrologon Pranses so wala ed opinyon a say presidente ed saman diad Pranses, si Giscard d’Estaing, so nabotoan lamet ed komaduan termino. Balet say kalaban to, si François Mitterrand, so analo ed eleksion. Saray insaew a singa saraya so mangipanonot ed sikatayo a say astrolohya so agmangiter na maseguron dalan diad pangamta ed arapen.

Kasin wala, sirin, so sananey a dalan? Alimbawa, kasin saray sagpot na sientista a mangipasakbay ed arapen so ontulong ed sikayo? Bueno, nia so pasakbay a ginawa na McGraw Hill Institute (Estados Unidos) nen 1970 ed no anto so nagawa ed 1980: “Saray druga a manalo ed kanser, saray kinargaan-na-toon pambiahe ed liwang ya onlad Mars tan Venus, sakey a permanentin base ed bulan, saray kotsen ombatik ed elektrisidad, say inkakalapagan na kompyuter ed abung, say posibilidad ed pampili na sekso na anak yo, tan say three-dimensional a telebisyon tan sine.”

Nen 1970 saray sientista ed sayan establisyamento so angikuan: “Sayan metodo [na panangipasakbay] so manggetma diad pakagamor ed napanmatalkan a pasakbay diad panamegley na nankakasakey ya opinyon na sakey a grupo na saray eksperto.” Balet sarayan pasakbay na eksperto so nansumpal a lingo ed sarayan lawak tan diad dakel a bilang na arum, a singa saray pulitika tan ekonomya.

Sakey a Seguradon Sengegan na Impormasyon

No saray astrologo tan sientista so agmakapangipasakbay ed anggan anton inkaseguro ed no anto so nagawa, kasin kabaliksan na satan ya imposibli so pakala na napanmatalkan ya impormasyon nipaakar ed arapen? Sakbay ya onsuko, usisaen tayo so ibabaga na Biblia nipaakar ed tema. Nonoten, si Jehova, ya Autor na Biblia, so adeskribe a bilang “say Sakey a mangibabaga a manlapud gapo na kasampotan, tan manlapud abayaglan panaon iray bengatlan agni agawa.”​—Isaias 46:10.

Say Salita na Dios so nankarga na dakel a propesiyas. Panon so piduma ra a manlapud saray pasakbay na astrologo? Say onggendan et ebat na sakey a kimey ya apauloan na The Great Ideas: “Balet no nipaakar ed masakbay-a-pakaamta na ompatey a too, saray Hebreon propeta so ompatnag a nikadkaduma. Aliwan singa saray paganon dibinista odino managparles, . . . sikara so agmanguusar ed saray arte odino kagawaan diad panebek ed saray madibinon sekreto. . . . Diad maslak a kabiangan na mapropetikon paliwawa ra, aliwan singa saraman so orakulo, so ompatnag a maseguro. Nayarin say intensyon so singa say pangiparungtal, aliwan say pangiyamot, say plano na Dios ed ontan a pamaakaran a Sikaton Mismo so nanggetma a makanengneng ed totoon mankurang ed madibinon panangiwanwan.”

A singa sakey ya ehemplo na saya, dakel ya impormasyon nipaakar ed si Jesus so nikurit ed Biblia diad dakel iran siglos sakbay na inkianak to. Nipropesiya a sikato so niyanak ed baley na Bethlehem tan diad linya na pamilya nen Jesse, say ama nen Arin David. (Miqueas 5:2; Isaias 11:1, 10) Ipapasakbay met na Kasulatan a sikato so napapatey diad sakey a palitek balet anggapo ed saray pukel to so naputer, a singa ugali na ontan a panamatey. Sarayan detalye so nansumpal a tua, tan sikara lambengat so pigaran ehemplo ed no anto so kinalkulo na sakey ya eskolar na Biblia a masulok a 120 propesiya ya asumpal ed si Jesus.​—Salmo 22:16, 17; 34:20.

Sakey a Propesiyan Asumpal Natan

Nagkalalo ni, say Biblia so nankarga na saray propesiyan mangisesentro ed agew tayo. Imanoen tayo so sakey ed saray sankaimportantian ed saraya. Dedeskribien to so sakey a panggegendanan na saray nagawa a mananda ed peryodon tampol ya unaan to so dramatikon isalet na Panarian na Dios ed mangaraldalin a kurang. Sarayan nagawgawa so mangisakup ed sankamundoan a bakal, yegyegyeg, epidemya, eraeras, tan indaak na kaugsan. Agta say inloor na sarayan bengatla so nagmaliw a mabitar ed saray balita ed mundo legan na koma-20 siglo tayo?​—Mateo 24:3, 7-14; Lucas 21:7, 10, 11; 2 Timoteo 3:1-5.

Impaliwawa nen Jesus a say kasumpalan na sarayan propesiya so mangibalita ed isasabi na Panarian to a segsegurado a singa say imutmut na saray simit na kiew so mangiyanunsio ed isabi na primabera ed Palestina. Impiho to ni a sikara so nakaukolan a nasumpal ed sakey a kapolian lambengat. Amin na saray aspekto na tanda, a pati saray detalyen asaglawi ed tagey, so asumpal ed arap na saray mata tayo nanlapulad 1914.a Sikatayo sirin so nawalaan na sigpot a talek a say Panarian so onkiwas ed maganggano la.​—Lucas 21:29-33.

Sananey a nengneng a nipropesiya ed sayan panaon et say “irap na nasyones ya agda amta so dalan na pawayan.” (Lucas 21:25) Natan, akin a wala so ontan lan pakasagyatan natan ed astrologo tan ed arum iran porma na okulto? Onebat so peryodikon Pranses a Le Monde Dimanche: “Nidunget ed krisis, saray totoo so ontunda ed anggapo diad pananap na pakaseguroan. Say parasikolohya so mangiter na baleg a ligliwa diad samet a sagpot, tan diad sayan makapataktakot a sientipikon panaon na saray agawaan a singa say nuklar tan gene splicing, saray totoo so natukson onarap ed agkabkabat tan diad ag-apabtangan-na-pakatalos, a salien dan anapen so kabaliksan na bilay.” Sirin sikatayo so agnikelawan diad laganap ya interes ed agamil na okulto, a singa say astrolohya. Sikato so sakey ed saray sintoma na “irap” ya sasagmaken na totoo natan diad kasumpalan na propesiya nen Jesus.

‘Itangwa Yo So Ulo Yo’

Anto so gawaen na saray Kristianos sano nanengneng da so amin na saray bengatla? Ontakot, a singa saray totoo ed kaliberliber da? Inter nen Jesus so onggendan a simbawa: “Balet no sarayan bengatla so onggapon nagawa, alagey kayon maptek tan itangwa yoray kauloan yo, lapud saray kililiktar yo so asingger la.”​—Lucas 21:28.

Kasin labay yon amtaen so arapen yo ed lalon detalyado? Sirin ilugar so panaon diad pangusisa ed Biblia tan “suboken so apuyanan iran balikas pian nengnengen no kasin sikara so nanlapu ed Dios.” (1 Juan 4:1) Saya so nagawaan yo diad tulong na magasin a Say Panag-Bantayan, a manisingbat a maparanay ed saray propesiya na Biblia tan mangipapaliwawa ed aplikasyon da diad agew tayo. Sirin, legan a sikayo so nakumbinsen say anggaan na peles a magulon mundo so asingger la, sikayo, met, so makayarin ‘mangitangwa na saray kauloan yo.’ Naaralan yo met so nepeg yon gawaen pian napanggayagaan yoray bendisyon ed Mesianicon Panarian, a magano lan onsalet ed kurang na mundo diad pankaabigan na amin a maptek-impanpuson totoo.

[Paimano ed Leksab]

[Kahon ed pahina 5]

“Tan say Tanda . . .So Tinmua”

‘Anto so mauges diad iyasingger ed sakey a managpalar odino manbasa na horoskopyo yo diad sakey a peryodiko? Agta saya so makapasakit a bengatla?’

Say Biblia so agmanleglemew ed pamaakaran. Diad tua, ipasen to itayo ed pambantay tayo a sumpad saray medyum tan dibinistas. Diad libro na Deuteronomio, iter nen Jehova so onggendan a pasakbay: “No bilang ta sakey a propeta odino sakey a kugip na managkugip . . . so mangiter ed sikayo na sakey a tanda odino pakelaw, tan say tanda odino say pakelaw so ontua a sinalita to ed sikayo, a kuanto, ‘manakar itayo ed arum a dirios,’ . . . agkayo ontatalineng ed saray salita na satan a propeta odino diad managkugip na satan a kugip.”​—Deuteronomio 13:1-3.

Imanoen ya agsusuppiaten na Kasulatan so katuaan ya arum ed saray pasakbay na medyum tan astrologo so nayarin ontua. Imbes, ipapasakbay na Biblia a, no sarayan pasakbay so nibase ed saray tanda ed tawen odino arum nin metodo na dibinasyon, sikara so nanlapud saray demonyo, makapalikdo, tan nayarin ipabeneg toray totoo a manlapud tuan Dios.​—Nengnengen so Gawa 16:16-18.

Say panimano ed saray astrologo odino ed arum iran mangibabagan mangipasakbay ed arapen et pangiiyan ed kaatapan na nagawan seryoson espiritual a problema tan mansumpal ed kaaripen ed “marelmeng ya espiritun puersa diad mangatatawen iran pasen.” (Efeso 6:12) Sirin, say pampanon ed saratan a totoo so impasen na Dios a seryoson kasalanan; a saramay mangaagamil ed ontan iran bengatla so makapadimla ed pakanengneng to tan agda natawir ed Panarian to.​—Apocalipsis 22:15.

Sirin dilin pankaabiganan tayo so pangipasen na Biblia ed sikatayo a manbantay a sumpad astrolohya tan ed amin nin arum a porma na dibinasyon.

[Kahon ed pahina 6]

IMPASAKBAY NA BIBLIA ED AKAUNA LA A:

◆ Si Jesus so nianak ed Bethlehem.​—Miqueas 5:2

◆ Sikato so nianak ed pamilya nen Jesse, say ama nen Arin David.​—Isaias 11:1, 10

◆ Sikato so napapatey ed palitek.​—Salmo 22:16, 17

◆ Anggapo ed saray pukel to so naputer.​—Salmo 34:20