Gawaen So Anggaan na Nayarian Tayo a Pangiyabawag ed Maong a Balita
“Gawaen mo so anggaan na nayarian mon pangipatnag na inkasika a naabobonan ed Dios, sakey a komikimey ya andian na ibaing.”—2 TIMOTEO 2:15.
1, 2. Anton imbulaslas ed ranko na sigpot-panaon iran ministros so naimatonan yo? Anto so tinmulong ed satan?
“PIGARAN taon lan linmabas, dakel ed sikatayo so nanisip a saraman lambengat so nawalaan na sirkumstansya so nayarin manpayunir,” so insulat na sakey a payunir, odino sigpot-panaon a ministro, ed Hapon. “Ompatnag a sikatayo so lingo. Aaralen tayo a saraman lambengat so walaan na espesyal a sirkumstansya so agnayarin manpayunir.”
2 Satan a positibon nengneng so nansumpal ed sakey ed sankabiskegan ya imbulaslas ed ranko na sigpot-panaon iran ministros diad limog na saray Tasi nen Jehova ed agano niran taon. Natan diad Hapon, duara ed kada limaran manangipalapag na Panarian so mibibiang ed arum a porma na sigpot-panaon a ministeryo. Balet sayan maseseg ya espiritu so agnigeter ed Hapon. Diad unor a serbisyon taon, say bilang na saray manangipalapag ed sankamundoan so binmulaslas na 5 porsiento, bang say bilang na sigpot-panaon a ministros so dinmaak na 22 porsiento. Malinlinew, saray totoo nen Jehova so angipapuso ed saray salita nen apostol Pablo: “Gawaen mo so anggaan na nayarian mon mangiparungtal na inkasika a naabobonan ed Dios, sakey a komikimey ya andian na ibaing.” (2 Timoteo 2:15) Kasin onia so kipapasen ed sika?
“Saya So Kabaliksan na Panangaro ed Dios”
3. Anto so manamakiwas a puersa ed benegan na sayan imbulaslas?
3 Sano saray payunir so natepetan no akin a sikara so linmoob ed sigpot-panaon a ministeryo, saray nanduruman ebat da et lapud panangaro ra ed si Jehova a Dios. (Mateo 22:37, 38) Saya, siempre, so nepeg ya ontan, lapud no anggapo so aro a bilang manepeg a motibo, angganan anton karakel na sagpot so magmaliw a kaapaan. (1 Corinto 13:1-3) Tuan komendabli a dakerakel a tuloy ed saray kapara tayon Kristiano—diad tua, sakey a promedio na masulok a 7 a manangipalapag ed kada kongregasyon diad sankamundoan—so angilugar ed bilay da diad pangipatnag na aro ra ed Dios diad onian dalan.
4. Panon so impangaro tayo ed Dios? (Roma 5:8)
4 Siempre, amin tayo ya angidedika na bilay tayo ed si Jehova so nanggawa na ontan lapud sikato so inaro tayo. Sanen naaralan tayo so panangaro nen Jehova tan say Anak to, si Jesu-Kristo, ed sikatayo, tan diad saray makapakelaw a bendisyon ya itarok na Panarian to, saray kapusoan tayo so apakiwas a mangaro ed sikato. Onia so impangipasen nen apostol Juan: “Mangaro itayo, lapud sikato so inmuna ya angaro ed sikatayo.” (1 Juan 4:19) Sikatayo so natural ya onkiwas ed ontan a dalan lapud ontan so inkagawa tayo. Balet kasin satan ya ampetang a liknaan tayo so lalanoren na amin a panangaro tayo ed Dios?
5. Anto so lalanoren na panangaro ed Dios? (1 Juan 2:5)
5 Andi, say aro ed Dios et kabaliksan to so nagkalalo ni. Ibabaga ed sikatayo nen apostol Juan: “Saya so kabaliksan na aro na Dios, a sumpalen tayoray ganggan to; tan ingen saray ganggan to so aliwan makapabelat.” (1 Juan 5:3) On, say tuan aro, a singa say tuan pananisia, so nibalikas ed panamegley na aksion. (Ipareng so 2 Corinto 8:24.) Kaliktan ton paliketen tan gamoran so panangabobon na samay sakey ya inaro. Agaylan ekselentin dalan ed saraman so wala ed sigpot-panaon a ministeryon amilin mangipatnag na aro ra ed si Jehova tan si Jesu-Kristo!
6. (a) Anton nengneng na totoo so akayarin manpayunir? Anto so nanggawan posibli ed sikara diad impakapanggawa na ontan? (b) Kasin wala so kabat yo ed ontan iran ehemplo?
6 Say indibidual a sirkumstansya so manduruma, tan sikara so nepeg a konsideraen. Ingen sano sikatayo so onnengneng ed saraman so wala ed sigpot-panaon a ministeryo, naromog tayo ya isasakup daray totoo ed amin a posiblen situasyon—ugaw tan matatken, walad kasuloan tan walaan na asawa, walaan na maabig tan makapuy a bunigas na laman, walaan tan andian na responsabilidad ed pamilya, tan arum nira. Say pidumaan, so imbes ya abuloyan darayan sengegan a magmaliw a babeng, sikara, singa si apostol Pablo, so akaaral a mankimey ed liberliber da odino manbilay ed saratan. (2 Corinto 11:29, 30; 12:7) Imanoen, alimbawa, so tipikon pamilya.
Si Eiji so sakey a matatken ed kongregasyon to. Sikato tan say asawa to so manpapayunir la ed loob na 12 taon legan a papabalegen daray taloran anak da. Panon so panggagawa ra ed satan? “Nakaukolan mi so manbilay a lalon simpli,” so kuan nen Eiji. Anggan saray anak so nakaukolan a mangaral a mangawat na andi ed saray dakel a bengatlan kaliktan da. “Anggaman sikami so walaan na kairapan no maminsan, si Jehova so naynay ya angitarya ed nakaukolan mi.”
Kasin saray sakripisyo so makana? “Kada labi sakbay ya erepen mi so silew, bantayan ko so akulaw kon mangisulat na report to ed impanpulong diad saman ya agew,” so kuan nen Eiji. “Sano nanengneng ko so pamilyak a mangiyuuna ed saray espiritual ya intereses a singa saya, naliknak ya amin a bengatla so nepeg ya ontan, tan siak so walaan na pakalikna ed asumpalan. Agko naisip a sikami so agmanpayunir a mankakasakey.” Panon so liknaan na asawa to ed satan? “Si Eiji so mangaasikaso ed sikami a maong,” inkuanto. “Sano sikato so nanengneng kon okupado ed saray espiritual a bengatla, naliknak so aralem ya akindalem ya inkakontento. Ilaloan ko a sikami so makapantultuloy.”
Kaiba so ama tan ina a manguusar ed dakel a panaon diad kimey na panagpulong a kada agew, anto so epekto na satan ed saray ananak? Say sankapanguloanan a laki so natan et mantatrabaho ed apat-taon a proyekto na panagpaalagey ed sanga na Watch Tower Society. Say anak a bii so regular payunir, tan say maneeskuela nin anak a laki so mangegetman magmaliw ya special payunir. Sikara so maliket ta saray atateng da so payunir.
7. (a) Mangiter na ehemplo nipaakar ed saraman so kabat yon analona ed saray babeng diad inloob ed sigpot-panaon a serbisyo. (b) Anton konseho na Biblia so impapuso ra?
7 Saray pamilyan singa onia so naromog ed limog na saray Tasi nen Jehova ed dakel iran bansa ed sankamundoan. Sikara so mangisesekar na peteg a sagpot diad panggawa ed sankaabigan a sirkumstansya ra ta pian onloob tan insan mansiansia ed sigpot-panaon a serbisyo. Diad saray kiwas da et ipapanengneng da so peteg a panangaro na Dios ed sikara. Magunaet, sikara so mangiimano ed bilin nen Pablo: “Gawam so anggaan na nayarian mon mangipatnag na inkasika a naabobonan ed Dios, sakey a komikimey ya andian na ibaing.”—2 Timoteo 2:15.
“Sakey a Komikimey ya Andian na Ibaing”
8. Akin a pinaseseg nen Pablo si Timoteo a ‘gawaen to so anggaan na nayarian to’ tan anto so kabaliksan na satan?
8 Sanen saratan a salita so insulat nen Pablo ed si Timoteo, ngalngalin 65 K.P., si Timoteo so manlilingkor la ed sakey a responsablen posisyon ed Kristianon kongregasyon. Sikato so tinawag nen Pablo a “maabig a sundalo nen Kristo Jesus” tan naulit-ulit a pinanonotan to diad responsabilidad to ed panagbangat tan panagbilin ed arum. (2 Timoteo 2:3, 14, 25; 4:2) Ingen, pinaseseg to si Timoteo: “Gawam so anggaan na nayarian mon mangipatnag na inkasika a naabobonan ed Dios.” Say balikas a “gawam so anggaan na nayarian mo” so nipatalos a nanlapud Griegon termino a kabaliksan to so “pelesan mo.” (Nengnengen so Kingdom Interlinear Translation.) Diad arum a salita, si Pablo so mangibabaga ed si Timoteo a ta pian nawalaan na panangabobon na Dios et nakaukolan ton parakelen so kimey to, anggaman sikato la so manasakbat na ambelat ya awit na responsabilidad. Akin? Ta pian sikato so magmaliw a “sakey a komikimey ya andian na ibaing.”
9. Anton parabolo nen Jesus so ontulong ed sikatayon mantalos ed saray salita nen Pablo nipaakar ed “sakey a komikimey ya andian na ibaing”?
9 Sayan saginonor a balikas so mangipanonot ed sikatayo na taloran ariripen diad parabolo nen Jesus ed talento, a singa nikurit ed Mateo 25:14-30. Diad ipawil na katawan, sikato so panaon na pangisuko ra na kimey da ed katawan a para ed panangabobon to. Saray ariripen a naikdan na limara tan duaran talento so kinomendaan na katawan da diad agawaan da ed saray bengatlan nimatalek ed sikara. Sikara so naimbitaan ya ‘onloob ed gayaga na katawan da.’ Balet say aripen ya angimatalkan na sakey a talento so nalmoan a kinmulang. Say wala ed sikato so inekal, tan diad kababaingan to, sikato so nibantak “ed kabilungetan diad paway.”
10. Akin a samay aripen a naikdan na sakey a talento so nibabaing tan adusa?
10 Say inmunan duaran ariripen so nankimey na impasya tan pinarakel daray intereses na katawan da. Sikara so tuan komikimey ya “andian na ibaing.” Balet akin a say komatlon aripen so niiyan ed kababaingan tan adusa anggaman agto met imbalang so niiter ed sikato? Saman so lapud anggapoy ginawa ton makapaalagey ed satan. A singa impabitar na katawan, indeposito to ed banko so kuarta. Balet say manunan mauges et sikato so andian na peteg ya aro ed katawan to. “Siak so tinmakot tan tinmaynan tan inyamot ko so talentom ed dalin,” so impatua to ed katawan to. (Mateo 25:25; ipareng so 1 Juan 4:18.) Impasen to so katawan to a bilang mapasang, “toon maagum” tan say kimey a bilang makapabelat. Anggapo so ginawa to ta pian komon et ginawa to so “anggaan na nayarian to” diad pakagamor ed panangabobon na katawan.
11. Panon a say parabolo so managlawi ed sikatayo natan?
11 Natan satan a parabolo so mankukurang ed kasumpalan to. Say Katawan, si Jesu-Kristo, so pinmawil tan uusisaen to so kimey na “aripen” a klase to, tan ontan met ed saray kakaiba ra, say “baleg ya ulop” na malakarneron totoo. (Mateo 24:45-47; Apocalipsis 7:9, 15) Anto so aromogan na Katawan? No sikatayo la so mankontento ed panengneng labat a serbisyo pian makagawa, sirin nayarin sikatayo so naromogan a kaiban nibabaing tan nibantak “ed paway diad kabilungetan.” Diad biek a dapag, no ‘gawaen tayo so anggaan na nayarian,’ salanti, ‘pelesan’ so kimey tayo diad ikiwas ed inkaganatan na panaon, naromog tayo so inkasikatayon naabobonan a bilang ‘komikimey ya andian na ibaing’ tan mibiang diad ‘gayaga na katawan tayo.’
Nakaukolan So Disiplina tan Dilin-Sakripisyo
12. Antoran sengegan so tinmulong diad intagey na porsiento na manangipalapag ed Hapon a linmoob ed sigpot-panaon a ministeryo?
12 Say mantutultuloy ya ilalaknab na ranko na payunir ed kada bansa ed sankamundoan so malinew ya ebidensyan saray totoo nen Jehova so ‘manggagawa na anggaan na nayarian’ da pian paneknekan da so inkasikaran ‘komikimey ya andian na ibaing.’ Balet kasin sikayo la so nanmorekdek no akin a diad arum iran bansa et say porsiento na agagi tayon akayarin linmoob ed sigpot-panaon a serbisyo so mas babaleg nen say diad arum a bansa? Saya so makapainteres a tepet a nipaarap ed arum a payunir ed Hapon. Imanoen irayan ebat:
“Agko isipen a kabaliksan to a say pananisia odino panangaro, na saray Tastasin Hapones so babaleg nen saraman so agagi ra ed arum a bansa,” so inkuan na sakey a mankikimey ed Bethel a sikato la so wala ed sigpot-panaon a serbisyo ed 30 taon. “Balet manisia ak a say personalidad na Hapon so nayarin walaan na bengatlan gawaen ed satan. Bilang intero, saray totoon Hapones so matulok; sikara so aliston onkiwas diad panamaseseg.”
“Lapud walaray dakel a payunir ed ngalngalin amin a kongregasyon,” so inkomento na sakey a matatken, “say inheneral ya ideya et anggan siopa so makayarin manggawa ed satan.” Saray totoon Hapones so malabay a manggawa ed saray bengatla ya inggrupo. Sikara so walaan na ekselentin espiritu na panuulop.
Saraya so peteg a manangusisa-na-kanonotan a komento, tan no sikatayo so seryoso diad pamaaligwas na serbisyo tayo ed si Jehova, walaray pigaran sankaabigan a punton makana ya imanoen tayon maalwar.
13. Panon so kagunggunaan tayo ed pamaakaran na pagmaliw a matulok tan akaparaan ya onkiwas ed panamaseseg?
13 Ununa ed amin, wadtan so pamaakaran na pagmaliw a matulok tan akaparaan ya onkiwas ed panamaseseg. Sano onsabi so panangiwanwan tan panamaseseg a manlapud manepeg a sengegan, manepeg lambengat a sikatayo so sipaparaan ya onkiwas. Sirin, imbes a moriaen a sarayan kalidad a bilang sankanasyonan lambengat ya ugali, lawas nonoten tayoray salita nen Jesus: “Say karnerok so ontalineng ed boses ko, tan sikara so kabat ko, tan siak so tumboken da.” (Juan 10:27) Nanonotan tayo met a say sakey a punto “na kakabatan a manlapud tagey” et “akaparaan ya ontulok.” (Santiago 3:17) Saraya so kalidad ya akapasesegan na amin a Kristianon isulong. Nisengeg ed nanlapuan tan binalegan, arum so nayarin nagkalalon naikdan na independentin panagnonot tan biskeg na linawa nen saray arum. Angangko et saya so sakey a pasen a mankaukolan na panisiplina ed inkasikatayo tan ‘pasimbaloen so kanonotan tayo’ ta pian natebek tayon lalon malinew no anto so “linawa na Dios.”—Roma 12:2.
14. Anton imbitasyon so inawat na amin a dedikadon Kristiano, tan anto so nalalanor?
14 Bilang dedikadon Kristianos, inawat tayo so imbitasyon nen Jesus: “No siopaman et labay to so ontumbok ed siak, italirak to so inkasikato tan sakbaten to so panamairapan a kiew to tan mantultuloy a tumboken toak.” (Mateo 16:24) Say “pangitalirak” na sakey ed inkasikato et literal a kabaliksan to so ‘sigpot a pangibeneg to ed inkasikato’ tan kayari to et sibubulos a mangawat ed pagmaliw a kayarian nen Jehova a Dios tan si Jesu-Kristo, a sikara so abuloyan a mangontrol na bilay tayo tan mangibaga ed sikatayo no anto so nepeg tan agnepeg a gawaen. Anto ni magmaong a dalan diad pangipanengneng a sikatayo so angitalirak ed inkasikatayo nen say diad panumbok ed bakat nen Jesus diad sigpot-panaon a ministeryo?
15. (a) Panon a say pagmaliw a kontento ed medyo daiset ed materyal so nisiglaot diad pananumbok ed si Jesus? (b) Panoy inkiwas na saray inmunan babangatan ed imbitasyon nen Jesus a manumbok ed sikato?
15 Insan wadtan so pamaakaran na pagmaliw a kontento diad kakisiran ed materyal. Saya so malinlinew a misumlangan ed kurang na mundo, a mangiyaalibansa “na pilalak na laman tan say pilalek na mata tan say mapangtan panagbilay na sakey.” (1 Juan 2:16) Balet indanet nen Jesus: “Nayarin sikayo so maseguro, anggapo ed sikayo ya agmanpatanir ed amin na saray kayarian to so makapagmaliw a babangatan.” (Lucas 14:33) Akin ya onia so saya? Lapud say pagmaliw a babangatan nen Jesus et kabaliksan to so mas nen say pagmaliw a mananisia. Sanen tinawag nen Jesus si Andres, Pedro, Santiago, Juan, tan saray arum a magmaliw a babangatan to diad samay komaduan taon na ministeryo to, sikato so agtinmundan kinmerew ed sikara a manisia ed sikato a bilang Mesias. Diad kaunoran et sikara so inimbitaan ton ontumbok ed sikato tan manggawa ed kimey a gagawaen to, salanti, say sigpot-panaon a kimey na panagpulong. Anto so inkiwas da? “Tampol a tinaynanan daray iket da tan sikato so tinumbok da.” Si Santiago tan Juan so “anaynan ni ingen ed si ama ra a Zebedeo diad baluto a kaiba toray inupaan a lalaki tan sikara so tinmumbok ed sikato.” (Marcos 1:16-20) Tinaynanan da so negosyo tan saray datin kalimog da tan sinakbat da so panagpulong a sigpot-panaon.
16. Bilang dedikadon Kristianos, diad anto so nepeg a pangiteran tayo na panaon tan biskeg tayo? (Uliran 3:9)
16 Mainomay a natalosan, sirin, no akin a magmaliw a kontento ed medyo daiset so ontan lan importantin sengegan diad panggawa na anggaan na nayarian tayo diad kimey nen Jehova. No sikatayo so nabebelatan ed dakel a materyal iran bengatla odino obligasyon, nayarin magmaliw itayon singa say mayaman a lakin walad kalangweran a manuley ya ag-angawat ed imbitasyon nen Jesus a magmaliw a patumbok to, aliwan lapud agto nayarian a gawaen, noagta lapud sikato so aliwan mabulos a mangibeneg ed “saray dakerakel a kayarian” to. (Mateo 19:16-22; Lucas 18:18-23) Sirin imbes a pirdien tayo so panaon tan biskeg diad pangusil ed saray bengatlan magano lan ‘napaso,’ kaliktan tayon iter irayan mablin poonan a para ed magnayon a pankaabigan tayo.—1 Juan 2:16, 17.
17. Diad anton kalaknab a say espiritu na panuulop so magmaliw a positibon impluensya?
17 Kaunoran, wadtan so pamaakaran ya espiritu na panuulop. Si Andres, Pedro, Santiago, tan Juan so andi-duaruwan angimpluensya ed balang sinansakey diad desisyon dan mangawat ed imbitasyon nen Jesus a manumbok ed sikato. (Juan 1:40, 41) Miulibay, say katuaan a dakel ed saray agagi so akayarin mangilugar ed okupadon bilay da diad inloob ed sigpot-panaon a serbisyo so mamakiwas ed sikatayon mangimano ed dilin kipapasen tayo a seryoso. Diad biek a dapag, saraman so walad limog tayo a manggagayaga la ed sayan pribilehyo so makapangipanabang na maliket iran eksperiensia ra ed arum, a ditan et saraya so pasesegen da met a miulop ed ranko ra. Tan, siempre, saray sigpot-panaon a ministros so makayarin ontulong ed balang sinansakey diad pankaabiganan na amin.—Roma 1:12.
18. Panon so pakatulong tayon amin ed espiritu na panagpayunir?
18 Anggaman saraman so diad kaplesan et saray sirkumstansya ra so agmangiyabuloy ed sikaran onloob ed sigpot-panaon a ministeryo so makagawa na malaem diad pangarum ed satan ya espiritu na panagpayunir. Panon? Diad panuporta tan pamaseseg ed saraman so manpapayunir, diad pangipanengneng na aktibon interes ed saraman so walaan na potensyal a manggawa na ontan, diad pangiyareglo na nayarin sakey a membro ed pamilya ra a manpayunir, diad pibiang ed kimey na panag-auxiliary payunir kapiganman a nayari, tan diad pankimey ya iloob ed sigpot-panaon a serbisyo diad maganon panaon. Diad panggawa na ontan, amin tayo so makapangipanengneng a ‘gagawaen tayo so anggaan na nayarian tayo’ a manlingkor ed si Jehova balanglan sikatayo so peles a nilista ed sigpot-panaon a ministeryo odino andi.
Mantultuloy diad Panggawa na Anggaan na Nayarian Tayo
19. Anto so nepeg a desisyon tayon gawaen nisesengeg ed panaon?
19 Peteg, unong a si Jehova et pepelesan to so kimey, natan la so panaon a ‘panggawa tayo na anggaan na nayarian tayo’ ta pian magmaliw a ‘komikimey ya andian na ibaing.’ Bilang maabig a sundalo nen Jesu-Kristo, nakaukolan tayo met so pangipukay ed amin ya agnakaukolan iran pakabelatan ta pian makapanlingkor itayon epektibo tan nagamoran tayo so panangabobon to. (2 Timoteo 2:3-5) Legan a sikatayo so mankimey na impasya a mamalaknab na pibibiang tayo ed kimey na Panarian, napaseguroan itayon saray sagpot tayo so mayaman a natumangan. (Hebreos 6:10; 2 Corinto 9:6) Sirin, imbes a manbantay lambengat, a singa panangibaga, sikatayo komon so mantultuloy diad panggawa na anggaan na nayarian tayo a mangipulong ed maong a balita, diad ebat ed imbitasyon na salmista: “Lingkoran si Jehova a tekep na panliket. Ondago ed arap to a tekep na kelyaw na gayaga.”—Salmo 100:2.
[Repason Kahon ed pahina 12]
◻ Anto so lalanoren na panangaro ed Dios?
◻ Anto so peteg a problema ed komatlon aripen diad ilustrasyon nen Jesus ed talento?
◻ Anto so kabaliksan na pangitalirak tayo ed inkasikatayo?
◻ Akin a saray patumbok nen Jesus so nepeg a ‘manpatanir ed saray materyal a kaykayarian’?
◻ Panon so pakatulong tayon amin ed espiritu na panagpayunir?
[Litrato ed pahina 10]
‘Ibantak ed paway so andi-kakanaan ya aripen’