Angheles​—Kasin Apektaen Da So Bilay Yo?

KASIN saray angheles so peteg a wala? Odino kasin sikara labat so sakey a bunga na imahinasyon? No sikara so peteg a wala, kasin apektaen da so bilay yo?

Wala lambengat so sakey a napanmatalkan a sengegan na saray ebat ed saratan a tepet. Satan so apuyanan a Kuritan ya inter na Dios ed katooan​—say Salita to, say Masanton Biblia. Insulat nen apostol Pablo nipaakar ed satan: “Amin a Sulat so impuyan na Dios tan makagungguna . . . diad pametek ed saray bengatla.”​—2 Timoteo 3:16.

Sirin, nawalaan itayo na talek a say Biblia so mangiter ed sikatayo na diretsan ebat no nipaakar ed kiwawala na saray angheles tan no kasin sikara so mangapekta ed sikatayo. Peteg a say Amalsa na talba so makapangibaga ed sikatayo no saray angheles so kaiba na saray pinalsa to.

Kasin Saray Angheles So Petepeteg?

Malinlinew ya ibabaga na Biblia: “Sikato [Dios] so manggawa ed saray angheles to ya espiritu.” (Hebreos 1:7) Sirin say Amalsa so walaan na saray espiritun pinalsa ed mangatatawen ya ayaman. Saraya so agtayo nanengneng, tan sikara so mabibiskeg.​—Salmo 104:4; 2 Pedro 2:11.

Kasin ginetma na Dios a saray angheles so basta aliwan persona, maudiem a kiwawala? No ontan so kipapasen, akin ya ireretrato na Biblia iray angheles a walaan na saray liknaan? Alimbawa, ibabaga to ed sikatayo a sanen nigaton so letnegan na dalin, saray angheles so “magaygayagan kinmelyaw a nankakasakey, tan amin na saray anak na Dios [saray angheles] so ginmapon inmeyag ed liket.”​—Job 38:4-7.

Ompatnag a, singa saray matudion mangaraldalin a palsa, saray matudion espiritun pinalsa, saray angheles, so walaan na dili ran personalidad. Anggaman ibabaga na Biblia so kangaranan na duara lambengat ya angheles (Miguel tan Gabriel), say katuaan a saray angheles so walaan na kangaranan so mangarum ed indibidualidad da. (Lucas 1:11, 19, 26; Judas 9) Mabiskeg a kokondenaen na Biblia so panagdayew ed saray angheles, tan isasakup na satan so pampikasi ed sikara. Imbes a sikatayo so manpikasi ed saray angheles, sikatayo so sisimbawaen nen apostol Pablo: “Diad amin a bengatla ed pikakasi tan pikekerew a tekep na pisasalamat et komon ta saray kerew yo so nipaamta ed Dios.”​—Filipos 4:6; Apocalipsis 19:10; 22:8, 9.

Balet kasin saray angheles so niprograman andian na pakayari ed personal a pampili ed baetan na duga tan aliwa a singa saray andian na kanonotan a robot? Andi, saray angheles so bulos ya ahente na moral, a singa saray totoo. Alimbawa, sanen pigara ed saray angheles so anumlang ed ganggan na Dios ed saray agew nen Noe, sikara so impulisay na Dios, tan sikara so pinagit ed mangatatawen iran korte na Dios. Say matungangan ugali ra so mapatnag a panangiparungtal ed inkasinansakey na saray angheles.​—Genesis 6:1, 2; 2 Pedro 2:4; Mateo 25:41.

Sirin, itatarya na Biblia so makatulong ya impormasyon nipaakar ed nanlapuan, kiwawala, tan kipapasen na saray angheles. Say ilampas ed ibabaga na Salita na Dios nipaakar ed sikara so nayarin managdag ed sinansakey diad panmorekdek ya andi-kana ed saray tepet ya ag-ebatan na Biblia. Mangitonton ni ingen ed pangiter na agmanepeg ya imano odino panagdayew ed saray angheles. (Colosas 2:18) Sikatayo so papanonotan na Biblia a “maneguro ed saray lalon makanan bengatla” tan ‘ag-onlampas ed saman so niyabawag la a bilang maong a balita.’​—Filipos 1:10; Galacia 1:8.

Saray Angheles ed Gagala na Dios

Anggaman dakel so nayarin mipakna ed nanlapuan tan ugugali na saray angheles, pigpigara so peteg a sikakabat ed rason na kiwawala ra tan no panon a saray angheles so mangapekta ed saray bilay tayo natan.

Diad Biblia, saray duaran salitan nausar a para ed “anghel” so mal·’akhʹ (Hebreo) tan agʹge·los (Griego). Namparan saraya et kabaliksan to so “mensahero.” Ibabaga ra ed sikatayo so bengatla nipaakar ed sakey ed saray kurang na angheles. Saray angheles so manserbi a bilang mensahero, odino igaganggan, ed baetan na Dios tan too.

Alimbawa, sakey ya anghel so nibakin mangitulor na mensahe ed si Abraham nipaakar ed si anak ton Isaac tan say bendisyon ya onsabi ed panamegley to, sakey a bendisyon a nayarin naawat tayo. (Genesis 22:11-17) Nibaki so sakey ya anghel a mitalosan ed si Moises. (Gawa 7:37, 38) Imbaki met na Dios so sakey ya anghel a tekep na saray instruksion ed si propeta Elias. (2 Arari 1:3) Tan sakey ya anghel so pinmatnag ed si Jose, say anagibin Ama ed si Jesus, a tekep na nikadkaduma ran instruksion nipaakar ed ugaw.​—Mateo 2:13.

Saray angheles so nibaki met a manalimbeng ed saray totoo na Dios: “Say anghel nen Jehova so mankampamento ed kaliberliber na saraman so ontatakot ed sikato, tan sikara so iliktar to.” (Salmo 34:7) Alimbawa, sakey ya anghel so angibulos ed si apostol Pedro a manlapud pangawan. (Gawa 12:6-11) Duaran angheles so tinmulong ed si Lot tan saray mamarikit to a makaliktar ed kadederal na Sodoma tan Gomorra diad impangantabay da ed sikara ya ompaway ed saman a pasen. Say asawa nen Lot, anggaman kuan, so agkinmiwas ed nagnap a pitutunosan ed saray angheles, sirin sikato so aderal a kaiba na saraman a syudad.​—Genesis 19:1-26.

Sasalambiten na Biblia so dakel niran arum ya agawgawa diad pananulong na angheles, a mangidadanet ed ibabaga na Hebreos 1:7 tan 14: “No nipaakar ed saray angheles et ibabaga to: ‘Tan gawaen toray angheles to ya espiritu, tan saray ariripen ed lapag a sakey a layap na apuy.’ Agta amin da so espiritu a para ed kimey ed lapag, ya imbaki toran manlingkor ed saraman so manawir na kilalaban?”

Sakey ya anghel so angitarok na baleg a ligliwa ed si Jesus. Diad samay labi ed sakbay ya impatey to, kabat nen Jesus no anto so manatalaran ed sikato​—a sikato so itapat, leweten, tan maruksan pateyen. Kinaukolan to so biskeg pian makapansungdo ed sayan subok na katooran to. Diad saman a sankakanaan a panaon, sakey ya anghel so pinmatnag ed sikato a ‘mamabiskeg ed sikato.’ Agaylan saman a panagligliwa na anghel so sakey a bendisyon ed si Jesus! Bilang nansumpalan, anggaman asagmak to so ontan lan kairapan a say “linget to so nagmaliw a singa tedter na dala a napepelag ed dalin,” ayarian to so nansungdon sitotoor ya anggad patey.​—Lucas 22:43, 44.

Inusar met na Dios iray angheles a maneral ed saray kakabusol na totoo to. Sanen say Asirion Pakayari Mundo et ginetma ton deralen iray inmunan managdayew ed Dios, say onggendan so agawa: “Agawa ed saman a labi a say anghel nen Jehova so pinmaway tan kinabil to so sanlasus tan walumplo-tan-liman libo ed kampamento na saray Asirio. Sanen saray totoo so binmangon ya asaksakbay ed kabuasan, akin, amin da so inatey a bangkay.” (2 Arari 19:35) Nanengneng yo so makapakelaw a pakayari na saray angheles​—a kinaukolan to lambengat so sakey ya anghel a mamatey ed 185,000 a sumusumpa ed Dios tan totoo to!

Si manag-ayew a Herodes met so nidunget ed pakayari na sakey ya anghel. Sanen ginapoan nen Herodes ya isipen ed inkasikato a bilang singa-dios, “tampol a say anghel nen Jehova so angabil ed sikato, lapud agto inter so gloria ed Dios; tan sikato so inupot na saray bigis tan inatey.”​—Gawa 12:21-23.

Apakabatan itayo ya agla mabayag sano sayan interon marelmeng a sistema na bengabengatla so panganggaen na Dios, saray angheles lamet so nausar a bilang manamatey. “Say Anak na too so mangibaki ed saray angheles, tan tinipon da a manlapud panarian to so amin a bengatlan pansesengegan na kagapolan tan saray totoon manggagawa na kaugsan, tan sikara so ibantak da ed mandarlang a palbaan.”​—Mateo 13:41, 42.

Sirin, saray angheles so arawi ed saman so nayarin iisipen na dakel a totoo. Inkuan na autor na relihyon ya Aleman a si Dr. Manfred Barthel: “No labay tayon isipen iray angheles na Katawan a bilang autor na Daan a Sipan ya akanengneng ed sikara, ununa et nakaukolan tayon lingwanan iray de-dimpel iran kerubines . . . a mandekora ed saray pabanon kard tayo.”​—What the Bible Really Says.

Panon So Pangapekta na Saray Angheles ed Sikayo?

Anggaman kuan, say tepet a siansia so: Anto so gagawaen na saray angheles natan? Kasin sikara so mangaapekta ed sikatayo natan a mismo? On, peteg!

Nonoten a diad propesiya to nipaakar “ed kasampotan na sistema na bengabengatla” et impasakbay nen Jesus: “Sano say Anak na too so onsabi ed gloria to [a pamemben ed pakayari na Panarian], tan amin na saray angheles so kaiba to, saman la et sikato so onyurong ed maglorian trono to. Tan amin na saray nasyones so natipon ed arap to, tan pambibiiganen to so totoo a manlapud sinansakey.”​—Mateo 24:3; 25:31, 32.

Panon so kagawa na sayan panangibiig ed totoo? Impasakbay met nen Jesus: “Sayan maong a balita na panarian so nipulong ed amin ya atooan a dalin ya onkanan pantasi ed amin a nasyones; tan insan onsabi so anggaan.” (Mateo 24:14) On, uusaran na Dios so totoo to ed dalin diad panggawa ed sayan sankagloboan a kimey na panagpulong.

Say Panarian na Dios so gobiernon mangitarok na mogmon solusyon ed saray problema na katooan. Natan, say mensahe nipaakar ed satan so iyaabawag ed sankamundoan na masulok a taloran laksan Tastasi nen Jehova, a saray angheles so ontutulong ed sikara. “Ontan so nagawa ed kasampotan na sistema na bengabengatla: saray angheles so ompaway tan ibiig da so marelmeng a manlapud limog na matunong.”​—Mateo 13:49.

Sayan iwawanwan-na-anghel a kimey na panagpulong natan so makakaawat na manduruman reaksion a manlapud totoo. Arum so mangikuan a sikara so okupadon tuloy ya ondengel odino basta satan so agda labay. Arum so masugnar odino manduaruwa. Ingen, dakel a masimpit-impanpuson totoo, a mapaga nipaakar ed arapen da, so sibubulos a kinmiwas. Panon?

Diad 208 daldalin, saray Tasi nen Jehova so mangikokondukta na panangiyaral ed Biblia ed saray nilaksalaksan totoo a “manonot ed saray espiritual a nakakaukolan da” tan sikara so ‘napepegaan ed inkatunong.’ (Mateo 5:3, 6) Ipapanengneng na dakel iran eksperiensia a saray angheles so mabetbet a mangididirihe ed saray ariripen na Dios a makapitongtong ed ontan iran masimpit-impanpuson totoo diad mensahe na kilalaban. Simbolikon dedeskribien na Apocalipsis 14:6 so sakey ya “anghel a mantektekkiab ed pegley-tawen” a walaan na “andi-anggaan a maong a balita ya iyaabawag a bilang magayagan balita ed saraman so manaayam ed dalin.” Satan so peteg a nagagawan mismo natan! Panon so pangapekta na saya ed arapen yo?

Saray Angheles ed Arapen Yo

Malinlinew ya ipapabidbir na Biblia so panaon tayo a bilang “say kaunoran iran agew” na sayan peles a sistema. (2 Timoteo 3:1-5) Sikatayo met so papakabatan na Biblia a saray angheles natan so “manalalagey ed apatiran suyok na dalin, a pupugeran da so apatiran dagem.” (Apocalipsis 7:1) Anto so kabaliksan na sayan simbolismo?

Diad kipapasen dan wala ed “saray suyok” na dalin, saray angheles so wala ed talindeg a mangibulos ed makaderal a “dagem” a manlapud amin a direksion. Anggapoy pasen ed dalin a nipuera a mankabaliksan na “kasakitan,” odino kadederal, ed sayan marelmeng a sistema tan amin na saray managsuporta to. Saray angheles na Dios so adeskribe a bilang akaparaan ya onkiwas sano niiter so sinyal!​—Apocalipsis 7:3; 19:11-21.

Say makaderal a “kasakitan,” anggaman kuan, so dia lambengat ed saraman so ag-onkiwas ed mensahen susuportaan na anghel a nipupulong natan ed sankadalinan. Agto pasakitan iraman so manaanap ed Dios tan ontatalineng ed mensahe na Panarian. Sikara so niliktar, a singa ibabaga na Salita na Dios: “Anapen yo si Jehova, amin yon mauyamo ed dalin . . . Anapen so inkatunong, anapen so kauyamoan. Nayarin sikayo so niyamot ed agew na sanok nen Jehova.”​—Sofonias 2:3.

Anto ed satan so betang na saratan a “mauyamo”? Ibabaga na Salmo 37:11: “Saray mauyamon mismo so mangayarian na dalin tan sikara a peteg so makaromog na liket diad inkadaakan na kareenan.” Diad panon kabayag? “Saray matunong a mismo so mangayarian ed dalin, tan sikara so manayam ya ando lan ando ed tapew to.” (Salmo 37:29) Kabaliksan na satan a say andi-anggaan a bilay so posibli ed sakey a dalin a mansumpal ed paraiso, a singa imbaga nen Jesus.​—Lucas 23:43.

Kanian, sirin, say tepet a nakaukolan yon itepet so: ‘Anto so arapen ko?’ Say ebat so mandepende ed no panon so ikiwas mo ed panangiwanwan na anghel. Kasin sika so ontalineng tan onkiwas sano nipresenta ed sika so mensahe a susuportaan da? No ontan so gawaen mo, sika so kaiba na saraman so manilalo ed arapen a tekep na talek, a walaan na maseguron sipan na Dios: “Say mundo so napaso tan ontan met ed pilalek to, balet say manggawa ed linawa na Dios so mansiansia lawas.”​—1 Juan 2:17.

[Litrato ed pahina 7]

Saray angheles natan so ‘mamupuger ed apatiran dagem.’ Akin?