No Panon Kan Natulongan na Saray Anghel

PEPEKDERAN na Salitay Dios so kiwawala na saray anghel. Ibabaga to’d sikatayo a minilyon irayan espiritun pinalsa. Si Daniel ya aripen nen Jehova a Dios so walaan na pasingawey ed mangatatawen iran bengatla a nipaakar ed satan et insulat to: “Libolibo so saray nanlingkor ed [Dios], tan samplon libo ed maminsamplon libo so inmalagey ed arap to.”​—Daniel 7:10.

Imanoen a say balikas nen Daniel so mangiiter ed sikatayo na nagkalalon impormasyon nipaakar ed saray anghel nen say basta bilang da labat. Ipapanengneng to met a saray anghel et manseserbi ed Dios. Sikaray lingkor to. Mitunosan ed saya, onia so inkanta na salmista: “Galangen yo si Jehova, sikayon angheles to, a mabiskeg, a manguunor na salita to; ondengel na bosis na salita to. Galangen yo si Jehova amin ya ehersitos to; sikayo a ministros to, a manggawa na kaliktan to.”​—Salmo 103:20, 21.

Ipapaliwawa met na Biblia ya agginmapoy bilay na saray anghel bilang totoo ed dalin. Apalsa la nen Jehova iray anghel ed tawen sakbay a pinalsa toy dalin. Sanen inletneg na Dios so dalin, amin iray [“anghelikon,” NW] anak na Dios inmeyag ira lapu ed liket.’​—Job 38:4-7.

Saray anghel et espiritun pinalsa​—agnanengneng, makapanyari, intelihenti. Diad Biblia, say Hebreon salita a mal·ʼakhʹ tan say Griegon termino ya agʹge·los so nipapatalos ya “anghel” sano natutukoy so espiritun pinalsa. Sarayan salita so naromog a ngalngalin 400 a danay ed Biblia. Namparan walaan na parehon kabaliksan, salanti, “mensahero.”

Impakaabet ed Saray Anghel

Peteg a mensaheros iray anghel. Nayarin pamilyar ka ed salaysay na Biblia nipaakar ed panaon sanen pinmatnag si anghel Gabriel ed si Maria. Inkuanto’d si Maria ya anggaman sikatoy birhen, sikatoy mangiyanak na ugaw a laki ya ingaran na Jesus. (Lucas 1:26-33) Sakey ya anghel so pinmatnag met ed pigaran managpastol a walad alog. Inyabawag to: “Nianak ed sikayo [natan] so sakey a Manangilaban, a sikato so Kristo a Katawan.” (Lucas 2:8-11) Mipadpara, angipasabi na mensahe iray anghel ed si Hagar, Abraham, Lot, Jacob, Moises, Gideon, Jesus, tan ed arum ed rekord na Biblia.​—Genesis 16:7-12; 18:1-5, 10; 19:1-3; 32:24-30; Exodo 3:1, 2; Uko-ukom 6:11-22; Lucas 22:39-43; Hebreos 13:2.

Makatantanda ya amin na sarayan mensahen impasabi na saray anghel so mitunosan ed pakasumpal na saray gagala na Dios tan aliwan saramay gagala na totoo a nalalanor. Inmapireng iray anghel bilang manangilaman na Dios, unong ed linawa tan panag-orasan to. Ag-ira impaibaki na totoo.

Nepeg Kasin Ontawag Itayo ed Saray Anghel Parad Tulong?

Manepeg kasin ontawag ed saray anghel ed panaoy kairapan? No ontan, labay tayon amtaen so ngaran na anghel a makayarin tuloy ya ontulong ed sikatayo. Kanian, arum a komersyal a libro so angilista ed ibabagan kangaranan na dakel ya anghel, pati posisyon, titulo, tan kimey da. Sakey a libro so angilistay tatawagen a “manunan samploran anghel ed tawen,” say “bantog a tuloy iran anghel ed Mamasagur a mundo.” Katekep na listaan et wadtan so panonot ya ikupit moray matam, kalkalnan uliten a maminpiga so ngaran na anghel, onsungap na araldalem, onengas a kalkalna, tan “iparaan moy inkasika ed posiblin pakapitalosan ed sikara.”

Diad kasunian, iiter ed sikatayo na Biblia so kangaranan na duara labat ed saray matoor ya anghel na Dios, si Miguel tan Gabriel. (Daniel 12:1; Lucas 1:26) Posibli, say rason ed impangitarya ed sarayan kangaranan et pian ipanengneng a kada anghel so nikadkaduman espiritun persona a walaan na ngaran, aliwa lambengat ya inkalapagan ya enerhiya odino puersa.

Makatantanda ya aglabay na pigaran anghel ya ibaga so kangaranan da ed totoo. Sanen kinerew nen Jacob ed sakey ya anghel ya ipaamta toy ngaran to, agto ginawa itan. (Genesis 32:29) Sanen kinerew ya ipakabat toy inkasikato, samay anghel ya inmasingger ed si Josue so angikuan labat a sikatoy “prinsipe na ehersito nen Jehova.” (Josue 5:14) Sanen tinepet na atateng nen Samson so ngaran na sakey ya anghel, inkuanto: “Akin et tepetan mo so ngaran ko, anta sikato so makapakelaw?” (Uko-ukom 13:17, 18) Diad ag-impangiter na listaay kangaranan na saray anghel, sasalimbengan itayo na Biblia ed pangiter na agkanepegan a galang tan dayew ed saray anghel. Unong ya imanoen tayo, agto itayo met bibilinen ya ontawag ed sikara.

Ontawag ed Dios

Ibabaga ed sikatayo na Biblia so amin a kaukolan tayon amtaen nipaakar ed nagagawa ed espiritun ayaman. Onia so insulat nen apostol Pablo: “Amin a Sulat ya impuyan na Dios sikato met so maabig a pakaaralan . . . pian say too na Dios anggapo komon so pankulangan to, a nabangatan a maong ed amin a gawa a maabig.” (2 Timoteo 3:16, 17) No labay na Dios ya amtaen tayo so kangaranan na dakel ya anghel, di imparungtal to komon iraya ed Salita to, say Biblia. Tan no pilalek na Dios a bilinen itayo no panoy pitalosan ed saray anghel tan pitongtong ed sikara diad pikakasi, di intarya to komon itan ya impormasyon diad Kasulatan.

Imbes, onia so imbangat nen Jesu-Kristo: “Bangno mikasi ka, onloob ka ed silir mo, et no nikapot mo la so pintom, insan ka mikasi ed Amam a wala ed amot . . . Kanian onia sirin no mikasi kayo: ‘Ama min wala ka ed tawen, nagalang komon so ngaran mo.’” (Mateo 6:6, 9) Say Makasulatan a panmoria et saya: Agtayo ontawag ed saray anghel odino manpikasi ed sikara, noagta nepeg a sisisimoon itayon onasingger ed Manamalsa na saray anghel, say Dios a mismo. Aliwan misteryo so ngaran to, tan agla kaukolan so pasingawey pian iparungtal itan. Anggaman walaray impanalin iyamot so ngaran na Dios, satan so pinmatnag ed rekord na Biblia ed masulok a 7,000 danay. Singa bilang, diad panutukoy ed mangatatawen ya Ama et inkanta na salmista: “Sika, a say ngaran mo a bukbukor et Jehova, Sankatageyan ka a manuna nen say amin a dalin.”​—Salmo 83:18.

Agbalot okupado si Jehova pian ontalineng ed sikatayo no onasingger itayo ed sikato ed dugan paraan diad pikakasi. Ipapaseguro iya na Biblia: “Saray mata nen Jehova, ombatik dia tan diman ed amin a dalin, pian ompatnag a mabiskeg ya ontulong ed saray ayadyari puso ra a dapit ed sikato.”​—2 Awaran 16:9.

Saray Anghel tan Moralidad

Sumlang ed mabetbet ya ipapatnag na media, saray anghel so agmanguukom ed totoo. Matukoy itan, ta saray anghel so ag-autorisadon mangukom ed totoo. Si Jehova so ‘Ukom na amin,’ balet ‘inter to so amin a panangukom ed Anak,’ si Jesu-Kristo. (Hebreos 12:23; Juan 5:22) Anggaman kuan, lingo so pangipasen ya ag-interesado iray anghel nipaakar ed no panoy kabibilay tayo. Inkuan nen Jesus: “Wala so liket ed arap na saray anghel na Dios nisengeg ed sakey a managkasalanan a magbabawi.”​—Lucas 15:10.

Anggaman ontan, agmamanbantay labat iray anghel. Diad apalabas iran panaon, sikaray nausar bilang manamatey, manangipaakseb na saray panangukom na Dios. Alimbawa, inusar na Dios iray anghel sumpa ed kadaanan iran Ehipsio. Unong ed Salmo 78:49, ‘sikato intupak to ed sikara so kasebegan na petang na ulo to, sanok tan panggula, tan gotgot, ed impangibaki to na angheles [a mangitarok na kalamidad].’ Mipadpara, inreport na Biblia a diad sanlabi et pinatey na sakey labat ya anghel so 185,000 ya Asiryano iran sundalo.​—2 Arari 19:35.

Ontan met, diad arapen et deralen na saray anghel iramay ag-ontulok ed saray matunong ya estandarte na Dios a mamepeligro ed pankaabigan na arum. Onsabi si Jesus “ya iba to so saray anghel na pakayari to, a dia ed mandarlang ya apuy, iter to so panamales ed saray agmikabat ed Dios, tan dia ed saray ag-ontulok ed ebanghelyo.”​—2 Tesalonica 1:7, 8.

Ipapanengneng sirin na Kasulatan a saray matoor ya anghel na Dios so lawas a manggagawa’d linawa to diad panumpal ed saray instruksion to tan pangitandoro ed saray matunong ya estandarte to. Malinew, no labay tayon tulongan itayo na saray anghel na Dios, kaukolan tayon amtaen no antoy linawa na Dios tan seryoson pambanikelan a gawaen itan.

Saray Anghel de la Guardia

Kasin tatalimaen tan sasalimbengan na saray anghel so totoo? Intepet nen apostol Pablo: “Aliwa ta ra [saray anghel] ya espiritu ya amin, a nibaki a manlingkor a pinabangan na saray manawir naani na kilalaban?” (Hebreos 1:14) Malinew, say ebat ed tepet nen Pablo so on.

Lapud agda indakmomo ed arap na binalitokan ya imahen ya impaalagey nen Nabucodonosor ya Ari na Babilonia, say taloran Hebreon si Sidrac, Mesac, tan Abednago so imbuntok ed pinapetang a maong a palbaan. Balet, saraman a matoor a lingkor na Dios so ag-apoolan. Sanen binantag na ari so palbaan, anengneng toy “apatiran lalaki,” tan inkuanton “say nengneng na komapat sikato so singa anak a laki na saray dirios.” (Daniel 3:25) Pigaran taon ed saginonor, naimano nen Daniel so inkasikato ed ungib na saray leon lapud katooran to. Sikato met so akaliktar ya ag-asakitan tan inkuanto: “Say Dios ko imbaki to so anghel to, tan pinepet to so saray sangi na saray leon.”​—Daniel 6:22.

Diad inkiletneg na kongregasyon na papatumbok nen Kristo nen inmunan siglo K.P., saray anghel so inmapireng lamet, ya imbulos iray apostol ed prisoan. (Gawa 5:17-24; 12:6-12) Tan sanen niiyan ed kapeligroan so bilay nen Pablo diad dayat, sikatoy pinaseguroan na sakey ya anghel a makasabin maligen diad Roma.​—Gawa 27:13-24.

Sigpot a kombinsido iray lingkor nen Jehova a Dios natan a saray agnanengneng ya anghelikon puersa na Dios so tudtua tan makayarin manalimbeng, a singa ginawa ra ed si Eliseo tan say katulongan to. (2 Arari 6:15-17) On, “say anghel nen Jehova mankampamento ed liberliber na saray ontakot ed sikato, tan iliktar tora.”​—Salmo 34:7; 91:11.

Say Mensahen Tarok na Saray Anghel

Anggaman interesado iray anghel ed pankaabigan na saramay manseserbi ed si Jehova a Dios, seseguradoen da met so pakaaral na totoo nipaakar ed sikato tan ed gagala to. Onia so insulat nen apostol Juan: “Anengneng ko so sananey ya anghel a mantektekkiab dia ed pegley na tawen, a wala ed sikato so andi-angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley; et kuanto ed baleg a bosis: ‘Takotan yo so Dios, tan iter yo ed sikato so gloria.’”​—Apocalipsis 14:6, 7.

Labay mo ta ya amtaen so lugan na sayan “andi-angga a maabig a balita”? No ontan, tepetan iray Tastasi nen Jehova. Maliket iran manginabang ed sika.

[Saray litrato ed pahina 7]

Iyaabawag na sakey ya anghel ed pegley-tawen so andi-anggaan a maong a balita. Labay mo ta a naaralan itan?