Balita na Saray Manangiyabawag ed Panarian
Kinomendaan Iray Tasin Ugugaw a Maneeskuela
KASIN sika, bilang sakey ya estudyante ed eskuelaan, so mabaing a mangitongtong ed pananisiam? Saray eksperiensia ed leksab so mangiparungtal a sarayan walad kalangweran a Tastasi so agtinmakot a mangitandoro ed Kristianon pananisia ra tan sikara so kinomendaan ed impanggawa na ontan.
◻ Diad sakey ya eskuelaan ed Australia, saray estudyante so apabtangan a manggawa na sakey ya essay ed Krismas, balet imbaga na maestro ed sakey a manedad-na-11-taon a Tasi: “Amtak a sika so sakey ed saray Tasi nen Jehova, kanian agmo nayarian ya isulat so nipaakar ed saray selebrasyon na Krismas. Nayarian mo so mangisulat na sakey a miduman essay ed ‘Historya na Krismas.’” Say walad kalangweran ya agin bii so nanggawa ed essay, ya inusar toray matukoy ya impormasyon a nanlapud saray palapagan na Sosyedad tan arum iran reperensyan libro. Diad pankelaw na klase, kinomentoan na maestro a say impormasyon so ekselente tan maawaran a duga. “Manlapud amin na saray essays a naawat ko, say ginawam so sankaabigan ed klase,” so imbaga na maestro. Bilang nansumpalan, say walad kalangweran a Tasi so akapangipalima na sakey a brosyur ya School, 15 magasin, sakey a libron Youth, tan duaran libron Live Forever ed maestro to tan saray kaklase to.
◻ Diad sananey ya eskuelaan ed Australia, waloran Tasin ugugaw so susuperbisaen na sakey a kasandin maestro a kada ngarem diad unor a taloran simba ed eskuelaan, lapud sikara so agmibibiang ed saray aktibidades na Krismas. Inkomento to ed saginonor diad ina na arum ya ugugaw: “Say parte a kikiwasan ko so melag a tuloy. Pigara ed saray mamaestro so linmoob tan tinepet da no panon so kagagawa na saray bengatla. Imbagak ed sikara: ‘Anggapo so kipaakaran to ed no anto so isipen mo ed relihyon da tan say dalan na agda pibiang ed arum iran aktibidades, saya so sankaabigan a grupo na ugugaw ya akikimeyan ko.’” Pigaran simba ed saginonor sanen sikato so apitongtongan ed kabkaabungan a ministeryo, imbaga to: “Anggaman ontan, kasin impasabi yo so imbagak nipaakar ed saray ugugaw ed eskuelaan? Labay kon naamtaan na amin.”
◻ Manlapud Estados Unidos et sinmabi so sayan eksperiensia na sakey a manedad-na-17-taon a kuarto anyo ed high school a say klase to ed ley so alanlanor a tuloy ed sakey a diskusyon nipaakar ed pankanepegan a nisiglaot ed kawayangan na relihyon tan say pambiigan na Iglesia tan Estado. Duara ed saray kaso so anaglawi ed saray Tasi nen Jehova tan say isyu ed dala. Say walad kalangweran ya agin bii so akaromog ed report a sisingbaten a wala so lalabien tan ag-asimbang no nipaakar ed saray katuaan na Biblia ed dala tan satan so imbaga to ed maestro to. Say maestro to so angiter ed sikato na pankanawnawan mansalita ed klase. Sakbay na paliwawa to, saray estudyante so nanisip a say korte so nanggawa na suston desisyon a mamilit ed saray Tasi a saksakan na dala a sumpad labay da. Balet kayari na impakadngel da ed argumenton nibase ed Biblia, say klase so nankakasakey ya angiboton sumpa ed desisyon na korte. Say agi tayon bii so aliketan sanen dakel ed saray estudyante so inmasingger ed sikato tan kinmerew ira na malaem ya impormasyon nipaakar ed pananisia na saray Tasi nen Jehova. Ibabaga to natan a lalon nagnap ya aapresyaen ton say eskuelaan so nikabkabiig a teritorya to.
On, sikayoran ugugaw a manaaral so walaan na nikadkaduman teritorya. Legan a sikayo so walaan na pankanawnawa, itultuloy yon sipapangasin tulongan iray kapara yon estudyante a makaaral ed saray makapakelaw a gagala na Dios, tan makaawat kayo na komendasyon ya aliwa lambengat a manlapud arum noagta manlapud si Jehova a mismo!—Job 40:14.