Responsablen Panag-ilalak ed Sayan Panaon na Anggaan
“Mangimaton ed maabig a pamaakaran diad saray anak.”—1 TIMOTEO 3:12.
1. Anto so natural a pilalek na maslak a bibii, tan panon so kipatnag na saya a masakbay ed bilay?
SAY gayaga na inkaateng so agniburi. Say liknaan na inkaina so natural, anggaman mabibiskeg ed arum a bibii nen say diad arum. Diad dakel iran daldalin ed Sagur, saray angkekelag ya ugugaw a lalaki so lalon interesado diad panggalaw ed saray galawgalaw a mekanikal, bang saray angkelag ya ugugaw a bibii ed inkalapagan so malabay ed saray manyika, a saray managgawa na galawgalaw so manbabanikel a manggawan realistiko no nayari. Dakel iran bibii so basta manbilay ed agew sano nayarian dan lakapen, aliwan sakey a manyika, noagta say dili ran mabilay, ampetang, onggalaw ya ugaw.
Saray Gayaga tan Responsabilidad
2. Panon so pangipasen na saray atateng diad kapangyanak ya ugaw, tan anto so nepeg ya akaparaanan dan sakbaten?
2 Say responsablen panag-ilalak so mankaukolan ed atateng a mangimano ed sakey a kapangyanak ya ugaw ya aliwan sakey a galawgalaw noagta bilang sakey a pinalsa a say bilay to tan arapen to et sikara so oneebat ed Amalsa. Sano sikara so mangitarok na sakey ya ugaw ed mundo, saray atateng so nepeg ya akaparaan a manakbat ed baleg a responsabilidad tan panangiyarunsa ed satan. Sikara so mangigagapo na 20-taon a panamakan, panangawes, panangasikaso-na-bunigas, tan programa na edukasyon, a say pansumpalan so agnailaloan.
3. Akin a say Uliran 23:24, 25 so niyaplika ed dakel a Kristianon atateng?
3 Makapaliket, dakel iran tuloy a Kristianon atateng so amabaleg ed saray anak da a nagmaliw a matoor, dedikadon ariripen nen Jehova. Arum so akanengneng ed saray anak da a binmaleg tan linmoob ed sigpot-panaon a serbisyo bilang payunir, misionero, odino membro na pamilyan Bethel. Diad saratan ya atateng et nayarin tuan nibaga: “Say ama na sakey a matunong so andi-saew a magayaga; say sakey a magmaliw ya ama ed sakey a makabat so manliket met ed sikato. Say amam tan inam so manliket, tan manggayaga iman so angiyanak ed sika.”—Uliran 23:24, 25.
Saray Inaateng a Sulit-na-Puso
4, 5. (a) Anto so Makasulatan a nakakaukolan ed mamatatken tan ministeryal ya ariripen a walaan na saray anak? (b) Panon ya arum iran anak et kabaliksan da so “kairapan” ed ama ra?
4 Balet saya so aliwan naynay ya onia, anggan diad saray mamatatken a walaan na saray anak. Insulat nen apostol Pablo: “Say manangasikaso so nepeg sirin ya andian na kabalawan, asawa na sakey a bii . . . sakey a lakin imatonan to so dilin sankaabungan to ed maabig a pamaakaran, a walaan na saray anak ya ontulok ed amin a kabintaan; (no peteg ya anggan siopan laki ya agto amta no panon so pangimaton ed dilin sankaabungan to, panon so pangasikaso to ed kongregasyon?)” Inyarum nen Pablo: “Komon ta saray ministeryal ya ariripen so kaasawaan na sakey a bii, a mangimaton ed maabig a pamaakaran diad saray anak da tan diad dilin sankaabungan da.”—1 Timoteo 3:2-5, 12.
5 Siempre, saray Kristianon mamatatken tan ministeryal ya ariripen so aliwan responsabli no saray anak da, a wala la ed edad, so agmalabay a mantultuloy a manserbi ed si Jehova. Balet sikara so responsabli ed saray minor de edad ya ananak da tan diad matatatken ya anak da a siansia nin manaayam ed leksab na bubong da. Saray mamatatken tan ministeryal ya ariripen so akabalang na mablin pribilidad na serbisyo lapud sikara so nagmaliw a mamapaulian odino sinmaew a seryoso a mangabet ed Makasulatan a nakakaukolan na “pangimaton ed maabig a pamaakaran ed saray anak tan ed dilin sankaabungan da.” Diad saray ontan, tan saray dakerakel ni, saray anak da so angitarok ed sikara na lalon dakel a gonigon. Agaylan mabetbet a nansumpal a tua so uliran: “Say makulangkulang ya anak et kabaliksan to so kairapan na ama to”!—Uliran 19:13.
Responsablen Inkaama
6. Anton tepet so nepeg ya itepet na saray Kristianon kaasawaan a lalaki ed inkasikaran dili?
6 Amin a Kristianon kaasawaan a lalaki, balanglan sikara so walaan na responsabilidad ed kongregasyon odino andi, so nepeg met a mangimano ed epekton onwala diad espiritualidad na asawa ra diad panangasikaso ed saray angkekelag ya ananak. No say sakey ya asawan-bii so aliwan mabiskeg ed espiritual, panon a say sakey ya ugaw, odino pigaran ugugaw, so mangapekta ed personal a panagaral to tan diad saray pankanawnawa ton mibiang ed kimey na panagpulong?
7. Anto so agawa ed arum iran Kristianon asawan bibii, tan anto so mabetbet a sengegan na sayan kipapasen?
7 Kasin namorian naynay na saray kaasawan-a-lalaki a say panangasikaso ed sakey ya ugaw odino sakey a melag ya anak so mabetbet a mangamper ed saray kaasawaan da a manlapud pakagamor na nagnap a gungguna diad Panagaral na Libro ed Kongregasyon, diad saray pantitipon ed Kingdom Hall, saray asamblea sirkito, tan diad saray kumbension distrito? Say ontan a kipapasen so mantultuloy ed pigaran bulan, tan anggan taotaon, sano mantutumbokan so ugaw. Satan so wala ed inkanatural na saray bengatla a say awit, ed sayan pamaakaran, so manunan nipasakbat ed ina, imbes a diad ama. Naobserbaan no maminsan a bangta arum iran Kristianon lalaki so maaligwas ed espiritual, anggan dia ed punto na kaikdan ni na saray pribilehyo ed kongregasyon, saray kaasawaan dan bibii so magmaliw a maletey ed espiritual. Akin? Mabetbet a lapud saray angkekelag ya anak da so mangamper ed saray kaasawaan a bibii a mangiyapasakey ed saray pantitipon, panggawa na pirmin panagaral ed Biblia, odino diad pibibiang ed malaknab a sukat ed kimey na panagtasi. Kasin say inkaama so responsabli no abuloyan to so ontan iran kipapasen ya ombaleg?
8. Panoy pibiang na dakel a kaamaan ed sasakbaten diad pangasikaso ed saray anak, tekep na anton gungguna ed kaasawaan da?
8 Makapaliket, saya so aliwan naynay a kipapasen. Dakel iran Kristianon kaamaan so manggagawa na anggaan na nayarian da a misakbatan ed awit diad panangasikaso ed saray anak. Alaen da so nagnap a pibiang diad pangimano a saray anak da so mansiansian mareen legan na saray miting ed kongregasyon. No say melag ya anak da so onggapon onakis, odino no say anak da so maingal, sikara so mansublayan a mangipaway ed sikato a para ed manepeg a disiplina. Akin a say ina so naynay a makasaew ed saray parte ed miting? Diad abung, saray makonsideran kaasawaan a lalaki so ontulong ed kaasawaan dan bibii ed kimey tan diad panamaugip ed saray anak ta pian say asawan-laki tan asawan-bii so makapanyurongan a mangiyapasakey a mareen diad espiritual a bengatla.
9. Anto so mamaneknek a saray anak so aliwan naynay a makaamper?
9 Sano saray bengatla so manepeg a naorganisa ed sakey a kongregasyon, saray walad kalangweran a kainaan a walaan na saray angkelag ya anak so makapibiang ed panag-auxiliary payunir a serbisyo. Arum ni ingen so regular pioneer. Sirin saray anak so aliwan naynay a makasbel. Dakel iran Kristianon atateng so mangipapanengneng na maabig ya espiritu na panagpayunir.
Andian na Anak Balet Maliket
10. Anto so denisidi na arum a sanaasawa, tan panon so inkabendisyonan da?
10 Arum iran walad kalangweran a sanasawa so nandesidin mansiansian andian na anak. Anggaman saray kaasawaan a bibii so walaan na inkainan liknaan a mabiskeg a singa saraman so wala ed arum a bibii, denisidi ra, diad pipaknaan ed kaasawan dan lalaki, so agda pananak ta pian nideboto ra so inkasikara a manserbi ed si Jehova a sigpot-panaon. Dakel ed sikara so nanlingkor a bilang payunir odino misionero. Nayarian da natan so onlingaw ed saray taon a tekep na pisasalamat. Pian maseguro, sikara so ag-amawala na silalaman iran anak. Balet sikara so amawala na saray balon babangatan a nantultuloy a matoor diad panagdayew ed si Jehova. Sarayan ‘peteg ya ananak ed pananisia’ so agbalot makalingwan no siopa so instrumento diad impangitarok ed sikara “na salita na katuaan.”—1 Timoteo 1:2; Efeso 1:13; ipareng so 1 Corinto 4:14, 17; 1 Juan 2:1.
11. (a) Iner so panlilingkoran na dakel iran andian na anak a sanaasawa ed si Jehova, tan akin a sikara so andian na anggan anton pagbabawi? (b) Anton kasulatan so niyaplika ed amin a sanaasawa a nansiansian andian na anak “nisesengeg ed panarian”?
11 Dakel iran sanaasawa ed sankamundoan ya angisuko ed saray gayaga na inkaateng so akayarin nanlingkor ed si Jehova diad kimey na sirkito, diad kimey na distrito, odino diad Bethel. Saraya met so onlingaw a tekep na inkapnek ed saray bilay dan nausar diad panaglingkor ed si Jehova tan diad saray agagi ra ed sarayan espesyal a pribilehyo. Andian ira na pagbabawi. Manwarin andian ira na gayaga diad impamawala ed saray anak ed mundo, sikara so kinmiwas na mablin biang diad panangilaknab ed saray intereses na Panarian diad nanduruman lawak na kimey da. Ed amin na sarayan sanaasawa a nansiansian andian na anak “nisesengeg ed panarian,” say kasulatan so seguradon niyaplika a kuanto: “Say Dios so aliwan agmatunong ta pian nalingwanan to so kimey yo tan say aro ya impanengneng yo ed ngaran to, a sikayo so nanlingkor ed saray sasantos tan mantutultuloy a manlilingkor.”—Mateo 19:12; Hebreos 6:10.
Sakey a Personal a Pamaakaran
12. (a) Akin a say panag-ilalak so nikadkaduman pribilehyo? (b) Legan na antoran panaon a say panag-ilalak so inter-na-Dios a kimey?
12 A singa anengneng tayo ed gapo na sayan salaysay, say panag-ilalak so sakey a langkap na Dios. (Salmo 127:3) Sikato so sakey a nikadkaduman pribilehyo ya ag-akibiangan na saray espiritun pinalsa nen Jehova. (Mateo 22:30) Walaray panaon sanen say panag-ilalak so anibukel na kabiangan na kimey ya impabtang nen Jehova ed saray ariripen to ed dalin. Saya so diad kipapasen nen Adan tan Eva. (Genesis 1:28) Satan so tua ed saray niliktar ed Delap. (Genesis 9:1) Nanlinawaan nen Jehova a saray ananak na Israel so ondakel diad panamegley na panag-ilalak.—Genesis 46:1-3; Exodo 1:7, 20; Deuteronomio 1:10.
13, 14. (a) Anto so nibaga ed panag-ilalak natan, tan anton panagbalaw so aliwan manepeg? (b) Manwarin say panag-ilalak ed sayan panaon na anggaan so sakey a personal a pamaakaran, anton simbawa so niiter?
13 Natan, say panag-ilalak so aliwan espesipikon kabiangan na kimey nen Jehova ya ingganggan to ed totoo to. Anggaman ontan, sikato nin siansia so sakey a pribilehyo ya iter to ed saray walaan na kaasawaan no satan so kaliktan da. Saray Kristianon sanaasawa a mandesidin mangigapo na sakey a pamilya so agnepeg, sirin, a balawen; nisay saray sanaasawa ya agmalabay a nawalaan na saray anak.
14 Sirin say pamaakaran na panag-ilalak ed sayan panaon na anggaan so sakey a personal a nepeg a desidien na kada sanasawa a mismo. Anggaman kuan, lapud “say panaon a natitilak so aparaisetan,” saray sanaasawa so maong no simbangen dan maalwar tan sipipikasi iray pankaabigan tan agpankaabigan na panag-ilalak ed sarayan panaon. (1 Corinto 7:29) Saraman so manpili a nawalaan na saray anak so nepeg a sikakabat a sigpot ed aliwa lambengat ed saray gayaga na panag-ilalak noagta ontan met ed saray responsabilidad a nasasaglawi tan diad saray probleman nayarin onlesa ed sikara tan diad saray anak ya itarok da ed mundo.
Sano Ag-implano
15, 16. (a) Anton awawey so nepeg a paliisan sano nagawa so ag-inilaloan a panlukon, tan akin? (b) Panon so nepeg a pangipasen ed anggan siopan melag ya ugaw, a manasaglawi ed antoran responsabilidad?
15 Nayarin ibaga na arum: ‘Satan so sankaabigan, balet anto no say sakey ya anak so onsabin ag-inilaloan?’ Saya so agawa ed dakel iran sanaasawa a sikakabat a nagnap ed katuaan a saya so aliwan makanan panaon diad pamawala na saray anak ed mundo. Arum ed sikara so wala ed sigpot-panaon a serbisyo diad dakel a taon. Panon so nepeg a panmoria ed isabi na ag-inilaloan ya anak?
16 Saya so kiwasan na responsablen inkaateng. Tua, say panaglukon so nayarin ag-inilaloan, balet say ugaw ya onsabi so agnayarin ipasen ya agkalikaliktan na Kristianon atateng. Antokaman a pananguman a nayarin itarok na isabi to ed bilay da, sikara so nepeg a maseguron agmanlikna na panunganget ed satan. Tutal, sikara so responsabli ed inkinginew to. Natan ta wadia la, nepeg dan awaten so anguman a kipapasen da, a kabat da, diad sakey a dalan odino diad sananey, say “panaon tan ag-inilaloan a nagawa so nagawa” ed amin a totoo. (Eclesiastes 9:11) Sibubulos odino andi, sikara so akibiang diad panamalsan gawa a si Jehova a Dios so Autor. Nepeg dan awaten so anak da a bilang sakey a sagradon talek tan simamaaron sakbaten daray responsabilidad da a bilang “atateng a mikasakey ed Katawan.”—Efeso 6:1.
“Gawaen So Amin a Bengatla ed Ngaran na Katawan”
17. Anton simbawa so inter nen Pablo ed saray taga Colosas, tan panon so nayarin panumbok ed sayan simbawa natan?
17 Sakbay na impangiter to na simbawa ed pamaakaran na pamilya, insulat nen apostol Pablo: “Antokaman a gawaen yo ed salita odino diad gawa, gawaen so amin a bengatla ed ngaran na Katawan a Jesus, a pisalamatan so Dios ya Ama ed panamegley to.” (Colosas 3:17-21) Antokaman a kipapasen a nayarin pakaromogan na sakey a Kristiano na inkasikato, sikato so nepeg a misalsalamat ed si Jehova tan anamoten to so kipapasen to a “manggawa ed amin a bengatla ed ngaran na Katawan.”
18, 19. (a) Panon a saray andian na asawan Kristianos tan saray andian na anak a sanaasawa so “makapanggawa ed amin a bengatla ed ngaran na Katawan”? (b) Panon so panmoria na Kristianon atateng ed ananak da, tan anton kalat so nepeg dan igeter ed inkasikaran dili?
18 Say Kristianon pinili to so mansiansian andian na asawa so mangusar ed kawayangan to, aliwan diad dilin kagletan, noagta a mankimey a “sigpot-kamarerwa no nipaakar ed si Jehova,” no nayari ed arum a porma na sigpot-panaon a serbisyo. (Colosas 3:23; 1 Corinto 7:32) Mipadpara, say sanasawa a mandesidin malabay a nawalaan na saray anak so aliwan sinisiblet a ‘mangusar ed mundo a nagnap’ noagta ikdan da so serbisyo ed Panarian na sankalaknaban a pasen ed bilay da.—1 Corinto 7:29-31.
19 No nipaakar ed saray Kristianos a walaan na saray anak, nepeg dan awaten so inkaateng da diad responsablen dalan. Arawin ipasen daray anak da bilang makaamper diad panlingkor ed si Jehova, sikara so nepeg dan ipasen a bilang nikadkaduman kimey. Anto so lalanoren na saya? Bueno, sano say sakey a dedikadon Kristiano so makaabet ed sakey a mangipanengneng na interes ed katuaan, igapo to so maparanay a panangiyaral ed Biblia ed satan a sakey. No nigapo to la so panangiyaral, say Tasi so magunaet, ompawil a sinimbasimba ta pian tulongan so interesado ya onaligwas ed espiritual. Ontan so nakaukolan diad kipapasen na saray anak na sakey a Kristiano. Say maparanay, aledler a panagaral ed Biblia, ya igapon masakbay no nayari tan gawaen a maparanay, so nakaukolan diad panulong ed walad kalangweran ya ombulaslas ed espiritual tan mangaral a mangaro ed Amalsa to. (2 Timoteo 3:14, 15) Niarum ni, saray atateng so nepeg a maalwar a mangipanengneng ed saray anak da na maabig ya ehemplo na Kristianon ugali ed abung, unong a singa gawaen da ed Kingdom Hall. Tan no nayari et sakbaten da so responsabilidad da diad panangipasal ed saray anak da diad lawak na kimeyan. Diad onia, niarum ed pananulong ed arum a matatken, saray atateng so mananap, diad tulong nen Jehova, a “manggawa na babangatan” ed dilin ananak da.—Mateo 28:19.
Ananak Legan na “Baleg a Kairapan”
20. (a) Anto so wala ed unaan tayo, tan ed antoran kairapan so angiteran nen Jesus na pasakbay? (b) Antoy pisiglaotan na saray salita nen Jehova diad panangumponi ed saray anak diad panaon na anggaan?
20 Say walad unaan tayo et say “baleg a kairapan ya agni agawa nanlapulad gapo na mundo ya anggad natan, andi, nisay nagawa lamet.” (Mateo 24:21) Satan so sankairapan a panaon ed saray matatatken tan ontan met ed saray ugugaw. Diad sayan propesiya ed konklusyon na peles a sistema na bengabengatla, impasakbay nen Jesus a say Kristianon katuaan so mangapag ed saray pamilya. Imbaga to: “Nagkalalo ni, say agin laki so mangiyawat ed agi to diad patey, tan say ama so mangiyawat ed anak, tan saray anak so ontalindeg a sumpad atateng tan pateyen da ra.” (Marcos 13:12) Mapatnag, say panangumponi ed saray anak diad panaon na anggaan so aliwan naynay a sakey a puron gayaga. Nayarin mangitarok na saray ot-ot na puso, pakadismayaan, tan anggan kaatapan, a singa ipanengneng na saray salita nen Jesus ya inaon ed tagey.
21. (a) Manwarin momorekdeken a realistiko so arapen, akin a saray atateng so aliwan agmanepeg a mapaga? (b) Anto so nayarin ilalo ra, ed inkasikara tan diad saray anak da?
21 Balet manwarin realistiko ed saray kairapan diad arapen, saramay walaan na angkelag ya ananak so agnepeg a manpaga nipaakar ed arapen. No sikara so mansiansian matoor tan gawaen da so anggaan na nayarian dan mamabaleg ed saray anak da “diad disiplina tan manametek-kanonotan nen Jehova,” makapanmatalek ira a saray matulok ya anak da so naimanon maapabor. (Efeso 6:4; ipareng so 1 Corinto 7:14.) Bilang kabiangan na “baleg ya ulop,” sikara tan saray ilalak da so makailalon makaliktar “ed baleg a kairapan.” No saratan ya ugugaw so ombaleg a magmaliw iran matoor ya ariripen nen Jehova, sikara so maandon misalsalamat ed sikato a sikara so responsablen atateng.—Apocalipsis 7:9, 14; Uliran 4:1, 3, 10.
Repason Tepetepet
◻ Anton andukey-dampoten a programa so lalanoren na kianak na sakey ya ugaw?
◻ Akin ya arum iran mamatatken tan ministeryal ya ariripen so akabalang na pribilehyo?
◻ Antoran sengegan so nepeg ya imanoen na Kristianon asawan laki no nipaakar ed panlukon na asawa to?
◻ Anto so mamaneknek a say sakey a Kristianon sanasawa so nayarin andian na saray anak tan maliket?
◻ Panon so pangipasen na saray ateng diad kianak na sakey ya ugaw, tan akin a sikara so agnepeg a napagaan nipaakar ed arapen?
[Litrato ed pahina 9]
Saray kaamaan so makapibiang ed responsabilidad diad pamareen ed saray anak legan na miting