Say Oras na Panangukom na Dios So Sinmabi La
“Takotan so Dios tan iter ed sikato so gloria, lapud say oras na panangukom to so sinmabi la.”—APOCALIPSIS 14:7.
1. Anto so isakup na manangilukas iran kapitulo na Apocalipsis?
SAY libro na Apocalipsis so nankarga na makapasagyat iran propesiya a walaan na kasumpalan ed agew tayo. Say akaunan artikulo so analaysay na arum ed saratan, a pati say inkilukas na anemiran simbolikon tatak. Sarayan nilukas a tatak so angiparungtal ed panagderal ya inkabayo na apatiran apocaliptikon managkabayo ed sarayan “kaunoran ya agew.” (2 Timoteo 3:1; Apocalipsis 6:1-8) Ibabaga ra met so nipaakar ed saraman so miuley ed si Kristo ed tawen tan saraman so makaliktar “ed baleg a kairapan” a manbilay a mantultuloy ed dalin ed ando lan ando. Say komanem a tatak so mangipapanengneng a say “aturon panaon” na Dios diad pangidapo na panangukom “so asingger la.”—Apocalipsis 1:3; 7:4, 9-17.
2. Panon so kausar na pitoran simbolikon trumpeta ed Apocalipsis kapitulo 8?
2 Balet ta wala ni so tatak, say komapito. Ibabaga ed sikatayo na Apocalipsis 8:2 ed no anto so niparungtal sanen sikato so alukasan: “Tan anengneng ko so pitoran anghel a manalalagey ed arap na Dios, tan pitoran trumpeta so niiter ed sikara.” Ibabaga na Apo 9 bersikulo 6: “Tan say pitoran angheles a walaan na pitoran trumpeta so akaparaan a mamaknol ed sikara.” Diad saray panaon na Biblia, saray trumpeta so nausar pian ipaknol daray importantin nagawgawa. Diad parehon dalan, sarayan tanol na pitoran trumpeta so mangitatawag na imano ed saray pamaakaran na bilay-tan-patey a kaimportantian ed panaon tayo. Tan legan a papaknolen na angheles so trumpeta, saray totoon Tastasi ed dalin so manutumbok dia ed pangikakayat da na makanan balita ya impaknol na kada trumpeta.
No Anto So Kabaliksan na Tanol na Trumpeta
3. Anto so kabaliksan na pitoran tanol na trumpeta?
3 Sarayan tanol na trumpeta so mangipanonot ed sikatayo na bakbak ya inkalbo nen Jehova ed kadaanan ya Ehipto. Saraman a bakbak so balikas na panangukom nen Jehova ed saman ya inmunan pakayari na mundo tan say palson relihyon to, balet ta nilukasan da so dalan na pakaliktar na saray totoo na Dios. Miulibay, saray tanol na trumpeta ed Apocalipsis so modernon-agew a bakbak, sayan panaon ed interon mundo nen Satanas tan say palson relihyon to. Anggaman kuan, sikara so aliwan literal a bakbak noagta managbakbak a mensahe na saray panangukom nen Jehova. Sikara met so mangipapaknol na dalan na pakaliktar a para ed saray totoo na Dios.
4. Panon a say tanol na pitoran trumpeta so akaromog na kasumpalan ed panaon tayo?
4 Mitukoyan ed sarayan pitoran tanol na trumpeta, saray mabiskeg-dapmeg a resulosyon a sumpad mundo nen Satanas so indalatdat ed pitoran nikabkabiig a tinaon a kumbensyon na saray totoo nen Jehova a nanlapud 1922 ya anggad 1928. Nilasus minilyon a kopya na resolusyon so nibunog. Anggaman kuan, say panangipaknol ed saratan a makasinit a mensahe so agniyapasakey ed saraman a taon, noagta sikato so nantultuloy diad amin na saray kaunoran ya agew. Tan natan say pangipapaknol ed saratan so lalon mabiskeg nen say nensaman, unong ta nilaksalaksa ed “baleg ya ulop” so angarum na boses da ed melag ya ulop na alanaan ya inmunan nampulong kayari na Guerra Mundial I. (Apocalipsis 7:9) Kada taon natan, diad ombibiskeg a puersa tan bilang, sarayan nilaksalaksa so mangiyaabawag a say mundo nen Satanas so sigpot a nipaarap ed kadederal.
5. Siopa so “komatlo” ed mundo a sikato so mabiskeg a naukom ya ununa, tan akin?
5 Diad Apocalipsis 8:6-12, say ununan apatiran trumpeta so nipaknol. Bato, apuy, tan dala so nikalbo, a nansumpal ed inkadesyang na “kakatlo” na mundo. Akin a “kakatlo” so asalambit a bilang makasalanan a kabiangan na mundo ya onsabin ununa ed maruksan kaukom? Lapud manwarin amin ed sistema nen Satanas so kabalawan ed Dios, sakey a kabiangan so nagkalalo. Dinan a kabiangan? Say kabiangan ya angala ed ngaran nen Kristo a mismo—Kakristianoan. Tan sanen saray mensahe na panangukom na Dios so dinmapo ed sikato diad kayari na Guerra Mundial I, say nanarian na Kakristianoan ed saman a panaon so angayakup ed ngalngalin kakatlo na katooan.
6. Akin a kinaindanan nen Jehova so Kakristianoan ed kadederal?
6 Say relihyon na Kakristianoan so bunga na 1,900-taon-ya-edad na apostasya nanlapud tuan Inkakristiano ya impasakbay nen Jesus tan saray babangatan to. (Mateo 13:24-30; Gawa 20:29, 30) Say klero na Kakristianoan so mangirerepresenta ed inkasikara a bilang managbangat na Inkakristiano, balet saray doktrina ra so anggapon tuloy ed katuaan na Biblia, tan saray abulok a kiwas da so nantultuloy ya angitarok ed ngaran na Dios ed kabalawan. Say impankasalanan da a sumpa ed dala nisengeg ed impanuporta ra ed saray bakabakal ed sayan koma-20 siglo so niparungtal. Say Kakristianoan so interon sakey a kabiangan na sakey a sistema na saray bengabengatla nen Satanas. Sirin, awaten to so mabiskeg, mamabakbak a mensahe a manlapud si Jehova a mangipapanengneng ya agto kanepegan so madibinon pabor ed antokaman. Kinaindanan nen Jehova so abung na Kakristianoan diad kadederal a segsegurado a singa ginawa to ed abung na saray Judio nen inmunan siglo!—Mateo 23:38.
Abilay a Para ed Sankagloboan a Panagpulong
7, 8. (a) Diad Apocalipsis kapitulo 9, anto so iparungtal na komaliman tanol na trumpeta? (b) Siopa so isisimbolo na saray duron?
7 Diad Apocalipsis 9:1 et papaknolen na komaliman anghel so trumpeta to, tan say pasingawey so mangipaparungtal ed sakey a bitewen ya onleleksab ed dalin. Sayan bitewen so walaan na sakey a tombok ed lima to. Diad satan et lukasan to so sakey ya abut ya akapangipukokan ed muyekyek na saray duron. Say bitewen et say balobalon nitronon mangatatawen ya Ari nen Jehova, si Jesu-Kristo. Saray duron et saray ariripen na Dios, a sikara so apasegsegang tan singa no naandi la sanen saray manunan opisyales da so nipriso nen 1918. Balet si Kristo, natan et wala ed pakayari na Panarian ed tawen, so mangibulos ed sikara ta pian nitultuloy da so sankagloboan a mapublikon panagpulong da, diad inkadismayan tuloy na klero, a nanggetman mamatey ed kimey da.—Mateo 24:14.
8 Saray duron so adeskribe ed onia diad Apocalipsis 9:7: “Tan say kanengnengan na saray duron so kapadpara na saray kabayon niparaan ed bakal; tan diad saray ulo ra et singa saray balanget a balitok, tan saray kalupaan da so singa kalupaan na saray totoo.” Iyarum na Apo 9 bersikulo 10: “Ontan met, sikara so walaan na saray ikol tan mamautot a singa alakdan.” Sarayan duroduron so maabig a mangiretrato ed abilay a nakdaan na saray mananawir na Panarian ya onla lamet diad espiritual a pibabakal nanlapulad 1919 a manpatuloy. Diad apasimbalon biskeg, inyabawag da so makapautot iran mensahe na panangukom na Dios, nagkalautla a sumpad abulok a Kakristianoan.
9, 10. (a) Anto so iparungtal na komanem a tanol na trumpeta? (b) Siopa so nisakup ed saray samplon libulibon mabibiskeg a kabayo?
9 Ontumbok, pinaknol na komanem ya anghel so trumpeta to. (Apocalipsis 9:13) Saya so mangipaparungtal ed inkabulos na saray armada na de-kabayoan. Ibabaga na Apo 9 bersikulo 16 a sikara so manbilang na “duaran samplon libulibo,” a satan so 200 milyon! Tan sikara so adeskribe ed Apo 9 bersikulo 17 tan 19 a singa onggendan: “Saray ulo na kabayo so singa ra ulo na leon, tan ompaway ed sangi ra so apuy tan asewek tan asupre. . . . Saray ikol da so singa ra uleg.” Sarayan armada so onkarol diad leksab na panangiderihe na Ari, si Kristo Jesus. Tan agaylan sikara so makapataktakot a nenengnengen!
10 Anto so irerepresenta na saratan a mabibiskeg a kabayo? Lapud sikara so manbilang na nilaksalaksa, sikara so aliwan basta saray alanaan a nakdaan, a sikara natan so ngalngalin 8,800 ed dalin. Sarayan samplon libulibon kabayo so nepeg a mangisakup ed “baleg ya ulop” na Apocalipsis Apo 9 kapitulo 7, saraman so walaan na ilalo diad pambilay na ando lan ando ed dalin. Diad Biblia, say salitan “samplon libulibo” so mabetbet a manutukoy ed baleg, agnapihon bilang. Sirin, sarayan simbolikon kabayo so mangisakup ya aliwa lambengat ed mandaiset a bilang na alanaan noagta ontan met ed ombabaleg tan mabiskeg ya impansangin minilmilyon a “baleg ya ulop” na “arum a karnero” a mantultuloy ed publikon kimey ya inggapo na singa-duron ya alanaan a nakdaan.—Juan 10:16.
11. Akin a nibagan “say pakauley na saray kabayo so wala ed sangi ra,” tan panon so ‘panggawa ra na panamasakit ed saray ikol da’?
11 Ibabaga na Apocalipsis 9:19: “Say pakauley na saray kabayo so wala ed sangi ra,” tan “diad [saray ikol da] et sikara so mamasakit.” Diad anton dalan a say pakauley so wala ed sangi ra? Unong ta diad saray pigamplon taotaon, diad panamegley na Teokratikon Eskuelaan na Ministeryo tan arum niran miting, saray ariripen na Dios so nibangat ed no panon so pangipulong da ed saray mensahe na panangukom to ya autoritatibo diad panamegley na insangi. Tan diad anton dalan a sikara so mamapasakit ed saray ikol da? Unong ta imbunog da so binilbilyon iran nibase-ed-Biblian palapagan ed sankamundoan, sirin intilak da so makapautot iran mensahe a sumpa ed mundo nen Satanas. Diad saray kalaban da, sarayan armada na de-kabayoan so tuan singa ra samplon libulibo.
12. Anto so itultuloy a gawaen na saray simbolikon duron tan kabayo, tan diad anton epekto?
12 Sirin, saray simbolikon duron tan kabayo so nepeg a mangipaknol ed saray mensahe na panangukom na Dios a lalon malinew tan maksil legan a manasingger so agew na panangibales to. Diad saraman so masimpit ed puso, saratan a mensahe so sankaabigan a balita. Balet diad saraman so manlabay ed mundo nen Satanas, sikara so mauges a balita, lapud kabaliksan da a say mundo ra so magano lan naderal.
13. “Say komatlon irap” a nisiglaot ed komapiton tanol na trumpeta so manasaglawi ed anto, tan panon a satan so sakey ya “irap”?
13 Saray manamakbak a duron tan saray armada na de-kabayoan so adeskribe a bilang ununa tan komadua ed taloran madibinon nigetman “irirap.” (Apocalipsis 9:12; 11:14) Anto so “komatlon irap”? Diad Apocalipsis 10:7 et nibaga ed sikatayo: “Diad saray agew na panangipaknol na komapiton anghel, . . . say sagradon sekreto na Dios unong ed maong a balita a niyabawag ed saray dilin ariripen to a propeta so peteg a nitarok ed panganggaan.” Sayan sagradon sekreto so manasaglawi ed “binin” inmunan insipan ed Eden. (Genesis 3:15) Satan a “bini” et manunan si Jesus balet ta isakup to met iray alanaan a kakaiban miuley ed sikato ed tawen. Sirin say sagradon sekreto so manasaglawi ed mangatatawen a Panarian na Dios. Sayan Panarian so mangitarok ed komatlon madibinon nigagalan “irap,” lapud idapo toray panangukom na Dios a sumpad mundo nen Satanas dia ed kasampotan.
Say Panarian So Niletneg
14. Anto so iyaabawag na komapiton tanol na trumpeta ed Apocalipsis 11:15?
14 Insan agawa! Ibabaga na Apocalipsis 11:15: “Tan say komapiton anghel so amaknol ed trumpeta to. Tan agawa ed tawen so maksil a boses, a kuan da: ‘Say panarian na mundo so nagmaliw a panarian na Katawan tayo [Jehova] tan ed Kristo to, tan sikato so manuley a bilang ari ed ando lan ando.’” On, iyabawag a say Panarian na Dios ed panamegley nen Kristo so niletneg ed tawen nen taon 1914. Tan sanen say nakdaan so abilay diad kayari Guerra Mundial I, sayan balita so intarok da ed unaan.
15. Nen 1922, anton agawa so angisinyas na balon biskeg diad panangipulong ed Panarian?
15 Diad sakey a kumbension na saray ariripen nen Jehova nen 1922 ed Cedar Point, Ohio, E.U.A., saray nilibulibon inmatendi so akadngel ed makapasagyat ya anunsyo: “Saya so agew na amin ya ag-agew. Nia, say Ari so manuuley! Sikayoray manangiyabawag ya ahentes to. Sirin, iyabawag, iyabawag, iyabawag, so Ari tan say panarian to.” Satan so angigapo na baleg ya inkurang na mapublikon panangipulong na Panarian ya angisakup ed saray panangukom ya impaknol na pitoran managtrumpetan angheles. Natan, ngalngalin talora-tan-kapalduan-milyon ya ariripen nen Jehova ed masulok a 55,000 kongregasyon ed interon sankamundoan so alanor ed sayan sankagloboan a panangipulong ed Panarian. Samplon libulibo a peteg!
16. Diad Apocalipsis kapitulo 12, anton malaknab a nagagawa a manasaglawi ed tawen tan dalin so imparungtal na komapiton tanol na trumpeta?
16 Balet say komapiton anghel so walaan ni na iparungtal. Ibabaga na Apocalipsis 12:7 a “tinmerak so bakal ed tawen.” Sayan resulta na kiwas na Kriston Ari so iter ed sikatayo na bersikulo 9: “Sirin naplag so baleg a dragon, say daan ya uleg, say sakey a tinawag na Diablo tan Satanas, a mamapalikdo ed interon panaayaman a dalin; sikato so nibantak ed dalin, tan saray angheles to so nibantak a kaiba to.” Iyarum na Apo 9 bersikulo 12: “Nisengeg ed saya et manliket kayo, sikayon katawenan tan sikayoran manaayam ed sikara!” On, saray katawenan so alinisan ed impluensya nen Satanas, sakey a sengegan na baleg a panliket ed limog na saray matoor ya angheles. Balet anto so kabaliksan to ed katooan? Satan a parehon bersikulo so onebat: “Kasi la so dalin tan say dayat, lapud say Diablo so inmakseb ed sikayo, a walaan na baleg a sanok, ya amta to a sikato so walaan na antiktikey a panaon.”
17. Akin a matukoy so impangiretrato ed saray gobierno na mundo a bilang “sakey ya atap ya ayep” ed Apocalipsis kapitulo 13?
17 Ideskribe na Apocalipsis 12:3 si Satanas a bilang ‘baleg a dragon, a walaan na pitoran ulo tan samploran saklor,’ sakey ya abalbaleg a singa-ayep a managderal. Saya so mangipanengneng a sikato so desinyador na mangaraldalin a mapulitikan “atap ya ayep” ya adeskribe ed kapitulo 13, bersikulo 1 tan 2. Satan ya ayep so walaan met na pitoran ulo tan samploran saklor, diad pangalig ed si Satanas. Ibabaga na Apo 9 bersikulo 2: “Say dragon [Satanas] so angiter ed ayep na pakayari to tan trono tan baleg a pakauley.” Say pangiretrato ed saray mapulitikan gobierno a bilang atap ya ayep so peteg a matukoy, lapud diad sayan koma-20 siglo, masulok a sanlasus milyon a totoo so inatey ed saray bakal na nasyones.
18. Anto so duaran-saklor ya ayep ed Apocalipsis 13:11, tan panon a saray kiwas to so ontulong a mangipabidbir ed satan?
18 Iparungtal na ontumbok ya eksena ed Apocalipsis 13:11, a singa ibabaga na bersikulo 11, “sananey ya atap ya ayep ya ontatatdang ed dalin, tan walaan na duaran saklor a singa sakey a kordero, balet ta ginmapon mansalita a singa sakey a dragon.” Sayan duaran-saklor ya ayep et say nantekep ed pulitika ya Anglo-Americano. Sikato so singa-kordero unong ta sikato so nankunwarin aliwan-opensibo, say aliwawaan a tuloy a porma na gobierno. Balet ta sikato so mansalita a singa sakey a dragon, singa si Satanas, tan sikato so atawag na “sananey ya atap ya ayep” lapud saray kiwas to ed pananguley so singa-ayep. Sikato so manesdes tan manaktakot tan anggan mangusar na karamsakan inerman a say bersion na pananguley to so agnaawat. Ipaseseg to, aliwan say itutuek ed Panarian na Dios, noagta, ingen, say isilong ed mundo nen Satanas. Sikato no akin ya ibabaga na Apo 9 bersikulo 14: “Papalikdoen to raman so manaayam ed dalin.”
19, 20. (a) Anto so ipapatnag na katooran na saray ariripen nen Jehova? (b) Panon so pikabat tayo a say alanaan a nakdaan so seguradon manalo ed mundo nen Satanas?
19 Sayan mundo ed leksab na pananguley nen Satanas so mairap a pasen a panayaman na saraman so, mitukoyan ed ganggan nen Jesus ed saray tuan Kristianos, aliwan kabiangan na satan. (Juan 17:16) Sirin, sikato so matalonan panangipatnag na pakayari tan bendisyon nen Jehova ed saray ariripen to ed sankamundoan natan so pamemben na katooran tan mankakasakey a mantultuloy a mangalangon ed si Jehova tan saray matunong a dalan to. Saya so gawaen da ed arap na mabiskeg ya isusumpa, panamasegsegang, tan anggan patey.
20 Saray alanaan a nakdaan ed partikular so puntirya nen Satanas lapud sikara so kaiban-manuley nen Kristo. Balet say Apocalipsis 14 so mangipanengneng a say nagnap a bilang da, 144,000, so mananalon atipon ed si Kristo diad pakayari na Panarian. Sikara so matoor a pinmeket ed Katawan da, lapud ibabaga na Apo 9 bersikulo 4: “Saraya so mantutultuloy a manutumbok ed Kordero inerman a laen to a”—saya anggaman ed maruksan panamasegsegang ya intarok nen Satanas ed sikara.
Awaten ya Ununa Iray Panangukom na Dios
21, 22. (a) Antoran anunsyo so gawaen na saray angheles diad Apocalipsis 14:7, 8? (b) Akin ya inyabawag na sakey ya anghel so relihyoson inkagba na Babilonia anta sikato ni so wala?
21 Diad Apocalipsis 14:7 et kinmelyaw so sakey ya anghel: “Takotan so Dios tan iter ed sikato so gloria, lapud say oras na panangukom to so sinmabi, tan sirin dayewen so Sakey a nanggawa ed tawen tan say dalin tan dayat tan saray subol na danum.” Siopa so mangawat na masebeg a panangukom na Dios ya ununa? Onebat so Apo 9 bersikulo 8: “Tan sananey, say komaduan anghel, so tinmumbok, a kuanto: ‘Sikato so nagba! say Babilonia a Baleg so nagba, sikato a nanggawa ed amin na saray nasyones ya oninum ed alak na sanok na pilalawanan to!’” Diad ununan panaon, balet ta aliwan unor, sasalitaen na Apocalipsis so “Babilonia a Baleg,” say sankagloboan ya imperyo na palson relihyon.
22 Lapud say relihyon so siansia nin mangaagamil na impluensya ed nanduruman kabiangan na dalin, akin ya iyabawag na anghel a say Babilonia a Baleg so nagba la? Bueno, anto so nansumpalan nen 539 K.K.P. sanen nagba so karaanan a Babilonia balet ta aliwa nin sigpot ya aderal? Akin, saray akautibon ariripen nen Jehova so pinmawil ed dalin dan nianakan ed duaran taon ed saginonor tan impawil da so tuan panagdayew! Diad parehon dalan, say kipawil na saray ariripen na Dios ed apasimbalon kimey tan espiritual ya aligwas a ginmapo nen 1919 so malinew ya ebidensya a diad saman, nen 1919, say Babilonia a Baleg so anagmak na inkagba a singa anengneng nen Jehova. Ditan et sikato so kinondena to diad saginonor a kadederal.
23. (a) Panon so kipaparaan na dalan diad kaderal na Babilonia a Baleg? (b) Antoran malaknab a propesiya so salaysayen ed ontumbok a paway na Say Panagbantayan?
23 Bilang ununan-nagawa ed manasingger a kadederal to, say modernon Babilonia so sinmabi ed kagonigon a tuloy. Say inkabulok to, sankaugesan ya imoralidad, kasaolan, tan pibabali ed pulitika so niwalwal ed amin a pasen. Diad kaslakan ed Europa, pigpigaran totoo so onloloob ed simbaan. Diad dakel iran sosyalistikon bansa, say relihyon so impasen a bilang “say opium na totoo.” Ontan met, say modernon Babilonia so kababaingan ed mata na amin na saray manangaro ed Salita na Dios a katuaan. Sirin sikato la natan so manaalagar, a singa panangibaga, ed dasig na patey a para ed makanepegan a kapatey to. On, “say aturon panaon so asingger la” a para ed makatenyeg-mundon nagawgawa! Tan diad ontumbok a paway na Panagbantayan, say malaknab ya aralen iran artikulo so manalaysay ed saray propesiya ed Apocalipsis nipaakar ed onsasabin kadederal na relihyoson “balangkantis,” tan ontan met ed interon sistema na bengabengatla nen Satanas.
Panon So Pangebat Yo?
◻ Anto so kabaliksan na pitoran tanol na trumpeta a ginmapo diad Apocalipsis kapitulo 8 ed agew tayo?
◻ Akin a say Kakristianoan so onloob ya ununa ed maruksan kaukom?
◻ Panoy inkadeskribe na panagpulong a kimey na alanaan a nakdaan tan say “baleg ya ulop” diad Apocalipsis kapitulo 9?
◻ Anto so kabaliksan na anunsyo ed Apocalipsis 11:15 a para ed tawen tan dalin?
◻ A singa adeskribe ed Apocalipsis 14:8, panon so inkagba na relihyoson Babilonia nen 1919, tan anto so kabaliksan na saya ed sikato?