Kasin Sikayo So Mabulos ya Ontalineng ed Dios?

SANO basaen tayo so Biblia, tampol a namoria tayo a say kipapasen na totoo nen inmunan siglo diad dakel iran dalan et miulibay ed kipapasen tayo natan. Wala so daakan ya imoralidad tan kapikewetan, nagkalautla ed limog na saray marurutak a kakaabay na Israel, a say imoralidad so mabetbet a kabiangan na relihyon. Say bilay so panduaruwaan a para ed saray durukan totoo, tan walaray problema ed pulitika. Diad taon 66 K.P., say Israel tan Roma so malaknab a linmoob ed bakal. Diad saraman ya agew, a singa natan, nakaukolan na totoo so tulong.

Relihyoso, saray panulibayan ed baetan na saraman ya agew tan say panaon tayo so dakerakel. Saray relihyoson papangulon Judio so mansimpisimpitan. (Mateo 23:15; Lucas 20:46, 47) Diad aliwan-Judion mundo, saray relihyoson awawey so linmaknab a manlapud kapalikdoan ed panag-anito tan panatikon relihyoson kaktangan. (Ipareng so Gawa 14:8-13; 19:27, 28.) Anggan diad balobalon Kristianon kongregasyon, aliwan amin et maabig. Diad sampot na siglo, impasakbay nen apostol Juan: “Dakel iran managpalikdo so pinmaway ed mundo.” (2 Juan 7) On, diad saman met, daakan a bugos a simbawa so niyopresi diad tema na relihyon. Ingen say napanmatalkan a tulong so nitarya.

Kasin Sika La So Tinmalineng ed Si Jesus?

Si Jesus so sakey ya angiyopresi na maabig a simbawa ed saraman ya agew. Saman so makatangguyor a tuloy a saya so nabasa tayo ed epekto to: “Saray ulop so nikelawan ed nengneng na panagbangat to.” (Mateo 7:28) Balet pigpigara ed limog na saraman ya ulop so peteg a tinmalineng ed imbaga to. Si Jesus so nanggawa na saray mamilagron kimey tan angiletneg na maabig ya ehemplo na maridios a panagbilay tan kondukta. Ingen, anggan saray impasen a magmaong-edukadon papangulo so agmalabay ya onnengneng ed kablian na imbaga to. Akin?

Diad malaknab a sukat, saman so sakey a pamaakaran na panaglabi. Arum so nanmudmora ed si Jesus lapud sikato so nanlapud Nazareth. Arum so angipulisay ed sikato lapud sikato so agnanaral diad sakey ed saray eskuelaan da tan andian na koneksion ed mananguley a klase. (Juan 1:46; 7:12, 15, 47, 48) Nagkalalo ni, si Jesus so agnaynay ya angibaga ed saman so labay na totoon dengelen. Sinalita to lambengat so katuaan, tan saray Pariseos, alimbawa, so mabetbet a naopendi ed saray salita to. (Mateo 15:12-14) Peteg, kayari na impampulong to a taloy taon tan kapaldua, saray Judion relihyoson papangulo so amapatey ed sikato. (Lucas 23:20-35) Agaylan sakey a pankanawnawa so asaew da, lapud si Jesus so walaan na “saray balbalikas na andi-anggaan a bilay”!​—Juan 6:68.

No sika so nambilay ed Jerusalem ed saman a panaon, kasin tinumbok mo iray relihyoson papangulo tan saray amin ya ulop? Odino kasin sika so nagmaliw a lukas-kanonotan a manebek ed kabaliksan na ibabaga nen Jesus? No ontan, sika so nayarin singa saman so agnalingwanan a biin nabet nen Jesus legan na pambibiahe to.

Sakey a Tuan Tinmalineng

Sayan bii so nabet to legan a sikato so manbibiahe ed pegley na Samaria. Sikato so yinmurong ed diking na sakey a bobon pian manpainawa, tan say bii so sinmabi a mangasol na danum legan a sikato so wadman. Agtayo amta so ngaran na bii, balet inkurit na Biblia a si Jesus, anggaman ed inkaksawan to, inala to so pankanawnawan mitongtong ed sikato nipaakar ed relihyon.​—Juan 4:5-15.

Natan, walaray dakerakel a rason no akin a sayan bii so nayarin angipukay komon ed impitongtong nen Jesus. Sikato so wala ed duman relihyon​—say Samaritanon dalan na panagdayew so duma a manlapud saray Judios. Ontan met, saray Judios so nanleglemew ed saray Samaritano tan agda labay so milimog ed sikara. Insan, met, saray Judion lalaki so gendagendat ya agmanawag ed saray bibii a sankaili ed sikara. (Juan 4:9, 27) Nagkalalo ni, say Samaritanan bii so manbibilay na imoral a bilay, tan nayarin sikato komon so sinmanok ed posibilidad na kabalaw odino kiparungtal na saray kasalanan to.​—Juan 4:18.

Anggaman kuan, aliwan ontan so inkiwas to. Imbes, sikato so nantepet na makatunongan iran tepet diad ebat ed mataktika, makasagyat-interes a pitotongtong nen Jesus. Diad kurang na tongtongan, sikato so inmarap ed mairap a pasen, a tutukoyen to so relihyoson baetan ed saray Judios tan saray Samaritanos. Si Jesus so inmebat a siuuyamo balet pranka, a kuanto ed bii: “Dadayewen mo so agmo kabat; dadayewen mi so kabat mi.” (Juan 4:19-22) Balet ta say bii so agsinmanok. Say lukas a kanonotan to so akaparaan ya ondengel nin nagkalalo.

Kanian intuloy nen Jesus ed importantin impangiyabawag: “Anggaman kuan, say oras so onsabi, tan natan la, sano saray tuan managdayew so mandayew ed Ama diad espiritu tan katuaan, lapud, peteg, say Ama so onnengneng ed saray ontan a mandayew ed sikato. Say Dios so sakey ya Espiritu, tan saraman so mandadayew ed sikato so nepeg a mandayew ed espiritu tan katuaan.” (Juan 4:23, 24) Saginonor, sayan lukas-kaisipan a bii so angipanengneng na apresasyon diad magunaet ya impangibaga to ed saray kakaabay to ed saman so naaralan to. Sikara, ed biek to, so nananap na malaknab ya impormasyon diad intalineng ed saray salita nen Jesus.​—Juan 4:39-42.

Anto so naaralan tayo ed saya? Bueno, no sikatayo so manbibilay ed sakey a pasen a wala so mabiskeg a gulaan ed rasa, nasyonal, odino relihyon, panon so ikiwas tayo sano say sakey a wala ed duman rasa, nasyonalidad, odino relihyon so mitongtong ed sikatayo? Kasin sikatayo la so ag-oneseesel sano nasisingbat iray bengatlan nayarin mangipanengneng ed sikatayo a sikatayo so lingo? Odino kasin sikatayo, singa samay Samaritanan bii, so mabulos a mitongtong?

Kasin Sika La So Tinmalineng ed Si Pablo?

Sananey ya angiyopresi na maabig a simbawa legan na inmunan siglo et si apostol Pablo. Diad sakey a panaon et si Pablo met so walaan na kaput a kanonotan. Impatua to: “Dati et siak so sakey a manag-ayew tan managpasegsegang tan makinon a too. Anggaman kuan, siak so apanengnengan na panangasi, lapud siak so agmikakabat tan kinmiwas ed kakulangan na pananisia.” (1 Timoteo 1:13) Anggaman kuan, inawat to so katuaan nipaakar ed si Jesu-Kristo tan inwaklit to laray panaglabi. Say ehemplo to so mangipanengneng a say katuaan na Biblia so ontulong a ‘mangigeba ed saray mabibiskeg a portalesa’ diad puso no saratan a bengatla so maneral ed kaabigan tayo.​—2 Corinto 10:4.

Diad bektan sikato so nagmaliw a sakey a Kristiano, si Pablo so linman sitetepel a mangikayat ed maong a balita a naaralan to. Tan singa nailaloan, nabet to so parehon nengneng na inkakaput-kanonotan a wala ed sikato ya aminsan​—balet aliwan diad amin a kipapasen. Diad Beroea, ed baybay a Gresya, aromog to so pigaran mauyamo-ed-puson totoo a walaan na maabig ya ehemplo ed no panon so italineng ed simbawa. Saraya so amidbir ed tanol na katuaan diad saray salita nen Pablo. Sirin, “inawat da so salita a tekep na sankabalgan a gunaet na nonot.” Balet sikara so lukas-impanisip, aliwan mainomay a napalikdo. Sikara so ‘maalwar ya angusisa ed Kasulatan ya inagew-agew no kasin sarayan bengatla so peteg.’ (Gawa 17:11) Nilabay da so nadngel da, anggamano inusisa so autentisidad to ed Biblia sakbay a satan so kumpleton inawat da.

“Seguroen So Amin a Bengatla”

Diad agew tayo, saray Tasi nen Jehova so manguusar na malaem a panaon diad pangipanabang ed maong a balita na Panarian diad saray kakaabay da a wala ed arum a relihyon. Anton kiwas so nanaawat na saray Tastasi? Dakel iran makaaron totoo so maliket a mangawat ed sikara. Balet pigara so agmalabay, tan arum ni ingen so onsanok lapud idadalaw na saray Tastasi.

Saya so makapaermen, lapud say labay a tongtongen na saray Tastasi so tinawag na “maong a balita” ed Biblia. (Mateo 24:14) Nagkalalo ni, ipapaseseg da so awawey nen apostol Pablo, a kuanto: “Seguroen so amin a bengatla; mansiansian malet ed saman so maabig.” (1 Tesalonica 5:21) Anggamano say sakey so walaan na saray mabiskeg ya opinyon, peteg, singa saray taga Beroea tan samay Samaritanan bii, satan a sakey so nepeg a lukas-kanonotan a mangitongtong nipaakar ed Dios ed arum.

Akin a Magmaliw a Lukas-Kanonotan?

Makapaliket, nilasus nilibon totoo ed kada taon so manggagawa na ontan. Dakel so makakaaral a mamidbir ed kakabatan a kinarga na Biblia, tan say resulta so peteg, magnayon iran inkapasimbalo ed bilabilay da. Arum so diad akauna et singa ra si Janet, sakey a biin walad kalangweran a walaan na andukey ya awaran na panagdruga tan panag-abuso ed alkohol a diad kaunoran et nisunson a manalin manbitkel. Natan, si Janet so sakey a maliket a Kristianon too. Say impanaral to ed Biblia so tinmulong ed sikaton makagamor na biskeg diad panumbok ed simbawa nen Pablo: “Linisan tayo so inkasikatayo ed amin a tilol na laman tan espiritu.”​—2 Corinto 7:1.

Si Vernon so sakey ya alkoholiko, tan say panamaley to so wala ed kaatapan na kabuyak. Balet say impanumbok ed simbawa na Biblia so tinmulong ed sikaton manalona ed sayan bisyo tan akipulangan ed asawa to. (1 Corinto 6:11) Si Debra so walaan na mabiskeg a panaglabi ed rasa. Balet say panagaral na Biblia tan pililimog ed saray Kristianon totoo so tinmulong ed sikaton mangiyarunsa ed panagnonot to. (Gawa 10:34, 35) Tan siopa so manisia diad inkapasimbalon agawa ed bilay na sakey a walad kalangweran a balangkantis ed Netherlands sanen, sakey ya agew, akipaknan manaral na Biblia ed saray Tasi nen Jehova? Agnambayag, sikato so abautismoan a Kristianon manbibilay na malinis a panagbilay tan sireresponsablin mangaasikaso ed saray anak to.

Saray ontan ya eksperiensia so naulit-ulit ed dakel a danay legan a saray totoo so ontalineng ed ibabaga na Biblia. Saray bilay da so apaaligwas ed saray dalan a dakel ed sikara so agbalot nanisip a posibli. Lalon importante, agamoran da so sakey a relasyon ed Dios, ta pian nayarian da so manpikasi ed sikaton magunaet a bilang “Ama min wala ed katawenan.” (Mateo 6:9) Tan agamoran da so segurado, agnabuyak ya ilalo ed arapen legan a naeksperiensia ra so katuaan na saray salita nen Jesus: “Saya et kabaliksan to so andi-anggaan a bilay, say pangala ra na pikakabat ed sika, say alenleneg a tuan Dios, tan ed saman so imbakim, si Jesu-Kristo.”​—Juan 17:3.

Saya so nengneng na impormasyon a labay ya isingbat na saray Tasi nen Jehova sano sumpalen da so ministeryo ra tan ondalaw ed saray kakaabay da. Nayari, sikara lamet so ondalaw ed sika ed agmabayag. Kasin sika so lukas-kanonotan a tuloy ya ontalineng ed sikara?

[Litrato ed pahina 7]

Say Samaritanan bii so ag-angiyabuloy ed panaglabi a manebel ed sikato diad italineng ed si Jesus. Kasin sika met so lukas-kanonotan?