Iner So Teplegan Yo ed Simbawa?

KASIN wala so siopaman ya angipasa na bugos a kuarta ed sika? Anganko ta anggapo ni, balet panon so ikiwas mo no wala so angibaga ed sika ya onkakayat so palson kuarta? Kasin sika so onsanok? Siempre andi! Nayarin sika so nagkalalon misalsalamat a sika so apasakbayan tan manalwar ya agpirdien so arum a mairap-nalmoan, puron kuarta a para ed palso.

Maslak ed sikatayo so mangaawat na simbawa odino pasakbay a panapanaon. Tua, arum iran pasakbay so lalon makana nen saray arum. Balet anggamano agtayo nanengneng so personal a kablian na arum a simbawa odino bilin, kasin wala so rason ed isanok lapud satan so inyopresi?

Say katuaan so, amin so mankaukolan na tulong tan simbawa a panapanaon. Anggapo so walaan na amin ya ebat. Diad agpanseguro ed ekonomya tan pulitika a nanliktub ed sikatayo, balang sakey so mankaukolan na mabiskeg ya ilalo ed arapen. Diad sakey a mundon ngalngalin kapaldua ed saray impanaasawa so mansusumpal ed diborsyo, a say panaglukon na katayatdang so laganap, tan say makaalis iran sakit ed sekso so kasmak, wala so pankaganatan ed pankaukolan na sililiing, praktikal a panangiwanwan. Nakaukolan na saray atateng so panitermina ed sankaabigan a dalan diad pamabaleg ed saray anak da ed sayan magutgut a sistema na bengabengatla. Nakaukolan na saray katayatdang so tulong diad kainawaan ed saray magutgut ya emosyon da tan desdes a nayarin singa manatalikebkeb. Balang sakey so mankaukolan na tulong diad pamawala na praktikal iran kablian ed moral diad sakey a mundon say inkaagnapampiyaan, imoralidad, tan karawalan so manpapalalon naawat.

Iner so pakaromogan na ontan a tulong? Anggad natan et say sankaabigan a sengegan na simbawa ed panagbilay et say Biblia, say apuyanan a Salita na Dios. Insulat na kadaanan a salmista: “Say salitam so sakey a silewan na salik, tan sakey a liwawa ed basbas ko.” (Salmo 119:105) Saraman so manbasa tan mangiyaplika ed Salita na Dios so makapaliis ed maslak iran patipatit a wala natan. Satan so sakey a rason no akin a saray Tasi nen Jehova so manguusar na nilasus nilaksan oras kada taon diad idalaw ed saray kakaabay da tan singbaten so Biblia ed sikara. Ingen, dakel a totoo so ag-ontalineng, tan arum ni ingen so onsanok. Akin ya onia so saya?

Saradon Kanonotan​—Akin?

Bueno, dakel a totoo so sensitibon tuloy nipaakar ed panangawat na simbawa, nagkalautla ed tema na relihyon. Anggan saray membro na iglesia so agnaynay a malabay ya ontalineng ed simbawa ya iyoopresi na saray managpulong da. Intagleey na sakey a klero a British: “Amin so walaan na dili ton ideya tan sikara so impasen a maabig a singa saray ideya na managpulong.” Sirin, aliwan makapakelaw a saray totoo so agmalabay ya ontalineng ed sakey a sankaili ed puerta.

Nagkalalo ni, anggaman sikatayo so manbibilay ed sakey a panaon na panduaruwa, dakel so siansia nin walaan na mabiskeg, emosyonal a siglaotan ed iglesia ra. A singa imbaga na sakey ya ensiklopedia, “say relihyon so maniwit ed sankaaraleman iran liknaan na agnabilang a totoo.” Saray ontan a totoo so nayarin agmakanengneng ed pankaukolan na pitongtong ed sakey a wala ed sananey a relihyon nipaakar ed Biblia, anggamano say diskusyon so walaan na kipaakaran diad pananap na solusyon ed saray problema ra.

Arum so agmalabay a maningbat ed Biblia lapud anengneng da so karakel na pansimpisimpitan tan kabulokan ed relihyon. Sikara so naopendi a saray arum iran relihyoson papangulo so angonsenti ed imoralidad, odino sikara so sinmanok diad andi-baing ya inkaagum na dakel iran ebanghelista ed telebisyon. Anganko ta sikara so indepak sano sakey a klero so mangusar na autoridad to a manuporta ed sakey a dapag a sumpad sananey diad labanan ed pulitika. Diad sikara, say relihyon so singa pansesengegan na dakel a problema nen say nasolbar to.

Saray probleman irereklamo na saray ontan so petepeteg. Diad relihyoson panagsalita, wala so dakel a “bugos a kuarta” ya onkakayat. Balet petepeteg, say agpanlabay a pangawat ed mablin tulong a manlapud Biblia a para ed sayan sengegan so aliwan lohikal a singa pangipupulisay na pangawat ed puron kuarta lapud bugos iran kuarta ya onkakayat!

Tan singa asalambit la, amin tayo so mankaukolan na simbawa ed sayan mundo na mairap a panagpili tan mapeligron kipapasen. Kasin wala so anggan anton dalan ed pagmaliw ya asimbang ed pamaakaran na panangawat ed simbawa? Kasin agnakaukolan odino lingo ni ingen so pitongtong ed sakey a wala ed duman relihyon nipaakar ed Biblia? Kasin posibli so pagmaliw a lukas-kaisipan diad pangawat ed maabig a simbawa tan ingen agnapalikdo na bugos a simbawa? Anto so ibabaga na Biblia nipaakar ed saya?