Nipawil a Paraiso Mangigloria ed Dios
“Igloriak so mismon pasen na saray salik.”—ISAIAS 60:13.
1, 2. (a) Diad panamegley na propeta ton Isaias, anto so impasakbay na Dios nipaakar ed dalin? (b) Onnengneng ed sanlibon taon diad arapen, anto so nanengneng tayo?
PINALSA nen Jehova so dalin a bilang sakey a planeta ed leksab na sali to, a bilang piguratibon gagatinan-na-sali to. Diad panamegley nen propeta ton Isaias, impasakbay na Dios ya ‘igloria to so mismon pasen na saray sali to.’ (Isaias 60:13) Diad tulong na apuyanan a Biblia, nanengneng tayo, a singano diad panamegley na mabiskeg a telescopyo, so sanlibon taon diad arapen na too. Agaylan makapalikliket so nanengneng na saray mata tayo! Say interon dalin so masnag ed kalimgasan a pinawala na sankabalgan a Hardinero ed amin a talba. Say Paraiso so nipawil ed sankadalinan diad katooan!
2 On, say madibinon Supremon Dios ya angigapo ed kiwawala na too ed sakey a hardin a paraiso so akankaisipan ed sankabalgan a liket na too. Agaylan maaron Manamalsa a peteg ed katooan, a diad sikato et makabaliksan so balikas a, “say Dios so aro”! (1 Juan 4:8, 16) Diad nipawil a Paraiso, saray matatken a lalaki tan bibii ed andi-matik ya atooan ya inkayadyari so manaamong bilang maarowan a sanaagin lalaki tan bibii. (Isaias 9:6) Pinakiwas na aro, sikara so wala ed ayadyarin katutulok ed maglorian Manamalsa na tawen tan dalin, si Jehova a Dios.
3, 4. (a) Diad anton dalan a say tawen tan dalin so manpetekan ed balang sakey? (b) Panon so ikiwas na saray angheles sano say Paraiso so nipawil ed dalin?
3 Nilibulibon taon ed akauna, diad madibinon apuyanan a salaysay na ayaman to, sarayan makapasagyat a salita so sinalita na Dios ed pinili ton totoo: “Saray mismon katawenan so tronok, tan say dalin so gagatinan na salik.” (Isaias 66:1) Say gloria na “gagatinan-na-sali” to, say Paraison dalin so matukotukoy a mipetekan ed gloria na trono to ed agnanengneng iran katageyan.
4 Diad panaon na inkapalsa na dalin, saraman so katambayan na trono na Dios diad mangatatawen ya ayaman so angimano ed mangaraldalin ya ayaman ed leksab. Agaylan sikara so alikeliketan legan ya anengneng na saray mata ra so maglorian kasnagan! Panon so kasebelan da diad bansag a pangilaldis da na kanta? (Ipareng so Sofonias 3:17, Revised Standard Version; Salmo 100:2, The Jerusalem Bible.) Say aliketan tan maliket ya Amalsa so amuyan ed mangaraldalin ya eskriba to a mangiretrato ed dugarugan salaysay na mangatatawen ya eksena, a kuanto: “Saray bibitewen na kabuasan so magaygayagan kinmelyaw a nankakasakey, tan amin na saray anak na Dios so ginmapon inmeyag ed liket.” (Job 38:7) Agaylan nagkalalo a saray anghelikon anak na Dios so onkelyaw ed gayaga, diad gloria na Dios, sano nipawil so Paraiso!
5. Panon so nepeg a liknaan tayo nipaakar ed pakagamor na orihinal a getma na Dios nipaakar ed dalin?
5 Makapaligsay-puson peteg ed sikatayo so impamaseguro na apuyanan a Masanton Kasulatan a say engranden pakagamor ed sakey a paraison dalin so getman ginagala nen Jehova a Dios a nanlapu ed gapo. Sayan makapagayaga, manangitarok-na-dayew a pantok na gagala na Dios ed sayan dalin so maptek a bengatlan ilaloan ed sakey a Dios a lawas magloria ya anggapo so isasaew diad panangipatnag na karlangan to. Amin a dayew so onla ed sikato!—Salmo 150:1, 2; Isaias 45:18; Apocalipsis 21:3-5.
Saray Napaoli So Ontulong diad Panangipawil ed Paraiso
6. Kayari na Armagedon, panon a natooan so dalin?
6 Anggaman saray niliktar ed Armagedon so relatibon daiset ed bilang, aliwan sigpot a diad panag-ilalak ed biang da a say dalin so nagnap a natooan. Si Jehova met so ‘mangigloria ed pasen na sali to’ diad pangipawil to na bilay ed saraman so wala ed pakanodnonotan a lubok tan sinmabi ed silong na gungguna na dondon bagat nen Kristo. Saraya, met, so nawalaan na pribilehyo diad pibiang ed makapaliket a kimey na panangipawil na mangaraldalin a globo diad sankasantingan a paraiso.—Gawa 24:15.
7. Antoran salita nen Jesus so lawas nonoten na saray niliktar ed Armagedon?
7 Saray niliktar ed Armagedon so lawas sinononot ed makapaliing-kamarerwa iran salita na Katawan a Jesu-Kristo diad samay inkagawa sanen apakiwas a mangibaga: “Agmankelaw ed saya, lapud say oras so onsabi ya amin na saraman so wala ed pakanodnonotan a lubok so makadngel ed boses to tan ompaway.” (Juan 5:28, 29) Agaylan oras sano saray inaatey a totoo ed pakanodnonotan a lubok da so onggapon makadngel ed boses na Anak na Dios a mangibabaga ed saray salitan miulibay ed saraman so nibaga ed si Lazaro, a say bangkay to so wala ed lubok diad Betania: “Lazaro, paway ka!”—Juan 11:43.
8, 9. Siopa so nayarin ununa a napaoli ed apasimbalon bilay diad dalin, a mangitarok na anton liket ed saray niliktar ed Armagedon?
8 Siopa ra so nayarin ununa a napaoli ed apasimbalon bilay ed dalin ed leksab na Sanlibon Taon ya Uley nen Jesu-Kristo tan onebat ed ganggan to? Makatunongan a say “arum a karnero” ya inatey legan na kaunoran iran agew sakbay na anggaan na sayan sistema na bengabengatla. Naeksperiensia ra so masasakbay a kioli. (Juan 10:16) Sikara so nayarin aliwan tanton nairapan diad pangiyarunsa ra na inkasikara ed balon mundo.—Ipareng so Mateo 25:34; Juan 6:53, 54.
9 Agaylan makapaliket ed saray niliktar ed Armagedon sano nanengneng dan napaoli iraman so “arum a karnero” ya inatey kaleganan na kapolian ed sakbay na “baleg a kairapan”! (Mateo 24:21) Dingan na malinew iran pakabidbiran, saray niliktar ed Armagedon so makabidbir ed sikara, abrasaen da ra, tan kaiba daran mangitultuloy ed nankakasakey a serbisyo ed Sankatagyan a Dios!
10. Diad pakaliktar ed Armagedon, anto so nayarin natasian yo?
10 Diad pagmaliw a sakey ed saray niliktar ed Armagedon, nayarin natasian yo so kioli na ununa ed saray dilin mangaraldalin a kakanayon yo. Panon kasi so emosyonal ya epekto na saya ed sikayo a singa saraman so atateng ya akanengneng ed si Katawan a Jesus ya amaoli ed manedad na labinduay taon ya anak a bii a mabilay ed saray mailiw a taklay da? “Tampol sikara so nanabay ed baleg a liket.” (Marcos 5:42) A, peteg, agnibalikas a gayaga so wala ed sikayo diad kioli na saray inaatey a manlapud Hades tan ed dayat. (Apocalipsis 20:13) O, agaylan maglorian kaimbuas itan, kaimbuas a magano lan wadia!
“Piprinsipe ed Amin a Dalin”
11, 12. (a) Anto so idadanet na Salmo 45:16? (b) Manlapud limog na siopa a say Ari, si Jesu-Kristo, so nayarin manuro na “saray piprinsipe ed amin dalin”?
11 Diad pangagamil na pakayari to a mamaoli ed totoon inaatey ya angigatonan to na ayadyarin atooan a bilay to bilang sakey a dondon bagat, nayarian nen Jesus ya itarok ed kasumpalan so Salmo 45:16. Sayan salmo so mapropetikon nipaarap ed si Jesu-Kristo bilang nitandoron Ari: “Diad pasen na saray [mangaraldalin] ya ateng mo et magmaliw iran anak mo, a sikara so turoen mo a piprinsipe ed amin a dalin.” Sayan salmo so mangidadanet a si Jesu-Kristo so magmaliw a mangatatawen ya ama ed saray anak dia ed dalin tan sikato so mangitandoro ed saray anak a manlapu ed limog da bilang “piprinsipe ed amin a dalin.” Bilang “anak nen David” tan bilang panguloan ya anak na Judeanan birhen Maria, si Jesus so walaan na mangaraldalin iran totoon ateng a mamapawil ya anggad say inmunan ateng, si Adan.—Lucas 3:23-38.
12 Kasin ibabaga na Salmo 45:16 a saraman so datin atateng nen Jesus ed laman so magmaliw iran anak to diad pamaoli to ed sikara a manlapud saray inaatey? On. Kasin ibabaga met na Salmo 45:16 a nisesengeg ed panamagalang to ed poli to a nanlapud sikara, ipanengneng nen Jesus ed sikara so nikadkaduman maarin pabor tan turoen to ra lambengat a magmaliw a “piprinsipe ed amin a dalin” ed Paraison kipapasen to? Andi. Say kasumpalan na propesiya ed ontan a nengneng so mangipalugar lambengat ed limitadon bilang na saray “piprinsipe” ed amin a dalin. Nilikud ed satan a katuaan, aliwan amin na sarayan atateng to so ontanlan matalona no nipaakar ed merito na nikabkabiig ya inkaprominte ed dalin kaleganan na Milenyon Uley to. Say Ari, si Jesu-Kristo, so walaan na agnabilang a nagkalalo nen saray mangaraldalin ya atateng to a turoen bilang “piprinsipe”—kualipikadon niliktar ed Armagedon, ed apaolin “arum a karnero,” a pati saray sakbay-Kristianon totoo na pananisia. Manlapud limog na amin na saraya, nayarian to so manuro na saray kualipikadon manepeg a mamemben na maprinsipen inkabetang bilang mangaraldalin iran representante to.
13, 14. Antoran napaoli so napribilehyoan a nanengneng na saray niliktar ed Armagedon diad saray dilin mata ra?
13 Isipen pa so ontan iran nidasig ed kioli diad leksab na Mesianikon Panarian. Nia! Kasin napanisiaan tayoray mata tayo? Wadtan si Abel, say inmunan toon martir, tan si Enoc, a nantultuloy ya akipanakar ed tuan Dios. Wadtan, met, si Noe, say managgawa na biong. Wadtan si Abraham, Isaac, tan Jacob, atateng na nasyon na Israel. Wadtan si Moises (ed saserdoten tribu na Levi) tan si David ya akagawaan na andi-anggaan a sipanan nipaakar ed Panarian. Tan wadtan, si Isaias, Jeremias, Ezequiel, Daniel, tan amin nin arum a managsulat-na-Biblian Hebreon propetas ya angga ed sankaunoran ed sikara, si Malaquias, tan, siempre, si Juan a Managbautismo tan ontan met ed si Jose, say nantagibin ama nen Jesus.
14 Diad sakey ya inkagawa et inkuan nen Jesus ed saray Judios a “nanengneng da si Abraham tan Isaac tan Jacob tan amin na saray propetas ed panarian na Dios, balet [sikaran mismo so] nibantak ed paway.” (Lucas 13:28) Say “baleg ya ulop” na mangaraldalin iran niliktar ed “baleg ya agew na Dios a Makapanyarin-amin” so napaboran ed pribilehyo na literal a pakanengneng ed kioli nen “Abraham tan Isaac tan Jacob tan amin a propetas” diad Paraison dalin tan diad maarin serbisyo ed silong na Panarian na Dios ed panamegley na “Maandon Ama,” si Jesu-Kristo.—Apocalipsis 7:9, 14; 16:14; Isaias 9:6.
15. Anton agnaparengan a pribilehyo so manatalaran ed saraman so makaliktar ed Armagedon?
15 Agaylan makapaligsay-puso ed sikayon makaliktar ed anggaan na sayan peles a mauges a mundo so pangikumpara na nota ed si Noe tan diad maapit a pamilya to, “waloran kamarerwa,” ya akaliktar ed anggaan na inmunan mundo diad sankagloboan a Delap nen 2370 K.K.P.! Anggapo ed amin ya inkamaando so walaan na saray eksperiensia a singa sikayo tan sirin nayarian yo so manserbi a bilang Tasi nen Jehova a Dios ed sayan matalona, agnaulit a pamaakaran.—1 Pedro 3:20; Marcos 13:19; 2 Pedro 3:5-7.
Anonotan So Manangiyansakit a Managgaway-Mauges
16, 17. (a) Sano nonoten nen Jesus so manangiyansakit a managgaway-mauges, anton pribilehyo so onwala ed saray niliktar ed Armagedon tan saray arum a mabilay ed satan? (b) Anton ilalo so abrasaen no nipaakar ed samay napaolin managgaway-mauges?
16 Agpanduaruwaan, diad satan et say panangipawil ed Paraiso ed dalin so mantutultuloy a nagagawa. Say nankasalanan-ed-ganggan a nipasak ed Kalbaryo a kaiba nen Jesus tan angikuan diad impamidbir ed nisulat ed tagey na ulo To, “Jesus, nonot moak sano onsabi ka’d panarian mo,” so napaoli ed mangaraldalin a bilay diad nipawil a Paraiso. (Lucas 23:42) Pribilehyo na saray niliktar ed Armagedon tan saray arum a mabilay ed satan so pangabrasa ed sikato a manlapud saray inaatey. Sikato so bangatan dan sigpot nipaakar ed manuuley lan Ari, si Jesu-Kristo, a diad sikato so angipanengnengan to na aralem a simpatya nen Nisan 14 ed taon 33 K.P.
17 Say Katawan a Jesu-Kristo so ag-onsaew a mannonot ed sikato kaleganan na uley To ed sanlibon taon. Andi-duaruwan saman a manangiyansakit, apaolin managgaway-mauges so mangipatnag na apresasyon to ed manuley lan Ari, si Jesu-Kristo, ya akautangan to na inkioli to, diad pamaneknek to na katooran to ed Sankatalbaan a Soberano, si Jehova a Dios. Insan sikato so nibilang a makanan manggayaga a manbilay ed Paraison balon mundo ed amin ya inkamaando a dingan na amin nin nipawil, matulok a katooan.
Bilay ed Sankagloboan, Nipawil a Tanamanan na Eden
18. Anto so itsura na bilay ed nipawil a Paraiso?
18 Diad nipawil a Paraiso, balang sakey so kaaro na amin. Say bedber na sankamundoan a siglaotan na pamilya so nalikna ed kaaralman na kamarerwa na sakey. Amin so mantatalosan ed balang sinansakey. Sikara so mansalita na parehon lenguahe ed mundo. Nayarin say orihinal a lenguahe na too, a sinalita na amin ed inmunan 1,800 taon ed kiwawala na too—manlapud inkapalsa nen Adan nen 4026 K.K.P. ya angga ed agew nen Peleg (2269 ya anggad 2030 K.K.P.), lapud “diad saray agew to et say dalin, [salanti, populasyon na dalin] so naapag-apag.” (Genesis 10:25; 11:1) Balang sakey so manggayaga ed pribilehyo na pambilay, tan kada balon agew so ilugay na pisasalamat ed niarum ya agew ed bilay. Saray kaleteyan ed laman so ag-ombaleg legan ya ilabas na panaon. Saray puersa ed pisikal so napabiskeg, tan saray laman so ag-onkapuy.—Ipareng so Job 33:25.
19. Anto so naimano nipaakar ed saraman so akauna lan walaan na kaleteyan?
19 Tan nia! Say aminsan a lupoy so manakar, on, manlukso ed gayaga. Saray abalang a taklay tan bitking so mamilagron nipawil. Say datin bulag so makanengneng, say telek so makadngel, say umel so mansalita tan mankanta ed panggayaga. (Ipareng so Isaias 35:5, 6.) Say agpakanengneng ed porma na too tan pigura so naandipat la. Say inkalaki na too so masansanting a simbangan na atooan ya inkabii. (Genesis 2:18) Say atooan ya inkayadyari so mangigloria ed si Jehova a Dios, say Manamalsa ed ayadyarin atooan a laman.
20. Anto so naimano nipaakar ed puersa na palsa, abaston tagano, say palsan ayep, tan panon so kausar na dalin?
20 Say interon dalin so magmaliw a sakey a sankagloboan a sankarakpan a pasen. Anggapo ed pasen na dalin so panlapuan na anggan anton balita na kakelangan odino makadesyang ya uran odino makaderal iran aluboob, bagyo, tan tornado. (Ipareng so Marcos 4:37-41.) Amin a puersa na palsa so nitarok ed inkayadyarin inkasimbang diad panggawa ed interon dalin ed sankarakpan ya ayaman a pambilayan. Anggapo la so kakulangan na tagano ed inerman a pasen, lapud say dalin so mamawala na bunga to ed inkagnap. (Salmo 72:16) Say kareenan tan kaligenan so onwala la ed sankamundoan diad namparan ayep tan too, a singa imbaga nen Jehova: “Aglara manggawa na pamasakit odino deral ed amin a masanton palandey ko.” (Isaias 11:9; nengnengen met so bersikulo 6-8.) Diad onian dalan et say dalin so nagawan makapaliket ya ayaman a pambilayan tan pangitarokan na panagdayew tan serbisyo ed si Jehova a Dios, say Manamalsa tan Akankayarian na dalin. Sikato so kayarian to diad kanepegan na impamalsa, kanepegan to so nausar ed nengneng a panliketan to tan mangigloria ed sikato.—Ipareng so Isaias 35:1, 2, 6, 7.
21. Panon so panmoria na arondon a katooan ed amin a bengatla ed dalin, tan anton musika so narengel?
21 Makarepreskon balo—ontan so pagmaliwan na amin a bengatla ed dalin a para ed arondon a katooan ya agnin balot nanayam ed dalem na Paraison hardin na Eden a ginapoan na atooan a bilay ed marakerakep ya inkayadyari! (Apocalipsis 21:5) Agaylan makapaliket a musika, instrumental tan bokal, so narengel—amin et mangidadayew ed si Jehova!—1 Awaran 23:4, 5; Salmo 150:3-6.
22. Panon so liknaan na pambilay ed Paraison balon mundo?
22 Agaylan makapakelaw so panayam ed sakey a dalin a say atooan a bilay so daakan ed nagnap tan amin na saray sengegan na ipapatey nisesengeg ed orihinal a kasalanan nen Adan so napunas la! (Ipareng so Juan 10:10.) On, sikato so sakey a dalin a ditan et pangisindagan na amin a naabobonan a toon pinalsa ed indengan tan ulibay nen Jehova a Dios ya akapalsaan na inmunan too ya Adan! (Genesis 1:26, 27) Say dalin ed satan so aliwa lan kamata ed saray serapin, ed saray kerubin, tan ed saray masnag iran angheles ed tawen. Sano ipaarap daray karakpan na kalupaan ed dalin, ya onkunineng ed satan diad aparakpan a malaparaison kalimgasan, sikara lambengat so mangidayew tan misalsalamat diad samay Sakey a say indengan to et walaan ira na pribilehyon nanengneng da a direkta—si Jehova, say Sankatalbaan a Soberano.—Mateo 18:10.
Sakey a Maliket, Andi-anggaan ya Arapen
23. Anto so posibli nipaakar ed saray alanaan a Kristianos, tan diad anton resulta ed saray manaayam ed mangaraldalin a Paraiso?
23 Walad sakup na posibilidad tan pakagawa ya, arum ya agew ed arapen, say kangaranan na saraman so alanaan a Kristianos ya agawan say “inkatawag tan inkapili ra” so diad mangatatawen a Panarian et maseguro tan sikara so apapalar diad sayan mangatatawen a kioli a nipalapag ed nagnap nipaakar ed pakakabatan na atooan a pamilya ed mangaraldalin a Paraiso. (2 Pedro 1:10; Salmo 87:5, 6) Sirin, say kaandi na 144,000 iran nailalak-ed-espiritun alanaan a babangatan nen Jesu-Kristo a manlapud mangaraldalin a Paraiso so sigpot a natalosan diad kapenek na amin tan diad sigpot-puson panggayaga ed sikara tan kaiba da ra.
24. (a) Anto so agawaan nen Jehova nipaakar ed “gagatinan-na-sali to”? (b) Panon so pikabat tayo a say balon mundo so agbalot mangangga, tan anton mapropetikon kanta so nasumpal?
24 Maliket so andi-anggaan ya arapen na amin a mansiansia ed agnabuyak a debosyon ed si Jehova, say petepeteg a Soberano ed amin a talba. Say kumportablen napno a Paraison dalin so magmaliw a manepeg ya ayaman, magalang ya ayaman, bilang “gagatinan-na-sali” a nayarin piguratibon toonan na sali na Dios. On, diad amin ya inkamaando et si Jehova so mangigloria ‘ed mismon pasen na sali to,’ tan amin a katooan so pauleyan ed sikato ya anggapoy kibot! (Mateo 5:34, 35; Gawa 7:49) Say balon mundo so magmaliw a sakey a mundon andian na anggaan lapud “diad inkadaakan na maprinsipen uley tan kareenan et anggapoy anggaan.” (Isaias 9:7) Insan, say mapropetikon kanta na mangatatawen iran angheles ed inkianak nen Jesus ed Betlehem na Judea nen 2 K.K.P. so nasumpal: “Gloria ed tagey diad tagey ed Dios, tan diad dalin et deen ed limog na saray totoon maong-linawa.”—Lucas 2:13, 14.
25. (a) Anto natan so apresyaen na saraman so kabiangan na “baleg ya ulop” na “arum a karnero”? (b) Anto so nepeg ya impapuson pilalek tayo?
25 Saraman so kabiangan na “baleg ya ulop” na “arum a karnero” na maabig a pastol so mangapresya ed saray manamaligsay-kamarerwan salita na sipan ed nipawil a Paraiso. Pribilehyo ra so mikasakey ed organisasyon na Dios natan tan diad pagmaliw a magunaet a mibibiang ed kimey ya impasakbay nen Katawan a Jesu-Kristo, say panangipulong na maong a balita na Panarian ed amin a panaayaman a dalin a para ed unor a pantasi. (Mateo 24:14; Marcos 13:10) Say masimoon, impapuson pilalek tayo bilang Tastasi nen Jehova et say pamemben na katooran tayo ya agnamantsaan ed amin ya inkamaando, diad andi-anggaan a gloria tan kaalangon na Sankatalbaan ya Soberano, si Jehova a Dios, tan diad silong na maarin pananguley na bogbogtong ya Anak to, si Jesu-Kristo. “Hallelujah!”—Apocalipsis 19:1, 3, 4, 6, RSV, New International Version; Uliran 10:9.
Panon So Pangebat Yo?
◻ Anton sipan so ginawa nen Jehova nipaakar ed piguratibon gagatinan-na-sali to, say dalin?
◻ Siopa so ontulong diad panangipawil ed Paraiso?
◻ Manlapud limog na siopa a say Ari, si Jesu-Kristo, so manuro ed “saray piprinsipe ed dalin”?
◻ Anton manamaligsay-kamarerwan eksperiensia so nayarin kayarian yo sano nagawa so kioli?
◻ Anton arapen so manatalaran ed saraman so mamemben na agnabuyak a debosyon da ed si Jehova?