Mamatatken Bantayan Yo So Nimatalek ed Sikayo
“Imanoen yo so inkasikayo tan ed amin a pulok, ya anuroan na masanton espiritu ed sikayo a manangasikaso, pian pastolan so kongregasyon na Dios, a sinaliw to ed dala na dilin Anak to.”—GAWA 20:28.
1. Anto so ilaktip na Kristianon talek?
SI Jehova a Dios so angiter ed saraman so wala ed mangaraldalin ya organisasyon to na sakey a makapakelaw a talek. Balet anto so sakey a talek? Sikato so bengatlan mablin nipabtang ed sakey a toon mangisaklang na pipalinewan. Say Kristianon talek so mangisasakup “ed padron na saray mabunigas a salita,” say katuaan a niiter ed panamegley na Kasulatan tan imparungo na “matoor tan makabat ya aripen” bilang “tagano ed manepeg a panaon.” (2 Timoteo 1:13, 14; Mateo 24:45-47) Sayan talek so mangisakup ed ministeryon nisiglaot ed katuaan, a nepeg a nipulong ed dalem tan paway na kongregasyon. (2 Timoteo 4:1-5) Saray manangiyabawag na Panarian, a pati saray tinuro-na-espiritun mamatatken, so nepeg a mamabli ed sayan talek bilang sankablian.
2. Saray mamatatken so walaan na anton kaaruman a talek, tan anto so imbaga nen Pedro nipaakar ed satan?
2 Saray Kristianon mamatatken so walaan na kaaruman a talek—say responsabilidad na panangipastol ed pulok na Dios. Diad sayan pamaakaran, insulat nen apostol Pedro: “Diad saray mamasiken ed limog yo et sayan bilin so iter ko, ta siak met so sakey a masiken ed sikara tan sakey a tasi ed irirap nen Kristo, sakey a minanabang ed anggan diad gloria a nipatnag: Pastolan so pulok na Dios a nimatalek ed sikayo, aliwan napilpilit, noagta mabulbulos; nisay diad aro ed kasaolan a pananubo, noagta sigugunaet; nisay pakatawan ed saraman so tawir na Dios, noagta magmaliw ya uliran na pulok. Tan sano say manunan pastol so nipatnag, sikayo so mangawat na ag-onkupas a balanget na gloria.”—1 Pedro 5:1-4.
3. Saray Kristianon mamatatken so nepeg a sengegan na anto?
3 Saray Kristianon mamatatken “so nepeg a magmaliw a singa sakey ya amotan a pasen a manlapud dagem tan sakey a pasen na siruman a manlapud bagyo, singa agus na danum ed amagan dalin, singa anino na baleg a bato ed naklangan a dalin.” (Isaias 32:1, 2) Kabaliksan na saya a saray mamatatken so nepeg a lapuwan na kaligenan, kareenan, tan kabiskegan ed pulok na saray malakarneron ariripen na Dios. “Nagkalalo nen say gendat” so nakaukolan ed saray mamatatken odino katambayan-a-papastol, na pulok lapud sikara so “angimatalkan na dakel.” (Lucas 12:48) Tan seguradon walaan ira na mablin talek a nepeg a bantayan.
Akin a Nimatalek ed Sika?
4. Akin a saray dakerakel a mamatatken so nakaukolan?
4 Say kiwawala na masulok a 60,000 kongregasyon na saray Tasi nen Jehova ed sankamundoan so mankakaukolan na nilibulibon kualipikadon lalaki ed espiritual a mangasikaso ed pulok na Dios. Walaray dakel a mamatatken ed kada bansa, tan saya so sakey a sengegan na gayaga. Diad sankamundoan et wala so promedyo na ngalngalin 60 manangiyabawag na Panarian ed kada kongregasyon. Sirin, wala so baleg a kimey a gawaen na saray mamatatken.—1 Corinto 15:58.
5. Diad anton letnegan so pribilehyo na panlingkor bilang sakey a matatken a ninatnat ed sakey a laki?
5 No sika so sakey a matatken, akin a sayan apapalar a pribilehyo so niiter ed sika? Lapud sika so akagawa na saray bengatla, tan sika so awalaan na espiritual iran kualipikasyon. Singa bilang, nayarin sika so magunaet a nanaral ed Salita na Dios. (Josue 1:7, 8) Sika so nayarin akibiang a maseseg diad lawak na ministeryo, a tutulongan met so arum a magmaliw a manangiyabawag na Panarian. Diad “inkasubok ed kinepeg ya ununa,” sika so nanserbin matoor a bilang sakey a ministeryal ya aripen. Sika so ‘dinmampot,’ odino ginawam so impagmaliw a kualipikado, magmaliw a sakey a matatken, ya inapresyan say pagmaliw a sakey a manangasikaso so “sakey a maabig a kimey.” (1 Timoteo 3:1, 10) Singa si Timoteo, sika so “awalaan na maong a pakatongtongan ed saray agagi.” (Gawa 16:2) Sanen nirekomenda bilang sakey a matatken, nayarin sika so wala ed saginonor a 20’s odino mas matatatken tan eksperiensiado ed bilay. Say kongregasyon so nanrespeto ed sika bilang sakey a matatken ed espiritual, mainomay ya asinggeran ya agin laki a makayarin mangiter na epektibon Makasulatan a simbawa tan manamemben na kumpidensialidad.—Uliran 25:9, 10.
No Panon So Pambantay ed Nimatalek ed Sika
6, 7. Iter na 1 Timoteo 4:13-15 so anton simbawa ya ontulong ed sakey a laki a manbantay ed nimatalek ed sikato bilang sakey a matatken?
6 On, no sika so sakey a matatken, sikato so diad maabig iran rason a say Kristianon panangasikaso so nimatalek ed sika. Tan agaylan pribilehyo so aliknam! Balet panon mon nabantayan so nimatalek ed sika?
7 Sakey a dalan na pambantay ed nimatalek ed sika bilang sakey a matatken et say pagmaliw a positibo tan magunaet diad panangasikaso ed saray kimey mo. Amin tayo so walaan na saray nipabtang a kimey ed nanduruman responsabilidad diad organisasyon nen Jehova. Sirin, pansiansiaen mo so pasen mo tan magmaliw a kontento diad ‘pangikiwas mo na inkasika a bilang memelag.’ (Lucas 9:46-48; ipareng so Uko-ukom 7:21.) Panliketan moray pribilehyom, tan agbalot ‘mankikimey ed mangiras a lima.’ (Uliran 10:4) Agmanmemeneng, noagta diad tulong nen Jehova, onaligwas ed amin a pamaakaran na ministeryo. Peteg, tumboken iyan simbawa ya inter nen Pablo ed si Timoteo: “Mantultuloy a gawaen mo so panagbasa ed lapag, diad panamilin, diad panagbangat. Agmo papaulianan so langkap ed sika a niiter ed sika diad panamegley na pasakbay tan sanen say ulop na mamasiken so angitapew na lima ra ed sika. Morekdeken mo irayan bengatla; sikara so pampelengan mo, pian say iyaaligwas mo so nipatnag ed amin a totoo.”—1 Timoteo 4:13-15.
8. Anto so ontulong ed sakey a matatken diad pangiter na maabig a simbawa tan mangipanabang na bengatlan makapayaman ed espiritual diad saray miting?
8 Seguroen a pansiansiaen mo so maabig, mabunan eskedyul na personal a panagaral. Bilang sakey a matatken, sika so manepeg a nailaloan a mangiter na maabig a simbawan Makasulatan. Pian nakinlongan mo so inkasika ed sayan responsabilidad, kasin abasam so interon Biblia a tekep na panagmorekdek, nayarin diad dakel a danay? (Uliran 15:28) Anto so nipaakar ed asainmin mo ed plataporma? Sikara so iparaan mon maong, sipipikasin kerewen so tulong nen Jehova ta pian nipinabang mo so bengatlan makapayaman ed espiritual diad saraman so presente ed saray miting tayo. Saray mamatatken ed partikular so nepeg a ‘mangibaga na maabig diad kapabiskegan, pian nipinabang komon so maabig ed saray dumerengel.’—Efeso 4:29; Roma 1:11.
9. Unong ed 2 Timoteo 4:2, anto so nepeg a gawaen na sakey a matatken?
9 Bilang sakey a matatken, imanoen so bilin nen Pablo: “Ipulong so salita, gawaen ed maabig a panaon, diad magulon panaon, mamaat, manimbawa, mamilin, a tekep na amin ya andukey-a-panangitepel tan dunong na panagbangat.” (2 Timoteo 4:2) Si Pablo so mapaga nipaakar ed apostasya lapud arum ed kongregasyon so ‘manlalaban ed salita,’ akibiang ed ‘makulangkulang iran suppiatan,’ tan ‘sikara so aliwan-maapabor a niparungtal ed katuaan.’ (2 Timoteo 2:14-18, 23-25; 3:8-13; 4:3, 4) Balanglan say kongregasyon so manasagmak na magulo odino maapabor a panaon, anggaman kuan, si Timoteo so “mangipulong ed salita.” Saya so mamabiskeg ed saray kapananisiaan a manresiste ed apostasya. Miulibay natan, saray mamatatken so manepeg a mangipulong ed mananalos a Salita, odino mensahe, na Dios, a sabien to so puso tan ipaseseg to so pananumbok ed saray estandarte nen Jehova.—Hebreos 4:12.
10. Akin a say sakey a matatken so nepeg a mankimey a maparanay diad lawak na ministeryo a kaiba toray membro na pamilya to tan saray arum?
10 Diad pansalita a tekep na autoridad, say sakey a matatken so nepeg a manbilay a mitukoyan ed Salita na Dios. Balet sikato so agnagnap a mamabantay ed nimatalek ed sikato no sikato so ‘mangipulong ed salita’ lambengat diad plataporma ed dalem na kongregasyon. Diad parehon konteksto et pinaseseg nen apostol Pablo si Timoteo: “Gawaen so kimey na sakey ya ebanghelisador.” Pian ‘nasumpal mon nagnap so ministeryom’ bilang sakey a matatken, nepeg mon ipulong so Salita na Dios “ed lapag tan diad kabkaabungan.” (2 Timoteo 4:5; Gawa 20:20, 21) Sirin, mankimey ed lawak na ministeryo a kaibam iray membro na pamilyam. Saya so ontulong ed espiritual a bedber ed baetan mo tan say asawam tan mangunggunan baleg ed saray anak mo. Usaren so arum a panaon, met, diad pibiang ed kimey na panagpulong a kaiba so arum a membro na kongregasyon. Saya so mamabiskeg ed espiritual a siknol tan pabiskegen to so arowan na sanaagi. (Juan 13:34, 35) Siempre, nepeg a pambanikelan na sakey a matatken so inkasimbang diad panangapag ed mablin panaon ed baetan na pamilya to tan say kongregasyon. Say pangusar na pakatebek so mangamper ed sikaton mangideboto na dakerakel a tuloy a panaon ed sakey, diad pakapaulian tan kaatapan na sananey.
11. Akin a say sakey a matatken so nepeg a mankimey na impasya diad pamadaak na kapabilidad to bilang sakey a managbangat?
11 Pian nabantayan so nimatalek ed sika bilang sakey a matatken, kimeyan met a maong so pamadaak na kapabilidad mo bilang managbangat. “Saman so manbangat, magmaliw ya ontan komon ed panagbangat to,” so inkuan nen Pablo, “odino siopaman a manbilin, magmaliw ya ontan ed panagbilin.” (Roma 12:7, 8) Lapud say sakey a managbangat so ontalindeg a bilang sakey ya instruktor ed arap na arum, sikara so walaan na kanepegan ed panilalo na malaem ed sikato. No say sakey a matatken so nalingon seryoso diad panagbangat to tan saya so pansengegan na problema ed saray kapananisiaan, sikato so ukomen na Dios. On, saray managbangat “so mangawat na ambebbelat a kaukom.” (Santiago 3:1, 2; Mateo 12:36, 37) Kanian saray mamatatken so nakaukolan a seryoson estudyante na Salita na Dios tan nepeg dan iyaplika ed bilay. Sirin say Makasulatan a bangat da, a pinabiskeg na personal a panangiyaplika, so naapresyan tuloy na saray kapananisiaan. Salimbengan to met so kongregasyon ed makapuy iran impluensya, a pati say apostasya.
Paliisan Iray Patipatit
12. Anton simbawan nipalapag ya aminsan ed sayan palapagan so ontulong ed sakey a matatken diad ipaliis ed lingon-panangusar ed dila?
12 Bantayan so nimatalek ed sika bilang sakey a matatken, met, diad ipaliis ed saray patipatit. Sakey ed saraya et say mauges a panangusar ed dila bilang sakey a managbangat. Say pankaukolan na panalwar ed sayan pamaakaran so abayaglan indanet na muyongan nen Jehova. Alimbawa, diad Mayo 15, 1897 a paway to, sayan palapagan so analaysay ed Santiago 3:1-13 tan inkuanton nagkalautla ed saray mamatatken: “No sikara so walaan na makilas a dila a nayarin paralanan ed baleg a bendisyon, a sagyaten so baleg a bilang diad Katawan, say katuaan tan say dalan na inkatunong, odino diad biek a dapag, no alaokan na lingo, say dila so makapanggawa na ngalngalin agnibagan desyang—kasugatan ed pananisia, diad saray moral, maabig iran gawa. Peteg a tua, a siopaman a mangagamil ed langkap na panagbangat so mangipapasen ed inkasikato a lukas diad babaleg a responsabilidad ed imaton na Dios tan totoo. . . . Siopaman a magmaliw a sakey a subol a manlapud’tan et ompaway so madibinon Salita, a mangawit na bendisyon tan pakainawaan tan biskeg, so nepeg a mangimano a saray ampait a danum, palson doktrina a pansengegan na ayew, kasakitan—kamudmora na Dios tan panamikewet ed Salita to—so nepeg ya agnaromog ed sikara a paralanan na salita. Diad panamili na saray pangulo diad miting et say kualipikasyon ed ‘dila,’ a singa niletneg dia so agnepeg ya ibaliwala. Say maapuy ya impandila so nepeg ya agpilien, noagta say mauyamo, say mapalna, a ‘mameget’ ed saray dila ra tan panggunaetan dan siaalwar so ‘mansalita a bilang orakulo na Dios’ lambengat.” Agaylan importante a say sakey a matatken so mangusar ed dila to a manepeg!
13. Saray mamatatken so nepeg a mangagamil na anton alwar nipaakar ed panligliwaan?
13 Say alablabas a panligliwaan so sakey met a patit a paliisan. Say panligliwaan so nepeg a manrepresko tan mamaalagey, aliwan mamunaw tan mangisuawi ed Kristiano. Nagkalalo ni, saray manangasikaso so nepeg a “kabkaabigan ed saray ugali.” (1 Timoteo 3:2) No say inkakabkaabigan so manguley ed gawaen mo nipaakar ed panligliwaan, saya so mamantay ed sika tan say pamilyam tan mangiter na maabig ya ehemplo ed kongregasyon. Mairap a sika so mangipapanengneng na maabig ya ehemplo no, naulitulit, sika so onla ed saray panligliwaan diad sampot-simba legan a saray kapananisiaan mo so magunaet a mibibiang ed lawak na ministeryo. Say maong a balita so nepeg a nipulong, tan saray mamatatken so nepeg a mangipangulo ed sayan kimey a bilang magunaet a manangiyabawag na Panarian.—Marcos 13:10; Tito 2:14.
14. (a) Antoran Makasulatan ya ehemplo so mangipabitar ed pankaukolan na saray mamatatken a manbantay a sumpad seksual ya imoralidad? (b) Saray mamatatken so nepeg ya agmangipulisay ed anton naulit a simbawa diad pananulong ed espiritual a tulong ed agagin bibii?
14 Say seksual ya imoralidad so sananey a patit a paliisan. Say inkabulok na mundo ed moral so nayarin mangimpluensya ed anggan diad sakey a matatken no agto labanan iray tukson uusaren nen Satanas diad getma ton pamuyak ed katooran na saray totoo na Dios. (Ipareng so Mateo 4:1-11; 6:9, 13.) Nonoten a si propeta Balaam, agtinmalona diad saray getma ton pangayew ed saray Israelitas, so angikatunongan a si Jehova a mismo so mangayew ed sikara no sikara so nasagyat a mibiang ed panangidayew ed sekso. Kanian imbangat nen Balaam si Moabitan arin Balak “a mangipasen na pakagapolan ed arap na saray anak na Israel, pian mangan ed saray bengatlan imbagat ed saray talintao tan manggawa na pilalawanan. Kasin saman a patit so pinaliisan da? Andi, lapud 24,000 Israelitas so inatey diad bakbak a nanlapud si Jehova lapud sikara so awalaan na imoral a relasyon ed saray Moabitan bibii tan dinmakmomo ra ed dirios da. (Apocalipsis 2:14; Numeros 25:1-9) Nonoten, met, ya anggan si David, ‘sakey a lakin inabobonan na puso na Dios,’ so niparugso ed patit na seksual ya imoralidad. (1 Samuel 13:14; 2 Samuel 11:2-4) Bilang sakey a matatken, sirin, et imanoen so naulit a simbawa na “matoor a mayurdomo” ya agbalot tulongan so sakey ya agin bii ed espiritual a pribada noagta mangitagar na sakey a matatken a presente sano gagawaen iyan responsabilidad.—Lucas 12:42.
15. Panon so nayarin panulong na pamilya na sakey a matatken ed sikato ya ompaliis ed patit na materyalismo?
15 Say materyalismo so sananey a patit a paliisan na sakey a matatken. Magmaliw a kontento ed saray nakakaukolan, a kabat ton si Jehova so mangitarya na magenap. (Mateo 6:25-33; Hebreos 13:5) Ipasal mo so pamilyam a magmaliw a maigot, lapud say inkamadarak so sakey a matakew na panaon tan kayarian a nayarin nausar a panulong ed pamilya, tan ontan met diad pibiang ed lawak na ministeryo, mamabiskeg ed kongregasyon, tan mangiyalibansa ed saray intereses na Panarian. Say sakey a matatken so nagunggunaan diad kooperasyon na pamilya to ed sayan pamaakaran tan misalsalamat a sikato so agda seseldeten ed saray bengatlan aliwan peteg a nakaukolan. Diad tua, “magmaong so melag diad takot ed si Jehova nen say daakan ya abasto tan gutgutan so kaiba to.”—Uliran 15:16.
“Imanoen Yo So Inkasikayo”
16. Anton simbawa so inter nen Pablo ed saray manangasikaso ed Efeso?
16 Pian nabantayan na saray mamatatken so nimatalek ed sikara, nepeg dan iyaplika so simbawa nen Pablo ed saray manangasikaso ed Efeso. Imbaga to ed sikara: “Imanoen yo so inkasikayo tan ed amin a pulok, ya anuroan na masanton espiritu ed sikayo a manangasikaso, pian pastolan so kongregasyon na Dios, a sinaliw to ed dala na dilin Anak to. Amtak a kayari na itaynan ko et saray masesebeg a lubo so onloob ed limog yo tan agda piarapan so pulok ed inkamatamoy, tan manlapud limog yo a mismo et ontalindeg so lalaki tan mansalita ed saray pikewet a bengatla pian patumboken daray babangatan ed inkasikara. Kanian mansiansian aliing, tan nonoten a diad taloran taon, labi tan agew, agak tinmundan nansimbawa ed balang sakey a tekep na saray lua.”—Gawa 20:28-31.
17, 18. Anton simbawa so nipalapag ed sayan magasin ed apalabas lan ngalngalin 80 taon so siansia nin onaplika ed saray Kristianon mamatatken?
17 Masulok a 80 taon lan apalabas, say The Watch Tower (Marso 1, 1909) so angaon ed akaunan simbawa nen Pablo ed saray kapara ton mamatatken tan nankomento: “Saray Mamatatken ed amin a pasen so nakaukolan a mangiter na nikabkabiig ya imano; lapud diad kada subok et say apalaboan a tuloy tan sankaprominentian so walaan na sankabiskegan a gonigon tan subsubok. Sirin imbilin [nen Santiago], ‘Aliwa komon a dakel ed sikayo so managbangat, agagi, a kabat yon say sakey a too so mangawat na lalon ambelat a subok.’ Sikami, met, so mamilin ed amin a Mamatatken a dia ed puso et dalisay, andi-siblet, ya andian ira na antokaman noagta say aro tan maabig a pilalek ed amin a katooan, tan sikara so nagmaliw a lalonlalo a napno na saray bunga tan grasya na masanton Espiritu, a mangiimano met ed pulok. Nonoten, a say pulok so kayarian na Katawan tan sikayo so walaan na responsabilidad ed Katawan, tan ontan met ed sikara. Nonoten, a sikayo so manbantay ed saray kamarerwa (intereses) ra a singa saraman so nepeg a mangiter na pipalinewan ed Baleg a Manunan Pastol. Nonoten, a say manunan bengatla et say Aro, ed amin; tan, legan ya agpaulianan iray doktrina, mangiter na nikaduman imano diad ibabaleg na Espiritu na Katawan ed limog na saray nanduruman membro na Laman to, pian sikara komon so magmaliw a ‘mangabet diad tawir na saray sasantos ed liwawa,’ tan, unong ed Madibinon linawa, agnagapol diad sayan mauges ya agew, noagta, diad impakagawa ed amin, ontalindeg a nagnap ed Kristo, say Laman to, saray Membro to, saray Kaiban-Managsakripisyo to, saray Kaiban-Mananawir to.”
18 Saratan a salita so nipaarap ed saray alanaan-na-espiritun mamatatken tan kapananisiaan a nidasig ed pakatalos tan sirkumstansya na organisasyon nen Jehova ed saraman ya akadkaunan agew. Ingen, agaylan maabig so kiyaplika na satan a simbawa! Balanglan say ilalo ra so mangatatawen odino mangaraldalin, saray Kristianon mamatatken so nepeg a mangimano ed inkasikara, a bantayan da so nimatalek ed sikara, tan maaron asikasoen daray intereses na pulok na Dios.
Gayaga So Mansumpal diad Pambantay ed Nimatalek ed Sika
19, 20. Akin a nibagan say gayaga so mansumpal sano saray mamatatken so manbantay ed nimatalek ed sikara?
19 Liket—diad tua, impapuson gayaga—so mansumpal diad pambantay ed nimatalek ed sika a bilang sakey a Kristianon matatken. Wala so liket diad pananumpal a maong ed seryoson responsabilidad. Sirin manalwar, sipipikasi, magunaet. Bantayan mo so nimatalek ed sika bilang sakey a matatken tan onnengneng ed panaon sano nibagam, a singa ginawa na saman so lakin walaan na tintiroan na sekretaryo: “Ginawak so singa ingganggan mo ed siak.”—Ezequiel 9:3, 4, 11.
20 On, mankimey a sitotoor bilang sakey a matatken ta pian nibaga ed sika a singa ed si Noe: “Ontan so ginawa to.” (Genesis 6:22) Manlapud ontan a magunaet a serbisyo, say kongregasyon so nagunggunaan ed dakel a dalan. Manuna ed amin, si Jehova so napagalangan diad mabiskeg, aktibon kongregasyon a lilingkoran na saray matoor a mamatatken a mamabantay ed nimatalek ed sikara. Balet nagkalalo ni so nakaukolan no, diad epekto, nibaga ed sika: “Maabig ya agawaan, maong ya aripen!” (Lucas 19:17) Bilang sakey a matatken, nepeg mon tratoen met so pulok na Dios a tekep na inkatamoy.
Anto So Ibagam?
◻ Anton kaaruman a talek so wala ed saray Kristianon mamatatken?
◻ Say sakey a matatken so makapangala na antoran positibon kundang diad pambantay ed nimatalek ed sikato?
◻ Pian nabantayan so nimatalek ed sikato, antoran patit so nepeg a paliisan na sakey a matatken?
◻ Akin a say gayaga so mansumpal sano bantayan na saray mamatatken so nimatalek ed sikara?
[Litrato ed pahina 8]
Saray Kristianon mamatatken so nepeg a singa “sakey a pasen na siruman a manlapud bagyo”
[Litrato ed pahina 10]
Bilang sakey a matatken, maparanay a mibiang ed lawak na ministeryo a kaiba iray membro na pamilyam tan saray arum
[Litrato ed pahina 11]
No bantayan mo so nimatalek ed sika bilang sakey a matatken, say kongregasyon so nagunggunaan ed dakel iran dalan