Say Katuaan Nipaakar ed Impierno

MAPATNAG, say mabitar a doktrina ed benegan na sisiaen ed kadusa kayari na patey so sisiaen a say peteg a too so ag-ompatey a peteg sano say silalaman a kabalgan to so ompatey noagta satan a bengatla​—a mabetbet a tinawag na sakey a kamarerwa​—so makaliktar ed ipatey na laman. Sayan sisiaen, a singa anengneng tayo ed akaunan artikulo, so ginmapo ed saray inmunan Sumeriano tan Babiloniano ed Mesopotamia. Saginonor, satan so inadapta na saray Griego, a saray pilosopo ra, a singa si Plato, so amino ed teorya. Say agugolan a nankaduan sisiaen ed “laman tan kamarerwa” so nagmaliw a kabiangan na apostatan Judion pananisia.

Kapigan so impangadapta na saray mangibabagan Kristianos ed pananisia diad ontan a kayari-na-bilay? Seguradon aliwan diad kaleganan na panaon nen Jesus tan saray apostoles to. Ibabaga na Pranses ya Encyclopædia Universalis: “Say [apocryphal] Apocalypse of Peter (koma-2 siglo K.P.) so inmunan Kristianon sulat a manedeskribe ed dusa tan kapairap na saray managkasalanan ed impierno.”

Diad tua, ompatnag diad limog na saray inmunan ama na iglesia, wala so baleg ya ag-impampapakna ed impierno. Si Justin Martyr, Clemente na Alexandria, Tertullian, tan si Cyprian so mananisia ed impiernon apuy. Si Origen so analin mangiter ed impierno na remedyon kapuliwes, a kuanton say makasalanan ed impierno so diad saginonor et niliktar. Sikato so tinumbok ed babaleg odino memelag a sukat nen Gregory na Nazianzus tan Gregory na Nyssa. Balet si Augustine so amultot ed ontan ya anlemek a panmoria ed impierno. Diad libro ton Early Christian Doctrines, insulat nen propesor J. N. D. Kelly na Oxford: “Diad komaliman siglo et say mapekder a doktrinan saray makasalanan so andian na komaduan tsansa kayari na sayan bilay tan say apuy a mangakmon ed sikara ya aglan balot naerep so wala ed amin a pasen.”

No nipaakar ed purgatoryo, say libron Orpheus​—A General History of Religions so mangibabaga: “Intandoro nen Sto. Agustino a wala so saletan a kipapasen na probasyon ed baetan na arapen a kareenan tan kadusa, salanti say kalinisan na saray kamarerwa ed apuy. Saya so Orpiko [paganon Griego] tan Virgilianon [paganon Romano] doktrina na Purgatoryo: anggapo so salita nipaakar ed satan diad saray Ebanghelyo. . . . Say doktrina na Purgatoryo . . . so inimbento nen komanem a siglo, tan inyabawag a sakey a bangat na Iglesia diad Konsilyo ed Florence (1439).” Inako na New Catholic Encyclopedia: “Say Katolikon doktrina ed purgatoryo so nibase ed tradisyon, aliwan diad Sagradon Kasulatan.” No nipaakar ed Limbo, inako nen Kardinal Ratzinger na Roma a satan “lambengat so sakey a teologon teorya.”

Anggapo So Kadudusa ed Kayari na Ipatey

Anto, anggaman kuan, so nipaakar ed Biblia? Kasin ibabaga to a say kamarerwa so makaliktar ed laman diad patey tan sirin nadusa ed mandarlang ya impierno odino purgatoryo? Ibabaga na New Catholic Encyclopedia: “Say kaisipan a say kamarerwa so makaliktar kayari ipatey so aliwan magmainomay a natebek ed Biblia. . . . Say kamarerwa ed D[aan] a S[ipan] et kabaliksan to so aliwan sakey a kabiangan na sakey a too, noagta sakey ya interon too​—too a bilang sakey a mabilay. Miulibay, diad B[alon] S[ipan] et ituturo to so atooan a bilay: say bilay na sakey.”

Sirin say mamabitar ya akaunan ideya ed kadudusa kayari na ipatey so akusbo. Ibabaga na Biblia: “Say kamarerwan mankasalanan so ompatey.” (Ezequiel 18:4, Revised Standard Version, Edisyon Katoliko) Ibabaga to met: “Saray bayar na kasalanan et say patey.” (Roma 6:23, RSV) Sirin, sano sasalitaen na Biblia so agmanagbabawin marelmeng a totoo a mansumpal ed “Gehenna,” “andi-anggaan ya apuy,” odino “say dayat na apuy,” uusaren to lambengat so simbolikon lenguahe a manasaglawi ed sagmaken dan permanentin patey, “say komaduan ipapatey.”​—Mateo 23:33; 25:41, 46; Apocalipsis 20:14; 21:8;a ipareng so 2 Tesalonica 1:7-9.

Naandian So Impierno diad Panamegley na Kioli

Kasin say impierno so ampetang, sirin? Andi unong ed Biblia. Peteg, saray Hebreo tan Griegon salitan nipatalos ed arum a Biblia a bilang “impierno” so mangituturo lambengat na karaklan a lubok na inaatey a totoo. Aliwan ampetang a pasen na pairapan. Sikato so, imbes, sakey a pasen na painawaan, a manlapud’tan et ompaway iray inaatey diad kioli. (Eclesiastes 9:10; Gawa 24:15) Si Oscar Cullman, propesor ed Theological Faculty of the University of Basel, Switzerland, tan ed Sorbonne, diad Paris, et sasalitaen to so “radikal a pandumaan ed baetan na Kristianon pananisia ed kioli na saray inaatey tan say Griegon sisisiaen ed imortalidad na kamarerwa.” Dugaruga, inkuanto a “say katuaan a say saginonor ya Inkakristiano so nanggawa na siglaotan ed baetan na duaran sisisiaen . . . so diad tua et aliwan sakey a siglaotan a balot noagta panangidepak ed sakey [say doktrina na Biblia] diad pabor na sananey [say paganon pananisia ed imortalidad na atooan a kamarerwa].”​—Kien mi so italiko.

Saray Tasi nen Jehova so ag-angitapat ed pananisia ra diad kioli pian lablabayen so ideya na imortalidad na kamarerwa. Sikara so maliket a mangipanabang ed sikayo ed maliket ya ilalo ra tan paneknekan ed sikayo manlapud Biblia a, katuaan, say impierno so aliwan ampetang.

[Paimano ed leksab]